Matius 10

Yesusé nkakémé ni motemote nesté bo nané si rfafan ni yabé né

(Mrk. 6:7-13; Luk. 9:1-6)

Yesusé nkakémé ni motemote yófésó re séluwé nesté, se rfajól lima po I ni, bóngo npo si ni kawasa né bo rfaungé setan-setané, re bo rfafié kyat ta reriri péspisé sói le.

2 Ta Yesusé nkakém si bo nané si rfafané ni yabé né, si ngósnori né ta nte: Simon (ta Yesusé nfangósno i Petrusé njé), Andreasé (Petrusé ni fténo i); Yakobusé i re ni fténo Yohanesé (Zebedeusé ni ntu si), 3 Filipusé, Bartolomeusé, Tomasé, Matiusé (ta ni yabé né nfalutno pajaké), Yakobusé (Alfeusé ni ntu i); Tadeusé, 4 Simoné (ta i re ni délé né bo rfaungé keé kyat Roma ta rkawasa po riri bótén Israelé né) re Yudas Iskarioté (kyat ta njé i ta bo nwagé keé Yesusé).

5 Yesusé nané ni motemote yófésó re séluw ta bo rfafané ni yabé né, bóngo nfaftóto si faje, “Ffané nte, ndél pa bo ffan po bótén ta kyat Yahudi si pa né, re ma fsung po kyat Samaria né riri kota né na. 6 Mayta ffan be po ité rir suku Yahudi né le, sababta ta iglé né rdéréré Jou né re métegél pa na. Ya kfatailo si né tadolo domba ta rémsayé né^a. 7 Se ffané bo ffabingo si faje, ‘Re mnuw pana, Jou Lahatala nase nkawasa dolo Kolano po kyaté-kyat ta rdéréré I né’. 8 Se ffané bo ffafié keé kyat ta rlélété né ro, kyat ta re rmóté né ffapangéné keé si, ffafié keé ta rpado né, bóngo ffaungé keé setan-setan ta rcung si po kyaté-kyaté né. Kawasa ta kpo mewé né, re pélpólso pa. Se mewé ma iga ffafan kawasa ta né i bo fgali kyat iglé né, ndél pa bo féror pélpólésé. 9 Po waktu ta fané né, ndél pa bo fut pipis po nimi pipis góo lo na, masike necé pipis guraci pari, salaka pari, tembaga pari. 10 Bóngo ndél pa bo fut yéléné, ngélngaléné, sandal pari tatoné. Sababta kyat ta rfawómo Habar ta Fié lima Jou Lahatala ni né, pantasé bo kyaté pocé né rgawené si fafié né.

11 Bóngo iga re fsung po kota pari pnuw faisó ni, fayówé kyat pai ta nase ruté mew fié né bo ftolno si, sogado fsópén po bótén ta néi. 12 Iga fsung po kyaté ni umé, féroré bo Jou ni féyfié né palóy po férimé ta si po umé wlólo né. 13 Pocé, iga kyat ta ftolno si né ga ruté mew fié, Jou ni féyfié ta féroré né nase rduké. Mayta bo sogado ruté mew lé, nase rduk pa. 14 Fajé nóté iga reni kyat po um faisó ni pari, po kota ta rtarima mew pa, pari rlongé nimi dodoto né pa, fsópéné mew po um re kota ta njé i óro. Bo bétbét ta natéf po sóomi pópo lo né, ffatété keé pocé ro bo runé ta re rcól po Jou Lahatala ni. 15 Fatélolmo mew fafié é, pote se néli ga dunia njé nkiamaté, po waktu ta Jou bo nadili keé férimé kyaté né, kyat ta rtarima mew pa né nase rduké róri hukumané né tadélé météwé, nase lebe météw po hukuman ta kyat po kota Sodom re kota Gomora nesté bo rduké né.”

