Mépin balo ta reni renó pa njé ni sadaka
(Mrk. 12:41-44)
21
Po waktu ta Yesusé I po Um Sambayang ta npélóyé njé ni lesu né, I ntarukira be kyaté-kyat ta rkayangé né rwómé se réfrayé riri sadaka po ni góo kébya njé ni. 2 Pocé ntarukira mépin balo isó nóté reni renó pa, i ma nwómé se néfrayé ni sadaka. Mayta ta i ni né cuci le maduga logam péluwé. 3 Pocé tabóngo Yesusé néceg faje, “Flongé fafié é, ta Ya bo kécegé nte. Iga po Jou Lahatala usno lo, mépin balo njé ni sadaka né lebe félé po férimé kyat ta rpawélé né. 4 Sababta, ta rkayangé né masike rpawélé né félé mayta ni gléo né lebe félé lesu. Mépin balo nje masike reni renó pa, férimé ta po i ni né ta re npawélé keé ndimé né.” Um Sambayang ta npélóyé njé nase bo rfagégné keé i
(Mat. 24:1-2; Mrk. 13:1-2)
5 Po waktu ta néi, kyaté-kyat ta rfadéréré re Yesusé I re ni motemote nesté né, reni séfis néli réféténé cogo Um Sambayang ta npélóyé njé nfié, sababta rfakéwelo i re lóy ta fié ndimé. Bóngo kyaté né ma rpo róri sói le, se rpeé riri syukur po Jou Lahatala ni.
Mayta Yesus nlongé ta réféténé, tabóngo nécegé si faje, 6 “Ta mewé fémnaw po Um Sambayang ta npélóyé njé ni né, nase reni waktu ta bo rfagégné keé ndimé. Se ni lóyé né nase fapusó le ma tisé ta bo terétewlé i po góo lo nóté.”
Kyat ta rdéréré Yesusé né nase rduk kangelangé
(Mat. 24:3-14; Mrk. 13:3-13)
7 Tabóngo Yesusé ni motemote nesté rutné, “Guru, kangelang ta méceg péséwé né, nase ngané fisé ga bo ndadi i? Re ni faféyal sói, bo amé kuné?”
8 Tabóngo I ncónglo, “Fpe mew fafié, ma sogado rlól lé mew na. Sababta nase reni kyat félé ta rwómé rut Ya ngósnogé, bóngo récegé mew faje, ‘Ya nte Mesias óro, Kolano ta Jou Lahatala néjaji nwómé bo nfasalamaté kyaté njé!’ Re nase récegé nóté, ‘Dunia nje bo nkiamaté né, re rakéné.’ Mayta ma fdéréré si na. 9 Re iga flongé ta bo rfaparangé, bóngo rngamo keé pemerenta né, ma fémtat na. Sababta farimé né nase bo ndadi i ntubé, mayta necé ni ngale bukan ta dunia nje bo nkiamat óro pa.”
10 Tabóngo, Yesusé nécego si nóté, “Nase, reni kyaté-kyat ta si po bótén isó rfaparang re kyat ta si po bótén nésé, bóngo kolano isó i re ni kyaté-kyaté nase rfaparang re kolano isó nóté i re ni kyaté-kyaté né. 11 Se nase reni suyé né tadélé nkuaté. Bóngo reni panyaket sampar ta mgo keé kyat ta si po géwgów pua le, re nase nfatélóto i. Sababta nase reni faféyal yama langét ta npe sogado kyaté né tadélé rémtaté. 12 Mayta iga férimé né ndadi i pafule, nase reni kyat ta rgó mewé se rfakangelangé kée mewé, sababta re fdélé Ya. Pocé nase rserakané mew po agama Yahudi né riri um sambayangé ni wlólo, ga radili keé mewé se rfasungé mew po bui wlólo, ga rfatébono keé mew re kolano re gubernuré nesté. Férimé né nase bo ndadi i po mew ni, sababta fdélé Ya. 13 Mayta po waktu ta bo radili keé mewé né, pocé nase fduk yéféné bo féfétno si, Ya óro ta kfasalamaté kyaté né. 14 Se iga mew re si bo ffatébono, ffakwaté wlomi né ro, bo ma fafénuta be sói ta nase fécegé bo fbela nimi diri né. 15 Sababta Ya ta nase kfaftulo mew méitén ta fié, se fsóngélé né ma tadolo kyat ta runé lebe félé. Bóngo nimi réwé né nase réfen pa bo rfakotalé rdé mewé né. 16 Kyat-kyaté nase riri lé keé mewé, sababta re fdélé Ya. Nimi déluté, faftén re farémóné, nimi keluarga ta iglé, re nimi dél faljil ta rdélé Ya pa né, si ta néi ta nase bo rserakané mewé, bóngo nimi dél séfis néli nase rpuné keé si. 17 Se férimé kyaté nase riri lé keé mewé. 18 Mayta ma fémtat na, sababta nimi uté mutcó ta po babokomi lo ma nase bisa némyangés pa. 19 Iga fdélé Ya né ga faféntébné pa, nase fhidup re Jou Lahatala sogado fajé néli le.”
