Matius 16

Kyat Farisi re kyat Saduki né réroré bo Yesusé nfaftulo ni kawasa

Reni kyaté-kyat agama Yahudi ta si lima aliran Farisi re lima aliran Saduki né si dórén séfis néli, bo rayówé Yesusé nó sélsólé. Se rwómo I néli bóngo rané I npe mujizat faesó bo runé ta I yama Jou Lahatala ni.”

2 Mayta Yesusé nécegé si faje, “Adeade fémnaw ngénngané njé bo ncep nópé ga langété njé nmakóté, nase féceg faje mélówé néya nte bo méklóngéné. 3 Iga tamémóné ga langété njé nmakót re nfaméklikté i, nase féceg faje ngénngan pésénte nase bo félé. Mewé fémnaw be langété njé ni dai né le, re funé óro sói ta bo ndadi i po ngénngan ta néi. Mayta Jou Lahatala ni kawasa ta npe né ga funé pa. 4 Mewé kyaté kyat ta isémé nte tadélél flé, fécegé cogo fdélé Jou, momongo fdéréré be ménimi ta sólé né! Mewé féroré kpe mujizat faisó bo cogo funé ta Ya nte, Ya I yama Jou Lahatala ni. Mayta, Ya nase kfaftulo mew mujizat galesó pa, maduga bo kéfétno mew be mujizat ta tatubé lima se re kpe po nabi Yunus ni né bo funé. Yesusé néceg faje rewóré, tabóngo I re ni motemote nesté rfatoléné keé si se rfan si po gawgów nésé nóté.”^a

Yesusé nécego ni motemote bo ma sogado rdéréré keé kyat Farisi re Saduki nésté riri dodoto né na

(Mrk. 8:14-21)

5 Yesusé I re ni motemote nesté rpe néli po talaga Galilea ni faspalé. Po waktu ta néi, rfatélolmo si ta ruté róri roti pa. 6 Bóngo Yesusé nécegé si faje, “Fpe mew fafié, sababta kyat Farisi re Saduki róri ragi né lé.”

7 Pocé Yesusé ni motemote nesté rlongé ta néceg fajé né, tabóngo rfalécego, “Alli, rir Guru njé néceg fajé né, sababta ité tut roti pa né ga.”

8 Mayta Yesusé nuné si ta rfalécego né, bóngo nécegé si faje, “Mewé facogoma ta kméiténé né ta fut roti pa né? Peé, ga fdélé Ya pa né! 9 Mewé mare fsaé! Sababta nase fatélolmo mewé lesu, po waktu ta kfalkelsé roti pélimé se kfamnómé kyat calén lim re glé né! Taga po waktu ta néi, ni gléo ta ffajólo né téglas péfisé? Ffatélolmo mew pa? 10 Fajé nóté re maduga roti péfité le, bisa kfamnómé kyat calén fót re glé, ta ni gléo né ffatélolmo mew pari tisé, reni téglas péfisé ta fajólo po waktu ta néi? 11 Iga re fémnaw Ya nik kawasa ta néi, pe sói se nte fsaé pa? Ta Ya kéceg péséwé né ni ngale roti pa. Mayta Ya bo kécego mewé nóté, mewé mare fpe mew fafié po kyat Farisi re Saduki róri ragi né!” 12 Pocé ga ta ga re ni motemote nesté rcae. Ta Yesusé nané si rpe si fafié né, ragi ta rpeo roti né pa, mayta kyat Farisi re Saduki riri dodoto ta lé né ma sogado rdéréré na.

Petrusé nécegé Yesusé njé Kolano ta Jou Lahatala néjaji tatubé, ta bo mfasalamaté kyaté njé”

(Mrk. 8:27-30; Luk. 9:18-20)

13 Yesusé I re ni motemote nesté rwóm po bótén ta nérakén kota Kaisarea Filipi né. Pocé, bóngo nutné ni motemote nesté faje, “Ta mewé flongé kyaté rfangsónglé né, récegé Ya nte pai?”

14 Bóngo si rcónglo I, “Reni ta récegé cogo Awé Yohanes ta nénbaptisé kyaté njé. Iglé né récegé Awé nabi Elia. Iglé nóté ta récegé Awé nabi Yeremia, re cogo nabi ta iglé nóté ta re rmóté se rpangéné nmulé.”

15 Tabóngo Yesusé nutné si nmulé, “Se iga mewé, ta funé né Ya nte pai?”

16 Bóngo Simon Petrusé ncónglo, “Guru, Awé Mesias óro, Kolano ta Jou Lahatala néjaji nwómé bo nfasalamaté kyaté njé. Awé Jou Lahatala ta nhidupé njé ni ntu Awé!”

