Yesusé nfafié tentara Roma né riri kapala njé ni yomya yabé ta npisé njé
7
Yesusé nméitén po kyat ta félé né rewóré ndimé, tabóngo nfan I po kota Kapernaumé. 2 Po kota Kapernaumé né, reni tentara Roma kompi esó riri kapala njé reni yomya yabé isó njé ta délé nmésié i. Ga npisé météwé se rebo nmóté. 3 Se tentara Roma né riri kapala njé nlongé ta Yesusé nwóm po kota Kapernaumé né, tabóngo nané kyat Yahudi né riri kyat tut séfis néli rfané rkakém I bo nfafié ni yomya yabé ta npisé météwé njé. 4 Se re rwóm po Yesus ni, tabóngo rfawómo tentara né riri kapala njé ni faftóté né. Se récegé I faje, “Moke, tentara né riri kapala ta njé mgali i le. 5 Sababta kyat ta njéi, nmésié ité rir bangsa Yahudi né. Se nkumél i nané kyaté, nfawoslé rir um Sambayang isó.” 6 Tabóngo Yesusé ndéréré si néli.Se rebo rwóm po tentara né riri kapala njé ni umé lo, mayta tentara né riri kapala njé nané ni délé séfis néli rfané rwetcé Yesusé bo réceg faje, “Moke, ma mfakangelang Awé bo mwóm po nik umé lo su na, pantas pa. 7 Sababta kémtaté bo kagbono Awé né. Se masike Aw pote bo méceg méitén faesó le ma, nik yomya yabé ta npisé njé nase nfié i. 8 Sababta ya kuné, Awé bisa mparenta kyaté bo rfié, tadolo amé tentara né ma bisa kparenta kyaté. Ya ma renik kyat ta rkawasa ya nóté, bóngo ya renik yomya-yomya ta rlongé ya nóté. Iga ya kparenta nik yomya-yomya né, ‘Ffané!’ Si ma nase rfané. Iga kané nik yomya-yomya ta iglé né, ‘Fwómé!’ Si ma nase rwómé. Re iga kané nik yomya yabé ta iglé né, ‘Fpe nte!’ Si ma nase rpe sói ta ya kparenta si né.”
9 Yesusé nlongé tentara né riri kapala njé ni faftóté ta rfawómo I né, télél I. Tabóngo néngóto néli re lima po kyat félé ta rdéréré I né, se nécegé si faje, “Flongé fafié ta Ya bo kécego mewé nte. Nuéncó pafule bo kduké kyat faisó po bangsa Israel ta fatuw-fatuwé ndélé Jou ta dolo kyat Roma nje né!” 10 Po ngénngan ta néi óro kyaté-kyat ta tentara né riri kapala njé nané si nesté rpolén si néli po tentara né riri kapala njé ni umé lo né, pocé ga rémnawé ni yomya ta npisé météwé njé re nfié i.
Pégelé balo isó ni ntu njé nmóté se Yesusé nfapangén i nmulé
11 Rewóré ta néi, Yesusé nfan po kota isó ta ngósno Nain. Yesusé ni motemote nesté, re kyaté-kyat ta félé né ma rdéréré I nóté. 12 Se rfané rwóm po kota njé ni ngówéné gbono lo, télél be reni kyat félé rpó matmóté njé se rwetco pocé. Yomya món ta nmóté njé, pégelé balo isó ni ntu be isó ta njéi óro. Se kyat félé ta rdéréré pégelé balo njé bo rfané rfalputé. 13 Pocé Yesusé némnaw pégelé balo njé ntangésé né, tadélé nmésié i. Se nécegé pégelé balo njé faje, “Neke, ma mtangésé le na!”
14 Tabóngo nfarakén i néli se nétané bakél ta rpo i njé, se rtébné. Tabóngo nécegé móné mya ta nmóté njé faje, “Móné mya ta awé! Ya kécego awé, mpangén óro!” 15 Pocé néceg fajé rewóré, tabóngo móné mya ta nmóté njé npangén i nmulé. Se ntoléné, tabóngo nméiténé. Tabóngo Yesusé ntuda i se nfatebé i po ni neke njé ni.
16 Se kyat ta pocé né rémnaw ta néi, tabóngo rémtaté se rcuba re rtail Jou Lahatala bóngo réceg faje, “Nete reni nabi ta pélóy isó pote it ni nte! Fatuwé Jou Lahatala re nwómé n-gali ni kyaté-kyaté né!” 17 Tabóngo sói ta Yesusé npe né re nlaja i po férimé bótén Yudea, re po bótén ta nérakén pocé né.
Yohanes ta nanénbabtisé kyaté njé ni motemote nesté rutné Yesusé
18 Yohanes ta nanénbabtisé kyaté njé ni motemote nesté rfébingo i férimé ta Yesusé re npe né. 19 Se Yohanesé nlongé ta ni motemote nesté rfébingo i né, tabóngo nkakémé ni motemote séluwé se nané si rfan po Jou Yesus ni bo rutné faje, “Moke, Awé ro ta Jou Lahatala néjaji bo nwómé njé? Pari kyat nésé ta amé bo kéftón i njé?”
