Kuibing ansinsakna
sika a iam ngāi anthek u
8
1 Stephan athat u lāi han Saulin um ei mahampui ani na.
Hava nikhua len āta Jerusalem khopuia kuibing a om ngāi chunga achālaka ansinsakna ahong asuaka.
Kuitīr ngāi rong nōk chu,
aiam ngāi dōra Judia ram le Samari rama anthek rak u na.
2 Pathian andon mi senkhat ngāiin Stephan chu avaphūm u na achālaka a chap sabak u na.
3 Tenchu Saul hān kuibing ngāi ansiat aphut zeia.
In tina avalūta,
nupang pasal avanuka lung ina ankhum ranga abetōka.
Samari rama
Philip thang ahui aril
4 Hatuka hava anthek rak ngāi ha ei sē u na mun tina thang ahui chong aril tir u chachaka.
5 Hatuka Philip chu Samari rama khuana asēna.
Amāni kōma Krista rui avapuanga.
6 Hatuka mipuin Philip achong ariat u le sinsiana ngāi rui ei riat u na ei mu u na malung mun khata ahē arangāi u na.
7 Asik chu ratha annimin ei sūr mi ātampa sūng āta anringpana ankhēka ratha annim ngāi chu ei hong suak u chachak ani na.
Hanūk chu azeng le akhor tamtak um alei man dam ani na.
8 Hantin han hava khuana han achālaka rāi ei man sān u
ani na.
Mitpial dōi athei Simon
9 Tenchu mi khat araming Simon ati na a om a,
aphut āta hava khuana han mitpial dōi athei ani na.
Samari mi ngāi rang aboi ei man dong chachaka,
hanūk chu athetheia mi lian khat ka ni ati na chongpāk ansal chachak ani na.
10 Mi dōrān asīn khīt āta ansāng khītin um achong arangāi sabak u na.
Amānīn ati u na:
“Hiva mi hi Pathian thōtheina alian khīt adōn ani,”
ati una.
11 Hun asōtpa nāta adōi theina lehan mi aboi ei man dong chachak sika han ama chong ei rangāi u chachaka.
12 Philippin Pathian ram le Isua Krista raming ruia chong arila.
Philip achong a iama nupang pasal baptisma alāk u na.
13 Hatuka Simon len um a iama baptisma alāka,
Philip abila a om chiana.
Sinsiana ngāi le tichang abui sin thō ngāi amu na aboi aman donga.
14 Hatuka Jerusalem khopuia om kuitīr ngāi hān Samari khuana mi ngāiin Pathian chong apom u zei,
ati na ariat u le Peter le Johan amāni kōma atīr u na.
15 Hatuka amānīn Samari khua avasuak u le Samari ngāiin Ratha Ānthiang ei man thei u na ranga bōr azong u na.
16 Asik chu hava mān han amāni kāra tutē chunga Ratha Ānthiang la hong tung mak.
Puma Isua raming ronga kēng baptisma ei lāk u.
17 Hankēng Peter le Johan achung u na akut abāng u na,
Ratha Ānthiang aman u na.
18 Kuitīr ngāiin mi chunga akut abāng u le Pathianin Ratha Ānthiang ei man u Simonin amuna,
akōm u na sum apēk rang ati na.
19 “Koi um hiva ang thōtheina ranak na pe u ro,
hankēng angkhat pei chunga ka kut kei bāngna taka Ratha Ānthiang ei man thei u na ranga,”
ati na.
20 Tenchu Peterin akōma:
“Pathian neinun pēk hi sum le anchōk rang malung nei thō sika,
Pathianin na sum le ile na pei rase.
21 Pathian mit muna na malung ei anzīk nōk sika,
hiva dorbon doma hin itē anchelna nei mak che,
na chang āi um om mak.
22 Hava sika han,
āsia nei mandon āta na malung makhīr tān,
Pathian kōma zong ro,
asik chu asa nōk na malung mandon hi ana la madual ving theia.
