Yesusé néfétén Jou ni méitén po métété lo
5
Yesusé néngóto kyat ta rdéréré I né re félé, tabóngo nawét I néya po métét isó ni. Se ntolén I nópé, pocé tabóngo ni motemote nesté ma rfan néli se rérakén I nóté. 2 Pocé tabóngo nfasodoto si. Se nécegé si faje,3 “Ta séngséngé bóto si né, maduga kyaté-kyat ta rpe riri diri dolo re riri ngale gélesó pa po Jou Lahatala usno lo né,
sababta si ta néi ta rdadi Jou Lahatala ni kyat si.
4 Goné mewé kyat ta masike wlori né kangelangéa,
sababta Jou Lahatala nase niwéné keé se séngséngé bóto si.
5 Goné be kyat ta ryó be pópé le né,
sababta kyat ta dolo fajé né Jou Lahatala nase npo si dunia nje.
6 Goné be kyat ta wlori métmóto bo rpe be ta nfamgo re Jou Lahatala wlo,
sababta kyat ta néi ta Jou Lahatala nase n-gali si se rpe né nfamgo re I wlo njé.
7 Goné be kyat ta rfaftulo riri masié né po kyat pai le,
sababta Jou Lahatala ma nase nfaftulo ni masié né po si ni nóté.
8 Goné be kyat ta wlori né be po Jou ni,
sababta kyat ta néi ta nase rémnaw Jou Lahatala.
9 Goné be kyat ta rfaifio kyat ta rfatut lé,
sababta Jou Lahatala nase nkakmé si ni ntu si.
10 Goné be kyat rpe be ta métegél po Jou Lahatala usno lo, nópé ga kyat nésé né rfakangelangé keé si,
sababta kyat ta dolo fajé né ta nase bo rdadi Jou ni kyat si bo nkawasa dolo Kolano po riri hidupé wlólo.
11 Goné mewé sababta ni mdio be fdéréré Ya le, nópé ga kyaté né rfakcegé mewé, rfakangelangé mewé, reni ta rpe nómi ta lé nóté. 12 Fséngé re wlomi né séngséngé bóto mewé ro, sababta po soroga nase fduk ta fié né tadélé pélóyé. Tatubé, Jou ni nabi né ma re rduk pénpuné ta ni mdio be rfawómo Jou ni faftóté po kyaté-kyaté.”
Mare nimi ngale ta fié po kyat ni
(Mrk. 9:50; Luk. 14:34-35)
13 Yesusé nfasodoto si né, néceg faje, “Mew ta fdélé Ya né mare fpe ta fié po kyaté. Kfatailo dolo gasi. Gasi né ta nfamnó mnómé, mayta iga gasi né re nmamisé, nase reni ngale pana se twóté keé nató naliké bo kyaté né rfagteglo keé. Fajé nóté, bo nimi fié né ga fpe pana, bóngo mewé ma re nimi ngale gélesó pana.
14 Kfatailo mewé né dolo manano ta nfaménano yéfén po dunia nje ni wlólo nte bo kyaté-kyaté né rdéréré Jou. Ménano ta njé i masike tépiné ma nase kyaté né rémnawé i le, dolo kota ta po métét papo lo né. 15 Fajé nóté re logaloga né. Iga résting i rewóré, bisa pa bo rfarfura keé i, mayta mare rpe i po ya bo nfamanano farimé kyat ta si po umé wlólo né. 16 Fajé nóté re mewé. Nimi faifié né mare fpe po kyaté-kyaté bo rémnawé bo si ma rtail re rfapélóy Jou Lahatala ta I po soroga njé.
