Tdéréré be Jou ni dodoto, ma tiwno re kyaté ni dodoto na
(Mrk. 7:1-23)
15
Nuéncó, reni kyat agama Yahudi ta aliran Farisi, re guru guru agama Yahudi ta runé fié Musa ni kitab abén limé né si dórén fis néli, rwóm yama Yerusalemé, se rutné Yesusé, 2 “Moke, pe sói se Anim motemote nesté rdéréré pa ité rir aturan agama né? Sababta aturan ta ité rir délut tatubé lima né rfasodoto ité né, iga bo témnómé mare téus faoré, mayta si rdéréré pa.”3 Bóngo Yesusé ncónglo, “Mewé ma fdéréré pa Jou Lahatala ni nparenta né, se maduga fdéréré be nimi délut tatubé lima nesté riri aturané né? 4 Sababta Jou Lahatala ni parenta né ta dolo faje, ‘Mewé mare langlongo mi fié po nimi moke re neke nesté ni,’ Bóngo, ‘Pai ta nfakcegé ni moke pari ni neke njé, nase rfasól i sogado nmóté.a 5 Mayta mewé ga ffasodoto kyaté né nésé, se fané si róri sói néli ta bo rgali riri moke pari riri neke nesté né, ma rpo si na, rfara keé bo rpeé riri sadaka po Jou Lahatala ni. 6 Mewé nimi dodoto ta néi, tadolo fané si bo ma rgali riri moke pari riri neke nesté na. Iga fpe fajé necé fdéréré pa na Jou Lahatala ni parenta né, se maduga fdéréré be menimi aturané né le. 7 Ee, Mewé kyaté-kyat ta fmalólé né! Sói ta tatubé lima Jou Lahatala re néceg po nabi Yesaya ni Buké wlólo né fatuwé ro, ta ni glio né tadólo faje,
8 ‘Kyat ta nte rtail Ya né maduga be po sumori lo,
mayta po wlori wlólo né ralówé keé Ya.b
9 Rtail Ya né reni ngale gélesó pa,
sababta ta si rfasodoto né Ya nik dodoto pa,
mayta kyaté ni dodoto.’ ”
Méitén ta nfalélé it po Jou Lahatala ni
(Mrk. 7:14-23)
10 Rewóré ta néi, Yesusé nkakémé kyat ta félé se nécegé si faje, “Flongé fafié ta Ya kécegé nte bo fsae! 11 Sói néli ta tfasung po sumoré lo né, nfalélé it po Jou Lahatala ni pa. Mayta ta tcópné tdélé po sumoré lo né, necé ta nfalélé ité.”
12 Rewóré ta néi, Yesusé ni motemote nesté rfano I néli se récegé I faje, “Guru, méitén ta méceg péséwé né kyaté kyat ta rdéréré dodoto Farisi nesté ryó ni ngale.”
13 Mayta Yesusé nécegé si faje, “Kyaté kyat ta néi rfasodoto né, kfatailo dolo téntóném ésó ta nik Moke Jou Lahatala ntóném i pa, se nuéncó nase bo népaténé keé i re ni wówo nuéncó le. 14 Se kyat Farisi nesté fajé si ro, sababta runé riri gélesó pa mayta rfasodoto kyaté. Kfatailo si né dolo kyat ta rébyafé se rtuda ta rébyafé nóté se nase farimé si bo rémnap po lopé wlólo.”
15 Pocé bóngo Petrusé nécegé Yesus faje, “Guru, ta méceg péséwé né ni ngale sói? Coba mfébingo amé.”
16 Bóngo Yesusé nécegé si faje, “Alli! Se mewé ma fsaé pafule ni ngale né? 17 Mewé nase re funé, sói ta tó re tinémé né, ncung po snoré wlólo se tfané keé nmulé to? Ta néi pa ta nfalélé ité né. 18 Mayta méitén ta lé ta técegé se ncópén yama wloré wlólo né, necé ta nfalélé it po Jou Lahatala ni. 19 Sababta, méitén ta ncópén yama wloré wlólo né iga lé tadolo nte: rfapuné, ryó sólé, rdéréré be riri nafsu ta pélóyé, rfalewésé, rmalólé re réceg be kyaté. 20 Se farimé ta lé né, necé ta tcól po Jou Lahatala ni. Mayta iga bo témnómé ga téus faor pa, necé nfalélé it po Jou ni pa.”
