Adeade hakim isó i re mépin balo isó
18
Rewóré ta néi, Yesusé néfétén adeade isó po ni motemote nesté ni, bo rméiténé rdé Jou Lahatala né, ma rtébné na. 2 Pocé bóngo nécegé si faje, “Po kota isó, reni hakim isó njé némtat Jou Lahatala pa, bóngo nhoromaté kyat pa nóté. 3 Pocé ma reni mépin balo isó njé nfayléo i, se néceg faje, ‘Légaé hakimé, mgali ya su pa! Bo mfaméteglo keé nik perkara né po nik réwé njé ni.’4 Nuénfis néli né hakimé nje wlo pa bo n-gali i, pocé dolo nanuta, ‘Ya nte masike kémtat Jou Lahatala pa, re khoromat isó pa, 5 mayta pégelé balo njé nwómé se nfarwae keé ya le, se ta fié né kfaméteglo keé ni perkara né bo ma nwómé nfakangelang ya le na.’ ”
6 Pocé tabóngo Jou Yesusé nécegé nóté, “Ftarukira fafié ta hakimé njé nécegé né! I ta nmétegél pa ma, bisa n-gali pégelé balo njé. 7 Néga bo Jou Lahatala! I nase tadélé n-gali ni kyaté-kyat ta I re npili si né, ta dorém re ngénngané réror be néya po I ni né. Nase nfatolén si pa. 8 Ya kécego mewé: mnuw pa nase Jou n-gali si né. Mayta, waktu Kyaté ntu ta bo nwómé nmulé yama soroga né, nase nduké lesu pari tisé, kyat ta rdélé I po dunia wlólo nte né?”
Mare tpe rir diri dolo rerir ngale gélesó pa né
9 Reni kyat séfis néli ta rpe riri diri cogo si ro ta rmétegél po Jou Lahatala usno lo, kyat iglé né ga tisé. Pocé tabóngo Yesusé néfétno si adeade isó. 10 “Reni kyat séluwé, rfan po Um Sambayang ta npélóyé njé ni bo rméiténé rdé Jou Lahatala. Isó kyat ta rdéréré dodoto Farisi né, isó njé ga kyat ta rarénfalutno pajaké nesté. 11 Pocé kyat Farisi njé nosélé né nkumél i, bóngo nméiténé né néceg faje, ‘O Jou Lahatala, ya kéceg tarimakase po Aw ni, sababta ya nte tadolo kyat iglé né pa. Ya nte kmalewés pa, kmalól pa, kmayósól pa, re tadolo kyat ta rarénfalutno pajaké nesté pa. 12 Minggu nuéncó, ya kpuasa nuén luwé, bóngo iga kpe yabé se kduk pipisé, kasólé cuci se kpo nik perpuluhané.’
13 Pocé ga kyat ta rarénfalutno pajaké njé nosélé né lówé, bóngo nméiténé né némtaté se néngóto néya po langété lo pa. Bóngo maduga nfasésaé be katno njé le sababta i nuné i renó sélsól ta félé. Bóngo néceg faje, ‘O Jou Lahatala, mmésié ya, sababta ya nte kyat ta renak sélsól félé.’
14 Se nte, Ya bo kécego mewé: kyat ta nanénfalutno pajaké njé, néléy po ni umé lo né ndadi kyat ta nmétegél po Jou Lahatala usno lo, mayta kyat Farisi njé ga tisé. Sababta kyat pai ta rfamógé wlori né, Jou Lahatala nase ntebo keé si. Mayta kyat pai ta npe ni diri tadolo reni ngale gélesó pa, nejé nase nalóngé i bo ndadi kyat ta pélóy i.”
Yesusé nbarakat yomya-yomya
(Luk. 18:15-17; Mat. 19:13-15; Mrk. 10:13-16)
15 Nuéncó, reni kyaté-kyat ta rwómé ruté nturi ta myaku lesu né po Yesus ni bo nbarakat si. Pocé ni motemote nesté rémnawé tabóngo rcawané keé si. 16 Mayta Yesusé nkakém yomya-yomya né, bóngo nécegé ni motemote nesté faje, “Ma fsawan si na, ffamól si bo rwóm lima. Sababta kyat ta dolo si né, ta rpe riri diri dolo re riri ngale gélesó pa né, ta bo rdadi Jou Lahatala ni kyat si. 17 Ffatélolmo mew fafié ta Ya kécego mewé nte: pai ta wlo pa bo nfamya wlo dolo yomya nje, Jou Lahatala nase nkawasa dolo Kolano po ni hidupé wlólo pa.”
Kyat ta reriri reróri félé né dolo météwé bo rdadi Jou ni kyat si
(Luk. 18:18-27; Mat. 19:16-26; Mrk. 10:17-27)
18 Reni kyat tut agama Yahudi isó nutné Yesusé, “Guru ta mfié, ya mare kpe fanfawa bo khidup re Jou Lahatala sogado fajé néli né?”
19 Tabóngo Yesusé ncónglo, “Pe sói se mécegé Ya kfié? Reni isó pa ta nfié, maduga Jou Lahatala le ta nfié. 20 Awé re muné ro I ni parenta né: ma tyó sól na, ma tpuné kyaté bo tfamóté keé si na, ma tfalewés na, ma tdadi saksi ta tlól na, re awé mare mhoromaté nim moke i re nim neke nóté.”
