Kyat ta rkuasa po agama Yahudi né rfasogaro si bo rgó Yesusé
26
Yesusé nfasodoto si rewóré ndimé, bóngo nécego ni motemote né, 2 “Mewé re funé, etlé be ngané luwé le kyat Yahudi ité bo tpe rir ngénngan Paska né, bo tfatélolmo ta Jou Lahatala n-gali se nfabebasé keé rir délut tatubé ta kyat Mesiré né rjaja keé si. a Kécego mewé bo funé. Ngénngan ta né, Ya kyat ta Yai yama Jou Lahatala ni, nase rgó Ya se rpo keé Ya néli po kyat ta bo rsalib Ya né ni.”3 Ngénngan ta né óro, imam ta rpélóyé né, si re kyat tut Yahudi né rfan po imam Kayafasé ni umé lo. Kayafasé njé farimé imamé né riri kapala i. 4 Néli bóngo rfasogaro si rgó Yesusé bo rpuné keé I. Réyówé yéfén bo kyat ta félé ma runé si na. 5 Se réceg ta, “Mati tgó I po ngénngan ta pélóy na, nase kyat ta rdé si né rcawané ga ta rdé ité né ma rcawané bóngo it re si mleleye.”
Mépin isó nduplo Yesus yégét ta pépu mnó
6 Yesusé I po pnuw Betania po Simon ta npado njé ni umé lo. 7 Ntoléné némnómé, pocé ga mépin isó ncung néminé, nfauto yégét ta pépu mnó botol pusób ta ni mulo né pélóy tuwé. Bóngo mépiné njé nduplo yégété njé nóp Yesus béboko lo.
8 Yesusé ni motemote né rémnaw ta néi, bóngo rcawané se récegé, “É, ga nfalubiru keé yégét ta pépu mnó njé né! 9 Yégét ta njéi bo twagé i né, mulo né pélóyé, bo ni pipisé né tfanténo kyat ta reriri reróri pa né.”
10 Si réceg ta né i, Yesusé nuné keé si, bóngo nécegé si faje, “Mépiné nje re npe ta fié po Ya ni, ga fsawan i né! 11 Kyat ta reriri reróri pa né, mew re si ngénngan néya se bo fgali si né, si pocé. Ya ga, kémnuw pana po mew ni. 12 Ta mépiné njé nduplo nak yégété né, i re nfaléléy ta Ya bo kégbono néli nte, bo kmót sogado bo rput ya. 13 Ffaisnó fafié nte. Mépiné njé ni féyfié ta né i nase myangés pa. Po géwgów pua le ta kyaté nase rfawómo Habar ta Fié yama Jou ni né, si ma nase réfétén mépin ta nje i, bo kyaté né rlolmo ni féyfié po Ya ni né.”
Yudasé nwagé Yesusé
(Mrk. 14:10-11; Luk. 22:3-6)
14 Yesusé ni wyóy yófésó re séluwé né, isó ngósno Yudas Iskariot. Nfan po imam-imam ta rpélóyé nesté ni, 15 bóngo nécego si faje, “Iga Ya kgali mewé bo fgó Yesusé, nase bo fdo nik sói?”
Tabóngo si rétén pipis salaka yófétel nóp Yudas usno lo. 16 Ta né óro, Yudasé néyówé yéféné bo npo Yesus néli si ni.
Yesus i re ni motemote né rémnóm be po meja pusó po riri ngénngan ta pélóyé né
17 Kyat Yahudi né riri ngénngan Paska né re nwómo i ro. Po ngénngan-ngénngan ta néi, si ró roti ta reni ragi pa. Pocé bóngo Yesusé ni motemote né rwómo I se rutné I, “Légaé, ngénngan ta pélóyé nte, tewetés domba né, bo témnóm po sói lo? Mfaftulo amé, bo kfaléléy mnómé né pocé.”
18 Bóngo Yesusé nané si bo rfan néli pnuwé lo, bo récego kyat faisó ta si re rfayal i, “Légaé guru njé nané amé kpe lima nte, bo kécego awé, I ni ngénngan Paska né re nwómo i ro, se am re I bo kémnóm po nim umé lo po ngénngan ta pélóyé nje ni.” 19 Pocé Yesusé ni motemote né rfané, rpe ta dolo Yesusé nané né se rfaléléy róri mnóm Paska né pocé.
