Petrus i re Yohanes rfafié légaé isó ta nkafé
3
Nganesó po Yerusalemé, tok nuén telé, Petrus i re Yohanesé rfan po agama Yahudi né riri Um Sambayang ta npélóyé njé ni. Pocé rfapélóy Jou ngósno, rfambóngo si re riri dél Yahudi ta rérénsambayang tok nuén telé né. 2 Pocé po um sambayangé njé ni, reni isa ni ngówéné gbono ta rfangósno i, Ngówéné Gbono Ta nFie. Pocé fajé reni légaé isó nkafé. Ta sogado nkafé né, nfatubo, ni mnuwo né re tahun nuén yóféfóté. Légaé ta njéi ngénngan néya ni délé né rcib i se rfatolén i pocé, bo kyaté-kyat ta rcung re rcópén po um sambayangé lo né, néroro si pipisé. 3 Petrusé i re Yohanesé rwóm pocé, légaé njé némnaw si, tabóngo nkakém si, “Légaé ta mewé, fdo nik pipis facuci pa?”4 Si réngóto i, bóngo Petrusé nécego i, “Méngóto am yama.”
5 I nekngólo si néya, bóngo nénuta po wlo wlólo, “O, kyaté nesté, nihalé bo rdo ya pipisé.”
6 Pocé bóngo Petrusé nécego i, “Légaé, amé nte remam pipis pa. Mayta ta amé kenute nte, Yesus Kristus, kyat Nazarate njé ni kawasa. I ta bo nfafié awé. Wóré, mosél néya, bo menfan néli re lima se!”
7 Pocé Petrusé nétané ni fao wónéyé, né ga nfaosél i néya, tabóngo re sóo né ménóné i. 8 Nyóg néya ta nosélé, se nfané. Bóngo ndéréré Petrus i re Yohanes némin um sambayangé njé ni. Nfané, nfaptuble i néli lima, ta nécegé, “Alli, ta mnuw re lów i nje ó, tagare kfané nte! Jou Lahatala ni féyfié re pélóy po ya ni, se sogado re kfané!”
9 Kyat farimé ta po um sambayangé lo né rémnaw légaé ta nkafé njé nfané nfapélóy Jou Lahatala ngósno né, 10 bóngo tekakém si, “Tabeu! Neje légaé ta nkafé njé. I ro tatubé lima lesu ta nmaror pipis po isa ni Ngówéné Gbono Ta Nfié njé ni né! Alli, néga re nénfané né? Fawa ta néi e?”
Petrusé nécegé, “Jou Yesusé ni kawasa ta nfafié légaé ta nkafé njé, se mare fdélé I”
11 Légaé ta nkafé njé ndéréré Petrus i re Yohanesé né, neé si pa. Ndéréré si nétó sogado po mabé ta rfangósno Kolano Salomo ni mabé lo. Kyat ta si po miné né rcéreré nétó tabóngo rfaljelé si. Pocé ga rfanao légaé ta nkafé njé, se réceg ta, “Alli, fatuwé néga! Légaé ta nkafé njé re nfané!”
12 Petrusé némnawé rfajólo si lima, pocé bóngo nméiténé, “Anik délut, afténog re rémagé, ité nte farimé kyat Israel ité. Fpe sói se féngóto be amé? Ftélélo légaé ta nkafé njé re nfané né? Mewé fémnaw légaé ta nkafé njé nfané né, fécogoma amam kawasa, se kfafié i? Mewé funé amé kpe ta fié po Jou ni, ta mulo ga nfié né? 13 Tisé! Am pa ta kfafié i né. Flongé fafié bo ya kéfétno mewé se. Jou Lahatala, rir gae tatubé lima, Abraham, Ishak, re Yakobé riri Jou I. I ro ta nfapélóyé ni nénané Yesusé, bóngo npo I ni kawasa ta pélóyé. Yesusé ni kawasa ta néi ta nfafié légaé ta nkafé njé, sogado ga nfané né. Mayta, Yesus ta njé ro mewé fgó I, tagare fut I néli po gubernur Pilatus ni. Masike gubernure njé nécegé I ncól pa se bo nfasópéné keé I, mewé ga féceg ta I ncólé le. 14 Mayta I ncól pa, I ro Yesus ta nmétegélé njé, ta renó sól gélesó pa njé! Bóngo mewé fané gubernur Pilatusé nfasópén be kyat ta nmafapuné njé. 15 Yesusé ta nfahidup ité njé ga ffamóté keé I né! Mayta wóré, ta mewé ffamót I né, Jou Lahatala re nfapangén I nmulé. I npangéné né, amé kuné re kémnawé se nte amé kéfétno mewé nóté, ta fatuwé I re npangéné. 16 Yesusé ni kawasa ro ta nfafié légaé ta nkafé njé né. Légaé ta njéi ité re tuné nkafé né tagare nte pa, remnuwé. Amé kdélé Yesusé se necé ta mulo légaé njé sóo né météwé re ndadi ménóné i. Nte mewé ma re fémnaw remtomi peluw ta i re nfié né.
