Ankhumna in āta tichang abuia Peter azōk
12
1 Hatuka hava hun dām lāi han rēng Herod chu kuibing ngāi kār āta senkhat pēngsōm athō ranga kut anlek rang athōna.
2 Hatuka Johan aparual Jakob chu khendāi le athāta.
3 Hava ei thō ha Jihudi ngāi arāi asān u ti ariata Peter um avamansūra.
Hava lāi taka nikhua ngāi ha chol anchel lui ruti pānta nikhua ani na.
4 Hatuka Peter chu avamansūr sua le ankhumna ina avakhuma.
Sipai manli senga sipai rapom manlīn arung ranga abetōka.
Asik chu Zōkna pānta ansuale mipui vāntāng matona anlang ranga aderdīn ani na.
5 Hasika han Peter chu ankhumna ina akhum chiana.
Tenchu kuibing ngāiin ama ranga malung mun khata Pathian kōma bōr alei zong pe u na.
6 Hatuka Herod han mipui matona ahong masuak rang tianga zāna han Peter chu sipai anni kongkāra zīngzir le ankhita a ina,
hatuka ama arung ngāi um nisela makot kōla a om a,
ankhumna in chu ei rung chian u ani na.
7 Tenchu enta,
Puma vānpalāi khat akōl taka anlāiseka ahong anlanga ei omna inbingte chu ra-āngin ahong ēl ziaka.
Hatuka vānpalāiin Peter akāng ahong vita amathuia.
Hatuka vānpalāiin akōma:
“Anrapa anthui ta ro,”
ati na.
Hatuka zīngzir ngāi chu akut āta achul zit lena.
8 Vānpalāiin akōma:
“Na kōng khit tānla,
na puan ngāi rasila na kekok bun ta ro,”
ati na.
Hatuka hava anga athō na.
Hatuka vānpalāiin akōma:
“Na kultāi puan rasil tān,
ka nūk na hong zī ro,”
ati na.
9 Hatuka Peter asuaka vānpalāi nūk chu avazīna.
Tenchu vānpalāiin ei ti le ei thō ngāi dōra ha ataktak kēng ati na riat thei mak,
anrālna ei mu anga ala mandona.
10 Hatuka amāna arung le anūka arung ngāi akhēl sua ule khopui suakna thīr makot chu avasuak u na,
hava ha anininga anlong pe u na.
Hatuka asuak u na,
lampui khat azī sua
u le chu vānpalāiin anlāiseka amāk raka.
11 Hatuka Peter ahong ahian suale chu:
“Atun lam chu ka riat tatak zei,
Puma kēng avānpalāi ahong tīra Herod akut āta le Jihudi ngāi dōra derdīn āta ana hong anzōk ani zei,”
ati na.
12 Hatuka hava ha ariat vang suale Marka anti Johan anu Mari ina asēna.
Hava han mi tampa bōr azonga alei ankhōm u lāi tak ani na.
13 Hatuka Peterin suakkhār chu ahong atōka,
nupang sanāite khat araming Rodi hān ahong masanga.
14 Hatuka amān Peter arōl kēng ti ei riat phingle arāi asān raheia makot malong luia insūng tiang atān rēta:
“Peter kēng makota ahong anding chian,”
ati na avarila.
15 Tenchu amānīn:
“Achāng kēng na ni zei hile,”
alei ti u na.
Tenchu amān:
“Ama ngēt kēng,”
ati na athertita.
Hano tenchu:
“Ama aratha kēng ei ni rang,”
ati pe u na.
16 Tenchu Peterin suakkhār alei atōk chiana,
hatuka avamalong u na ama chu amu
u na achālaka aboi adong u na.
17 Hatuka amān adāirek ranga akut lehan azāpa.
Amāni kōma Pumān ankhumna in āta ei maruai zia arila.
Hatuka amān:
“Sē u tānla,
Jakob le unāi ngāi kōma hiva thang hi varil u ro,”
ati na.
Hatuka ama chu asuaka mun ateia asēna.
18 Hatuka zīng khuavāra chu sipai ngāi kāra anbuaina rahupuipa asuaka,
Peter chu hon tiang mo ei om ani zei ti andonna chang re u lāi mak.
19 Hatuka Herod hān asa dima aravāna hanum nisela tok lāi mak.
Hasika han arung ngāi chu achālaka aradēk suale athat kiar ranga chong apēka.
Herod athi
Hatuka Herod chu Judia ram āta Kaisari khuana asēna,
hava han avaom tota.
20 Hankēng chu Herod Tura le Sidon khuana mi ngāi chunga achālaka atak asina.
Tenchu hava ngāi ha lokona chong khat anrual u na akōma ahong u na,
hatuka rēng zālmun arungpu Balasta chu amāni ranga mal asin u na.
Asik chu rēngin aram āta amāni rama anēk asāk rang ei vazon chachak ani na,
hasika han akōma anngoina avazong
u na.
21 Hatuka hun ei ruat nikhua han Herod chu arēng raliang atianga rēng chōmphānga ansuta mipui ngāi kōma chong arila.
22 Hatuka hava lāi tak han mipui ngāi chu anring sabaka:
“Hiva rōl chu Pathian rōl kēng,
monisi ni lāi mak!”
ati na ankhēk u na.
23 Hankēng Pathian kōma anlianna ei pēk nōk sik han anlāiseka Puma palāi khatin ahong zēma,
hatuka rūlrukutin asāka,
ei thi len ani na.
24 Tenchu Pathian chong chu ansōna apung riama.
25 Hatuka Barnaba le Saul chu asin thō u rang azui ule Jerusalem khopui āta akīr u na.
Amāni bila Marka anti Johan chu aruai u na.