Kisah Para Rasul 5

Ananias i re Safira rlól Jou Lahatala ni Roh

Reni légaé isó nóté ngósno Ananiase. I ni dél pégelé njé ngósno Safira. Si ma rwagé róri bété. 2 Nópé, ni mulo né, iglé répiné keé. Ni gléo né, ga Ananiase nut néli po kyat ta rénut Jou Yesus ngósno nesté ni, bóngo npo si, néceg ta, “Amam bété ni mulo né pa?, ta nte óro.”

3 Pocé Petrusé nécegé, “Beé, Ananiase, ga mlól Jou Lahatala ni Roh njé né! Bété njé ni mulo né awé re myó iglé, né ga mécegé cogo mut lima ndimé né! Necé setané re nkawasa keé wlemé njé, ga mfamól i né! 4 Bété njé, mwagé i pafule, anam i lesu. Re mwagé i ma, ni pipisé né animé ro. Bo mgono nim sói néli ma, gélesó pa, animé né ga! Mayta mpe sói se ga mfamelól awé né? Awé nte mlól amé le pa, mayta re mlól Jou Lahatala!”

5 Ananiase nlongé ta néi, tabóngo térébébsé i nóp bétbété lo se nmót i. Pocé kyat ta rlongé ta néi rémtaté ndimé. 6 Fajé-fajé, món séfis néli rwóm lima, rfamyeme Ananiase, rfawléwté i nétó, ta rput i.

7 Rfaputé rewóré, ni mnuwo jam nuén telé ga ni pégelé njé ma nwómé. I nuné pafule ta ni légaé re nmóté né. 8 Pocé bóngo Petrusé nutné i, “Pégelé, fatuwé, nómi bété njé ni mulo né ta nte óro?”

Pégelé njé ncónglo i, “Jo, iya, ta né óro.”

9 Pocé bóngo Petrusé nécego i, “Mewé re funé Jou Lahatala ni Rohé njé ndél pa bo tlól I, né ga ffasogaro mewé se flól I né, fécogoma I nuné mewé pa? Méngóto, kyat ta rputé nim légaé njé ta ga bo rcung tóma nesté, se nte si bo rput awé nóté.”

10 Pégelé njé nlongé ta néi tabóngo némnap nóp po Petrus sóo lapo lo ta nmóté. Móné nesté rcung némin umé lo, rémnaw ta i re nmóté né, bóngo rfawléwté i nétó, rput i po ni légaé njé lapo lo.

11 Se pocé bóngo kyat ta rdélé Jou Yesus po Yerusalemé né re farimé kyat ta rlongé ta néi rémtaté ndimé.

Kyat ta rénut Jou Yesus ngósno né riri féyfié né félé po kyaté, né ga kyat tut Yahudi iglé rtélengéné, se rfasung si bui

12 Pocé kyat ta rénut Jou Yesus ngósno né, I npo si ni kawasa né se rfafié kyat ta rpisé re kyat ta setané ntolno si, re rpe nésé-nésé néli nóté ta kyaté né re rémnaw pafule. Kyat ta rdélé Jou Yesusé né farimé wlori be pusó. Ngénngan néya, rfajólo si néli po agama Yahudi né riri Um Sambayang ta npélóyé njé ni mabé lo, ta rfangósno Kolano Salomo ni mabé. 13 Kyat ta rdélé Jou Yesus pa né ga rémnaw ta si rpe né fié, bóngo re rtail si, mayta bo rfambóngo si néli né rémtaté, rdodato mati na ga réfen pa rdéréré Jou né.

14 Masike fajé ma, kyaté né nbóng ma nbóng i ta rdélé Jou Yesusé ne--i ni món pa i ni mépiné pa. 15 Kyaté né rémnaw Petrusé nfafié kyaté, bóngo si ma ruté kyat ta rpisé né cuci i pa lima po yéféné lo, rfabóy si nóp po riri róngété lo pari dabelo. Rpe fajé bo Petrusé nwetco pocé né, nfafié si. Masike nétané si pa ma, asal ta ni gurumine ntón si néli tabóngo rfié si. 16 Kyat lima pnuwé pnuw ta nfakrakén re Yerusalemé ma mwetés pa ta rwómé né. Rwómé né, ruté kyat ta rpisé re kyat ta setan ntolno si né. Pocé bóngo rfié si ndimé.

