Yesusé nfafié kyat isó ta npado njé
(Mrk. 1:40-45; Luk. 5:12-16)
8
Yesusé nduén yama métété njé ni, se kyaté né tadélé rfélé ta rdéréré I né. 2 Po waktu ta néi, reni kyat isó njé npado se nwómo Yesusé. Pocé, ntiki buku nóp Yesus usno lo né bóngo ncuba I, se néceg faje, “Moke, iga wlemé, Awé bisa mfafié ya.”3 Pocé tabóngo Yesusé nétané ni fao né se nécegé i faje, “Ya wlegé bo mfié. Se nte mfié awé ro!” Tabóngo po waktu ta néi óro, kyat ta npado njé nfié i. 4 Rewóré ta néi, Yesusé nécegé i faje, “Mfatalolmo é, ndél pa bo méfétén po kyat pai le, ta Ya re kfafié awé nte. Mayta mfan néli po imamé njé ni, bo némnaw ta awé re mfié né, bóngo npo nim sadéka haiwan faisó bo imamé njé ntapén i tadolo tatubé lima se nabi Musa nané méwé fpe né. Mpe fajé né bo kyaté kyaté rémnaw re runé ta fatuw fatuwé awé re mfié”
Tentara né riri kapala njé ndélé Jou Yesus fié
5 Po waktu ta Yesusé nwóm po pnuw Kapernaumé né, pocé tentara Roma né kompi esó riri kapala njé nwóm po Yesus ni. Se néror po I ni faje, 6 “Moke, po nik umé lo nik yomya yabé isó npisé, sogado ni badané né re nmóté se bisa nfaméyawén i pa na, se tadélé nkangelangé.”
7 Bóngo Yesusé nécegé i faje, “Iya, pana fajé Ya bo kfan néli po nim umé lo bo kfafié i.”
8 Mayta tentara né riri kapala njé nécegé I faje, “Alli, Moke ta Awé, ma mwóm po nik umé lo le na, sababta ya nte pantas pa bo ktarima Awé né. Mayta masike méceg be méitén faesó pote ma nase nfié i nik yomya yabé ta npisé njé. 9 Sababta ya kuné, Awé bisa mparenta kyaté bo rfié, nfamgo re amé tentara ma bisa kparenta kyaté. Ya ma renik kapala ta nané ya, re nik yomya yomya ta rlongé ya nóté. Se iga kparenta i, ‘Mfané!’ nase nfané. Iga kparenta ta iglé né, ‘Mwómé!’ nase nwómé. Re iga kparenta ta iglé né, ‘Mpe nte!’ nase npe nóté sói ta ya kparenta i né.”
10 Pocé Yesusé nlongé ta néceg fajé né, tadélé mgo wlo, se nécegé kyat ta rdéréré I né faje, “Flongé fafié ta Ya kécego mewé nte. Po farimé kyat Israelé né kduké kyat isó pafule ta ndélé Jou Lahatala fié ta dolo kyat ta i lima bangsa Roma nje né! 11 Se fatélolmo mew fafié, nase reni kyat félé ta kyat Yahudi si pa po gawgów pua le po dunia nje ni wlólo nte, lima ngancóo sogado po ngancepo né, bo rdadi Jou Lahatala ni kyat si, se bo rtoléné rémnóm re Abrahamé, Ishaké re Yakob po Jou Lahatala góo ta nkawasa dolo Kolano po ni kyaté-kyat ta rdélé I né. 12 Mayta masike bangsa Yahudi ta Jou Lahatala re npili si ntube bo rdadi I ni kyaté-kyat si né, reni kyat isó pa ta si ntéli. Se Jou Lahatala nase nwóté keé si po dérorémé wlólo. Pocé, nase raréntangés re tadélé rkangelangéa.”
13 Rewóré ta néi, Yesusé nécegé tentara né riri kapala njé faje, “Wóré, nte méléyé ro moke! Sababta awé re mdélé masike Ya kmaitén be pote ma, nim yomya yabé njé nase nfié. Se nte re nfié sababta awé re mdélé.” Po waktu ta néi óro, tentara né riri kapala njé ni yomya yabé ta npisé njé re nfié i.
Yesusé nfafié Simoné ni kmo re kyat iglé nóté
(Mrk. 1:29-34; Luk. 4:38-41)
14 Rewóré ta néi, Yesusé nfan po Petrusé ni umé lo. Se ncung néminé ga némnaw Petrusé ni kmo mépiné njé nénbóy i, nlélété se. 15 Pocé Yesusé nétané pégelé njé ni fao né, se nfié i. Tabóngo pégelé njé npangén néya se nfépelé wluné bo Yesusé némnómé.