20 Ta re dorémé né, tabóngo Yesusé I re ni wyóy yófésó re séluwé né rtoléné se rémnómé. 21 Rérémnómé lesu, bóngo Yesusé nécego si, “Flongé ta bo kécegé nte. Mew ta ftoléné nte, isó pocé faje ta bo nwagé Ya.”
22 Rlongé ta néi, wlori né ta délé kangelangé. Bóngo isó-isó nutné Yesusé, “Légaé, solo ma ga ya?”
23 Yesusé ncónglo si, “Kyat ta Ya re I ksubuk be cawan pusó njé i ta bo nwagé Ya. 24 Mayta fajé óro. Jou Lahatala re néceg po ni Buké wlólo ta Ya kyat Ya I yama Jou Lahatala ni nase kmóté. Mayta sen i, kyat ta nwagé Ya njé. I nó sélsólé né ta délé pélóyé. Ta fié né, kyat ta njé ma ntub po dunia lo na.”
25 Bóngo Yudas ta bo nwagé Yesusé njé nutné I, “Légaé, ma ga yae?”
Yesusé ncónglo i, “Né ta dolo re mécegé né.”
26 Rérémnómé lesu, pocé Yesusé nyó roti né bóngo néceg syukur po Jou Lahatala ni. Rewóré, nfakpekte roti né, se nfanténo ni motemote né bóngo néceg faje, “Roti ta nte anik wóngété, se fyó bo fó.”
27 Pocé nyó anggur njé lima, bóngo nécegé ni syukur po Jou ni nóté. Ntébéné, bóngo néyété angguré né néli po ni motemote nesté ni, se néceg ta, “Nik dél ta mewé, farimé finém angguré nte. 28 Sababta angguré nte nik léló. Nik léló ta né ta Jou Lahatala re néjaji nase megene, bo nfayangésé keé kyat félé róri sélsólé né. 29 Kécego mewé bo funé. Anggur ta Ya re mew tinémé nte rewóré, Ya nase kiném pafule. Mare pote se néli sogado Jou Lahatala nfaftulo ni kawasa né, ga nase Ya re mewé tinémé nóté.”
30 Yesusé nméiténé rewóré, tabóngo rnyanyi nuéncó, rfapélóy Jou Lahatala ngósno. Rewóré, rcópén pocé, se rfan si néli po métét Zaitun.
Yesusé nfabingé ta ni motemote né farimé nase rfatopo keé i
(Mrk. 14:27-31)
31 Néli, Yesus nécego ni motemote nesté faje, “Dorém ta nje i ro, nase fémnaw ta bo ndadi po Ya ni né, farimé mewé nase wlomi né nfatuténé se ffatopo keé ya. Mayta né mare ndadi i, sababta Jou Lahatala re nécegé rewóré, se ni nabi re nlefo po ni Buké wlólo, ta i glio né faje,
‘Ya nase kpuné keé domba né riri wlóné njé, se ni domba né famsako i néli lima.’c
32 Mayta, sogado kmóté se kpangéné nmulé né, nase ktubé néli bótén Galilea, bo tfapdipén pocé.”
33 Pocé bóngo Petrusé ncónglo Yesusé, “Légaé, masike nik délé né rówés si ndimé, mayta ya su ga nase kówés pa.”
34 Pocé Yesusé nécegé i, “Mlongé fafié ta kécego awé nte. Dorém péséwé nte, mané né rakuku pafule, awé re mécegé mfayal Ya pa re nuén telé ro.”
35 Pocé Petrusé ncónglo Yesusé, “Tisé, légaé. Masike ya ma nase kmót re awé, mayta ya nase kéceg ta dolo fajé pa.” Yesusé ni motemote ta iglé né ma réceg ta dolo Petrusé nécegé né nóté.
Yesusé nméiténé ndé Jou Lahatala po bét Getsemani
(Mrk. 14:32-42; Luk. 22:39-46)
36 Yesusé I re ni motemote né rfan néli po bét isó ta ngósno Getsemani. Rwóm néli bóngo nécegé ni motemote né, “Mew pote su. Ya bo kfan po teli bo kméitén kdé Jou Lahatala.” 37 Yesusé nfan néli, nut Petrus, Yohanes, re Yakobus. Rfan néli né, Yesusé wlo njé ta délé némoté. 38 Bóngo nécego si dórén telé nesté, “Wlegé nje ta délé nkangelangé, se kbósémé né dolo bo kmóté. Féftón Ya pote su, ma fyénéf na-e.”
