Yesusé nfabingé Um Sambayangé njé nase reni kyat ta bo rfagégné keé i
(Mrk. 13:1-23; Luk. 21:5-24)
24
Rewóré ta néi, Yesusé i po Agama Yahudi né riri Um Sambayang ta npélóyé lo se ncópén nétó. Po waktu ta néi, Ni motemote nesté rférakné si néli po I ni se rfaftulo I Um Sambayangé né ta fié-fié né. 2 Bóngo Yesusé nécegé si faje, “Flongé fafié é ta Ya kécego mewé nte, Um Um ta néi pote se néli, kyaté nase bo rfagégné keé. Se ni lóyé né nase fapusó le ma tisé ta bo térétewlé i po góo lo né.”Ta dunia njé re bo nkiamaté né, reni ngénngan-ngénngan ta kangelangé
3 Rewóré ta né, Yesusé nfan i néli po métét Zaituné, se ntolén i pocé. Ni motemote nesté ma rwómo I néli, bo si re I le, bóngo rméiténé rdé I. Bóngo rutné I, “Guru, ta mécegé bo régén Um Sambayang ta npélóyé njé né, mfabingo amé, ta méceg péséwé né ngané fisé ga bo ndadi i? Iga dunia njé re bo nkiamaté né, i ni faféyal sói bo amé kuné ta Awé bo mwómé?”
4 Yesusé ncónglo si, “Fpe mew fafié é. Ma sogado reni kyat rfalélólé mew na. 5 Sababta kyat félé nase rwómé rfalélólé mewé rut Ya ngósnogé, nase réceg faje, ‘Ya nte I ro, kolano ta Jou Lahatala néjaji bo kwómé kfasalamaté kyaté né!’ Mayta si ta néi maduga rlalólé keé kyat ta félé né bo rdéréré si, se fpe mew fafié, ma fdéréré si na. 6 Mewé nase flongé ta récegé cogo bo rfaperang po bótén esó pari po géwgów nésé. Mayta ma fémtat na. Ta féléo i né nase ndadi i, mayta ngénngan ta bo kiamaté né nwómo i pafule. 7 Sababta suku isó nase rfaparang re suku ta nésé. Néli lima né suyé ndimé, bóngo reni géwgów félé ta reni mnóm pana se kyaté né nfatélóto i. 8 Mayta gélesó pa, sababta férimé kangelangé né tagare po faiwóbno ta dunia njé nkiamat pafule né. Necé tfatailo dolo mépin ta tagare nfasbósmé i bo nmawyóyé né.
9 Se po waktu ta néi, farimé kyat po bótén lóyé njé ni ta rdélé pa né nase riri lé keé mewé sababta fdéréré Ya. Nase rgó mewé se rpo keé mew néli bo rfakangelang sogado rpuné keé mewé. 10 Bóngo kyat félé ta rdélé Ya né, nase re rdélé Ya pa na. Sababta si nase rfatut lé se rfakotale isó re isó rwómé, bóngo rpo keé riri délé né néli bo rfakangelangé keé si. 11 Bóngo nase reni kyat félé ta rwómé, se récegé cogo si nabi ta bo rfawómo Jou Lahatala ni faftóté nesté. Momongo rlólé, si maduga bo rlólé keé kyat félé né bo ma rdélé Ya le na. 12 Néli re lima kyat félé nase rbóngé rpe be ta lé se re rfamésié isó re isó pana. 13 Mayta kyat pai ta ndéréré Ya re wlo ta nésagél i pa sogado fajé néli le nase nduk salamaté. 14 Se Habar ta Nfié ta Jou Lahatala bo nkawasa dolo Kolano né nase rfawómo po férimé kyat ta po dunia nje ni wlólo nte, bo farimé suku rduk yéféné bo rtarima Habar ta Nfié njé né. Rewóré ta néi, ga tagare dunia nje bo nkiamaté.”