17 Pocé bóngo Yesusé nécegé i faje, “Simoné, Yunusé ni ntu ta awé! Goné awé, sababta ta mécegé né isó ta nfabingo aw pa, mayta Ya nik Moke ta I po soroga njé ta nfébingo awé. 18 Se Ya kfangósno aw Petrusé, ta ni ngale né lóy ta métuwé, ta n-géwgiw pa. Ya bo kfajólo kyat félé ta rdéréré Ya ta dolo awé nte, bo fdadi nik jemaate mewé. Kfatailo jemaaté njé dolo um ta tfawoslé po lóy ta métuwé ta tpeo fandasi né. Bo masike sói le ta nfarwae nik jemaate njé ma, nase némyangés pa sogado fajé néli le. 19 Ya bo kpo aw kawasa bo mfarén si. Se sói ta mpo fié pari tisé po dunia wlólo nte, Jou Lahatala ma nase npo fié pa po soroga né.” Fajé nóté re sói ta awé mpo fié po dunia nte, Jou Lahatala ma nase npo fié po soroga né.” 20 Yesusé néceg fajé rewóré, tabóngo nfaftóto ni motemote nesté, bo ma réfétén néli re lima na masike kyat pai le ta I Mesias óro, Kolano ta Jou Lahatala néjaji nwómé bo nfasalamaté kyaté njé.”

Yesus nfabingo ni motemote nesté ta kyaté né bo rfakangelang I sogado rfamót I

(Mrk. 8:31–9:1)

21 Pocé ga tagare Yesusé nfabingo keé ni motemote nesté ta Jou Lahatala ni jaji po I ni, ta ni glio faje, “I mare nfan néli po kota Yerusalemé. Néli, nase nduk kangelang félé lima Agama Yahudiné riri kyat tut-kyat tut, re imam ta rpélóy re guru-guru agama ta runé fié Musa ni kitab abén limé nesté, si ta bo rpuné keé I sogado rfamót I. Mayta télapés ngané telé, nase kpangéné nmulé.”

22 Petrusé nlongé ta Yesusé néceg fajé né, tabóngo natél Yesus lima lapo lo né, se nécegé I faje, “Guru, ma méceg fajé na. Kéroré bo Jou Lahatala nélówé keé ta néi, bo ma sogado ndadi i po Aw ni na.”

23 Mayta Yesusé nélolét I néminé, se nécegé i faje, “Ceh, mfaténténgén aw nópé! Nim méiténé né tadolo setané né riri kolano njé ni méiténé. Se mfaketé keé sói ta Jou Lahatala mgo wlo né. Sababta awé maduga manuta be sói ta kyat dunia wlo mgo né le, mayta ta Jou Lahatala wlo mgo né ga mfaketé keé.”

24 Rewóré ta néi, Yesusé nécegé ni motemote nesté faje, “Pai ta bo ndéréré Ya né, ma ndéréré ni wlo njé na, mayta ndéréré be ta nfamgo re Jou Lahatala wlo njé né. Se iga pai ta nfasadia i bo nduk kangelang sogado nmóté sababta ndéréré Ya. Necé tadolo npó ni salibé njé, bo ndéréré Ya. 25 Sababta kyat pai ta wlo njé i be néli po Jou ni sogado rfamóté keé i ma, nase nduk ta fié sogado fajé néli le. Mayta kyat pai ta maduga néyówé be ta fié po dunia njé ni wlólo, nejé nase nmóté né nduk ta fié pa sogado fajé néli le. 26 Sababta masike haréta ta po dunia njé ni wlólo nte ménimi ndimé, mayta fmót nópé né myangso mewé se reni ngale gélesó pa, bóngo nase fhidup re Jou Lahatala pana sogado fajé néli le. 27 Ta mulo kéceg fajé né, sababta Ya nase kwómé nmulé. Ktebé né, Ya re Jou Lahatala ni nénan ta po soroga né, kfauto Jou Lahatala ni ménano re kawasa né. Po ngénngan ta néi, Jou Lahatala nase nfamulé ni kyat ta rdéréré I né riri féyfié. Ta rdéréré I pa né ga, nase nfasólé keé si. 28 Se flongé fafié ta Ya kécego mewé nte. Po férimé ta mew pote né, nase reni ta rmót pafule, iga rémnaw Ya bo kwóm dolo Kolano Ya pafule né.”