Jou Lahatala ntebo ni Roh po kyat ta rdélé I né
2
1,5 Ngénngan Pentekostaa re nwómo i, se kyat Yahudi félé ta si po bótén nésé réléy po riri bótén Yahudi, rfajólo si po pnuw Yerusalemé. Rfajolo si né, rfapélóyé riri ngénngan Pentakosta né, rdéréré riri agama Yahudi né fié se. Pocé fajé kyat farimé ta rdélé Jou Yesusé né ma rfajólo si po géwgów esó ni. 2 Fajé-fajé, télél be rlongé gégliné isó yama langété lo, dolo moré i, nebube i sogado ncung némin umé wlólo, se kyat ta réntolén pocé né rlongé i ndimé. 3 Pocé bóngo réngóto dolo luténé ni beblob isó némsake néli re lima, ga nfangtingo kyat ta pocé né. Beblob ta nétingo kyaté né kfatailo dolo peplewe né. 4 Pocé bóngo Jou ni Rohé njé nkawasa keé wlori né, se npo si méitén ta runé pa ma ndadi runé. Se pocé fajé bóngo isó-isó npe ni méitén, pua ta Rohé njé nécego si né.6 Pocé kyat Yahudi félé ta rwóm yama bótén-bótén ta lówé, ta rbobo riri ngénngan Pentakosta né, si ma rlongé gégliné ta njéi, bóngo rfajólo si lima. Rfajólo si lima bóngo rlongé kyat ta rénut Jou Yesus ngósno né, nae ta rméiténé kyat wémwómé né riri méiténé, bóngo kyaté né télél si. 7-8 Rfawgiwé si, rfécego, “Alli, kyat ta rméiténé nesté, kyat Galilea bóto si, ga rpe ité rir méitén ta féléo i njé né! Runé fawa lima e? 9 Ité ta nte kyat wémwóm bóto, ta it lima bótén Partia, Media re Elam, iglé ta ttolén po bótén Mesopotamia, Yudea re Kapadokia, iglé ta it yama Pontus re Asia, 10 iglé nóté it lima Frigia re Pamfilia, bótén Mesir re bótén Libia ta nfakrakén re pnuw Kirene. Iglé nóté twóm yama pnuw Roma, 11 iglé kyat Yahudi wóngto ité, iglé kyat Yahudi it pa, masolo re tcungé rir agama Yahudi. Iglé nóté lema wéf Kreta, re ta twóm lima bótén Arab. Masike ité twóm lima bótén ta féléo i nte né, ta si réceg néya né ité rir méiténé né ndimé! Rtail Jou, réfétén I ni féyfié né, ité tcae keé ndimé.
12 Co, ga pai ta nfaftulo si e?” Pocé si farimé rtélél re rfawgiwé si, dolo bo rfakduko si pana.
13 Pocé reni kyat iglé ta rdélé pa, se réceg kyat ta rénut Jou Yesus ngósno nesté faje, “Eh, kyaté nesté rémse!”
Nae ta rpe riri méiténé né, tabóngo Petrusé nfabingo si ni ngale
14-15 Pocé Petrusé nosél néya, i re ni dél ta rénut Jou Yesus ngósno né, bo nméitén po si farimé ta rfajólo si né. Kyaté nesté kyat Yahudi si re kyat nésé ta rtolén po Yerusalemé né. Pocé bóngo Petrusé nécego si faje, “Ya nik délut, afténog re rémag kyat Yahudi ta mewé, re kyat nésé ta pote fajé po Yerusalemé nte. Mewé fécegé cogo amé kémse. Amé kémse pa. Nete taga tok nuén popété né ga! Mayta flongé fafié, bo ya kméiténé kdé mew facuci su. 16 Ta flongé amé kméiténé nimi méiténé né, necé Jou Lahatala re néjaji tatubé po ni Buké wlólo, ni nénan isó Yoelé nlefo ta Jou Lahatala néjaji né, ni glio né faje:
17 ‘Pote se néli po ngénngan ta dunia njé re bo tiso i né,
Ya nase ktebo nik Rohé njé néli re lima
po kyaté farimé né wlori lo.
Se pocé bóngo ntumi món re mépiné né,
nase réfétén sói ta Ya kécego si po wlori wlólo né.
Móné mya né ma,
nase rémnaw ta Ya bo kfaftulo si né.
Légaé né ma Ya nase kfabingo si po bélisé wlólo.
