Adeade kyat ta nisén pipisé njé nmétegél pa
16
Rewóré ta néi, Yesusé néfétén adeade isó nóté po ni motemote nesté ni, ta dolo faje, “Reni kyat isó njé, nkayangé. Pocé reni kyat isó ta nfaménawé nó haréta né. Tabóngo nuéncó, reni kyat ta rfébingo i cogo ni kyat yabé ta nfaménawé nó haréta njé, nfalubiru keé ni pipisé né ndimé. 2 Tabóngo kyat ta nkayangé njé nkakémé ni kyat ta nfaménawé nó haréta njé, se nécegé i faje, ‘Ya klongé cogo mfalubiru keé nak haréta né ndimé. Se wóré mut lima poté buké njé bo kémnaw férimé hasil ta mpé yabé né, sababta bo kasólé keé awé ro bo ma mpe yabé po ya ni le na.’3 Tabóngo ni kyat yabé njé nanuta po wlo wlólo, ‘Alli, iga nik tuangé njé re nésólé keé ya, nase bo kpe yabé sói nóté? Bo kpe bété, kéfen pa, bo kéror sói néli po kyaté, kmóé ya. 4 Ta fié né kéyówé yéfén faisó bo, iga nik tuangé njé re nésólé keé ya, nase reni kyat ta ryó ya bo ktolno si.’
5 Tabóngo nfané ga nkakém férimé kyaté-kyat ta róri utén po ni tuangé njé ni né isó re isó, se po faiwóbno né, nutné ta isó njé ntubé, ‘Nam utén po nik tuangé njé ni né, palóo fawa?’
6 Tabóngo kyat ta renó uténé njé ncónglo, ‘Ya nak utén yégét zaitun lube witéncó.’
Tabóngo nécegé i faje, ‘Nim suraté nje, famlale mtolén pocé bo mlefo falube yófé limé le!’ 7 Rewóré ta néi, nécegé ta isó i njé nóté, ‘Nam utén po nik tuangé njé ni né, palóo fawa?’
Kyat ta re nó uténé njé ncónglo i nóté, ‘Gandum karong caléncó.’
Tabóngo nécego i nóté, ‘Nim suraté njé, mlefo óro, fakarong witén walé le.’
8 Pocé, kyat ta nkayangé njé nlongé ta ni kyat yabé ta nmétegél pa njé npe fajé né, ta bóngo ntail i, sababta ni kyat yabé njé npande se nuné fié, nyó wlo né po kyaté-kyaté bo rgali i né. Kyat ta rdéréré be ta dunia ni né, si runé fié bo rakalé keé kyaté né, mayta bo kyat ta rdélé Jou, runé pa rpe faje né. 9 Se nte Ya kécego mewé: nómi haréta ta po dunia wlólo né, fpake fgali kyaté-kyaté bo fduké nimi dél faljilé né félé. Bo sogado nómi haréta ta po dunia wlólo né ga re tiso ndimé, mewé ma nase fduk ta fié sogado fajé néli le.
10 Iga kyat faisó npe yabé né réngóto reni ngale gélesó pa, mayta bo npe né métegélé, pote se néli nase rané i npe yabé né ta lebe pélóyé nóté. Mayta bo kyat faisó npe yabé ta réngóto reni ngale gélesó pa, bóngo npe né nmétegél pa ndimé, poté se néli nase rdélé i pana bo npe yabé ta lebe pélóyé nóté né. 11 Se iga haréta ta po dunia wlólo ma funé farén pa, faje nóté re Jou ni dodoto ta bo ffawómo kyaté né ma nase rdélé mew pa. 12 Iga kyaté nó haréta ta rané mewé féjaga né ma féfen pa, nase isó pa ta bo npo mewé nó haréta né bo fyó nómi.
13 Adeade kyat faisó, ndel pa bo nganesó né npe yabé po tuang séluwé. Sababta iga npe fajé, nase ni lé keé ta isó i njé, se nmésié be ta isó i njé. Npe yabé né nténgno be ta isó i njé, ta isó nje ga wlo ncuka i pa. Faje nóté re mewé: iga fpe yabé né fénuta be pipisé le, fpe Jou ni yabé né ma nase métegél pa.”
Yesusé ncawan kyaté-kyat Farisi né
(Mat. 11:12-13, 5:31-32; Mrk. 10:11-12)
14 Po waktu ta néi, reni kyat Yahudi ta rdéréré dodoto Farisi né, si dórén fis néli rlongé férimé ta Yesusé nécegé né, mayta rémlifo keé I, sababta rbabloko be pipisé. 15 Pocé bóngo Yesusé nécegé si faje, “Iga po kyat félé usnori lo, fpe nimi diri né cogo re fmétegélé, momongo be tisé. Sababta Jou Lahatala ta nuné ndimé wlomi wlólo né. Se fatélolmo mew fafié é, sói ta kyaté wlori ncuka né, necé Jou Lahatala tadélé wlo ncuka pa.
