Matius 13

Adeade géy ta résyapé po géwgów dirén fóté lo

(Mrk. 4:1-9; Luk. 8:4-8)

Po ngénngan ta né i óro, Yesusé ncópén tóma umé njé ni, bóngo nfan néli po talaga Galilea lapo lo né se néntolén I pocé. 2 Kyat ta félé né ma rwómé se rfajólo si po I ni. Pocé Yesusé nfan nélawé se ncapél I po yelé lo bóngo ntolén pocé, kyat félé né ga rosél po talaga lapo lo né. 3 Pocé Yesusé nfasodoto si félé, npe adeade né néceg faje, “Reni kyat isó npe nó bété se nfané nésyapé géy po no bété lo.

4 Waktu ta kyaté njé nésyapé géyé né, reni ta mnap nóp po yéfén lapo lo. Se mané ta ranopé né rwóm lima ga rétiréyé róri ndimé. 5 Iglé né mnap po bétbét ta reni lóy félé se ni bétbété né ménifésé se géy mnap pocé né mlale ntubé. 6 Mayta iga ngénngané ntulo bóngo mlay i se nmóté sababta ni wówo né ncung nóp lów pa.

7 Géy iglé nóté mnap po gamuné ta gémgaméné lo. Se ntubé néya né nfadéréré se gamuné né néyémé keé géyé ta re ntubé né sogado nmóté.

8 Mayta reni géy iglé ta mnap po bétbét ta fié lo. Se ntub néya né békboké, sogado pyono ma félé. Reni ta pyono sogado witéncó néli, reni ta yóféwoném néli, ta yófétel néli.

9 Se flongé fafié bo fisén po wlomi wlólo!”

Yesusé ni motemote nesté rutné Yesusé, “Mpe sói se mfasodoto si né mpe be adeade le?”

(Mrk. 4:10-25; Luk. 8:9-18)

10 Rewóré ta néi, Yesusé ni motemote nesté rférakné si néli se rutné I, “Guru, pe sói se Awé mfasodoto kyat ta félé né, mpe be adeade?”

11 Tabóngo Yesus ncónglo, “Jou Lahatala, npe fajé bo bisa funé re fsaé ta nkawasa dolo Kolano I né, mayta iga po kyat iglé né, tisé. 12 Sababta kyat pai ta nfaméylongé Ya nik méiténé ga ndéréré, Jou nase n-gali i se ta délé nuné lebe félé nóté. Mayta pai ta nfaméylongé ga ndéréré pa, sói ta i re nuné re ncae né, Jou Lahatala nase nyó keé ndimé. 13 Se ta mulo ga kfasodoto si né kpe adeade. Sababta masike re rémnaw ta Ya kpe né, mayta rcae pa. Masike rfaméylongé Ya nik méiténé né, mayta dolo rcae pa nóté. 14 Sói ta re ndadi i po kyaté kyat ta nte i né, tatubé lima lesu Jou Lahatala re néceg po nabi Yesaya ni ta glio faje,

‘Masike re faméylongé fafié, mayta fsae pa le.

Masike re fémnaw fafié mayta funé pa nóté ni ngale né.

15 Sababta kyaté kyat po bangsa wlólo nte wlori né matué, bóngo langlongori ma lé,

rémnaw Ya ma régiwé si nésé.

Rdodato nase rémnaw re rlongé bóngo rcae,

se nase rngali si bóngo rpolén si po Ya ni,

se kfayangésé keé róri sélsólé né.’

16 Mayta mew ta fdéréré Ya né, goné mewé, sababta re fémnaw re flongé ta Ya kpe nte se re funé re fsaé fié. 17 Fatélolmo mewé! Tatubé lima né reni nabi re kyat ta rpe be ta rmétegél po Jou Lahatala usno lo né, wlori ncuka bo rémnaw re rlongé sói ta mewé re fémnawé re flongé nte mayta rdótlé pa.”

Yesus ntebo adeade géy po géwgów dirén fóté ni ngale

(Mrk. 4:13-20; Luk. 8:11-15)

18 Yesusé nécegé nóté, “Se flongé fafié, ta Ya bo kfébingo mewé, adeade géy ta nésyapé po gawgów dirén fóté né ni ngale. 19 Géy ta mnap po yéféné lo né, necé tadolo kyaté kyat ta rlongé Jou nkawasa dolo Kolano I, mayta rcae fafié pa. Se rlongé Jou ni méiténé né rewóré tabóngo setané né riri kolano né rwómé ga ryó keé ta po wlori wlólo né.

20 Géy ta mnap po bétbét ta reni lóyé lo né, necé ni ngale kyat ta rlongé Jou Lahatala ni méiténé né, bóngo séngséngé bóto si. 21 Mayta, méiténé né risén fafié po wlori wlólo pa, se iga reni kyat ta rwóm lima rfakangelang si bo ma rdélé méitén ta néi le na, bóngo rdélé Jou pana.