17 Pocé ga Imam ta npélóyé njé, i re ni dél kyat Yahudi ta rdéréré dodoto Saduki né, rcawané ndimé, rfalécego, “Petrus i re Yohanesé, kyat ta félé né rlongé si, se ité ga, re rlongé it pana! Jolosi tgó si, bo tfasung si po bui lo!” 18 Bóngo rgó si dórén luwé né, rfasung si po bui lo, rfambóngo si re kyat léo ta re si pocé né.

Jou ncópné Petrusé i re Yohanes po bui lo

19 Pocé ta dorém fapéluno né, télél be Jou ni nénan isó ta i yama soroga, népil bui ni ngówéné njé, ncópné Petrus i re Yohanesé nétó, bóngo nécego si, 20 “Wóré, ffan néli agama Yahudi né riri Um Sambayang ta npélóyé njé ni. Fosél néya po kyat ta félé usnori lo né, bóngo féfétno si Jou Yesusé ni dodoto farimé bo si ma rdéréré I ta fatuwé.”

21 Rlongé ta néi rewóré ta rfané. Tómémóné lesu si rfan néli agama Yahudi né riri Um Sambayang ta npélóyé njé ni, rfasodoto kyat ta pocé né, rdéréré dorémé lo ta Jou ni nénané njé nécego si né.

Tómémóné ta néi ma Imam ta npélóyé njé, i re ni délé né, rfajólo si po géwgów esó ni. Rkakémé kyat tut ta rkawasa po agama Yahudi né, rfajól lima ndimé, bo rutné Petrus i re Yohanesé. Pocé bóngo rané tentara né, “Ffan néli bui lo, fyó Petrus i re Yohanesé bo fut si lima.”

22 Tentara né rwóm néli bui lo né, réyówé Petrus i re Yohanesé, rduk si pana. Réléy néli po kyat ta rfajólo si nesté ni, rfabingo si, 23 “Tiso si, kyaté nesté! Kwóm po bui lo né, ngówéné né rakété ndimé. Gélesó esó pa ta tepile. Kyat ta réjaga pocé né ma isó-isó rtolno góori ndimé. Masolo, ksung néminé né re tiso si, si dórén luwé né!”

24 Rlongé ta néi, jojaga um sambayangé né riri kepala njé, i re Imam ta rpélóyé nesté, rénuta, “Beé, ga fawa ta néi? Rcópéné ga runé si pa né!”

25 Pocé kyat isó ncungo si néminé, se nfabingo si, “Légaé ta mewé, alli, flongé nte su! Kyat ta ffasung si po bui lo nesté re rcópén si! Se nte si ntéli, re rfasodoto kyat po ité rir agama Yahudi ni um sambayangé ta npélóyé njé ni!”

26 Rlongé ta néi, bóngo um sambayangé ni jojaga ta rpélóyé né, si re riri kepala njé rfan néli réyó si. Néli rméiténé rdé si fafié, rpun si pa, sebabta rémtaté kyat félé ta rdéréré Petrus i re Yohanesé né. Iga sogado rpun si, nase kyaté né rpeo róri lóy.

27 Si rut Petrus i re Yohanesé néminé, rfaosél si néya rfatégbono kyat tut ta rkawasa po agama Yahudi ta pocé né. Pocé, Imam ta npélóyé njé nutné si, 28 nécego si faje, “Mew dórén luwé, amé re kécego mewé ndél pana bo féfétén Yesusé ngósno né nóté. Pe sói se ga ftébné pa né? Néli re lima pnuw Yerusalemé njé, mewé réfésyapé I ni dodoto né! Tagare mewé ffasólo am po kyat ta félé né, fécegé amé ta kpuné keé I. Cogo ncól gélesó pa ma amé kfasól I.”