39 Nécegé né rewóré bóngo nésalé i néli cuci, se néspók nóp bétbété lo, nméiténé ndé Jou Lahatala, néceg faje, “Anik Moke ta Awé, iga wlemé, mélówé keé kangelang ta Ya bo kduké nte. Mayta ta ndadi i né, ma mdéréré wlegé nje na, mdéréré be Aw wlemé njé le!”
40 Nméiténé ndé Jou Lahatala né rewóré, néléy néli ni motemote sételé nesté ni ga néngóto, re ryénéf si. Bóngo nécegé Petrusé, “Ceh, mewé nte féfen pa, fbobo Ya fajam nuéncó né? 41 Ffaménawé mew fafié re féror néya po Jou Lahatala ni bo nfakwaté wlomi bo fdéréré Ya né ma mtébné na. Mewé wlomi ncuka bo fdéréré be Ya, mayta ménimi badané né ta néfen pa.”
42 Pocé Yesusé nfan néli nuéncó nóté, nméiténé ndé Jou Lahatala, néceg faje, “Anik Papa, iga kangelang ta njéi, mélówé keé i pa, se ndadi i le po Ya ni, fajé óro. Ya kdéréré ta Awé re mfaréné né.”
43 Néléy néli, ni motemote nesté mtóri né nbóng ta météwé se re ryénéf si nóté. 44 Yesusé nfamól si fajé ro se nfan néli nóté nméiténé ndé Jou Lahatala nóté se re nuén telé ro, néceg be ta dolo péséwé né le.
45 Rewóré ta né, néléy néli bóngo nécego si, “É, ga fyénéfé mewé lesu né? Nte óro ta bo rgó Ya bo rpo keé Ya néli po kyat léo nesté ni. 46 Se wóré, fpangéné bo tfané ro. Kyat ta nwagé Ya njé, ta re njé lima ro.”
Kyat ta rgó Yesusé
47 Yesusé nénmaméiténé ndé si lesu, Yudas ta nwagé Yesusé njé ma nwóm lima. Kyat félé rdéréré i, rfauto riri yété re panga-panga, bo rgó Yesusé. Ta rané rgó Yesusé né, imam ta rpélóyé né, re kyat tut-kyat tut Yahudi né. 48 Ta rfan pafule né, Yudasé re nécego si, “Kyat ta ya kfótén i njé, nejé óro, se fgó I.”
49 Re rwóm néli bét Getsemani, bóngo Yudasé nfalów néli Yesus ni, nécegé I, “Légaé guru, nim tabea!” Tabóngo nfótén Yesusé.
50 Mayta Yesusé nécegé Yudasé, “Nik dél ta awé, re mfano Ya lima se ta bo mpe né, mpe ro pa?”
Bóngo kyaté né ryóg nétó se rgó Yesusé. 51 Yesusé ni wyóy isó némnawé rgó I né, ta netóbe ni yété njé, ga neswót imamé né riri kepala njé ni béyaké njé se tétango faspalé né mwetés i.
52 Mayta Yesusé nécegé ni motemote njé, “Mésungé nim yété njé nmulé po ni sarungé lo. Sababta pai le ta nut yété bo ntipélé kyat, i ma nase nmóto re yété. 53 Sogado mpe fajé né, mécogoma nase nik papa n-gali Ya pa? Bo kéror po I ni, nete óro, nase nfanaté ni nénan yama soroga ta féléori né calén yóféfit re luwé né ma cuci, bo rfatéfsal Ya po kangelangé lo né. 54 Mayta, bo Jou Lahatala npe ta dolo né, nase ni méitén ta po ni Buké wlólo né ndadi i pa. Se fajé óro, mare bo ndadi i ta dolo nte.”
55 Pocé Yesusé nécegé kyat ta félé né, “Fgó Ya nte, fut yété re panga-panga, mewé fécogoma Ya kyat léo Ya? Ngénngan néya, kfasodoto po Um Sambayang ta npélóyé njé ni, ma fgó Ya pa! 56 Mayta, fajé óro ta fgó Ya nte. Fajé bo ta nabi né re rlefo po Jou Lahatala ni Buké lo né ndadi i.” Rewóré ta néi, ni motemote né rfatopo keé Yesus se rówés si ndimé.