18 Bóngo kyat ta rdéréré Ya né, món re mépiné,
Ya nase ktebo Nik Rohé njé nkawasa si,
bo rfawómo nik méitén
po kyat ta kécego si né.
19 Pocé Ya nase kfaftulo nik kawasa ta pélóy po mew ni,
po ya langatélo re po dunia wlólo né nóté.
Sói le ta fémnaw pafule,
nase fémnawé se ftélélé.
Nase fémnaw léló, luténé re méyas ta nénénpiplé i.
20 Ngénngané njé nase ntul pana se ndérorémé.
Sni njé ma nase nmékót dolo léló wóngto i.
Farimé ta necei ga re ndadi,
né ga tagare ngénngan ta fié re pélóyé njé re nwómo i ro.
Pocé ro ta Jou bo nwómé nmulé né.
21 Pocé tabóngo pai le ta néroré
bo nduk sélamat po Jou ni,
Jou nase nfasélamat i.’
22 Anik délut, faftén re rémag, farimé ité nte kyat Israel ité. Flongé, bo ya kéfétén Jou Yesusé. Ta Yesusé I pocé lesu né, ntolén po pnuw Nazareté. Jou Lahatala ntebo I po it ni né, npo I kawasa se nfafié kyat ta rpisé re kyat ta setané ntolno si, I ma npe ta nésé-nésé néli nóté ta ité nte tétémnaw pafule, bo ité tuné ta fatuwé I nwóm yama Jou Lahatala ni. Mewé funé re fémnawé, sebabta I npe né pote faje po mew ni ro. 23 Nópé ga mam dél isó nwagé keé Yesus néli po mew ni. Bóngo mewé ffamót I, fané kyat léo rpaku I po salibé lo. Mayta fajé óro. Mewé ffamót I pafule, Jou Lahatala ma re nuné mewé ta bo ffamót I né. I re nfaréné rewóré ta mewé bo ffamót I né. 24 I nmóté né, Jou Lahatala nésólé I po géwgów ta nmóto lo né, nfapangéné keé I nmulé. Ndadi pa bo nmót i fajé néli le né. I mare npangéné! 25 Yesusé njé, Jou ni nénané Yoelé le pa ta néfétén I tatubé né, mayta Daudé ma néfétén Yesusé nóté, néceg faje,
‘Ya kémnaw Jou Lahatala nérakén Ya,
I néndéréré Ya,
se Ya kémtat pa.
26 Ta mulo ga séngséngé bóto Ya,
bóngo ktail I.
Masike ta Ya kyat Ya se bo kmóté,
kuné ta nase I nfatopo keé Ya pa.
27 Ya, Jou Lahatala,
Ya kmóté nte Awé nase mpo fié pa
bo kmót re kemjakém sogado fajé néli le,
Ya kdéréré Aw fié se.
28 Awé re mfabingo Ya ta nase kmóté,
mayta kpangéné nmulé.
Awé merakén Ya fajé néli le,
se séngséngé bóto Ya.’
29 Nik délut, afténog re rémag ta mewé. Daud néféténé kyat ta nmóté npangéné njé, i néfétén i ni diri né pa, ya kuné ta fatuwé. Daudé re nmóté se re rput i. I npangén pana. Ni góo ta rput i lo né i pocé lesu, it farimé tuné fié. Se ta Daudé néféténé kyat ta npangéné njé, Yesusé ro ta nmóté ga npangéné nmulé. 30 Daudé, Jou Lahatala nénénfabingo i I ni faftóté né, se Daudé ma nuné Jou ni jaji po i né, ta ntu re gbu isó nase bo ndadi Kolano dolo i né nóté. Njé Yesusé. 31 Daudé nuné pote se néli ta néi bo ndadi óro, ta mulo néfétén Yesus Kristusé, I ta Jou Lahatala néjaji it bo nfasalamat ité, I ta bo nmóté npangéné nmulé né. Daud néfétén Yesusé nmóté né, néfétén ta Jou Lahatala npo fié pa bo nmót re némjakém sogado fajé néli le.
