Ruirilna ansāng
matona Stephan achongril
7
1 Hankēng:
“Chāizūngin hiva chong ngāi hi adik mo?”
ati na.
2 Hatuka Stephanin:
“Ka parual le ka parua ngāi,
koini na pa Abraham,
Mesopotamia rama a om lāi han anlianna Pathian akōma ei hong anrāl ani na.
Haran khuana a om māna ei hong anrāl ani na.
3 Pathianin akōma:
‘Na ram le na mi ngāi māka suak ro.
Hatuka ram kei na man mu na rang tianga son sē ro,’
(Anp.12:1 )
ati na.
4 Hasik han Kaldai ngāi ram āta asuaka Haran khuana ei hong om.
Apa chu athi suale,
Pathianin atuna hiva nei om u na rama hin ei hong man lūt ani na.
5 Hatuka hiva hin amān ram alua rang pe mak ake pha siakna rang ngal pe mak.
Hanum nisela,
Abraham nāi anei mān han um,
ama le anūka achi ngāiin ram alua ranga Pathianin chong ei tin sua ani na.
6 Pathianin akōma hintin hin ati na:
‘Na chi ngāi chu mi rama khual chang unti na,
ruiril theina racham adōn ngāiin suak man chang unti,
kum razamanli pei sinsak unti.
7 Tenchu suaka anchang rang nam ngāi chu koiin achung u na rui la ril ka ti.
Hava suale hong suak unti na,
hatuka hiva muna hin koi na la biak unti,’
ati na.
8 Hatuka Pathianin akōma serantanna ruia dān ankhit athar chu ahong pēka.
Hankēng Abrahamin Isaak ahong neia,
ni riat nikhuana aser amantana.
Hatuka Isaakin Jakob ahong neia,
Jakobin sōmleianni nāi ngāi ahong neia,
aser amantan kiara.
9 Na chipui ngāiin Joseph rang ha khāmaret ei thō u sika Aigupta rama suak achang ranga azuar u na.
Tenchu Pathianin a ompuia.
10 Pathianin ei antakna dōra nāta amazōka.
Pathianin Pharao matona Joseph chu andit ruaina le hianna apēka.
Pharao chu Aigupta rama rēng ani na.
Hatuka Pharao hān Joseph chu Aigupta ram oppu le ainsūnga ami dōn ngāi dōra chunga ulian aman changa.
11 Hankēng,
Aigupta le Kanaan ram pumpuia han māitām ahong chula.
Antakna lian sabak ahong asuaka,
koini na chipui ngāiin itē nēk rang man u mak.
12 Tenchu Jakobin Aigupta rama bu a om ti ariat le koini na chipui ngāi atīra aman sē na.
Hava ha ei sē u na voi khatna ani na.
13 Hatuka voi anni asē u lāi han Joseph chu aparual ngāi le mēl anriat u na,
hatuka Pharaon Joseph insūngkua mi ngāi chu ariat theia.
14 Hava suale Joseph apa Jakob le ainsūngkua mi ngāi dōra akōm apāi kiara.
Amāni ngāi ha aloma miring sōmsari le rangā ani u na.
15 Hatuka Jakob chu Aigupta rama asēna.
Ama le koini na chipui ngāi dōra avathi kiar u na.
16 Sikim khuana aruak u ngāi chu ahong chōi u na.
Sikim khuana thāna aphūm u na.
Sikim pumapa kōma thān mun chu sum le ei rachōka han anphūm u na.
Abrahamin hiva thān mun hi sum lehan Sikim apa Hamor nāi ngāi kōma ei rachōk ani na.
17 Hatuka Pathianin Abraham kōma khomāk ansama chong ei tin ha ahong atung rang anāi zeia.
Aigupta rama koini na mi ngāi avapung sabak u na.
18 Nūka chu Aigupta rama Joseph riat lui rēng atei khat ahong asuaka.
19 Hiva mi hīn koini na nam ngāi ei huanga,
na chipui ngāi um pēngsōm ei manthō na,
nāite sender ngāi um ei dam u nōkna ranga apanga ei vamanpei chachak ani na.
20 Hava hun lāi han Mosi ei hong anzir ani na.
Ama chu Pathian mitmuna andit a om sabak ani na.
Apa insūnga thānthum bak avāia adōn theia.
21 Ama chu apanga avapei u lāi han,
Pharao nāi nupangin alei rūta,
anāi pasal ranga alei vāia.