29 Pocé bóngo Petrus ecé rcónglo i, “Tabea légaé, masike mewé fané amé ktébné, amé nase ktébné pana. Amé nase kfafan Jou ni yabé né le. Amé bo kfatubé ta Jou Lahatala nané amé né ga tagare klongé kyaté. 30-32 Ta amé kéfétén Jou Yesusé né fatuwé, ta féléo i né amé re kuné re kémnawé ro, ta mulo sogado kéféténé né. Jou ni Rohé njé ma nuné ta féléo ta Yesusé npe né fatuwé. Roh ta njéi, roh ta Jou Lahatala npo kyat ta rérdéréré I njé né. Se nase ktébné pana, légaé, amé nase kéfétén I le, Yesusé njé. Jou Lahatala, rir gélé re gaé tatubé né riri Jou I sogado it ta nte I ma rir Jou I nóté. I ta nfapangén Yesusé nmulé, njé I ta mewé fpaku I po salibé lo, sogado ffamót I né. Jou Lahatala ta nfatolén I po ni faspal wónéyé, bo I nkawasa kyat ta rdéréré I, re nfasélamate ni kyaté né. Se Yesusé nkakémé kyat Israel ité bo tngali ité, tpólén it néli po I ni, bo nfayangésé keé rór sélsólé né.”

33 Pocé kyaté né rlongé ta néi, bóngo ta délé rcawané, rfécego, “Ta fié né, tpuné keé si!”

34 Pocé fajé reni guru agama Yahudi isó, ngósno né Gameliel. Légaé ta njéi ndéréré dodoto Farisi. I nosél néya po lapori lo, farimé kyat pocé né rfaténténgén si, bóngo nécego si, “Fsópné Petrus i re Yohanes nétó su, ya bo kméiténé kdé mew su.”

35 Rcópné si rewóré, tabóngo Gameliele nécego si, “Légaé ta mewé, ité nte farimé légaé Israel ntu re gbu ité. Kécego mewé, ma fbablé fpuné keé si su na. Futa fafié su. 36 Ffatélolmo mewé fafié, sebabta ngané fis ta re télapésé né, reni kyat isó, ngósno né Teudase. I ma nécegé i kyat ta pélóy i, nécegé cogo ni lé Pemerintah Roma, se ndéréré si pa. Kyaté né sogado witén fóté rdéréré i. Nópé ga rfamóté keé i, tabóngo ni kyaté né nae ta msakori, se rpe gélesó pana. 37 Rewóré ta néi isó nwómé nóté, kyat Galilea i, ngósno Yudasé. Po ngénngan ta néi pemerintah Roma né bo rétén ité bo rané ité tpólés bose. Nópé ga i wlo pa, se nfakékakmé kyat iglé né, rpe riri nésé, rdélé si pa se. Né ga i ma rpuné keé i, bóngo ni kyaté né ma nae ta msakori, rpe gélesó esó pana. 38 Necé ta mulo kécego mewé nte pa? Mati fpuné keé si dórén luwé né na, ffamóle keé si óro. Ta si rdéréré I njé, Yesusé, ta re nmóté njé. Wóré ga témnawé. Si dórén luwé nesté, iga ta si rpe né kyaté ta nané si, mnuw pana nase rpe gélesó pana. Riri dodoto ma nase myangés i be nópé. 39 Mayta bo Jou Lahatala ta nané si, nase féfen si pa, nfané se nfané le. Se fpuné keé si matiné, mati na ga mewé ffawlawang re Jou.”

40 Kyaté né rlongé ta Gameliele nécegé né, bóngo rfauto fio. Riri séwsawan péséw ta bo rpuné keé si né ma ndadi i pana. Rkakém Petrus i re Yohanesé néminé nmulé, bóngo rfatat si se rané kyaté né rfaswake si. Rfaswake si rewóré tabóngo récego si, “Ndél pana bo féfétén Yesusé nóté.” Rewóré ta néi ta rfasópéné keé si.

41 Rfasópén si, bóngo si dórén luwé né rfan si. Ta rénfané né, séngséngé bóto si, rfalécego, “Alli, iti dórén luwé nte dolo ta rfaswake Yesusé né nóté. Ni ngale né, Jou néngóto it tfié, nuné ta masike réswaké ité né, nase tdéréré I le. Se fié! Masike réswaké ité re rfaméymóy ité ma, séngséngé bóto ité le.”

42 Pocé rfafan Jou ni dodoto né nóté, ngénngan néya rfan néli po agama Yahudi né riri Um Sambayang ta npélóyé njé ni, re rfan po kyaté-kyaté né riri umé lo, réréntébné pa. Réfétén ta, “Yesusé I ro ta Jou Lahatala néjaji tatubé bo nfasélamat ité né. Se fngali mewé, bo I nfayangésé keé nómi sélsólé né.”