22 Géy ta mnap po gémuné ta reni gémgaméné lo né, necé ni ngale kyat ta rlongé Jou Lahatala ni méiténé, mayta wlori kangelangé sababta ranuta be riri hidup ngénngan néya bóngo rayówé be haréta, momongo haréta njé reni ngale pa. Ni wóré nópé, Jou Lahatala ni méiténé né ma rfatélolmo si pana se ta rpe né reni ta fié pa.

23 Mayta géy ta mnap nóp bétbét ta fié lo né ga, necé dolo kyat ta rlongé Jou Lahatala ni méiténé né tabóngo rcae fié, tadolo géy ta ta pyóno fié se sogado witéncó néli, yófé woném néli re yófé tel néli né.”

Adeade iwé ta ntub po gandumé wlólo

24 Pocé Yesusé npe adeade isó nóté po kyat ta félé né ni glio faje, “Jou Lahatala nkawasa dolo Kolano I né, kfatailo dolo ade ade nje: reni légaé isó ta nésyapé gey gandum ta fié po nó bété lo. 25 Mayta dorém esó, ta kyaté né re ryénéfé ndimé, ga kyat ta ni lé légaé njé nwómé se nésyapé iwé wówo né po gandumé wlólo, bóngo nfan i. 26 Ta gandumé né ntubé se re bo pyoné né, iwé né ma re mógé nfadéréré re gandumé né.

27 Bóngo légaé njé ni kyat yabé né rwóm lima se rfabingo i, ‘Légaé, kacogoma géy ta méysapé po bété lo né géy ta fié? Pe sói se ga iwé né ma ntub pocé nóté?’

28 Légaé njé ncónglo si, ‘Kyat ta njé ni lé Ya se nésyapé nópé.’

Bóngo ni kyat yabé nesté rutné i, ‘Pana fajé, kapaténé keé iwé né, pari fawa?’

29 Légaé njé ncónglo si, ‘Matiné! Iga fépatén iwé né, nase gandumé né ma ntépatén i. 30 Se fajé óro, bo rtubé rfadéréré néya su. Sogado gandumé né re nwómo ni góo bo rfalingété, ga taga kané si rfatpatné keé iwé né, bo rpiténé ga rtapéné keé. Gandumé né ga rfajólo bo risén po ni góo lo.’ ”

Adeade géy pusó ta némyaku

31 Rewóré ta né, Yesusé néfétno kyat ta pocé né adeade isó nóté, néceg faje, “Jou Lahatala njé nkawasa dolo Kolano I, se nkawasa ni kyat ta rdéréré I né, po faywóbno né cuci le, mayta etné be ngénngané né nbóng ta rfélé kfatailo si dolo gey pusó ta némyaku po farimé géyé sekyaté né ryó iga ntóném i po bété lo né. 32 Masike némyaku, mayta ntub néya né ndadi téntóném isó ta lebe npélóy po farimé tantóném ta po bété lo né, sogado mané ta ranopé ma rfajól néli se rpe riri pup po ni séngsóngé lo né.”

Adeade ragi ta cuci le

33 Yesusé npe adeade isó nóté po kyat ta félé né tadolo faje, “Jou Lahatala njé Kolano I, bo nkawasa ni kyat ta rdéréré I né, po faywóbno né maduga cuci le, mayta étné be ngénngané né nbóng ta rfélé. Necé tadolo ragi cuci ta mépiné né njé nyó se rcapu keé re tarigu liter yóféfóté. Mayta, nawété né nfabékbaké keé góo njé.”

34 Yesusé nfasodoto kyaté ta félé né, félé be npake adeade. Bisa nfébingo si galesó pa iga npake ade ade pa né. 35 Ta mulo ga félé be npake adeade né, sababta tatubé lima lesu Jou Lahatala re néceg po ni nabi né se nlefo po Jou ni Buké wlólo ta ni glio faje,

“Ya kméiténé né kpake adeade bo kfabingo si ta Jou Lahatala ntulada dunia njé sogado nte,

félé ta kyaté né runé pafule.

”

Yesus ntebo iwé ta ntub po bét gandumé lo né ni ngale

36 Rewóré ta néi, Yesusé nfatoléné keé kyat ta félé né se néléi po umé lo. Pocé ni mote-mote nesté rwómo I se réceg faje, “Guru. coba mfabingo amé, iwé ta ntub po gandumé ni wlólo né ni ngale sói?

37 Bóngo Yesusé ncónglo si, “Kyat ta nésyapé géy ta fié né, nejé Ya, ta Ya I yama Jou Lahatala ni. 38 Iga bété njé ni ngale né kyat ta po dunia wlólo nte né. Géy ta fié né, ni ngale kyat ta lenglongori fié po Jou Lahatala ni se Jou nkawasa keé si. Iwé né ga kyat ta langlongori pa po Jou Lahatala ni se setané né rkawasa keé si. 39 Kyat ta ni lé légaé njé, se nésyapé iwé né, ni ngale setané né riri kolano njé. Kyat ta rfalingété nesté, Jou Lahatala ni nénan ta si yama soroga lo né. Ngénngan ta gandumé né re ncimo i se ringété né, ni ngale ngénngan ta dunia njé re nkiamaté.