Kyat léo ta ni lé Jou Lahatala njé bo nwómé, se kyaté né bo rówésé
15 Yesusé nécegé nóté, “Pote se néli, nase fémnaw reni kyat léo isó ta ni lé Jou Lahatala njé bo nwómé.’a Kyat ta njé bo nosél po Jou Lahatala ni Um Sambayang ta npélóyé njé ni wlólo, tadolo tatubé lima se Jou Lahatala re néceg po nabi Daniel ni. (Fbaca fafié bo fsaé i ni ngale né). 16 Iga fémnaw kyat léo njé re nosél pocé, kyaté-kyat ta mew po bótén Yudea né, famlale bo fówés néya po métété lo bo fapiné mew pocé. 17 Ta mew po um pépo lo né, ma ftebé bo fyó fagélesó po umé wlólo na. 18 Fajé nóté re kyat ta si po bété lo né, ma féléo nimi kabaya ta po umé lo né na. 19 Po ngénngan-ngénngan ta néi, mépin ta rpe lapori re ta rfasus yomya né, nase ta délé rkangelangé! 20 Se wóré féror po Jou Lahatala ni, bo waktu ta farimé mewé fówésé se fapiné mew po métété lo né, farimé ma mgo po félfélé wlólo re po ngénngan Sabat na. 21 Sababta po ngénngan ta néi, fatuw-fatuw kyaté né ta délé rkangelangé, lebe kangelang po farimé ta re rbósémé ntubé né. Ta faywóbno Jou Lahatala ntulada bóténé nje sogado nte, kangelang ta dolo necé téténduk pa. Sogado ngénngan ta kangelangé né rewóré ma, nase reni pana ta dolo fajé né. 22 Se iga ngénngan ta nkangelangé né ga Jou Lahatala npe sogado mnuwé, kyaté né réfen pa se nase rmóté ndimé. Mayta I nmasié ni kyat ta re npili si né, se nfakatobé keé ngénngan ta néi.”
Nase kyat félé rwómé récegé cogo si lima Jou Lahatala ni
23 Po waktu ta néi iga reni kyat ta récego mewé, ‘Coba fémnawé! Mesiasé njé I pote!’ Pari récegé mew faje, ‘Mesiasé njé I ntéli!’ Ma fdélé na sói ta récegé né. 24 Sababta nase reni kyat félé ta rwómé né récegé cogo si Mesiasé, bo tisé récegé cogo si nabi ta bo rfawómo Jou Lahatala ni faftóté nesté. Iglé nase nase rfaftulo riri kawasa né rpe mujizat re sói néli ta mgo kyaté né wlori, bo kyaté né rdélé si, momongo rlólé ndimé. Iga sogado réfené, si ma nase rfalélólé Jou ni kyat ta re npili si né bo rpeé si sogado rdélé Jou ta fatuw pana. 25 Se ffatélolmo mew fafié, sababta ta féléo i né ndadi i pafule, Ya re kfabingo mewé ntubé.
26 Se iga reni kyat ta récegé mewé, ‘Coba fémnawé, Mesiasé njé I ntéli po géwgów ta sésé bóto i njé ni!’ Ma fpe néli na. Pari iga reni ta récegé, ‘Coba fémnawé, Mesiasé njé népiné I ntéli po umé wlólo, necé ma fdélé na. 27 Sababta po waktu Ya kyat ta Ya I yama Jou Lahatala ni, kwómé né nase farimé kyaté bo runé. Kfatailo dolo lémlém ta ncayté i po ngancóo, né témnaw i sogado nélew ngancepo. 28 Adeade reni haiwan ta nmót po géwgów faisó ni, farimé kyaté nase runé, sababta nase reni mané ta rénopé nópé né rfajólé se ró ni wóngété né. Ni ngale, Ya kwómé nmulé né, nase farimé kyaté bo fémnaw Ya se ffajólé.”
Yesusé bo nwómé nmulé
29 Yesusé nécegé nóté, “Ngénngan ta kangelangé né tagare télapésé, ngénngané njé nase ndérorémé. Sni njé ma nase ntul pana. Ngó ta po langété lo né ma famnapo i nópé, re farimé ta po langété lo né ma, ruwae i néli lima. 30 Se po waktu ta néi óro, nase fémnawé reni faféyal isó po langété lo, bo funé Kyaté ntu ta I yama soroga njé bo nwómé nmulé. I ga rémnaw ta faje farime bangsa ta po dunia nje ni wlólo né nase rtangésé. Sababta férimé si nase rémnawé Kyaté ntu njé nwómé ndé mét yama langété lo né. Nfauto ni ménano re kawasa ta pélóyé. 31 Bóngo trompet ta gli pélóyé né se Kyaté ntu njé nase nané nik nénan-nénan ta yama soroga né rcópéné bo rfajólo ni kyaté-kyat ta I re npili si né po férimé gawgów ta po dunia nje ni wlólo nte po wóm sogado ga ntit ta wómé.
