Lukas 4

Setané né riri kolano njé néyówé yéféné bo ntofén Yesusé

Po waktu ta Yesusé I po wóé Yordané né, Jou Lahatala ni Rohé njé re nkawasa keé I. Se nuté keé I néli po géwgów esó sésé bóto i, ta nbéklingén, re nélówé pnuwé njé. 2 Se ntolén I pocé né, ni mnuo ngané yóféfóté. Pocé setané né riri kolano njé néyówé yéféné bo ntofén I. Po géwgów ta néi, Yesusé némnóm re niném pa, se ta délé ntélóté.

3 Tabóngo setané né rir kolano njé nfano I, se nécegé I faje, “Awé nte Jou Lahatala ni ntu Awé, to? Pana fajé, mané lóyé nte ndadi roti bo mó!”

4 Mayta Yesusé wlo pa, se nécegé i faje, “Po Jou Lahatala ni buké wlólo né, rlefo faje, ‘Kyat ité nte mare témnómé, mayta necé le pa, ta nfahidup ité né.’ ”

5 Rewóré ta néi, setané né riri kolano njé nuté keé Yesus néli po géwgów esó ta délé némógé. Pocé tabóngo nfaftulo I férimé ta po dunia njé ni wlólo né. 6 Se nécegé I faje, “Férimé ta mémnawé né nase kdo nimé, sababta férimé né ya niké ndimé. Se bo kpo keé pai le ta wlegé ncuka i. 7 Se iga msuba ya, ya nase kdo nimé ndimé.”

8 Mayta Yesusé nécegé i faje, “Po Jou Lahatala ni buké wlólo ma, rlefo faje, ‘Mewé mare fsuba maduga Jou Lahatala le, sababta nejé mewé nimi Jou I, se flongé maduga I le.’ ”

9 Rewóré ta néi, setané ni riri kolano njé nuté keé Yesus po kota Yerusalemé, po agama Yahudi né riri Um Sambayang ta npélóyé njé ni. Se nuté keé Yesus néya po papungéné lo, ga nécegé I faje, “Awé nte Jou Lahatala ni ntu Awé to? Pana fajé, mpawél Aw pote se nópé ro! 10 Nase mpe gélesó pa, sababta po Jou Lahatala ni buké wlólo né, re nlefo faje,

‘Jou Lahatala nase nané ni nénan ta si po soroga wlólo né bo rfaménawé Awé.

11 Iga mémnapé, nase rtóno faori né po Aw ni bo ralóngé Aw néya,

bo sóomé né ma nétit nóp bétbét lo na.’ ”

12 Mayta Yesusé wlo pa, se nécegé i faje, “Po Jou Lahatala ni Buké wlólo ma, nlefo faje, ‘Jou Lahatala njé menimi Jou I, se ndél pa bo ftofén I.’ ”

13 Pocé, setané né riri kolano njé nécegé rewóré ndimé, tabóngo nfan i se nfatoléné keé Yesusé, bo néftón ngénngan nésé nóté ta bo ntofén Yesusé nmulé.

Yesusé nfasodoto kyaté-kyat ta si po bótén Galilea né

(Mat. 4:12-17; Mrk. 1:14-15)

14 Rewóré ta néi, Yesusé npólén I nmulé po bótén Galilea. Se Jou Lahatala ni Rohé njé nkawasa keé I. Tabóngo sói ta I npe né, kyaté-kyaté né réféténé keé néli re lima, po férimé bótén ta pocé né. 15 I nfasodoto po kyat Yahudi né riri um-um Sambayangé lo, se férimé kyat ta pocé né rtail I.

Kyat Nazareté né wlori pa bo rlongé Yesusé ni dodoto

(Mat. 13:53-58; Mrk. 6:1-6)

16 Nuéncó, Yesusé nfan po pnuw Nazareté. Po pnuw ta njéi, I némyaku sogado npélóy pocé. Se iga ngénngan Sabaté, ncung I po agama Yahudi né riri um sambayangé lo, ta dolo I re nanénpe né. Pocé, nosél néya bo nbaca Jou ni méitén né. 17 Tabóngo kyat ta pocé né, rpo I nabi Yesaya ni kitabé njé. Se nésaén kitab ta ralilé i njé nópé, nduk méitén ta ni glio né ta dolo faje,

18 “Jou Lahatala ni Rohé njé, re i po Ya ni.

Sababta I re npili Ya re nané Ya bo kéfétén Habar ta Fié po kyaté-kyat ta reriri reróri pa né.

Re nané Ya 19 kfébingo kyaté-kyaté né tadolo faje:

kyat ta si po bui wlólo né, bo nfabebasé keé si,

bóngo kyat ta rébyafé né, nase bo rémnawé nmulé,

bóngo re nané ya kfabebas kyaté-kyat reni kyat nésé rfakangelangé keé si né,

re nané ya bo kfébingo kyaté-kyaté né, ta ngénngan péséwé nte Jou Lahatala bo nfabebasé keé kyaté-kyaté né re nwómo i ro.

Jou Lahatala ni masié re gogoru né ta tadélé, npélóy po ni kyaté-kyaté né.”

20 Yesus nbaca kitabé njé rewóré, tabóngo nélilé keé i nmulé se npo i néli po kyat ta rpe yabé pocé né, tabóngo ntolén I. Se férimé kyat ta si po um sambayangé lo né, réngóto I ndimé. 21 Tabóngo Yesusé nécegé si faje, “Férimé ta re flongé Ya kbaca po kitabé wlólo né, ngénngan pésénte óro re ndadi i.”

22 Se férimé kyat ta pocé né, wlori ncuka ta I nécegé né. Sababta ta délé fié. Mayta rewóré ta néi, réceg faje, “Njé maduga Yusufé ni ntu I le ga?”

