Yesusé nfasodoto bo tampongé rir dél ta rcól po it ni né
(Mat. 18:6-7, 21-22; Mrk. 9:42)
17
Yesusé nécegé ni motemote nesté faje, “Nase reni kyat ta bo nuté keé kyat iglé ta rdélé Ya né bo rpe sélsól sogado rdélé Ya pana, mayta si ma nase tadélé nkangelangé. 2 Se ta fié né rpitné lóy ta pélóyé né fapusó po koko lo ga rfadiré keé i po wolété bo nmót i, daripada bo nuté keé kyat faisó bo ndélé Jou pana. 3 Se mewé mare fpe mew fafié!Iga nimi dél faisó ta re fdélé Ya, ga ncól po mew ni, fécego i fafié le. Bóngo iga re nmangaku nó sélsólé né, fampong i. 4 Pocé masike nganesó wlólo né npe sélsól po mew ni sogado nuén fité, mayta iga nfailéo mewé bo nmangaku nó sélsólé né, fampongé keé i.”
Yesusé nfasodoto kyaté né bo rdélé
5 Tabóngo Yesusé ni motemote ta réceg rasul si né récegé I faje, “Guru, mfakwaté wlomamé nte bo tadélé kdélé Jou.”
6 Tabóngo I nécegé si faje, “Iga fdélé be Jou, pocée masike ménimi ngongano né myaku dolo géy pusó ta nalusé, mayta bo fané ay ponlóy ta nosélé njé faje, ‘Mlué aw nélaw wólété bo mosél pocé óro!’ Nase nlué i, sababta ndélé nimi parenta né.”
Ité mare tpe ta Jou nané ité né
7 Yesusé nécegé nóté, ité tyó be adeade isó njé le, “Tuang isó reni kyat ta npacol bétbét pari néjaga ni domba. Iga re néléy po ni umé lo, bukan ta bo ni tuangé njé nkakém i némnóm pari tisé? 8 Tisé. Mayta pocé nase ni tuangé njé nécegé i faje, ‘Mpe naké mnóm su, rewóré ta néi, mangalén awé bo mleleyan ya sogado kémnóm re kinémé rewóré ndimé, ga awé bisa mamnóm re minémé nóté.’ 9 Pocé ni tuangé njé masike néceg tarimakase po i ni pa, sababta necé i ni yabé óro ta mare i bo npe né. 10 Fajé nóté re mewé. Iga férimé ta Jou Lahatala nané mewé né ga re fpe ndimé, mare féceg faje, ‘Amé nte kyat ta maduga kpe be yabé sói le ta mare amé bo kpe né, se pantas pa bo mtail amé.’ ”
Yesusé nfafié kyat yófésó ta rpado nesté
11 Po waktu ta Yesusé nfan po kota Yerusalemé né, ndé I po bótén Samaria re Galilea ni fapéluné. 12 Se ncung po pnuw isó ni né, reni kyat ta rpado yófésó rwómé bo rfapdipéné rdé I. Se rosélé né dolo ralówé I cuci. 13 Bóngo rgélayé se réceg I faje, “Guru, mésié amé nte!”
14 Pocé Yesusé némnaw si, tabóngo nécegé si faje, “Ffan po imam-imamé né bo ffaftulo mew néli po si ni.” Tabóngo rfané, tagare rwóm po yéfén fapéluno lesu, re rfié si.
15 Pocé ta isó i njé némnaw ta re nfié né, tabóngo npóléné nmulé se ntail Jou Lahatala né, tadélé nfakwat i. 16 Tabóngo néli ga ncuba po Yesus sóo lo, re néceg tarimakase ta félé. I ta njéi, kyat Samaria i.
17 Tabóngo Yesusé nécegé i faje, “Péséw ta Ya kfafié mewé né mew dórén yófésó. Se sapopété nesté si pua? 18 Pe sói se rpólén si lima bo rtail Jou Lahatala pa, se maduga isó ta njei le ta npólén i nmulé? Ga tagare, kyat ta njé i ma ité rir kyat i pa, maduga kyat wamwómi le, agama Yahudi i pa nóté!” 19 Tabóngo Yesusé nécegé kyat Samaria ta re nfié njé faje, “Mosélé, bo mfan aw óro, re mfié sababta mdélé Ya.”
Kyaté-kyat ta rdélé Yesusé né mare rfasadia si bo réftón ta I bo nwómé nmulé né
20 Nuéncó, reni kyat Yahudi ta rdéréré dodoto Farisi né si dórén fis néli, rutné Yesusé, “Ngané fisé ga Jou Lahatala bo nkawasa dolo Kolano po ni kyaté-kyat ta rdélé I né?”