Kota Yerusalemé njé nase bo rféjakémé keé i
(Mat. 24:15-21; Mrk. 13:14-19)
20 Yesusé nécego si nóté, “Iga fémnaw tentara né re rfaljelé keé kota Yerusalemé, necé nase re funé óro, re mnuw pana nase bo rféjakémé keé i ro. 21 Se po waktu ta néi, kyat ta rtolén po bótén Yudea né, famlale bo rówés si néya po métét papo lo óro. Ta si po kota ni wlólo né ma, mare famlale bo rówésé nóté, re ta si po pnuw re pnuwé né ma, ndél pa bo rcung néminé. 22 Sababta po ngénngan-ngénngan ta néi, Jou Lahatala npo hukumané bo sói ta re néjaji po Kitabé ni wlólo né férimé nase bo ndadi i. 23 Se po waktu ta néi, mépin ta rpe lapori, re ta rfasusé nturi galólé né nase tadélé rkangelangé. Sababta po férimé bótén Israelé né Jou Lahatala nase npo si hukuman tadélé météwé. 24 Bóngo férimé suku né nase reni ta bo rpuné keé si re yété, reni nóté ta rgó si ga ruté keé si po bui wlólo. Sababta suku ta rféyal Jou Lahatala pa né, nase rfakteglo keé kota Yerusalemé, sogado po waktu ta Jou Lahatala re npo si né rewóré ndime.”
Yesusé nwómé nmulé
(Mat. 24:29-31; Mrk. 13:24-27)
25 Yesusé nécegé nóté po kyat ta pocé né, “Nase reni ta témnaw pafule ta bo ndadi i po ngénngané, sni re ngó sogado kyaté-kyaté né tadélé rémtaté. Re férimé suku ta po dunia nje ni wlólo né, nase tadélé rémtaté se rdangó ndimé, sababta po wolété lo né mawruwé se gégliné ndimé. 26 Kyaté-kyaté né nase rwawewé sogado re bo rmóté, sababta rarénuta be sói néli ta bo ndadi i po dunia njé ni wlólo se ntebé yama langété lo né, nase nruae. 27 Se po waktu ta néi óro, nase rémnawé Kyaté Ntu ta kwóm yama soroga kdé mété wlólo, bóngo Ya nik kawasa re manano né tadélé pélóyé. 28 Iga férimé né bo ndadi i ro, ffasadia mewé bo fakwaté wlomi né ro, sababta re mnuw pana, nase bo fduk salamaté.”
Yesusé npe adeade ay ara
(Mat. 24:32-35; Mrk. 13:28-31)
29 Tabóngo Yesusé néfétén adeade isó nóté po si ni. Se néceg faje, “Coba ftarukira fafié, ay ara pari, ay sói le. 30 Iga fémnawé ga re natubél i, necé nase re funé, bo ngénngan óro. 31 Fajé nóté iga waktu kangelang ta Ya kécegé né, iga bo ndadi i ro, mewé nase funé, mnuw pana Jou Lahatala bo nkawasa dolo Kolano po ni kyaté-kyat óro.
32 Se fatélolmo mew fafié ta kécegé nte. Kyat ta isémé nte iglé nase fmót pafule, mare sogado férimé ta kécegé né re ndadi i ndimé. 33 Sababta férimé ta po dunia nje wlólo nte masike bo myangésé, mayta Ya nik méiténé né nase myangés pa sogado fajé néli le.”
Yesusé nécegé ffasadia mew fafié bo sogado Ya kwómé nmulé
34 Yesusé nécegé nóté, “Fpe mew fafié, ma sogado fanuta be maduga fpe nimi rameangé bo ffainémé nómi sogado famse na, bóngo fanuta be nimi hidup étné be ngénngan néya ta bo fó re finémé né na. Ma sogado Kyaté Ntu ta Ya I yama soroga nje télél be kwómé nmulé ga ffasadia mew pa. Necé, nase tadolo haiwan ta tabóné npiténé keé si né. 35 Sababta po waktu ta Ya bo kwómé nmulé né, nase isó ta nuné pa. 36 Mayta mewé mare fpe mew fafié le, re fméiténé fdé Jou Lahatala né ma ftébné na bo I nfakuaté wlomi ta kangelangé né. Iga fpe fajé, necé ni ngale re ffasadia mewé bo faftón Kyaté Ntu ta bo nwóm yama soroga wlólo né.”