Yesusé nméiténé ndé nabi Musa I re nabi Elia po métété lo
(Mrk. 9:2-13; Luk. 9:28-36)
17
Télapés néli ngané wonémé, bóngo Yesusé nut Petrusé, Yakobusé, i re ni fténo Yohanesé, se rawét si néya po métét isó ta némógé njé papo lo. Pocé reni kyat nésé pa. 2 Se re rwómé ntéya, télél be ga réngóto Yesusé re nésé I: Usno né ménano dolo ngénngané, ni kabaya njé ma n-gégléwé ndimé. 3 Pocé télél be rémnaw nabi Musa i re nabi Elia ranméiténé rdé Yesusé.4 Bóngo Petrusé nécegé Yesus faje, “Jou, pote faje i ni birahi! Se iga wlemé, kpe umé myaku faay tel pote. Bo fa isó Anim i, isó Musa ni i, isó njé ga Elia ni i.”
5 Po waktu ta Petrusé nméiténé lesu né, télél be reni mét pakpuk esó nmanano ntebé nópé se nfarfura keé si, né ga reni gégliné isó lima mété njé ni wlólo né néceg faje, “Nje Ya ntig ta kmésié I. Ta I nénpe né mgo wlegé. Se flongé I ro!”
6 Yesusé ni motemote sételé nesté rlongé gégliné njé né, ta délé rémtat sogado réspók si nóp bétbété lo. 7 Pocé Yesusé nérakén néli se nétané si, bóngo néceg faje, “Fosél óro. Ma fémtat na!” 8 Po waktu si dórén telé rfapangné bébokori néya né, rémnawé kyat pa na, góli be Yesusé nkumél I pocé.
9 Tabóngo ta rénduén po métété lo se nópé né, Yesusé nfaftóto si faje, “Ma féfétén néli re lima su na, ta re fémnaw péséwé né! Nómés ta Kyaté ntu ta I yama soroga njé re nmóté se pangéné nmulé, ga tagare féféténé.”
10 Bóngo ni motemote nesté rutné I, “Pana fajé, pe sói se guru-guru agama ta runé fié Musa ni kitab abén limé né récegé cogo mare nabi Elia nwómé ntubé ga tagare Mesias, Kolano ta Jou Lahatala néjaji bo nfasalamaté kyaté njé nwómé?”
11 Bóngo Yesusé nécegé si faje, “Necé fatuwé, nabi Elia njé mare nwómé ntubé bo nfasadia 555 a 12 Mayta flongé fafié ta Ya kécegé nte, kyat ta dolo nabi Elia njé re nwómé, mayta kyaté-kyaté né rfayal i pa. Se rpe i né, rdéréré be wlori ta lé né. Necé ta nase bo rpe po Ya ni nóté, kyat ta Ya i yama Jou Lahatala ni.” 13 Pocé ga tagare ni motemote nesté rcae, ta Yesusé nécegé kyat tadolo nabi Elia njé ni ngale né Elia pa, mayta Yohanes ta nénbaptisé kyaté njé.
Yesusé nfaungé setan ta ncung po yomya món isó ni
(Mrk. 9:14-29; Luk. 9:37-43)
14 Po waktu ta Yesus I re ni motemote sételé nesté re rpólén si nmulé po kyat ta félé né, télél be reni kyat isó nfarakné i néli po Yesus ni se ncuba nóp usno lo. 15 Bóngo néceg faje, “Moke ta Awé, mgali ntigé njé su! Némgo mati-mati ayamé se ta délé nkangelangé. Iga re mgo i né, nuén téptipéné némop némin luténé lo, bo tisé némnap i nóp wóé lo. 16 Ya re kut i po nim motemote nesté ni, mayta réfené rfafié i pa.”
17 Pocé Yesusé nlongé ta néceg fajé né, tabóngo nécegé kyaté-kyat ta pocé né, “Mewé kyat ta isémé nte, re fdélo yéfén ta sólé se re fdélé Jou pana! Ya re mewé tfadéréré ta mnuo i nte ga, nase ngané fisé nóté ga bo fdélé? Wóré fut yomya njé lima!”
18 Waktu rut yomya njé néli po Yesusé ni, bóngo nfaungé keé setan ta ntolno yomya njé né se ncópén i. Tabóngo yomya njé nfié i.
19 Rewóré ta néi, Yesusé ni motemote nesté réftón sogado Yesusé nkumél I, gatagare rfan néli se rutné I, “Guru, pe sói se amé kfaungé setané njé ga ncópén pa?”
20 Bóngo Yesusé nécegé si faje, “Mewé fdélé Jou Lahatala né dolo nfamwómo i pa. Se flongé fafié ta Ya kécego mewé nte, iga mewé fdélé Jou Lahatala, masike ménimi ngongano né myaku dolo géy ta nalus po dunia njé ni wlólo nte, mayta iga fané métété njé, ‘Mlue aw néli!’ Nase nlué i. Sói le ta mewé bo féroré né, nase ndadi i ndimé, mayta mare fdélé Jou Lahatala ta fatuw-fatuwé. [ 21 Mayta mewé mare funé, iga bo ffaungé setan tadolo péséwé né, mare fméiténé fdé Jou Lahatala re fpuasab, ga taga nase ncópéné.”]
Yesusé nfabingo si nuén luwé ro ta bo nmóté né
(Mrk. 9:30-32; Luk. 9:44-45)
22 Po waktu ta Yesusé I re ni motemote nesté re rfajólo si po bótén Galilea né, tabóngo Yesusé nécegé si faje, “Ya nte Ya I yama Jou Lahatala ni, kyat ta riri lé Ya né nase bo rpo keé Ya néli po kyat ta rkawasa né ni, 23 bo rpuné keé Ya. Mayta ta ngané telé né, nase kpangén nmulé.”
Pocé ni motemote nesté rlongé ta néceg fajé né, wlori né tadélé kangelangé.
Yesusé nfasodoto si bo rpólés Um Sambayang ta npélóyé njé ni pajaké
24 Waktu Yesusé I re ni motemote nesté rwóm po kota Kapernaumé né. Kyate kyat ta ranfalutno Um Sambayang ta npélóyé njé ni pajak né, rfano Petrus néli se rutné i, “Nim guru njé nénpólés Um Sambayang ta npélóyé njé ni pajakc pari tisé?”
25 Bóngo Petrusé nécegé si faje, “Iya, nénpólésé.”
Waktu ta Petrusé ncung némin po umé lo né, tabóngo Yesusé nutné i ntubé, “Simoné, bo kutné awé nte, iga awé, pai ta mare npólés pajak po kolano kolano ta rkawasa po dunia nje ni wlólo nte? Si nturi óro pari kyat nésé?”
26 Petrusé ncónglo, “Mare kyat nésé, ” Tabóngo Yesusé nécegé i faje, fatuwé né. Se iga si nturi óro masike ma rpólésé le na. 27 Fajé nóté re ité, ité nte Jou Lahatala ni ntu ité, se masike ma tpólés pajak po Jou Lahatala ni Um Sambayangé njé le na. Mayta wóré! Ma sogado tfapeketé kyat ta nesté wlori né na. Se nte kané awé mfan néli po talaga njé ni bo mfatéé rór iné. Iga mót in ta faywóbno njé, mépil sumo né. Pocé nase mduk pipis ta nase nbungé iga mpólés it dórén luwé rir pajak po Um Sambayang ta npélóyé njé ni né.”