32 Yesusé néceg adeade isó njé ni glio faje, “Coba fémnaw ay ara né. Iga ni sangsóng ta myaku néga re nétubél i, necé mewé re funé bo ngénngané wlólo né re rakén óro. 33 Fajé nóté iga ngénngan kangelang ta kécegé re ndadi i, ga taga funé, re mnuw pana Kyaté ntu ta I yama soroga njé bo nwómé nmulé ro. 34 Se flongé fafié ta Ya kécego mewé nte. Kyat ta isémé nte iglé nase rmót pafule, sogado férimé ta kécegé né re ndadi i ndimé. 35 Langét re bétbété nase myangésé ndimé. Mayta Ya nik méiténé né nase myangés pa sogado ga fajé néli le.”
Yesusé nwómé nmulé né, isó ta nuné ni ngénngané né pa
(Mrk. 13:32-37; Luk. 21:34-38)
36 “Yesusé nécegé nóté, “Reni kyat isó pa ta nuné, ngané fisé ga Kyaté ntu ta I yama soroga njé bo nwómé nmulé. Jou Lahatala ni nénan ta po soroga lo né ma runé pa. Kyaté ntu ta I yama soroga njé le ma nuné pa. Maduga Moke ta I po soroga njé le ta nuné. 37 Sababta iga Kyaté ntu ta I yama soroga njé nwómé nmulé, necé tfatailo dolo tatubé lima ta nabi Nuh né. 38 Po waktu ta néi, si runé pa kipésé bo nfadiré keé bóténé njé né. Se rémnóm re rinémé le, réfsów re rfafsówé. Nfatut i fajé óro, sogado ngénngan ta Nuh ncung i némin po kapalé njé ni wlólo. 39 Se kyaté-kyaté né runé pa ta bo kipésé ta palóyé né, sogado wóé njé re nbaké se ramdiré né, ga taga runé ta bo rbolito. Ta dolo necé nóté, iga Kyaté ntu ta nwóm yama soroga nwómé nmulé, kyaté-kyaté né rfaléléy si pa. 40 Po waktu ta néi nóté, iga reni món séluwé rpe yabé po bété lo, isó njé Jou Lahatala nase nyó i, ta isó njé ga nase nfatoléné keé i. 41 Se po waktu ta néi nóté, iga reni mépin séluwé rtok gandumé, isó njé Jou Lahatala nyó keé i, ta isó njé ga kfatoléné keé i.
42 Ta mulo né, kécego mewé bo fpe mew fafié, sababta nase funé pa ngané fisé ga nimi Jou njé bo nwómé né. 43 Mayta mewé ma mare fatélolmo mew fafié, reni ade ade isó nje: Iga kyat ta ni umé njé nuné ni ngénngan ta reni kyaté bo nwómé nfalewésé né, nase nyénéf pa se nfaménawé, bo ta nfalewésé njé ma ncung na ni umé lo na 44 Ta mulo né, mewé mare ffaléléyé mew fafié, sababta Kyaté ntu ta nwóm yama soroga njé nase bo nwómé nmulé po waktu ta mewé funé pa.”
45 Yesusé nécegé nóté, “Iga reni kyat yabé isó ta npande re lénglóngo fié. I npe yabé né fié se ta ni tuangé njé bo nfané né, nélóngé i, bo nfaménawé tuangé njé ni kyat yabé ta iglé né re nfanténo róri mnómé. 46 Légaé njé nfané néléyé ga némnaw yabé ta nané npe né reni ta5 sól pa, se nase ncéngé i. Kyat yabé njé ma nase séngséngé bóto i. 47 Kécego mewé, légaé njé ni wódól sói le ta pocé né, nase npo kawasa po kyat yabé njé ni ndimé bo nfaménawé. 48 Mayta bo kyat yabé njé ga kyat léo i, nase nénuta po wlo wlólo faje, 49 ‘Nik tuangé njé nase némnuwé ga néléyé.’ Pocé bóngo nfaspésé ni dél yabé ta iglé né, ga némnóm re ninémé ndé ni dél ta rmafainémé. 50 Mayta ni tuangé nje nase télél be néléy po ngénngan ta i nuné pa. Se iga re néléyé, nase nfadótlo i npe yabé pa. 51 Bóngo kyat ta njéi nase légaé njé nfasól i né tadélé météwé. Tadolo kyat ta rmalólé nesté rbósémé né. Po géwgów ta néi, nase reni tangtangésé né raréntébné pa sogado rfakakikto ngangori né sababta rbósémé rkangelangé njé, kyaté né rkangelangé sogado rtangésé, ngangori né ma rénfakékikté.”