Yesusé négbono Imamé né riri Kapala njé
(Mrk. 14:53-65)
57 Yesusé re rgó I rewóré bóngo rut I néli po Kayafasé, imam-imamé né riri kapala njé. Pocé po Kayafasé ni umé lo, imam ta rpélóy, re guru-guru agama re farimé kyat tut Yahudi né re rfajólo si. 58 Petrusé ma ndéréré si, mayta nfaisém i. I ma ncung po min imam Kayafasé ni um lapo se ntoléné ndé tentara ta si pocé né bo i ma nuné, ta bo rutné Yesusé né, ni wóré fanfawa. 59 Pocé imam ta rpélóy, guru-guru agama re farimé kyat tut Yahudi né re rfajólo si réyówé kyat ta bo rpe Yesusé nó ta lé po Kayafas ni, bo masike npe gélesó pa ma, rpuné keé I. 60 Mayta masike rduké kyat félé ta rpe nó ta lé ma, rduké nó sélsól gélesó pa.
Nópé ga kyat séluwé ryóg nétó bóngo réceg faje, 61 “Kyat ta nje, I nécegé bo negene keé Jou Lahatala ni Um Sambayang ta npélóyé njé ga taga ni ngané telé né cogo bo nfapangén I nmulé.”
62 Bóngo imamé né riri kapala njé nosél néya, se nécegé Yesusé, “Kyaté nesté rkélak Awé, ga msóngél gélesó pa né?” 63 Mayta Yesusé nfaténgténgén I le.
Pocé nutné I nóté, “Ya ksasi re Jou Lahatala ta nhidup njé ngósno! Mécego amé, Awé nte fatuw-fatuwé Jou Lahatala ntu Awé? Awé ro kolano ta Jou Lahatala néjaji bo mfasalamat amé né?”
64 Yesusé ncónglo i, “Ta dolo awé mécegé né. Mayta, kécego mew farimé bo funé. Pote se néli nase fémnaw Ya kyat ta Ya I yama Jou Lahatala ni, ktolén po Jou Lahatala ni faspal wónéyé, ktebé kdé mét yama langété lo!”
65 Imam Kayafasé nlongé ta né tabóngo néceg ta, “Alli, ga nécegé cogo Jou Lahatala ntu I né! Ga nfaméymóy Jou Lahatala ngósno né!” Tabóngo Kayafasé wlo pisé i ta Yesusé néceg Jou Lahatala né, se nfawgawsé keé ni juba njé. Rewóré, bóngo nécegé kyat ta pocé né, “Mewé ma re funé re flongé nó sélsól ta nfasloé Jou Lahatala né. Se re tduké ro nó sélsólé né. 66 Se kutné mewé, fawa?”
Kyat ta félé né rcónglo i, “I ncólé se tpuné keé I ro!” 67 Pocé bóngo rfatitfo Yesus néli usno lo re rfakngite I. Iglé né ga rfaspaklé I, 68 bóngo rutné I, “Pai ta néspakél Awé? Cogo Awé kolano lima Jou Lahatala ni se nase muné isó-isó!”
Petrusé nécegé nfayal Yesus pa
69 Petrusé néntolén po Imam Kayafasé ni um lapo lo lesu. Pocé beyak mépin isó i néli Petrus ni, nécegé i, “Yesus kyat Galilea ta rutné I njemine, ni motemote né isó aw ta nte nóté.”
70 Pocé ga Petrusé ncónglo i, “Dolo ksaé pa, ta mécegé né.” Farimé kyat ta rérakén Petrus pocé né ma rlongé.
71 Bóngo Petrusé nfataw i nétó po isa ni ngówéné njé ni, né ga beyak mépin isó nóté newnaw Petrusé se nécego kyat ta pocé né, “Kyat ta njé i ma ndéréré Yesus, kyat Nazareté njé.”
72 Bóngo Petrusé nécegé mépiné njé, “É, masike ksasi. Kyat ta njé I, Ya kfayal I pa.”
73 Mnuw pa, kyat iglé ta rénwosél pocé né rfano Petrus lima se rutné i, “Kyat ta njemine, ni motemote né ta isó awé nte nóté. Kfayal be nim méitén ta mmaYunani né dolo kyat Galilea awé.”
74 Pocé Petrusé ncasi, “Dolo Jou! Ya kfajal I pa, kyat ta njé I!”