40 Se kfatailo iwé ta kyaté né répaté né se bo réslayé né, nécé ta nase bo ndadi i po waktu dunia nje bo nkiamaté né. 41 Po waktu ta néi Ya óro, kyat ta Ya i yama Jou Lahatala ni né, nase kané nik nénan ta yama soroga lo né bo rgó kyaté-kyat ta rpe be ta lé né, re farimé kyat ta rfaftulo kyat po ta sólé lo né. 42 Se nase rwóté keé si némin po lutén ta nléblobé njé ni wlólo. Pocé fajé nase rtangés re rfakékikto be ngangori sababta tadélé rkangelangé. 43 Mayta kyat ta wlori métegél po Jou Lahatala ni né ga, nase rcung po riri Moke Jou Lahatala góo ta nkawasa dolo Kolano I né se rmanano tadolo ngénngan si. Se flongé fafié bo fisén po wlomi wlólo.”

Jou Lahatala nkakém ité bo tdadi ni kyat ité, sababta ni féyfié né ta délé pélóy po it ni!

44 “Jou Lahalata ndadi Kolano po kyat pai le ta rpo wlori néli I ni né. I ni féyfié ta néi, kfatailo dolo haréta ta délé palóy ta róléy i po bétbété lo né. Pai ta nuné ni ta fié né kfatailo i dolo kyat ta nóléy bétbété ga nduk haréta njé, séngséngé bóto i se nputo i nmulé, ga nfané nwagé keé nó harétané ndimé, se ni mulo né ga n-gono keé bétbét ta reni haréta félé njé.

45 Yesusé nécegé nóté, “Iga bo tdadi Jou Lahatala ni kyat ité bo nkawasa dolo Kolano po rir hidupé wlólo, necé ma tadolo Adeade isó njé nóté: reni kyat isó ta ni yabé né bo néyówé mustika ta fié bóngo mulo palóyé né bo n,goné. 46 Nuéncó, nduk pusó. Se nwagé keé nó haréta né ndimé bóngo ni mulo né n,gono keé re mustika njé.”

Adeade, in ta fié re ta lé

47 “Jou Lahatala Kolano I nkakémé kyaté bo rdéréré I. Kfatailo né dolo kyat ta rfalóbén po wolété lo, se ramgo iné né nae ta usé. 48 In ta po lóbén lo né félé, se rcib rcib lóbé né njé nélew po talaga lapo lo né. Pocé bóngo in ta fié né résólé se réfray po céceké lo. In ta lé né ga rwóté keé. 49 I ni ngale né, pote se néli ngénngan ta dunia njé bo nkiamaté né, Jou Lahatala nase nané ni nénan ta yama soroga né bo rfara keé kyat léo né re kyat fio né. 50 Kyat léo né nase rtéo keé si némin lutén ta nleléblobe njé wlólo se réntangésé réréngagélay, ngangori ma nénfakekikte i.” 51 Rewóré ta néi, bóngo Yesusé nutné ni motemote nesté faje, “Farimé adeade ta kéceg péséwé né fsaé pari tisé?”

Si rcónglo, “Iya re ksaé óro!”

52 Bóngo Yesusé nécego si nóté, “Ta mulo Guru agama ta rénfasodoto hukum Tauraté né, iga re rpo wlori se re rdadi Jou Lahatala ni kyat si, kfatailo si dolo kyat ta reni haréta félé: ta nóbén re ta boné. Ni ngale, iga bo rfasodoto kyaté, nase rcópné Jou ni dodoto né ndimé: dodoto ta mnuwé né le pa, mayta bóngo ta nóbéné né.”

Kyaté ta si re Yesus pnuw be isó né rlongé Yesus pa.

(Mrk. 6:1-6; Luk. 4:16-30)

53 Yesusé néfétno si adeade né rewóré ndimé, tabóngo nfané nóté. 54 Nwóm po ni pnuw Nazareté, bóngo ncung po agama Yahudi né riri um sambayangé lo se nfasodoto kyaté né. Rlongé ta nfadoto né, kyaté né télél si se réceg faje, “Beé, ni dodoto né fié, ga nuné fawa lima? Ta ga ni kawasa né ta délé pélóyé, nfafié kyat re npe mujizat ta nésé félé, nécegé le ta ndadi i ndimé! 55 Sedangta kyat ta njéi ni moke njé maduga nbasé. Ni neke njé Maria. Ni fténo né ta Yakobusé, Yusufé, Simoné, re Yudasé to?. 56 Ni rémó nesté ma rtolén pote faje. Ceh, né ga ta féléo i né bo nuné ni fawa lima?” 57 Pocé bóngo wlori piso I se rlongé I pana.

Bóngo Yesusé nécegé si faje, “Mewé fpe Ya nte dolo Jou Lahatala ni nabi tatubé né. Nabi nesté rfawómo Jou ni faftóté ta dolo Ya nte. Se po kyaté ni pnuwé né, rlongé si fié. Mayta réléy néli po si riri pnuwé lo, kyat ta fapnuwé né rlongé si pa.”

58 Kyat ta po Yesusé ni pnuwé lo né rdélé I pa, ta mulo ga Yesus npe mujizat be séfis néli le.