16 Po waktu ta re bo darorémé né, reni kyat ta rwómé rut kyaté-kyat ta setané ncung si né po Yesus ni, tabóngo Yesusé nfaungé setan-setané né maduga néceg be méitén cuci se rcópén si ndimé. I ma nfafié férimé kyat ta rpisé né. 17 Férimé ta Yesusé npe né, necé re ndadi tadolo sói ta Jou Lahatala re néceg po kitab nabi Yesaya né, ni glio faje,
“I ta nfafié keé ndimé ité rir péspisé sói le.b”
Iga bo tdéréré Yesusé né, mare ta fatuw-fatuwé
18 Waktu Yesusé némnaw kyat ta félé né rfaljelé I, tabóngo nané ni motemote nesté rarué yelé né bo rlué si néli po talaga faspalé. 19 Pocé reni guru agama isó ta nuné fié, Musa ni kitab abén limé njé nwóm po Yesus ni, se nécegé I faje, “Guru, ya nte bo kdéréré Awé. Masike Aw po géwgów pua le, nase keé Aw pa.”
20 Bóngo Yesusé nécego i né npake adeade isó njé ni glio faje, “Iga yaw banga né re góori ta bo ryénéfé, fajé nóté re mané ta ranopé né, si ma re riri pupé. Mayta Ya nte kyat ta Ya I yama soroga lo né, renik yényénéf góo pa.”
21 Pocé reni kyat nésé isó nóté ta ndéréré Yesusé njé, nécegé Yesus faje, “Moke, mpo ya fié bo kputé nik moke su, rewóré ga kwóm lima bo kdéréré Awé.”
22 Mayta Yesusé nécegé i faje, “Kyat ta rdélé Ya pa né kfatailo si dolo kyat ta re rmóté né. Se fajé bo si óro ta rpe riri kuburé né, mayta awé lima bo mdéréré Ya ro.”
Yesusé nfatébén moré re méwruwé
(Mrk. 4:35-41; Luk. 8:22-25)
23 Rewóré ta néi, Yesusé rcapél I po yelé lo, pocé bóngo ni motemote nesté ma rdéréré I se rcóbél si. 24 Po waktu ta si po talaga lo né, télél be rato njé ntebé re méwruwé nawét sogado wóe ncung po riri yelé njé ni. Mayta po waktu ta néi, Yesusé nyénéf I. 25 Se ni motemote nesté réi I, bóngo récegé I faje, “Alli, Jou! Mgali amé. Ité nte bo tmóté ya!”
26 Pocé tabóngo nécegé si faje, “Ee, fpe sói se fémtaté? Mewé nte fdélé Jou né maduga cuci le.” Bóngo nosél néya se nécegé moré re méwruwé né re gli ta pélóyé, “Ftébén óro!” Bóngo po waktu ta néi óro, moré re mawruwé njé ntébén i, se talaga njé ma tadélé nmaklóngén i.
27 Pocé ni motemote nesté rémnawé né rherané, bóngo rfalécego, “Nfatébén moré re méwruwé né tabóngo ntébéné, ndéréré ni parenta né se. Kyat ta njé pai, sogado moré re méwruw ma ntébéné?”
Yesusé nfafié kyat séluw ta setané ntolno si nesté po bótén Gadara
(Mrk. 5:1-20; Luk. 8:26-39)
28 Si rwóm po talaga njé ni féspalé, po kyat Gadara né riri bóténé lo. Pocé reni món séluwé né, setané ncung si. Se kyaté né rémtaté keé si, se raréndé pocé pa. Pocé télél be si dórén luwé né rcópén lima kubur lóyé lo né, rwóm po Yesus ni. 29 Bóngo setan ta rcung si nesté rméiténé né rfakuat si, se réceg faje, “Ado, Jou Lahatala ni ntu ta Awé, mwóm lima nte bo mpe am fawa? Dunia njé nkiamat pafule, ga bo mfasusa keé amé ro né?c”
30 Po li fajé, reni bowé né tadélé rfélé raréyówé róri mnómé. 31 Pocé setané nesté rérór po Yesus ni, “Iga bo mfaungé amé, ta fié mané amé ksung po bowé nesté ni.”
32 Bóngo Yesus nécegé si faje, “Iya, ffan néli óro!” Tabóngo rcópéné se rfan néli ga rcung si po bowé nesté ni. Télél be bowé né nfasérero i néli po tériré lapo lo né, se férimé ryóg si nóp po talaga wlólo né bóngo rmót si pocé.
33 Pocé kyat ta réjaga bowé né rcéreré se rwóm po kota lo ga réféténé keé férimé ta rémnawé né. Réféténé keé kyat séluw ta setané ncung si se re rfié nesté. 34 Se kyaté-kyat ta rtolén po kota njé ni né, rlongé ta réféténé né, bóngo rémtaté se rcópéné ga rfan po Yesus ni. Po waktu ta re rfapdipén re Yesusé né, raroré bo Yesusé nfatoléné keé riri bóténé njé ro.”