Kyat tut ta rkawasa po agama Yahudi né rutné Petrus i re Yohanesé
4
Petrus i re Yohanesé réfétén Jou Yesus po kyat ta félé lo né lesu, pocé bóngo kyat tut ta rkawasa po agama Yahudi iglé né rwómo si néli. Kyat ta nesté si, iglé né imam si, iglé kyat Yahudi ta rdéréré dodoto Saduki né, re kyat ta réjaga um sambayangé né riri kepala njé. 2 Rwómo Petrus i re Yohanes néli né, rcawan si, se récegé, “Fpe sói se ga féfétén be Yesus ta re nmóté njé ga re npangéné nmulé né? Amé kdélé pa. Necé nase fécegé ité tmóté né ma tpangén po li faspalé!” 3 Pocé ta rgó keé Petrus i re Yohanesé, bo rutné si. Mayta re mérimé se rfasungé keé si po bui lo. Tómésu ni tómémóné né ga rutné si. 4 Masike re rgó si, mayta kyat félé re rdélé ta si réfétén Yesusé nmóté ga re npangéné nmulé né. Se kyat ta rdéréré Jou Yesusé né nbóng be rfélé. Rétén be móné le, ni féléo né calén limé, mépin re wyóe né ga rétén pa.5 Ni tómémóné né, kyat tut ta rkawasa po agama Yahudi né rfajólo si géwgów esó po Yerusalemé. Kyat ta nesté si, kyat ta rkawasa, kyat tuté, re guru agama si. 6 Kyaté nesté rfajólo si re Imam ta npélóyé njé ta ngósno Hanas, i re ni dél Kayafasé, Yohanesé, Aleksanderé, re ni dél tuo ta iglé né nóté. 7 Rérfajólo si ndimé, ta rkakém Petrus i re Yohanes lima bóngo rutné si, “Pai ta nané mewé ffafié kyat ta nkafé njé? Pai ta npo mew kawasa, sogado ffafié i né?”
8 Pocé tabóngo Jou Lahatala ni Roh njé nkawasa keé Petrus wlo njé se ncónglo si faje, “Mam kyat tut ta fkawasa ité rir agama né, re mam kyat tut ta mew pocé né. 9 Ngénngan péséwé nte, mewé fsawan amé né, i mdio né sói? Amé kgali kyat ta nkafé njé sogado nfié. Nete mewé futné mam kawasa fawa lima. 10 Sogado kyaté njé nfié né, kécego mewé nte bo funé. Mayta kécego mewé le pa, kécegé bo kyat Israel farimé ma runé ndimé. Kyat ta njé nfié né, lima Yesus Kristus ni, kyat Nazareté njé. Yesus Kristus ni kawasa ta nfafié i, sogado nosél po usnomi lo nte. Yesus ta mewé ffamót I njé, fésókté I po salibé lo, mayta Jou Lahatala re nfapangén I nmulé. 11 Necé ta mulo rlefo po Jou Lahatala ni Bukelo né, nfatailo I dolo lóy pusó, i glio né faje,
‘Lóy ta njéi, kyat ta rpe umé né rwóté I.
Mayta kyat isó ta nénpe umé né nyó I,
npeé I ni lóy ta faiwóbno,
bo nfamétuwé umé njé.’
(Mewé nte dolo kyat ta rpe umé né se fwóté lóy ta njéi.
Né i ni ngale mewé fétóf Yesusé.)
12 Isó pa ta dolo Yesusé. I le ta ni kawasa lima Jou Lahatala ni sogado néfené nfasélamat ité. Isó pana po dunia pópo nje ta dolo I. Jou Yesusé I le ta téroro I, nase nfayangésé rór sélsólé sogado tduk sélamat.”
13 Kyaté né rlongé Petrus i re Yohanesé rméiténé, bóngo rénuta po wlori lo, “Cekede, Petrus i re Yohanesé, kyat ta rsekola pa, kyaté mya si. Rméitén po kyat ta pélóy ta dolo ité nte, ga rémtat pa né!” Pocé bóngo rénuta nóté, “O, molene, kyat ta nesté réndéréré Yesusé, ta mulo rméitén fié né. 14 Mayta bo tcónglo si fawa eh? Sebabta légaé ta nkafé njé rénosél po usnoré lo, se ité re tuné ta fatuwé.” Si rénuta ta néi, ta rfaténténgén si. 15 Bóngo si rané Petrus i re Yohanesé, “Fsópéné mew po tetó su.”
Rcópén nétó, bóngo kyat ta si po miné né rfapépoé méiténé. 16 Rfalécego, “Kyat ta nesté, rfafié légaé ta nkafé njé né, réceg be néya ta ndadi i, farimé kyat po Yerusalemé né ma re runé si. Bo técegé rfafié i pa ma, ndadi i pa. Bo tfasól si ma ndadi i pa nóté. Se ga bo tpe si fawa nte? 17 Mati na ga kyaté né re rlongé néli re lima ndimé, ga rdélé be Yesusé, nópé ga rlongé it pana. I ni ta fié né tcawané keé si, técego si, ‘Mati fut Yesusé ngósno nóté na!’”
18 Pocé bóngo rkakém Petrus i re Yohanes néminé nmulé. Néminé bóngo récego si, “Faje: Po géwgów pua le, ndél pana bo féfétén Yesusé nóté.”