21 Tabóngo kyaté njé néceg faje, “Farimé né re kpe ndimé ta móné mya ya lesu.”
22 Pocé Yesusé nlongé ta néceg fajé né, tabóngo nécegé i faje, “Mayta reni ésó lesu, ta mpe pafule né. Awé mare mwagé férimé nam haréta né, bo ni pipisé né mfanténo keé kyaté-kyat ta reriri reróri pa né. Iga mpe fajé, awé nase mduk haréta po soroga wlólo. Rewóré ta néi, ga aw lima bo mdéréré Ya.” 23 Pocé nlongé ta Yesusé nécegé né, wlo njé tadélé nkangelang, sababta nó haréta né tadélé félé.
24 Pocé Yesusé néngóto i se nuné ta wlo njé kangelangé né, tabóngo nécegé i faje, “Iga kyat ta reriri reróri félé, nase rkangelangé rpo riri diri bo Jou Lahatala nkawasa dolo Kolano po riri hidupé wlólo né. 25 Ya kfatailo si né tadolo unta ta pélóy isó. Bo ncungé ndé po smo ni mdóké lo né, tadélé rkangelangé. Mayta ta lébé rkangelangé né, kyat ta reriri reróri félé né, bo rpo wlori néli po Jou Lahatala ni bo nkawasa keé si.”
26 Pocé kyaté né rlongé ta Yesusé néceg fajé né, tabóngo rutné I, “Pana fajé, reni pari tisé ta bo rduk salamaté né?”
27 Tabóngo I ncónglo, “Sói ta kyaté bisa tpe pa, Jou Lahatala bisa npe ndimé. Sababta maduga I le ta bisa nfasalamaté kyaté né.”
28 Pocé tabóngo Petrusé néceg faje, “Moke, amé nte mam sói néli né re kfatoléné keé ndimé, se kdéréré Awé.”
29 Tabóngo Yesusé ncónglo, “Fatélolmo mew fafié, ta Ya kécego mewé nte. Kyat pai le, ta npo wlo po Jou Lahatala ni bo nkawasa dolo Kolano po ni hidupé wlólo, bo nfafané nik yabé sogado nfatoléné keé ni umé, ni pégelé pari ni rémó, re ni daluté né, 30 nejé nase nhidup re Jou Lahatala sogado fajé néli le.”
Yesusé nfébingé ta I bo nmóté né re nuén telé
(Mat. 20:17-19; Mrk. 10:32-34)
31 Yesusé nfajólo ni motemote yófésó re séluwé nesté, se nécegé si faje, “Flongé é! Nte ité bo tfan néya po kota Yerusalemé. Férimé ta nabi-nabi né re rlefo tatubé lima ta bo ndadi i po Kyaté ntu ta nwóm yama soroga njé, pocé nase bo ndadi i ro. 32 Sababta kyaté né nase bo rpo keé I néli po kyat ta agama Yahudi si pa né. Si ta néi ta nase bo rfamia-mia, rfalélé, bóngo ritfo keé I. 33 Si nase réswako nó wólé ta wómo mdalémé né rewóré, ga rpuné I sogado rfamóté keé I. Mayta ngané telé le, I nase npangéné nmulé.”
34 Masike Yesusé néceg fajé, mayta ni motemote nesté rcae pa, sababta ta I néceg péséwé né ni ngalé né népino si lesu, se runé pa ni maksut sói.
Yesusé nfafié kyat isó nébyafé
(Mat. 20:29-34; Mrk. 10:46-52)
35 Po waktu ta Yesusé rebo nwóm po kota Yerikho né, pocé reni kyat isó nébyafé se nanéntolén i be po yéfén lapo bo néroro kyaté-kyaté né pipisé. 36 Pocé nlongé kyat félé ta rwetco né tabóngo nutné, “Reni sói né?”
37 Pocé reni ta rfébingo i, “Yesus, kyat Nazareté njé nwetcó.”
38 Pocé tabóngo n-gélayé, “Yesus, kolano Daudé ni ntu re gbu Awé, mésié ya nte!”
39 Pocé kyat ta rfadéréré re Yesusé se re rtubé né rcawan i, bóngo rané i bo nfaténténgén i. Mayta tadélé nbóng ta nfakwat i, “Moke, kolano Daudé ni ntu re gbu Awé, mésié ya nte!”
40 Tabóngo Yesusé noslé lesu, se nané kyat ta pocé né rut ta nébyafé njé po I ni. Pocé re nwómo I, tabóngo nutné i, 41 “Awé nte, bo mané Ya kpe aw fanfawa?”
Tabóngo kyat ta nébyafé njé ncónglo, “Moke, ya kéroré bo bisa kémnawé!”
42 Pocé ga nécegé i faje, “Mfié awé ro! Re bisa mémnawé, sababta re mdélé Ya.”
43 Po waktu ta néi óro, kyat ta nébyafé njé re bisa némnawé, bóngo ndéréré Yesus re ntail Jou Lahatala. Se férimé kyat félé ta rémnawé né, si ma rtail re rfapalóy Jou Lahatala ngósno nóté.