Tabóngo I nécegé si faje, “Iga Jou Lahatala bo nkawasa dolo Kolano po I ni kyaté-kyaté né, nase reni faféyal gélesó pafule. 21 Se ndél pa bo reni kyat ta réceg faje, ‘Coba fémnawé, Jou nkawasa dolo Kolano po ni kyaté né pote’, pari, ‘I ntéli, nkawasa ni kyaté né pocé,’ sababta nte Jou Lahatala re nkawasa dolo Kolano po nimi fapéluné.”
22 Rewóré ta néi, Yesusé nécegé ni motemote nesté faje, “Iga wlomi ncuka bo fémnaw Kyaté ntu ta nwóm yama soroga wlólo né, nase reni waktu nóté, mayta masike ngané esó le ma nase bisa fémnaw I pafule. 23 Bóngo nase reni kyat ta récegé mew faje, ‘Coba fémnawé, I ntéli,’ pari, ‘I pote!’ Mayta ndél pa bo fdéréré si néli. 24 Sababta iga Kyaté ntu ta bo nwóm yama soroga nmulé né, férimé kyat ta po dunia wlólo nte nase bisa rémnawé, necé nase ta dolo lamlém ta nmanano po wóm sogado ntit ta wómé. 25 Mayta I mare nduk kangelang félé su, re kyaté-kyat ta isémé nte nase rtarima I pa, pocé ga taga re nwómé nmulé.
26 Bóngo iga bo nwómé nmulé, kyaté-kyaté riri hidupé né nase ta dolo tatubé lima se nabi Nuh né. 27 Po waktu ta néi, si runé pa ta bo kipésé né, se riri hidupé né fanfajé si le, maduga rémnóm re rinémé róri, bóngo rafsówé róri le. Se riri hidupé né maduga fanfajé si le sogado ta nabi Nuh ncapél i po kapal ta npalóyé njé ni wlólo né. Pocé ga kipésé tabóngo nfamóté keé si ndimé.
28 Fajé nóté re ta kyaté-kyat rhidup po waktu tatubé lima se Loté né: si rémnóm re rinémé ma ta dolo necé le, rfalgon re rfalwagé, rpe bét re rpe umé, férimé ta dolo nécé le. 29 Mayta ta Loté re ncópen i tóma kota Sodomé njé ni wlólo né, lutén re belerangé rtebé yama langété né ta dolo félé se nfamóté keé si ndimé.
30 Se fpe mew fafié, sababta iga Kyaté Ntu ta bo kwom yama soroga wlólo tadolo faje né, nase kyaté né rfaléléy si pa. 31 Re po ngénngan ta néi, iga kyat ta re i po um papo lo né, ndél pa bo ntebé nyó riri gina ta po umé wlólo né na. Fajé nóté re ta re si po bété lo né, ndél pa bo rpólén si nmulé po riri umé lo, mayta famlale bo rówés si ro! 32 Fatélolmo mew fafié, sói ta tatubé lima re ndadi i po Loté ni pégelé ni né. Sababta i nmóté né, nlolém be haréta ta po dunia wlólo nte, se ta Sodomé né nówés pa!
33 Kyat pai ta nhidup be maduga i ni diri le, nejé, nmóté né nase nduk ta fié pa sogado fajé néli le. Mayta kyat pai le ta wlo njé i be po Jou Lahatala ni, nejé nase nduk ta fié sogado fajé néli le. 34 Ya kécego mewé: po waktu ta Kyaté ntu njé bo nwóm yama soroga nmulé né, po dorém ta néi iga reni kyat séluwé ryénéf po róngét papo lo, pocé isó njé Jou Lahatala nase bo nyó i, ta isó njé ga nfétoléné keé i. 35 Re po waktu ta néi óro, iga reni mépin séluwé rtok gandumé, ta isó njé nase nyó i, isó njé ga nase nfétoléné keé i. [ 36 Iga po waktu ta néi reni kyat séluwé rpe yabé po bété lo, ta isó njé nase bo nyó i, isó njé ga nfatoléné keé i.”]
37 Yesusé ni motemote nesté rlongé ta néceg fajé né, tabóngo rutné, “Guru, po sói lo ta nase bo ndadi fanfajé né?”
Tabóngo I ncónglo, “Adeade reni haiwan ta rmót po géwgów faisó ni, férimé kyaté nase runé, sababta mané ta rénopé né rfajólé bo ró ni bangkayé njé pocé.”