19 Pocé Petrusé ncónglo si, “Bo kdéréré mew pari bo kdéréré Jou Lahatala? Tai puai ta métegél po Jou ni né? Futa fafié. 20 Amé bo kdéréré Jou Lahatala. Amé re kémnaw re klongé ta Yesusé nécegé re npe né, se amé nase ndadi i pana bo ktébné né, kéfétén I se kéfétén I le.”
21-22 Pocé kyat tut ta rkawasa po agama Yahudi né rfécego, “Alli, ga bo técego si fawa nóté nte? Kyat ta rtail Jou Lahatala né re rfélé, re récegé légaé njé reni tahun nuén yóféfóté tagare nfané! Se bo tfasól Petrus i re Yohanesé nase kyaté né rcawan ité.” Se pocé bóngo récegé Petrus i re Yohanes, “Wóré, féléy mewé ro. Ndél pana bo féféténé Yesusé nóté, bo tisé nase fpik re fbose!”
Kyat ta rdélé Jou Yesusé né réror po Jou ni, bo nfakuaté wlori né
23 Rfasópén Petrusé i re Yohanesé bóngo réléy si néli po riri dél ta rdélé Jou Yesusé nesté ni. Pocé bóngo réfétno si, “Imam ta rpélóyé nesté re kyaté tuté Yahudi nesté rané amé, ‘Ma fut Yesus ngósno nóté na.’” 24 Riri délé né rlongé ta néi bóngo rfajólo si lima, rélóngé wlori né néya Jou Lahatala ni, réceg faje, “Jou, Awé ta mtulada langété, bétbété, re wolété, re ni wlólo né ndimé. Farimé ta ndadi i né ndé be po Aw ni. 29a,25 Awé ma re muné re mémnaw ta si rfasloé amé né. Mayta fajé óro, sebabta Awé tatubé re mécegé kyat félé nase bo riri lé Jou Yesus ta amé kdéréré I njé. Nim Rohé njé nfabingo anim nénan, mam gae Daud tatubé, ta nfawómo amé né faje:
‘Ta kyat Yahudi si pa né wlori piso I.
Kyat Yahudi né ma rfasogaro si bo rpun I,
mayta ta féléo i né ndadi i pa ndimé.
26 Kolano-kolano re kyaté-kyat nésé ta rkawasa po dunia wlólo né rfajólo si,
rfasogaro si bo rlawang Jou Lahatala,
I re ni kyat ta I néjaji it tatubé lima lesu njé,
ta bo nfasélamat ité.’
27 Jou!, ta kolano Daudé nfawómo ta néi, nete re ndadi i óro. Né, Kolano Herodes i re Pontius Pilatusé rérfajólo si po pnuw ta njei, si re kyat Yahudi re kyat ta Yahudi si pa né. Rfajólo si né, rfasogaro bo rpun Jou Yesusé, anim nénan ta nmétegél po aw ni njé. Neje ta Awé mélóngé I ndadi Kolano ta nfasélamate kyaté. 28 Ta si rpe né, rdéréré be tatubé lima lesu ta Awé re mécegé né. Ncópén po wlemé lo re po nim kawasalo. 29b Se nete, Jou, masike si récegé nase kpik re kbose, amé kéror po Aw ni Jou, bo mgali amé, mfakuaté wlomamé né, bo nimé kyat ta kut ngósnomé nte kéfétén be Awé le, kfasópéné nim méiténé né ndimé, ma kémtat na. 30 Mpo am nim kawasa bo kfafié kyat ta rpisé re setané ntolno si, re kpe nésé-nésé néli ta kyaté né re rémnaw pafule, bo si runé re rfayal ta nim kawasa né pélóyé. Farimé ta amé bo kpe nte kut be nim nénané Yesusé njé ngósno, I ta renó sélsól pa njé.”
31 Rméitén néya Jou ni rewóré, télél be géwgów ta rfajólo si né géwgiwe ndimé i. Pocé bóngo Jou Lahatala ni Rohé njé nkawasa keé si ndimé, bóngo réfétén Jou Lahatala ni méiténé né ma, rémtat pana.
Kyat ta re rdélé Jou Yesusé né, rfafaldoé po ta re riri re ta róri pa né
32-33 Pocé kyat ta rénut Jou Yesus ngósno né, Jou Lahatala ni kawasa ndéréré si fié, se néli re lima né réfétén ta Jou Yesusé nmóté mayta re npangén nmulé. Pocé bóngo kyaté né rémnaw Jou ni féyfié re pélóy po si ni né. Kyat farimé ta re rdélé Jou Yesusé né wlori be pusó. Isó pa ta reni re nó né, nénuta i nó le pa. Sói ta po si ni né, farimé si róri. 34-35 Kyat ta re riri um pari róri bét pari bo rwagé, ni mulo né rut néli Petrus ecé ni ta rfanténo kyat ta reriri reróri pa né. Se pocé isó pana ta nbósém kangelangé.
36-37 Pocé fajé, món isó ngósno Yusufé. Lewi ni ntu re gbu i, ntub po wéf Siprusé. Kyat ta rénut Jou Yesus ngósno nesté rfangósno i Barnabasé, ta ni ngale né ‘nenénfakuaté kyaté wlori’. I ma nwagé nó bété njé, ni mulo né, npo keé Petrus ecé ta rfanténo kyat ta reriri reróri pa né.