20 Pocé Yohanesé ni motemote séluwé nesté rwóm po Yesus ni, tabóngo rutné I, “Moke, Yohanes ta nanénbabtisé kyaté njé nané amé kutné, ‘Awé ro, ta Jou Lahatala néjaji bo nwómé njé? Pari kyat nésé ta mare amé bo kéftón i njé?’ ”
21 Ta Yohanesé ni motemote séluwé nesté rfan po Yesus ni né, Yesusé nfafié kyat félé ta re riri péspisé sói le. Kyaté-kyat ta roh léo ncung si. Ta rébyafé ma re bisa rémnawé nmulé. 22 Se Yesusé nécegé Yohanesé ni motemote séluwé nesté faje, “Fpóléné mew néli po Yohanes ni bo ffébingo i sói ta mewé re fémnaw re flongé né: kyat ta rébyafé re rémnawé, ta rlugu re rfané, ta rpado né re rfié, ta rpongo re rlongé, kyat ta rmóté né re rpangéné nmulé, kyat ta re riri re róri pa ma, re rlongé Habar ta fié lima Jou Lahatala ni.” 23 Bóngo Yesusé nané si rfébingo Yohanesé nóté, “Iga kyat pai ta nétóf Ya pa se ndélé Ya, kyat ta njéi ta nase tadélé séngséngé bóto i.”
24 Ta Yohanesé ni motemote séluwé nesté re rfan si né, Yesusé néfétén Yohanesé ni yabé ta npe né po kyat félé ta si pocé né, se nécegé si faje, “Nuéncó ta Yohanesé nfasodoto kyaté-kyat po géwgów ta sésé bóto i bóngo nélówé pnuwé njé, fan po i ni bo fpe sói? Bo fémnaw kyat ta pésénte néceg nésé, móné néceg nésé njé, tadolo gémuné ta moré nufé se nméyawén néli re lima njé? Nase tisé, sababta Yohanesé njé ta dolo njé pa. 25 Pari fpe sói se fan néli? Mewé ffan néli né bo fémnawé kyat ta riri kabaya fié né? Nase tiso. Sababta kyat ta ni kabaya fié re ta ni hidup fié njé góo po kolano né riri um ta pélóyé lo. 26 Se ffan néli po i ni né bo fpe sói? Mewé ffan néli bo fémnaw Yohanesé sababta i nabi ta nanénfawómo Jou Lahatala ni faftóté njé? Fatuwé ro! Mayta ffatélolmo mewé fafié, Yohanesé njé lebe npélóy po nabi-nabi ta iglé né. 27 Sababta po tatubé lima lesu, po Jou ni Buké wlólo né, nabi Yesaya re nécegé, Jou Yesusé nwóm pafule, Yohanesé ta bo nwómé ntubé. Ta Yesaya nlefo né ni glio faje,
‘Ffaméilongé fafié! Ya nase kané nik nénan isó ntubé po Awéa ni.
Kyat ta njé, ta bo nfamówé nim yéféné,
bo nfaléléyé kyaté né wlori bo rdéréré Awé.’ ”
28 Yesusé nécegé nóté, “Ffatélolmo mew fafié é, sababta po férimé kyat ta rtub po dunia nje ni wlólo né, reni isó pa ta lebe npélóy po Yohanes ni. Mayta nte, kyat pai le, masike gélesó ni ngale i pa, mayta iga kyaté njé npo fié Jou Lahatala nkawasa dolo kolano po ni hidupé wlólo, kyat ta njé i ta nase lebe npélóy po Yohanes ni.”
29 Férimé kyaté rlongé ta Yesus nécegé fajé né, masike kyaté-kyaté ta rarénfalutno pajaké nesté ma rlongé. Si farimé récegé ta Jou Lahatala npe né fatuwé ndimé, sababta si ma Yohanesé re nbaptisé keé si nóté. 30 Mayta kyat Yahudi ta rdéréré dodoto Farisi, re guru-guru agama nesté, wlori pa bo Yohanesé nbaptis si né, necé ni ngale né wlori pa bo rdéréré Jou Lahatala ni rencana po riri hidupé wlólo né.
31 Yesusé nécegé nóté, “Ya bo kfatailo kyaté-kyat ta isémé nte tadolo sói é? Kyat ta dolo sói si é? 32 Ya kfatailo si né ta dolo yomya ta étné be ngénngan né rtolén si po pasaré lo né, se rémongé re rpe riri rameangé. Bóngo rgagélayé bo rkakémé riri délé né se réceg faje,
‘Amé re kuf sulingé nte bo fsawélé, mayta mewé fsawél pa.
Amé knyanyi dolo reni métmóté, mayta ftangés pa.’