Yesusé n-gali mépin Kanaan ta ndélé Jou fié njé
(Mrk. 7:24-30)
21 Rewóré ta néi, Yesusé I re ni motemote nesté rfatoléné keé géwgów ta néi, se rfan néli po bótén ta nérakén kota Tirus re Sidoné né. 22 Pocé reni mépin isó njé kyat Kanaan i, i lima bótén ta néi, se kyat Yahudi i pa. Nwóm po Yesus ni se nécgé né nfakwat i, “Moke, kolano Daudé ni ntu re kbu ta Awéc, mmasié ya nte! Ntig mépiné njé haiwan léo ncung i se ta délé nkangelangé!”
23 Mayta Yesusé ncónglo i pa. Bóngo re ni motemote nesté rfano I néli se récegé faje, “Guru, mané mépiné njé bo néléy i su, bo ma ngagélay po tooré lo le na.”
24 Mayta Yesusé nécegé si faje, “Jou Lahatala nané Ya kwómé nte, bo gali be ité rir kyat Israel ta kfatailo si dolo domba ta rcól yéféné se rdélo riri yéfén nésé né.”
25 Mayta masike Yesusé néceg fajé ma, mépiné njé i néli le, ncuba nóp Yesus sóo lo né, bóngo néceg faje, “Moke, mgali ya su pa!”
26 Pocé bóngo Yesus nécegé i faje, “Awé nte kyat Israel aw pa, se iga bo gali awé, necé dolo lé, Ya kfatailo dolo yomya né róri roti ta re rfasadia né se kyó ga kafao keé yawé né róri.”
27 Mépiné njé ga ncónglo Yesus faje, “Molén Awé Moke, mayta yaw ta si po meja pópo ne ma raróri riri wlóné njé nó mnómé gléo ta mnap nóp po róri meja pópo lo né.”
28 Pocé, Yesusé nlongé ta mépiné njé néceg fajé né, tabóngo nécegé i faje, “Neke, awé fatuw-fatuw ta mdélé Ya, se sói ta maroré né ndadi i ro.” Po waktu ta néi óro, mépiné njé ni ntu njé nfié i.
Yesusé nfafié kyat félé ta rpisé né
(Mrk. 7:31–8:10)
29 Rewóré ta néi, Yesusé I re ni motemote nesté rfatoléné keé gawgów ta néi, se rfané ncófe si néli po talaga Galilea lapo lo né. Ga rawét si néya po métété papo lo se réntolén si pocé. 30 Po waktu ta néi, reni kyat félé rwómé ruté riri dél ta rkafé, ta rlugu, ta rébyafé, ta rmémewé, re kyat iglé nóté ta re riri paspisé sói le, rut si néli po Yesus usno lo né bóngo nfafié keé si ndimé. 31 Se kyat félé ta si pocé né, rherané sababta rémnawé kyat ta rmémewé né re bisa rméiténé, ta rlugu né ma rfié, ta rkafé né ma rfané, ta rébyafé né ma bisa rémnawé. Tabóngo rcuba re rtail Jou Lahatala, Jou ta kyat Israelé né rancuba I njé.
32 Pocé, bóngo Yesusé nkakémé ni motemote nesté se nécegé si faje, “Ya kmésié kyat ta félé nte. Re ngané telé ro si re Ya pote né, se nte re róri mnóm pana. Ya wlegé néfeno pa, bo kané si réléy re snori ta mémowélé né. Kdodato be po yéféné lo ga rémgaé si.”
33 Tabóngo ni motemote nesté récegé I faje, “Moke, gawgów ta ntei nélówé pnuwé, ga bo tduké róré mnóm fawa lima bo téfao kyat ta féléo i nte?”
34 Mayta Yesusé néngóto si bóngo nutné, “Nómi roti ta futé né péfisé?”
Si rcónglo I, “Péfité, re iné mya séfis néli.”
35 Pocé tabóngo nané kyat ta félé né réyówé góori bo rtolén nóp bétbété lo né. 36 Re rtolén nópé, bóngo néyó roti péfit re in séfis néli nesté, se néceg tarimakase po Jou Lahatala ni. Rewóré ta néi, nfalkelsé roti re nfamkimsé iné né, bóngo npo ni motemote nesté se rfanténo po kyat ta félé né. 37 Bóngo farimé si rémnóm sogado rmesé ndimé. Rémnómé rewóré, ga ni motemote nesté rfajolo mnómé gléo né, ni féléo farimé téglas péfité né rbékbaké ndimé. 38 Kyat ta rémnóm po waktu ta néi, ni kyat tut móné le farimé calén fóté. Necé rétén mépin re yomya né pafule. 39 Rewóré ta néi, bóngo Yesusé nané kyat ta félé né réléyé. I re ni motemote nesté ga ncapél si po yel esó se rfan po bótén ésó ngósno Magadan.