16 Aturan-aturan ta po Musa ni kitab abén limé, re ta po nabi-nabi né riri kitabé wlólo né, ité re tdéréré sogado Yohanes ta nanénbabtisé kyaté njé nwómé. Rewóré ta néi, kyaté né réfétén néli re lima Habar ta Fié ta Jou Lahatala bo nkawasa dolo Kolano po ni kyaté-kyaté né. Se kyat félé tadélé wlori ncuka bo rdadi Jou Lahatala ni kyat si. 17 Masike langét re bétbété né mjakémé, mayta farimé ta Musa i re nabi-nabi ta nésé rlefo né, nase ndadi i ndimé.”
18 Yesusé nécegé nóté, “Pai ta ntélaké keé ni pégelé njé se néfsóo nó mépin nésé, necé re nyó sólé. Faje nóté, bo món faisó néfsóo nó mépin ta re rtélak i njé, i ma re nyó sólé nóté.”
Adeade kyat ta nkayangé njé i re Lazarusé
19 Yesusé néfétén adeade isó nóté, ni glio faje, “Reni kyat isó njé nkayangé, se nanénduo i be kabaya ta fié ta mulo pélóyé, bóngo ni hidup ngénngan néya ma, nfasanang i re nó haréta né. 20 Pocé ma reni kyat isó nóté ta reni renó pa, ngósno Lasarusé. Ni badané né yóbét bóto i. Ngénngan néya, maduga nyénéf i be po kyat ta nkayangé njé ni ngówéné gbono lo. 21 Nópé ga nbósémé ntélóté, se ni nafsu keé kyat ta nkayangé njé nó mnómé gléo ta mnap po nó meja pópo lo né. Mayta nduké nó gélesó pa, maduga yawé né rwóm néli ga rfaflépé keé ni yóbété né.
22 Tabóngo nuéncó, Lasarus ta reni renó pa njé nmóté, se Jou ni nénan ta si yama soroga wlólo né ryó i ga ruté keé i po Abraham lapo lo né. Pocé kyat ta nkayangé njé ma nmóté nóté, se rputé keé i. 23 Pocé po dunia féspalé po kyat ta rmóté né góori lo né, kyat ta nkayangé njé tadélé nkangelangé. Se lówi lesu re némnaw Lasarusé i po Abraham lapo lo né. 24 Tabóngo n-gélay néya, ‘Moke Abrahamé, mésié ya facuci pa? Mané Lasarusé npe lima bo nwalmé kakolo né po wóé lo, bo masike kfamélom be papléogé nje le. Sababta ya nte ta délé kangelangé po luténé wlólo nte!’
25 Mayta Abrahamé ncónglo i faje, ‘Yomya ta awé, mfatélolmo aw fafié. Tatubé lima ta mhidup po dunia wlólo lesu né, mduk be ta fié ndimé. Mayta Lasarusé né sen i, nduk be ta lé ndimé. Se pote né i tadélé ncanangé, awé ga mkangelangé. 26 Bóngo am re awé né, Jou re npe tariré isó tadélé npalóyé bóngo namlóméné ga namsóyé, se bo kyat ta si poté né bisa rpe néli pa, ta si ntéli né bisa rpe lima poté pa.’
27 Tabóngo kyat ta nkayangé njé nécegé nóté, ‘Moke, pana fajé ya kéror po aw ni, bo mané Lasarusé nfan néli po nik moke njé ni umé lo su. 28 Sababta ntéli, reni fténog sélimé lesu. Se ta fié né, nané si bo rngali si óro, ma sogado si ma rduk géwgów ta kangelang ta dolo ya nóté na.’
29 Mayta Abrahamé nécegé i faje, ‘Po si ni né, reni Musa i re nabi-nabi ta iglé né riri kitabé, se fajé si bo rdéréré be sói ta re rlefo pocé né.’
30 Tabóngo kyat ta nkayangé njé nécegé Abraham faje, ‘Moke Abrahamé, ta mécegé né nbung pafule. Mare kyat ta re nmóté né npangéné bo nfébingo si, ga rngali si.’
31 Tabóngo Abrahamé nécegé i faje, ‘Iga ta Musa i re nabi ta iglé né re rfébingo si ma rdéréré pa, nase rdéréré pa le masike kyat faisó nmóte npangéné bo nfabingo si ma.’ ”