33 Mewé nte ta dolo yomya-yomya ta néi, sababta Yohanes ta nanénbabtisé kyaté njé nwómé né, flongé i pa. Yohanesé njé nó roti re niném anggur pa, mayta mewé fécegé cogo roh léo ntolno i. 34 Nte, Kyaté Ntu ta kwóm yama soroga wlólo nte, Ya kpuasa pa, se kó re kinémé le, mayta mewé fécegé cogo Ya kbabloko re kmaféinémé, bóngo kfaljilé kdé keé re kyaté-kyat ta rarénfalutno pajaké nesté, re kyat iglé ta re róri sélsól félé né. 35 Mayta masike mewé ftarima Ya re Yohanes pa, pote se néli ga nase fémnawé kyaté-kyat ta rdéréré nik dodoto né, pocé nase riri hidupé né fié re métegélé ndimé.”
Mépin ta nó sélsól félé njé, nduplo Yesus re yégét ta pépu mnó
36 Reni kyat Yahudi isó njé ndéréré dodoto Farisi, ngósno Simoné. Simoné njé nkakém Yesusé bo rémnóm po ni umé lo, tabóngo Yesusé nfan néli po Simoné ni umé lo, se rtoléné bo rémnómé. 37 Po pnuw ta njé, reni mépin isó njé kyat férimé runé ta mépin léo i. Nlongé ta Yesusé némnóm po Simoné ni umé lo né, tabóngo nfan néli nut yégét ta papu mnó tadélé mulo pélóyé né po botolé wlólo. 38 Se néli tabóngo nosél i po Yesus tóo lo ga nférakné i néli po Yesus sóo lo, se pocé ntangésé bóngo ni yowéné né ncelé nóp po Yesus sóo lo né, ga ntolésé nfamango keé re ni uté né. Tabóngo nfótén Yesus sóo né, se nduplo re yégét ta pépu mnó né léwlów-léwlów nóp po Yesus sóo lo né.
39 Pocé Simon ta nkakém Yesusé némnóm po ni umé lo njé némnaw ta mépiné njé npe fajé né, tabóngo nanuta po wlo wlólo né néceg faje, “Iga fatuw-fatuw ta Yesusé njé nabi I, nase nuné pai mépin ta nétané I, re fanfawa mépiné njé ni tabeaté né. I nase nuné, mépin ta njéi mépin léo i.”
40 Mayta Yesusé nécegé Simon faje, “Simoné, reni ta Ya bo kécego awé nte.”
Tabóngo Simoné ncónglo, “Mécegé ro, Guru.”
41 Tabóngo Yesusé nécegé Simon faje, “Reni kyat séluwé rélóm pipis po kyat isó ta nanénfalómo kyat pipisé njé. Pocé isó njé nélóm pipis salaka witén limé, ta isó njé nélóm pipis salaka yófé limé. 42 Mayta pipis ta kyat séluwé nesté rélómé né réfené rfamul pa. Se kyat ta nfalómo si pipisé njé, nféyangésé keé róri uténé né. Se iga awé, po si dórén luwé né pai ta ni mésié lebe pélóy po kyat ta nfalómo si pipisé njé?”
43 Tabóngo Simoné ncónglo, “Nihalé kyat ta nélóm pipis lebe félé njé pari ó.”
Pocé tabóngo Yesusé nécegé i faje, “Ta msóngélé né, fatuwé.”
44 Pocé Yesusé néngóto mépiné njé, tabóngo nécegé Simon faje, “Simoné, mémnaw mépiné njé. Ta Ya kwóm lima po nim umé lo né, awé mfaléléyé nik wóé ta bo kéus sóog pa, ta dolo ité re taténnpe né. Mayta mépiné nje, npake ni yowéné né se nfaberési sóo ge nte re ni yowéné né, ga ntolésé keé re ni uté né sogado mangé. 45 Péséw ta Ya kwóm lima né, awé mfótén Ya pa ta dolo taftóné kyaté rwómé se taténpe né. Mayta mépiné njé, Ya taga re kwóm lima né, nanéntébné pa nfótén sóogé nte né. 46 Awé ma mduplo re yégét ta papu mnó law-lów po babokogé lo pa, tadolo ité bo téftóné kyaté rwómé se taténpe né, mayta mépiné nje re nduplo yégét ta pépu mnó po sóogé lo. 47 Se nte, mlongé fafié ta Ya bo kécegé nte, mépin ta njei nó sélsólé ta félé né Ya re kféyangésé keé ndimé. Sogado ga kfényangésé keé nó sélsólé ta félé né, sababta mépiné nje re nfaftulo ni mésié né tadélé pélóy po Ya ni. Mayta iga kyat ta nó sélsólé né maduga cuci le, necé ni mésié né ma nase maduga cuci le, sababta maduga cuci le nó sélsól ta kféyangésé keé né.”
48 Rewóré ta néi, Yesusé nécegé mépiné njé faje, “Nam sélsólé né Ya re kféyangésé keé ndimé!”
49 Se kyaté-kyat ta si re Yesusé rémnómé né rlongé ta néceg fajé né, tabóngo ranuta po wlori wlólo né réceg faje, “I nfikire né, I Jou Lahatala ta bisa nfayangésé kyaté nó sélsólé!”
50 Mayta Yesusé nécegé mépiné njé faje, “Awé re msalamaté, sababta awé re mdélé Ya. Se méléyé ro, re wlem ta nténgéné!”