Yesusé nwómé né npe farimé ta nabi né re rlefo tatubé né
17 Yesusé nécegé, “Ma facogoma Ya kwómé nté bo kfayangésé keé aturan-aturan ta re rléfo po Musa ni kitab abén limé né, re po nabi-nabi ta iglé né riri kitab lo né, tisé. Mayta Ya kwómé nte, sói ta re rléfo po buké wlólo né nase bo ndadi i.b 18 Se flongé fafié é ta Ya kécegé nte. Iga langét re bétbété né i pocé lesu, aturan-aturan ta po Musa ni kitab abén limé né nase myangés pa, re po nabi-nabi ta nésé nóté riri kitabé lo né ma myangés pa. Aturan-aturan ta néi nase i pocé lesu sogado ta Jou Lahatala re néjaji tatubé lima né re ndadi i ndimé. 19 Necé tamulo, kyat pai le ta ndéréré aturan-aturan ta po Jou ni Buké lo pa, masike aturan faesó le ma, re sogado nfaftulo kyaté nésé bo rdéréré pa nóté, Jou nase néngóto i dolo kyat ta némya po I ni kyaté-kyaté né. Mayta kyat pai le ga ndéréré aturan-aturan ta po Jou ni Buké lo re nfaftulo kyat iglé nóté bo rdéréré, Jou nase néngóto i tadolo kyat ta pélóy po I ni kyaté-kyat ta rdéréré I né. 20 Se nete Ya kécego mewé. Guru agama Yahudi re kyat Yahudi ta rdéréré dodoto Farisi né, si récegé rdéréré ta Jou Lahatala wlo né, mayta ta rpe né nfamwómo i pa. Se mewé mare féliw si, fpe ta fié né bo runé ta re fdéréré Jou Lahatala wlo né, ga tagare fdadi Jou ni kyaté mewé.”
Ma ffamngamo na
21 “Mewé re flongé aturan ta rir gele re gaé tatubé lima nesté rduké, ta ni glio né ta dolo faje, ‘Ma fapun na. Pai ta nfapuné nase rfasól i.’ 22 Mayta nte Ya bo kécego mewé, pai le ta ncawan ni dél ta ma ndéréré Jou njec, nase rfasól i. Fajé nóté re pai ta npopété ni dél ta njéi, i mare rfatabono i po agama Yahudi né riri Mahkamah Agama nesté. Fajé nóté re pai le ta nécegé ni dél ta njéi, ‘Aw reni ngale gélesó pa’, nase Jou nfasól i se ntéo keé i némin po naraka wlólo ta nbablobé njé ni.
23 Se iga re fsung po um sambayangé lo bo fpo nimi sadaka po Jou Lahatala ni po géwgów ta raréntapén sadaka njé ni, po waktu ta néi iga ffatélolmo mew nimi dél isó wlo pisé po mew ni lesu, 24 se mare ffatoléné keé nimi sadaka pocé bo fsópéné bo ffané fféyfio mew re kyat ta njé i su, rewóré ta néi ga fpóléné mew néli nmulé bo fpo nimi sadaka né po Jou Lahatala ni.
25 Fajé nóté, iga reni kyat faisó nkalaké mewé, se nuté keé mew po pengadilané lo, masike mew po yéféné lo lesu, mare famlale fayówé yéféné bo fféyfio mew su. Sababta iga fféyfio mew pa, nase néyété keé mew néli po kyat ta nkawasa njé ni, rewóré ga nase néyété keé mew néli nóté po i ni kyat ta bo rfasungé keé mew némin po bui wlólo né. 26 Fatélolmo mew fafié, nase rcópné mew pa. Mare sogado re fpólésé ndimé utén ta hakimé né rané mewé fpólésé né, ga tagare rcópné mewé.”
Ma fyó sól na
27 “Mewé re flongé aturan ta nje i, ‘Ma fyó sól nad’. 28 Mayta nte Ya kécego mewé, iga reni món faisó ga néngóto mépin faisó se maduga nafsu i le ma, necé Jou nétén i re nyó sól po mépin ta njéi ni. 29 Bo mtómi faspal wónéyé né npe sélsól sogado re fdéréré Ya pana, ffélébété keé bo ma npe sélsólé le na. Ta fié fsung soroga né mtómi faspalé le, ga mtómi abén luwé né ndimé fsung naraka. 30 Fajé nóté re faomi né. Iga faomi ta faspal wónéyé né npe sélsól sogado fdéréré Ya pana, féwetésé keé bo ma npe sélsólé le na. Ta fié fsung soroga né faomi be faspalé le, ga faomi abén luwé né ndimé fsung naraka.”
Ndél pa bo ffatélaké
(Mat. 19:9; Mrk. 10:11-12; Luk. 16:18)
31 “Reni aturan ta nésé nóté, ta ni glio né faje, ‘Iga pai ta ntalaké ni pégelé, mare nlefo ni surat talak faisó bo npo ie.’ 32 Mayta Ya kécego mewé nte, iga món re mépin fadiréncó ta re rafsówé, ga mépiné njé nyó sólé, gélesó pa bo ni légaé njé ntalaké keé i né. Mayta bo mépiné njé nyó sól pa, ndél pa bo ni légaé njé ntalaké keé né. Bo sogado ntalak i ga ni mépiné njé néfsóo nó món nésé, mépiné njé re nyó sólé. Fajé nóté, bo món faisó néfsóo nó mépin ta re rtalak i njé, i ma re nyó sólé nóté.”