22 Aigupta rama aloma hianna lama anchūna ngāi apēka.
Achongril le asinthō ngāi dōra chu anchang sabaka.
23 Hatuka Mosi chu kum sōmmanli ahong akāi le a unāi,
Israel nam ngāi chu avaen ranga amalunga achuia.
24 Hatuka hintin hin ahong ani zeia,
amāni bila mi khat dik sabak luia antak ei tiar amu le chu ahuaia hava Aigupta pasal chu athata ratha ei thuan ani na.
25 Asik chu Pathianin Mosi akut amanga aparual ngāi chu ei sana ei mazōk ti riat thei u bo ni ati na ei mandon ani na.
Tenchu riat pe thei u mak.
26 Hatuka hanūk zīng khuavāra Israel pasal anni ansual u lāi tak alāi u na ahonga angoina rang ahong thōna:
‘Pasal ngāi,
parual lesa kēng na ni u,
ichang mo nangni le nangni āsiat nei anthō u?’
ati na.
27 Tenchu ainkōl mi chunga āsiat athōpu hān Mosi chu asuk raka:
‘Koini na chunga ulian achang rang le ruirilpu achang ranga tu mo ana phun?
28 Mi zāna Aigupta pasal nei that anga koi um ana that ranga mo nei mandon?’
(Ant.2:14 )
ati na.
29 Hatuka Mosīn hava achong ariata Midian rama arota asēna.
Hava han khuala mi anga avaom a,
nāi pasal anni avaneia.
30 Hatuka Pathian vānpalāi khat akōma ahong anlanga.
Kum sōmmanli atheng suale Sinai mual kōla,
philchār rama,
ram achūl kāra moi achuang ahong anlanga.
31 Mosīn hava ha a-ena aneinun mu chu ati na chang re mak.
Anthiang uala a en ranga avadēp le chu Puma hē akōma ahong asuaka:
32 ‘Koi hi nang ni chipui ngāi Pathian ka ni.
Abraham Pathian,
Isaak Pathian,
Jakob Pathian ka ni,’
(Ant.3:6 )
ati na.
Hatuka Mosi chu annōka,
en ngam thei mak.
33 Hanūk chu Pumān akōma:
‘Na ke nāta na kekok ha khēk ro,
asik chu nei andingna mun ha mun ānthiang kēng.
34 Aigupta rama ka mi a om ngāi ei antak zia u chu taktaka ka mu zeia.
Hanūk chu ei ankūi u na rahūm ka riat zeia.
Amāni ngāi anzōk ranga hin kei hong chum ani na.
Atun hin hong ta ro,
Aigupta rama na tīr ka ti,’
ati na.
35 Hiva Mosi tak ngēt hi:
‘Koini na chunga ulian achang rang le ruirilpu achang ranga tu mo ana phun?’
ati na ei manianga ei pei u ha Pathianin ruaitu le anzōkpu achang rit ranga ram achūl kāra akōma ahong anlang vānpalāiin ei tīr ani na.
36 Mosīn Aigupta rama tichang abui sin le sinsiana ngāi aman mu na ei hong masuak ani na.
Hanūk chu tipuisen le philchār rama kum sōmmanli sūng pei ahong maruai ani na.
37 Hiva Mosi ngēt hi ani,
Israel nāi ngāi kōma ei ti:
‘Puma na Pathian un nangni ranga deari khat na parual ngāi āta koi ana phuazek khat hong masuak ka ti.
Ama achong ha rangāi u ro,’
(Dān.18:15 )
ati na.
38 Ama chu philchār rama na chipui ngāi ankhōma a om u lāia amāni ngāi bila a om.
Sinai muala vānpalāiin ei chongpui ani na.
Ama chu koini ngāi kōma anānlōn ranga Pathian kōm āta dān adam alākpu ani na.
39 Koini na chipui ngāiin ahē tel u mak,
tenchu ei maniang u ani na.
Hatuka amalung u ngāi chu Aigupta tianga dēn ei makhīr rēt u ani na.
40 Amānīn Aaron akōma:
‘Na matona ana ruai ranga Pathian ngāi na sin pe ro,
asik chu hiva Mosīn Aigupta ram āta ana honga ruaipu ha imo ei chang ani zei,
itē re thei lāi mak me,’
(Ant.32:1 )
ati u na.