23 Pocé tabóngo I nécegé si faje, “Mewé nte, nihalé bo féceg méitén esó po Ya ni né, ni glio faje, ‘Sousou ta Awé, mfafié Aw su.’ Iga mewé féceg fajé, necé ni ngale, bo fané Ya kfafié kyat po niké pnuwé lo, ta dolo Ya re kpe po pnuw Kapernaumé né. 24 Mayta ffatélolmo mew fafié ta bo kécegé nte: nabi ta, rarénfawómo Jou Lahatala ni faftóté ta dolo Ya nte, iga po kyaté ni pnuwé né, rlongé si fié. Mayta réléy po riri pnuwé lo né, kyat fapnuwé né rlongé si pa. 25 Se ta Ya kécego mewé né fatuwé, necé tadolo adeade: Tatubé lima se nabi Elia né, félé pa ni mnuo taun nuén tel re sni séwonémé. Sogado po férimé bótén Israelé né, reni mnóm pa na se nfatélóto i. Pocé po Israelé né, reni mépin balo né félé. 26 Mayta, Jou Lahatala nané nabi Elia nfan po kyat Israelé né pa, se maduga nané i nfan po mépin balo isó, ta kyat Israel i pa, ntolén po pnuw Sarfat, ta po bótén Sidon. 27 Fajé nóté re nabi Elisa tatubé lima né. Ta i po Israelé né, reni kyat félé ta rpado, mayta isó pa ta Jou Lahatala nfafié i. Se maduga nfafié be isó ta kyat Israel i pa, mayta kyat Siria i. Ngósno Naaman.”

28 Se férimé ta si po agama Yahudi né riri um sambayangé lo né, rlongé ta Yesusé néceg fajé né, ta délé rcawané. 29 Pocé tabóngo rosélé ga rfaungé keé I. Se rcópné keé I po kota njé ni se nétó, ga rut I néli po maltepé lapo bo rétófé keé I nóp tariré lo. 30 Mayta Yesusé nfan I, ndé I po kyat ta félé né riri fapéluné se nfatoléné keé si.

Yesusé nfaungé setan ta ncung po kyaté isó ni

(Mrk. 1:21-28)

31 Rewóré ta néi, Yesusé nfan po kota Kapernaum, ta po bótén Galilea né. Étné be ngénngan Sabaté, I nfasodoto kyaté-kyat ta pocé né. 32 Se rlongé ni dodoto né, rherané, sababta nfasodoto né reni kawasa ta délé pélóyé.

33 Po riri um sambayangé lo né, reni kyat isó njé setané ncung i, se n-gélay, 34 “Eh Yesus kyat Nazaret! Amé kféyal Awé. Awé ta mwóm yama Jou Lahatala ni. Mwómé nte bo mpe am fanfawa? Bo mfamót amé?”

35 Mayta Yesusé ncawané, se n-galao setan ta ncung po kyaté njé ni né, bóngo nécegé i faje, “Mfaténténgén awé! Msópéné!”

Tabóngo setané njé nébépsé kyaté njé po kyat ta félé né usnori lo, tabóngo setané njé ncópéné, mayta kyaté njé npe gélesó pa.

36 Se férimé kyat ta pocé né rémnawé se rherané, bóngo rfalécego faje, “Alli, ta I nécegé né, fié re birahi ndimé! I ni kawasa né ta délé pélóyé. Nfaungé keé setané né tabóngo rcópéné.” 37 Se sói ta Yesusé npe né, re nlaja i po bóténé njé ni, sogado pua re pua.

Yesus nfafié Simoné ni kmo mépin re kyat iglé nóté

(Mat. 8:14-17; Mrk. 1:29-34)

38 Po waktu ta Yesusé I re ni motemote nesté rcópén tóma Um Sambayangé lo né, tabóngo rfan po Simoné ni umé lo. Néli faje, Simoné ni kmo mépiné njé nlélété, se kyat ta si pocé né réroré bo Yesusé nfafié i. 39 Tabóngo Yesusé nosél po pégelé njé ni lapo lo, se ta néi óro, pégelé njé re nfié i tabóngo npangéné ga nléléyan si.

40 Iga ngénngané njé re ncepé, kyaté-kyat ta rtolén pocé né rwómé rut férimé kyat ta rpisé né po Yesus ni. Ta riri péspisé sói le, se Yesusé nétané si tabóngo rfié si. 41 Re nfaungé keé setan ta rtolno kyaté né, se rgélay faje, “Awé Jou Lahatala ni ntu Awé!” Mayta Yesusé ncawan si, bóngo npo si fié pa bo rméiténé. Sababta si re runé, I kolano ta Jou Lahatala re néjaji nwómé bo nfasalamaté kyaté njé.

Yesusé nfawómo Habar ta Fié po kyat Yahudi né riri um-um sambayangé lo

(Mrk. 1:35-39)

42 Ni ngénngan móné, ta tamamóné i lesu né. Yesusé nfatoléné keé kota njé, se nfan I po géwgów ta béklingéné lo. Mayta kyaté-kyaté né réyówé sogado rduk I. Malil be re rduk I né, wlori pa bo nfatolén si. 43 Mayta I nécegé si faje, “Ya nte mare kfan po kota ta iglé nóté, bo kfawómo Habar ta Fié ta Jou Lahatala bo nkawasa dolo Kolano po ni kyaté-kyat ta rdélé I né. Sababta Jou Lahatala nané Ya kwóm po dunia njé ni wlólo né, bo kfawómo Habar ta Fié.”

44 Pocé se néli, Yesusé nfané nfawómo Habar ta Fié po kyat Yahudi né riri um-um sambayang ta po bótén Yudea né.