Kyat ta riri lé mewé né, ma fémtat si na

(Mrk. 13:9-13; Luk. 21:12-17)

16 “Yesusé nécegé nóté po ni motemote nesté ni, “Flongé fafié é! Ta Ya kané mewé fané né, nase po kyat léo bóto, necé kfatailo mewé né tadolo domba ni ntu ta rfan po yaw banga né riri fapéluné né. Se mare fpe akal ta dolo guwé njé nénpe né, re wlomi né mare berési dolo mané pombo wlo né.

17 Se fpe mew fafié po férimé kyaté! Sababta, pote se néli nase reni kyat ta riri lé mewé né rfagégóé mewé ga ruté keé mew néli po agama Yahudi né riri kyat tuté nesté ni bo rfasólé mewé. Bóngo nase rpake wólé ta ni wómo mdalémé né se réswako nómi po riri um-um sambayangé lo. 18 Mewé fdéréré Ya, se nase ruté keé mewé bo rfatébono mew re gubernur-gubernur re po kolano-kolano né, mayta pocé nase fduk yéfén óro ta bo fafétén Ya po si ni re po kyaté-kyat ta rféyal Jou Lahatala pa né. 19 Iga ruté mew néli, pocé ga rserakané bo radili keé mewé, ma fémtat na sói ta bo fécegé né. Sababta po waktu ta néi óro, Jou Lahatala nase nfaftulo mew sói ta bo féceg po si ni né. 20 Sababta necé mew pa ta fméiténé fdé si né, mayta nimi Moke Jou Lahatala nase nkawasa keé, wlólo né bo funé sói ta mewé bo fécegé né.

21 Nase reni waktu nóté ta kyaté-kyaté né bo rpo keé rémóri né néli bo kyaté kyat ta rféyal Jou pa né rpuné keé si. Fajé nóté re kyat tut móné né, si ma nase rpe nturi né tadolo fajé nóté. Bóngo reni nóté, yomya-yomya ta rmakotale po riri déluté né si ma nase rpo keé riri déluté néli bo rpuné keé si nóté. 22 Sababta mewé re fdéréré Ya se férimé kyaté nase riri lé keé mewé. Mayta iga bo fdéréré Ya sogado fajé néli le, nase bo fduk salamaté. 23 Se iga reni kyat ta rpuné mew po kota faisó ni, fówésé mew po kota ta nésé óro. Fatélolmo mew fafié é, iga Habar ta Nfié njé ga ffawómo po férimé kota ta po Israelé né pafule, Kyaté Ntu ta Ya i yama soroga re kwómé.

24 Reni motemote isó pa ta lebe npélóy po ni guru njé ni, pari reni kyat yabé isó pa ta lebe npélóy po ni tuangé njé ni. 25 Fié óro iga motemote isó ga nfamgo re ni guru njé né, bóngo fié óro iga kyat yabé isó ga nfamgo re ni tuangé njé né. Ya tadolo nimi tuangé njé, se mewé nte Ya nik yomya-yomya mewé. Iga kyaté né ga récegé Ya kpake Beelzebulé ni kawasa, nase lebe flé nóté mew ta fdéréré Ya né. Se mare fpe mew fafié!”

26 Yesusé nécegé nóté, “Se mewé ma fémtat si na kyat ta bo rfakangelangé mewé né. Sababta sói ta répino mewé lesu né, nuéncó nase bo ncópéné se bo tuné keé le. 27 Se sói ta Ya kfébingo mewé, se kyat iglé rlongé pafulé né, mewé mare ffébingé po kyaté-kyat ta félé né. Re sói ta kfagéyaso mewé né, mare ffébingé po kyat ta félé né fa kwaté mewé, tadolo fméitén yama um papo lo né. 28 Mewé ma fémtaté kyat ta bo rpuné keé mewé né na. Sababta si maduga réfené rfamóté nimi badané, mayta réfen pa bo rfamóté nimi jiwa né. Se fémtat be maduga Jou Lahatala le, sababta I ta néfené nwóté nimi badan re jiwa né nuéncó po naraka wlólo.

