Rfamót Yohanes ta nénbaptisé kyaté njé
(Mrk. 6:14-29; Luk. 9:7-9)
14
Po waktu ta néi, Herodesé ta ndadi kolano po bótén Galilea, se nlongé ta kyaté né réfétén Yesus néli re lima né. 2 Tabóngo néceg faje, “Alli, Yesusé njé, nihalé Yohanes ta nénbaptisé kyaté njé tatubé re nmóté se npangéné nmulé é! Ta mulo, ga reni kawasa se bisa npe mujizat-mujizaté né!”3-5 Kolano Herodesé néceg fajé né, sababta ngané fis lima, i ta nané rgó Yohanesé se rpiténé keé i re rante ga rfasungé keé i po bui wlólo. I npe fajé né sababta kolano Herodesé nyó Herodiasé se néfsóo nó i, padahal ta Herodiasé njé re néfsóo Filipusé, Herodesé ni fténo tuo i. 4 Se Yohanes ncawan Herodesé né nécegé i faje: ‘Moke, awé nte re msólé, sababta re myó keé nim tarino Herodiasé se mafsóo nam i. Herodesé nlongé ta néi tabóngo nmóé i se nané ni kyaté né rgó Yohanesé bo rpuné keé i mayta némtaté kyat ta félé né, sababta kyat ta néi runé Yohanesé njé nabi ta nénfawómo Jou Lahatala ni faftóté njé.
6 Ta Herodesé npe ni hari jadi né, Herodiasé ntu mépiné njé ncawél po Herodesé i re kyat ta félé né usnori lo. Ncawél né fié, se Herodesé ta délé mgo wlo. 7 Se néjaji né sogado ncasi, “Bo yomya njé néror sói le nase npo ndimé.”
8 Pocé bóngo yomya njé ni neke nané i nfan po Herodes ni bo néceg faje, “Ya kéroré bo Yohanes baboko njé mpe i po baki papolo bo mdo nik i, nete óro po kyat ta félé nte riri usnori lo nte.”
9 Herodese nlongé ta yomya mépiné njé néceg fajé né, wlo njé ta délé nkangelangé. Mayta, nmóyo ni jaji ta re ncasi po kyat ta félé usnori lo né, se nané ni kyaté né bo rpo le sói ta yomya mépiné njé néroré né. 10 Pocé bóngo ni kyaté né si néli bui lo, se réwetés keé Yohanes béboko njé. 11 Réwetés i rewóré, bóngo rpe i po baki lo, ga rpo yomya mépiné njé se nut i néli po ni neke ni. 12 Yohanesé ni motemote nesté rlongé ta Yohanisé re nmóté né, tabóngo rwómé ryó ni mayaté njé se rput i. Rewóré ga rfané se rfabingo Yesus ta Yohanesé re nmóté né.
Yesusé nfamnóm kyat calén lim re glé
13 Yesusé nlongé ta Yohanesé re nmóté né, tabóngo I re ni motemote nesté ncaplo yelé, se rfan si po géwgów ta béklingéné bóngo nélówé pnuwé né bo nkumél I pocé. Mayta waktu kyat ta félé runé ta néi, bóngo rcópén si po riri kota kota né se rfajalé I, rlongén si néli bo rfapdipéné rdé I. 14 Waktu ta Yesusé tagare ntebé po yelé lo se nélew bóténé lo né némnawé kyaté né félé, se nmasié si. Tabóngo nfafié keé kyaté-kyat ta rpisé né.
15 Ta ngénngané njé bo ncep nópé né, Yesusé ni motemote nesté rwómo I néli, se récegé I faje, “Guru, gawgów ta ntei nélówé pnuwé, se ta fié né macego kyat ta félé né nfan po pnuwé re pnuwé bo rgoné rori mnómé.”
16 Bóngo Yesusé ncónglo si, “Wóré, ma fané si rfan na. Mewé ro ta bo fdo si mnómé.”
17 Ni motemote nesté ga rcónglo I, “Alli, ga mam yéléné nte maduga roti pélim re in séluwé.”
18 Pocé bóngo Yesusé nécegé si faje, “Pana fajé fut lima ro.”
19 Rut néli, bóngo Yesusé nané kyat ta félé né réyówé góori bo rtolén nóp bétbété lo né. Pocé bóngo nyó roti pélim re in séluwé nesté, nékngól néya langété lo, néceg syukur po Jou Lahatala ni. Rewóré ga nfalkelsé roti né se npo ni motemote nesté bo rfanténo kyat ta félé né. 20 Pocé bóngo farimé si rémnóm sogado rmesé. Rémnómé rewóré, Yesusé ni motemote nesté rfajólo mnómé gléo né, ni féléo lalógéy yófésó re paluwé. 21 Sadangta kyat ta rémnómé né nihalé calén limé, necé tagare móné, rfaétno mépin re yomya né pafule.
Yesusé nénfan I po wóé pépo lo
22 Rewóré ta néi, Yesusé nané ni motemote nesté rcaplo yelé, bo rtubé néli po talaga njé ni faspalé. Kyat ta félé né ga, nané si réléy su. 23 Kyaté né re réléy si ndimé se Yesusé nkumél I, bóngo nawét I néya po métété lo, bo nméiténé ndé Jou Lahatala. Nméiténé ndé I pocé né sogado dorémé. 24 Yesusé ni motemote nesté ga re rélów nélaw po talaga njé ni fapéluné né. Pocé moré re méwruwé njé neslo si se bo rlé, rtomo róri moré njé se.
25 Ta rakno bo malówé né, Yesusé nwómo si néli, nénfan I po ya wóé pépo lo. 26 Rémnaw ta nfano si lima né, ta délé rémtaté se réceg faje, “Alli, njé hantu laut i né ga!” Bóngo rgagélayé.
27 Yesusé nlongé ta rgagélayé né, bóngo nkakmé néli, “Ffaténgténgéné mewé. Ma fémtat na. Neje Ya!.”
28 Petrusé ncónglo i néli, “Guru, bo fatuw ta njé Awé, mané ya kfan néli Aw ni, kdé po wóé pépo lo.”
29 Yesusé ncónglo i, “Iya, aw lima ro.”
Pocé bóngo Petrusé nfateglo i nóp wóé lo se nfan néli Yesus ni. 30 Nfan néli nwómo i pafule, né ga nbósém moré njé nbabubé se némtaté, tabóngo bo némdiré, se n-gélayé, “Guru, mgali ya!”
31 Tabóngo Yesusé nfamalé ncélok Petrus fao né se nélóngé i néya, ga nécegé i faje, “Petrusé, Ya kpe sogado mfan po wóé pépo lo né, pe sói se wlemé njé nfatutén sogado mdélé Ya fatuw-fatuw pa?”
32 Rewóré ta néi, si dórén luwé rcapél néya yelé lo, télél be moré njé ntébén i maklóngéné. 33 Bóngo farimé kyat ta po yelé wlólo né rcuba Yesusé, se réceg faje, “Guru fatuwé, Awé Jou Lahatala ni ntu Awé.”
34 Ta re rwóm po talaga njé ni faspalé né, rdime nélew po pnuw Genesaret. 35 Kyat fapnuw ta pocé né rfayal ta nwómé njé Yesusé, bóngo rfabéngbingé po pnuw re pnuwé. Se kyaté né rlongé bóngo rwóm lima, rut farimé kyat ta rpisé né po Yesus ni. 36 Kyat ta rwómé né, réroré bo rétané be Yesusé ni juba wómo le bo rfié. Bóngo farimé ta rétané i né rfié si ndimé.