23 Asik chu na sūng hi mit akhana ābit le adik nōka ankhit kēng na ni ti ka na mu,”
ati na.
24 Hatuka Simonin amasanga:
“Nei ti u ngāi dōra ka chunga ei chul nōkna ranga,
Puma kōma bōr na zong pe u ro,”
ati na.
25 Hatuka amānīn amanriat tir u na,
Puma chong aril tir u na Jerusalem khopuia akīr u na.
Hava han ei pan balam u han Samari khua tamtaka thang ahui chu aril tir u na.
Philip le thāidōr
26 Hatuka enta,
Puma vānpalāi khat Philip akōma chong ahong rila:
“Anthui tānala,
sim tianga lam Jerusalem khopui āta Gaza khua apan lampuia sē ro,”
ati na.
Hava lampui ha philchār ram panna lampui ani na.
27 Hatuka anthuia asē lena.
Hankēng enta,
Ethiopia ram āta mi khat,
Ethiopia ngāi rēngnu Kandaki thuaia sin athō thāidōr ulian khat a om a.
Ama hi rēngnu anei anung ngāi dōra chunga arungpu ani na.
Ama chu Pathian avabiak ranga Jerusalem khopuia asē ani na.
28 Hatuka ahong kīr tiang han,
arōt chunga ansuta deari Isaia lekhabu aphonga apore tira.
29 Hankēng Rathān Philip akōma:
“Sova ei chuangna rōt so vahuam tānla vānloppui ro,”
ati na.
30 Hatuka Philip thāidōr kōma atān le chu amān deari Isaia lekhabu kēng ei pore ti avariata.
Hatuka Philippin akōma:
“Hava nei pore ha imo a omzia na riat thei mo?”
ati na.
31 Hatuka Ethiopia mi hān:
“Mi khat pein ana rila ana manthiang vang nōk ten,
hontin mo kei riat thei rang?”
ati na.
Hasika han Philip chu ama bila avachuanga ansutpui ranga amathēma.
32 Pathian lekhabu alei porena mun tak hiva hi ani na:
“Anthat ranga bera anga ama
chu aruai u na.
Mul anchēppu makunga
berate anga adāireka.
Ama chu amūr malong mak.
33 Annuaia a om lāi han,
ama
asanpu ranga tutē om mak.
Ama achi le akhūk rui tu mo
apuang rang?
Ramual āta ama ei damna chu
ei lāk pe u,”
ti hi ani na.
34 Hatuka thāidōrin Philip kōma:
“Dearin hiva hi tu ruia mo ei ril?
Ama atheia rui mo ole mi tei ruia mo ei ril?
Hiva rui hi ana ril ranga kei na rakel,”
ati na.
35 Hankēng Philip chu hiva Pathian lekhabūna chong āta aphuta Isua ruia thang ahui akōma aril pe na.
36 Hatuka amāni ha lampuia asē susūng u na,
ti ei omna mun khat ahong suak u na.
Hasika han thāidōrpan:
“Enta,
hiva hin ti a om hile,
baptisma kei lākna ranga hong mo ana khār?”
ati na.
37 Hatuka Philippin amasanga:
“Na malung dōra le pei na iam ten,
na lāk thei,”
ati na.
Hatuka amān amasanga:
“Isua Krista chu Pathian Nāi Pasal ani ti ka iam zei,”
ati na.
38 Hatuka chu arōt pōngansa ranga ati na.
Hatuka Philip le thāidōr chu tina avachum rit u na,
Philippin baptisma apēka.
39 Hatuka ti nāta ahong kal sua phing u le,
Puma Ratha hān Philip chu anlāiseka aruai viak lena.
Thāidōrin Philip chu amēl amu lāi nōkām nisela rāisān hiaia alampui apana.
40 Tenchu Philip chu Azota khuana avān lang rēta.
Hatuka ei sē balam han Kaisari khua ten pei khotina thang ahui aril titira.