29 Coba fénuta fafié: Mané gotolo né masike remyaku se mulori be cuci le, mayta bo ropé ga faisó némnap po bétbété lo, nimi Moke Jou Lahatala nase nfamól si pa. 30 Fajé nóté re mewé! Jou Lahatala ta délé nuné mew fié, sogado nimi uté ta po babokomi lo né ma nuné keé ni féléo. 31 Se ma fémtaté le na, sababta mewé mulomi né lebe pélóy po mané gotolo nesté ni.

32 Pai ta nécegé nfayal Ya po kyat ta félé né usnori lo, Ya ma nase kécegé kfayal i po nik Moke Jou Lahatala ta i po soroga njé ni usno lo. 33 Mayta pai ta némtaté se nécegé nfayal Ya pa, Ya ma nase kécegé kféyal i pa po nik Moke Jou Lahatala ta i po soroga njé ni usno lo né.”

Kyat ta rdélé Yesus pa né rfakotale re kyat ta rdélé Yesusé né

34 Yesusé nécegé nóté, “Ya kwóm po dunia nje ni wlólo né, ma facogoma nase kyaté né bo rfatut fié ndimé na. Mayta Ya kwómé nte nase kyat félé rfakotalé sogado rfanpuné se iglé rmóté. 35 Sababta ta Ya kwómé nte kyat ta rdéréré Ya pa né rfakotale re kyat ta rdéréré Ya né: yomya móné né nase riri lé keé riri moke né, fajé nóté re yomya mépiné né, si ma nase riri lé keé riri neke né, malófé-malófé né ma nase riri lé keé kmori mépiné né. 36 Kyat ta rdéréré Ya né, riri kyat po umé wlólo né nase riri lé keé si.^b

37 Pai ta nmésié ni moke re neke nesté lebe pélóy po ni mésié ta po Ya ni né, nejé pantas pa bo ndéréré Ya né. Fajé nóté re pai ta nmésié ni ntu món pari ntu mépiné né ga lebe pélóy po ni mésié ta po Ya ni né, pantas pa nóté bo ndéréré Ya né. 38 Se kyat pai ta bo ndéréré Ya, mare ma ndéréré ni wlo njé na. Masike nduk kangelang sói le sogado bo nmóté ma, ndéréré be Ya le. Bo tisé, pantas pa bo ndéréré Ya né. 39 Kyat pai ta maduga néyówé be ta fié bo i nó nkumélé, nejé nase nmóté né nduk ta fié pa sogado fajé néli le. Mayta kyat pai le nduk kangelangé sababta ndéréré Ya né, nase nduk ta fié sogado fajé néli le.”

Kyat ta rdéréré Jou né nase rduk ta fié

(Mrk. 9:41)

40 Yesusé nécegé nóté, “Kyat pai ta ntarima mewé necé tadolo ntarima Ya, pai ta ntarima Ya necé tadolo ntarima Jou Lahatala ta nané Ya njé. 41 Kyat pai ta ntarima nabi, sababta nabi nesté rfawómo Jou ni faftóté po ni kyaté kyaté né, kyat ta njé i nase nduk féifié lima Jou Lahatala ni né tadolo nabi nesté rduké né. Fajé nóté re kyat ta rpe be ta métégel po Jou Lahatala usno lo né, kyat pai le ga rtarima si, nase rduk Jou ni féifié né tadolo kyat ta rpe ta métegélé nesté rduké né. 42 Nik motemote nesté, masike réngóto si dolo gélesó ni ngale si pa, mayta kyat pai ta ndo si wóé babóblo masike fagalas pusó le bo rinémé ma, Ya kécego mewé kyat ta n-gali si njé nase nduk féyfié lima Jou Lahatala ni né tadélé pélóyé.”