41 Hasika han hava hun lāi han serātte ramīl khat asin u na,
hava ramīl kōma anbōlna ranga dāli ngāi chu ahong dar u na.
Amāni akut sin u ramīl ngāi kōma rāi amansān u na.
42 Hasika han Pathianin nūksīr asona,
chungvān tianga ārsi ngāi anmōk ranga abetōka.
Asik chu deari ngāi lekhabūna anziak ang taka:
‘O Israel mi ngāi,
philchār
rama kum sōm manli
sūnga han,
Anthat sua sake manli thisen
mo anbōlna ranga dāli ka
kōma nei hong dar u?
43 Hantin han,
nangnīn
Molok biakna puan biak in
nei chōia na Pathian u
Raphan ārsi ramīl nei sin
u ha nei amōk u.
Hasika han Babulon khopui
varāla selkeia na manruai
u ka ti,’
(Am.5: 25-27 )
ati na.
44 Koini na chipui ngāiin philchār rama ariatpuina puan biak in khat adōn u na,
Hava ha Pathianin Mosi kōma ei manchū le ei man mu ramīl anga aphuazek ani na.
45 Hava puan biak in ha kēng Josua ahun tenpeia koini na chipui ngāi kōma akhūk tina ei hong manlōn tir u ani na.
David ahun tenpeia Pathianin koini na chipui ngāi matona nam atei ngāi ei razūla Josua lehan hiva rama ei hong manlūt u na ram ei hong lua thei u ani na.
46 David chu Pathian malung zōt taka om mi ani na,
amān Jakob Pathian omna rang in adet khat asin ranga azōta.
47 Tenchu Solomon kēng ama omna ranga in asin ani zeia.
48 Hanum nisela,
Chungnung khīta om Pathian chu miring kut sina biak ina om ngāi mak.
49 Hiva hi dearin ei ti anga:
‘Pumān ei ti,
Anvān hi kei
ansutna chōmphāng ani na,
Phil hi ka kepha siakna mun
ani na.
Hanle,
hong in mo ka ranga
nei la sin rang?
Hanūk chu ‘Ka pōng ansana
rang um nisela hong zāt
mun mo ei ni rang?
50 Hiva ngāi dōra aloma ka
kutin ei sin zit ni mak mo?’
(Isa.66:1 -2 )
ati na.
51 Nangni aruangru ankhir ngāi,
amalung le akuar serantan lui ngāi!
Ratha Ānthiang hi na dui chian u na,
asik chu na chipui u ngāiin ei thō u anga nangnīm nei thō u ani zei.
52 Na chipui u ngāiin hova deari ngāi bila mi mo ei sinsak u nōk?
Hanūk chu amānīn Mīnthiang khat ahong rang rui ei ril u ha nangnīn na lei that u ani na.
Hava Mīn thiang tak ha atuna ansūrpu le anthatpu na ni u zei.
53 Nangni tak hi vānpalāi ngāiin ei manlōn dān amana zī lui ngāi na ni u zei,”
ati na.
Stephan lung andēng
54 Hiva chong ngāi hi ariat u le chu achālaka atak asi sabak u na Stephan atak chunga rakam arial u na.
55 Tenchu hava hun taka han Stephan chu Ratha Ānthianga ābit ani na.
Chungvān tiang atanga Pathian ei anlian zia le Pathian chang tianga anding Miring Nāi Pasal chu a en chiana.
56 Hatuka amān:
“En u ta,
anvān chu anlonga ka mu zei,
hatuka Miring Nāi Pasal chu Pathian chang tianga andinga ka mu zei,”
ati na.
57 Hasika han akuar u ngāi amahīp u na,
anring sabaka ankhēk u na,
loko rualin avadel u na.
58 Hatuka khopui āta arasua u na,
lung le avadēng u na.
Hatuka ariatpui ngāi dōra chu ruathar khat araming Saul ake kunga apuan u ngāi avasiak kiar u na.
59 Amānīn lung le adēng u
lāi han,
Stephan chu Puma kōm bōr azonga:
“O Puma Isua, ka
ratha chu na la pe ro,”
ati na.
60 Hatuka,
mankhūk abila anringpana ankhēk:
“Puma,
hiva mi ngāi ei masial u hi arang u na sūr pe nō ro,”
ati na.
Hatuka hava chong aril sua phing le ama chu ansīng rapa ei thi ani na.