Ma fsasi na
33 “Mewé re flongé aturan esó nóté ta rir gele re gae tatubé lima nesté rduké né, ta dolo faje, ‘Bo fajaji fagalesó, fpe ta fécegé né. Bo sogado fajaji re fsasi po Jou ni, mare fpef óro.’ 34 Mayta nte Ya kécego mewé, ma fsasi le na! Masike féceg, ‘Dolo Jou, langété ntón ya’ matiné, sababta langété njé Jou Lahatala góo ta nkawasa dolo Kolano po ni kyaté-kyaté né. 35 Masike maduga féceg be, ‘Bétbété ntón amé’ matiné, sababta bétbété njé Jou Lahatala sóo ni yéfyéf i. Bo fécegé, ‘Kota Yerusalemé ntón amé’ matiné, sababta pnuw ta njéi ité rir Kolano Jou Lahatala ni pnuw i, I ta njéi Kolano ta npalóy I. 36 Fajé nóté ma fsasi bo fécegé ‘Kokogé mwetés’ na, sababta bo nimi uté famutcó némfus pari nbablaté ma, necé mew pa ta fpe fajé né. 37 Se ta fié né, iga ta fécegé né ga fatuwé, fsóngél be, ‘Fatuwé’, pari ta fatuw pa, fsóngél be, ‘Fatuw pa’. Mayta ma fsasi le na, sababta méitén ta néi lima setané né riri kolano njé ni.”
Ffaisno wlo né na
38 “Mewé ma re flongé aturan-aturan tadolo faje, ‘Iga reni kyat ta nfayóbété keé mtómi né, i mtó né ma mare rfayóbété keé. Re iga reni kyat ta nfapekété ngangomi né, i ngango né ma mare rfapekété keég.’ 39 Mayta nte Ya kécego mewé, iga reni kyaté ta rpe nómi ta lé, ma fkotale ta si bo rpe né na. Iga kyaté réspakél fofomi ta wónéyé né, fpo ta féspal balété né nóté. 40 Fajé nóté iga reni kyat ta rkalaké mewé bo ryó keé nimi kabaya né, nimi juba ta mulo lébé palóyé njé ma fpo keé si nóté. 41 Iga reni kyat ta palóy faisó ndésaké nané mewé fpó ni gina bo ffatebé i ni lóo fakilo pusó, ffatebé i sogado fakilo paluwé. 42 Bo kyaté né raroro mew fagalesó, fdo si. Fajé nóté ta ralómo mew fagalesó ma, ffalómo si le.”
Fmasié kyat ta riri lé mewé né
43 “Mewé re flongé aturan tadolo faje, ‘Mewé mare fmésié nimi dél kyat Israel ta bangsa esó re mewé né, bo nimi lé keé nimi réwé-réwé né.’ 44 Mayta Ya bo kécego mewé, mewé mare fmasié nimi réwé-réwé né, re kyaté-kyat ta rfakangelangé mewé né, faroré bo Jou npo si be ta fié le. 45 Iga fpe fajé, necé mewé re ffaftulo ta nimi Moke Jou Lahatala ni ntu mewé. I ta npe ngénngané njé bo ntulo férimé kyaté, ta rfié re ta rlé né. Fajé nóté re félfélé, ntebo né po kyaté-kyat ta rmétegélé re ta rmétegél pa né. 46 Iga fmasié be maduga kyat ta riri fié mewé né, sói ta nase mewé bo fduké? Ma fngongano Jou Lahatala nase bo ndo mew sói néli na. Ta ranénfalutno pajaké né ta cogo kyat léo si ma, runé rmasié kyat ta riri fié si né. 47 Fajé nóté iga fhoromat be kyat ta riri fié mewé né, ma facogo ma Jou Lahatala nase ntailé mew na. Sababta, kyaté-kyat ta rfayal Jou Lahatala pa ma runé rhoromaté kyat ta riri fié si né. Mayta mewé ma ftalko si na bo fmasié férimé kyaté. 48 Se mewé re funé nimi Moke Jou Lahatala nmasié kyaté né reni ta sól faésó le ma tisé. Se mewé ma mare fpe né ta dolo I npe né.”