Kyaté né rélóngé légaé séfité bo rgali kyat ta rénut Jou Yesus ngósno né
6
Pocé se lima, kyat Yahudi ta réréndéréré Jou Yesusé ni dodoto né nbóng ma nbóng i. Pocé fajé iglé ta rmaYunani wlori nkurang po riri dél ta rmaIbrani né, se réceg faje, “Ngénngan néya, ffanténé mnóm po mépin balo né. Fawa se fdo be nimi balo ta rmaIbrani né? Amam balo né ga fdo si pa?”2 Se pocé kyat ta rénut Jou Yesus ngósno né rfakékakmé farimé kyat ta réréndéréré Jou Yesusé ni dodoto né. Rfajól lima, bóngo récegé si, “Moléné mewé, ta fécegé mnómé né kdo be iglé né. Sogado amé kpe fajé né, mam yabé né félé, kfafan Jou Lahatala ni méiténé, ga bo kfanténé mnómé né nóté, nase nfatagaha mam yabé né. 3-4 Amam délut, faftén re farémóné ta mewé. Ndé fafié, amam yabé be kénméiténé kdé Jou re kfafané ni méiténé né. Yabé ta kfanténé mnóm po kyat balo né ga kpo kyat nésé. Se faje: féyówé nimi dél fasefité. Kyat ta félóngé si né, mare wlori fié, Jou ni Rohé njé ma nkawasa si, re si ma runé fié rfaméteglo pua ta sólé né. Félóngé kyat ta nesté si, rgali amé bo rfanténé mnómé né.”
5 Kyaté né rlongé ta néi, ta délé rfauto fio. Bóngo réyówé kyaté nesté, ta bo rfanténé mnóm po kyat ta rbalo né. Pocé, rduk Stefanuse, Filipusé, Prokhoruse, Nikanore, Timoné, Parmenase re Nikolaus. Stefanuse njé, kyat isó ta fatuw-fatuwé ndélé Jou. Jou ni Rohé njé nkawasa i. Nikolause njé, kyat Antiokhia i, mayta re ncung agama Yahudi. 6 Kyaté né rut si dórén fité né néli po Petrus ecé ni. Pocé bóngo rétewlé faori néya bébokori lo, bóngo rméitén rdé Jou, récegé, “Jou, si dórén fité nesté bo rfanténé mnóm po kyat balo nesté ni. Mgali si bo ta si rfaréné né fié ndimé.” Pocé bóngo kyaté nesté ngénngan néya rfanténé mnóm po kyat balo nesté ni.
7 Kyat ta rénut Jou Yesus ngósno né ga riri yabé né rfafan be Jou Lahatala ni méitén néli re lima. Se kyat Yahudi po Yerusalemé né nbóng ma nbóng i ta réréndéréré Jou Yesusé ni dodoto né. Imam agama Yahudi né ma rfélé ta rdélé né.
Kyaté tut agama Yahudi né rgó Stefanuse
8 Stefanuse, Jou ni féyfié re kawasa pélóy po i ni, se nfafié kyat ta rpisé re kyat ta setané ntolno si né, re npe nésé-nésé néli nóté ta kyaté né re rémnaw pafule. Kyaté né réngóto ta néi ga rtélélé. 9 Pocé ma reni kyat Yahudi iglé ta wlori piso Stefanuse. Kyat ta nesté riri um sambayangé njé ngósno Libertini, si lima pnuw Kirene re pnuw Aleksandria, re bótén Kilikia re bótén Asia. Rlongé Stefanuse néfétén Jou Yesusé bóngo rkotalé rdé i faje, “Jou Lahatala tatubé néjaji bo ntebo kyat faisó bo nfasélamat ité. Néga awé mécegé cogo re ntebo I né! Mécegé cogo Yesusé ta njé I ro! Awé msólé! Ga mfaméymóy Jou Lahatala né!”
10 Pocé Stefanuse nécego si, “O, fajé pa!” Bóngo néfétén Yesusé, nfaftulo si ta fatuwé I ro. Jou ni Rohé njé nkawasa Stefanuse se npo i méitén ta fié ta dolo kyat ta runé né félé. Rfaptoblo re i né, sogado ga si réfen i pa. 11 Pocé ga répiné si po i tó lo rfagéyaso kyaté né, “Fgali amé, fpe Stefanuse nó ta lé.” Kyaté nesté ma rdéréré si, bóngo réceg néli re lima, “Stefanuse nje, nfaméymóy Jou Lahatala re ni nénan Musa, am ta ntei ro klongé ta i nécegé né.”
12 Si rfatuté sumori néli re lima sogado kyat ta félé né, si re riri kyat tut re riri guru agama Yahudi né rcawané ndimé. Pocé kyaté né rgó Stefanuse, se rut i néli rfatégbono i re kyat tut ta rkawasa po agama Yahudi ta rérfajólo si né, bóngo rfabingo si faje, “Kyat ta nje renó sólé, se ta mulo kut i lima nte bo futné i.” 13 Bóngo rfatégbono i re kyat ta iglé nóté ta rpe Stefanuse nó ta lé, réceg faje, “Stefanuse nje, nfaméymóy keé rir um sambayang ta nfié njé, ité rir hukum agama Yahudi né ma nfakcegé keé nóté! 14 I nécegé Yesusé, kyat Nazareté nje, cogo bo negene keé ité rir Um Sambayang ta npélóyé nje. Cogo bo newetco keé rir adat re hukumé né farimé ta Musa npo it yama Jou Lahatala ni né! Am ta nte ta klongé i!”
15 Kyat farimé pocé né réngóto Stefanus néli, rémnaw usno né tésib re télélé niwén i, dolo Jou ni nénan isó yama soroga.