17 Anik délut, afténog re rémag ta mewé. Ya kuné fié mewé ffamót Yesusé né, funé pa ta fsólé né. Kyat Roma ta rcalib I né ma runé pa. 18 Mayta, fajé óro. Mewé fdéréré be ta Jou Lahatala néceg tatubé né, ta ni glio né faje, ‘I ta Ya ktebo I njé, bo nfayangésé róri sélsólé né, nase kyaté né rfaméymóy I, rpun I, rfamóté keé I.’ Meiten ta néi, Jou ni nénan tatubé né re rfawómo ité, se nte re ndadi i ro. 19 Yesusé re nmóté, mayta nmóté né, bo nfayangésé keé rór sélsólé né. Se nete kécego mewé: Fngali mewé. Fpóléné mew néli Jou Lahatala ni, bo nómi sélsólé né I nfayangésé keé. Necé rewóré, 20 nase Jou Lahatala bo niwéné keé wlomi né, bo séngséngé bóto mewé. Bóngo I nase nfanaté Yesusé nmulé, ta I re néjaji tatubé né. 21 Nte, Yesusé I po soroga lesu. I npólén I pote pafule, Jou Lahatala nase nfaféyfié farimé ta dolo ni nénan tatubé re rfawómo ité né. Rewóré ta néi, ga taga Jou Yesusé nwómé.
22 Kécego mewé nte pa? Fngali mewé. Sebabta Yesusé njé, Jou ni nénan Musa ma re néféténé né, glio faje,
‘Jou Lahatala nase nélóngé I ni nénan isó nóté ta dolo ya nte,
se i nase nfawómo mewé Jou ni faftóté né nóté.
Kyat ta njé mnapo ntumi re gbumi,
re nimi wes re félbawé I.
Flongé I fafié ta bo nécego mewé né.
23 Pai ta nlongé I pa,
Jou Lahatala nase nécegé i
ndadi I ni kyat i pana se nbolito i.’
24 Ta kéfétno mewé nte, Musa le pa ta néfétén Yesusé né. Mayta farimé Jou ni nénan tatubé rénfabingo it méitén ta Jou npo si né. Si farimé réfétén ta Jou Lahatala néjaji bo nfanaté kyat isó ta bo nfasélamat ité. Jou ni nénan Samuel re Jou ni nénan ta iglé né ma re réfétén Jou Yesusé nóté. 25 Tabóngo mewé fduk I!, mewé re fduk ta Jou Lahatala néjaji it tatubé né. Jaji ta njéi tatubé Jou Lahatala re néjaji Abrahamé, se nte remnapo mewé. Ta I néjaji né ni glio faje, ‘Néli-néli, kyat ta njé nase mnapo antim re gbim, nim wes re félbawé. Ni féyfié né nase pélóy po kyat farimé ta po dunia wlólo njé ni.’
26 Né Yesus ta Jou Lahatala nané I njé né. Jou Lahatala re nélóngé I, bóngo nfanaté I po mew ni ntubé. I nwómé né, nésé pa bo npo mew ta fié, né n-gali mewé bo fwóté keé nómi sélsólé né, fpóléné mew néli I ni. Se ta mulo né, mare fngali mewé ro!”