32 Yesusé njé ro nmóté mayta Jou Lahatala nfapangéné keé I nmulé. Amé nte kyat ta kenut Jou Yesus ngósno né re kémnaw fatuwé ta I re npangéné. 33 Yesusé térélóngé I néya, Jou Lahatala nfatolén I po ni faspal wónéyé, bo nkawasa ndé I, bóngo npo I Ni Roh ta re néjaji I tatubé njé. Yesusé nduk Rohé njé bóngo ntebo I po am ni. Ta necei ta fémnaw re flongé sogado ga ffajól lima nte né. Jou ni Rohé njé re ncung po am ni, se kméitén ta nécego amé né.
34 Fatuwé, kolano Daudé néfétén i ni diri pa, sebabta i térélóngé i pa, mayta i néfétén Jou Yesus ta térélóngé I. Daudé ma néfétén Yesus faje,
‘Jou Lahatala nécego anik Jou,
“Mtolén po nik faspal wónéyé,
mkawasa mdé Ya.
35 Kyat ta riri lé Awé né,
nase kpeé sóomé ni gésgis si sogado rlongé Awé.” ’
36 Ta Daudé néfétén Yesusé né kwóm lówo né óro. Flongé ta néi bo funé, kyaté-kyat Israel ta mew: Yesusé, ta fpaku I po salibé lo njé, I ro ta Jou Lahatala nélóngé I ndadi kyat farimé rir Jou I. Mayta ta né le pa. I ndadi rir Kolano ta bo nfayangésé keé ité rór sélsólé, ta dolo Jou Lahatala re néjaji tatubé lima né.”
37 Kyaté né rlongé Petrusé nécegé né, tabóngo rémtaté. Pocé bóngo rutné Petrus i re ni délé né, “Mam dél ta mew, amé nte re ksólé! Se amé nte bo kpe fawa bo Jou Lahatala ma nfasólo am na?”
38 Petrusé ncónglo si, “Fngali mewé. Fpóléné mew po Jou Lahatala ni. Lima bo kbaptisé mewé ndimé. Pocé Jou Lahatala nase nfayangésé keé nómi sélsólé né, bóngo npo mew I ni Rohé njé. 39 Rohé njé, Jou Lahatala néjaji bo npo kyat farimé ta I nkakém si bo rdadi ni kyaté, né mew ta nte, sogado ntebo ntumi re gbumi, re kyaté-kyat po bótén ta lówé nóté.”
40 Pocé Petrusé ntómé ni méitén félé po kyaté-kyaté né, nfatéfsilno si nuén fis néli ta ni ngale nópé né faje, “Kyat pote faje félé ta rlongé Jou pa se bo rduk ta lé. Se fpóléné mew po Jou Lahatala ni, bo Jou ma nfasólo mew dolo si né na.”
41 Petrusé néfétén méitén ta néi, kyat ta rdélé i né félé, bóngo rbaptis si. Ngénngan ta né óro, kyat ta tagare rdéréré Jou Yesusé né calén telé. 42 Se pocé kyat ta tagare rdélé Jou Yesusé né, ngénngan néya rfajólo si, rfaméylongé kyat ta rut I ngósno né. Pocé wlori pusó, riri tétut re géwgéwété né ma fié, rérénméiténé rdé Jou, re rémnómé né ma rferele.
Kyat ta rdélé Jou Yesusé né rfadéréré wlo né
43 Kyat ta rénut Jou Yesus ngósno né, Jou npo si kawasa se rfafié kyat ta rpisé re kyat ta setané ntolno si, re si ma rpe nésé-nésé néli nóté ta kyaté né rémnaw pafule. Pocé kyat farimé né rbóng ta rtélélé, bóngo rémtaté. 44 Kyat farimé ta rdélé Jou Yesusé né rérénfajólo si. Si rfadéréré wlo né fié, pai le ta reni renó né, nénuta ta i nó le pa. 45 Se bo kyat faisó reni renó pa, ni dél ta reriri reróri né rwagé róri sói néli, bóngo rfanténo néli re lima, sogado nwómo si ndimé. 46 Ngénngan néya rfajólo si po agama Yahudi né riri Um Sambayang ta npélóyé njé ni, rérénfapélóy Jou Lahatala ngósno. Si rfadéréré rfapelé róri wlun po um re umé, rfatélolmo si Jou ni féyfié po si ni né, se séngséngé bóto si. 47 Si rfapélóy Jou Lahatala ngósno. Kyat farimé ta rémnaw si né, réceg, “Alli, ga kyat fio si ndimé né ga!” Pocé étné be ngénngané Jou nbóngé ni kyat ta rdélé I né, sogado kyat félé rduk salamaté.