Barnaba le Saul atīr u
13
1 Hatuka hava lāi han,
Antiokei khuana kuibing a om ngāi bila han Deari le mīnchū ngāi senkhat a om u na.
Hava ngāi bila ani zei,
Barnaba,
Āduk ei ti u Simeon,
Kurini khuana Lusia,
rēng Herodan ei vāi Manaen le Saul ngāi ani u na.
2 Hatuka Puma haso andom le bu angoi chunga a om u lāi han Ratha Ānthiangin akōm u na:
“Barnaba le Saul chu ka ranga anthianga khāi u ro.
Asik chu haso andom ranga kei kui u kēng,”
ati na.
3 Hatuka bu angoia le bōr azong sua u le amāni chunga akut abāng u na,
hatuka ei man sē u ani na.
Barnaba le Saul Kupra
tianga asē u
4 Havan tin han Ratha Ānthiangin atīra Selukia khuana asē rit u na,
hatuka havan āta Kupra tianga antola ei sē u ani na.
5 Hatuka Salami khopuia a om u lāi han Jihudi ngāi ankhōmna in ngaia Pathian chong avaril u na.
Amāni san ranga abil u na Johan um a om ani na.
6 Hatuka havana mualanlān aloma a om ngāi apal kiara Papho khua ten pei ahong asuak u na.
Hava muna han Jihudi mi khat,
dōi athei le deari rothol khat avamu u na,
araming chu Bar-Isua ani na.
7 Ama ha ram optu Sergia Paul dorbōndom ani na.
Sergia Paul hi mi hian khat ani na.
Amān Pathian chong anngāi rang ei nuam sika Barnaba le Saul chu akōma ei kui ani na.
8 Tenchu dōi athei,
Eluma,
ama araming omzia chu hava len ha,
amān hava ngāi ranga alei khārtita.
Amān ram optu rang ha iamna nāta ankhīr ranga ei pūt ani na.
9 Hankēng chu mīn um Paul ei ti u Saul chu Ratha Ānthianga ābita,
dōi atheipa māisua tiang a en chiana.
10 “O nang diabol asanāi,
anhuangna tin le anphilna tina ābit,
dikna tin dōra aduipu,
Puma lampui anzīk āta ankhōi rēt chachak hi bāng nō ta ni mo?
11 En ro,
atun len Puma kut chu na chunga a om kēng ani zei,
na mit zīng intia khēp khat ranga ani vār mu nō ta ni,”
ati na.
Hatuka anlāiseka ansūm azīngin ahong khuma.
Hatuka akut asūra aruai rang mi aroka ancham titira.
12 Hatuka hava ngāi ha amu na ramoptu chu ahong iama,
hanūk chu Puma ruia anchūna ngāi chu achālaka aboi amandonga.
Pisidia rama Antiokeia Paul
13 Hatuka Paul le ama alōm ngāi chu Papho khua nāta antol u na Pamphilia rama Perga khua ten pei asē u na.
Hatuka Johan chu alōm ngāi amāk raka Jerusalema akīr viaka.
14 Tenchu amāni chu Perga khua amāka Pisidia rama Antiokei khuana avatung u na.
Hatuka Jihudi ngāi pōngansa nikhuana ankhōmna ina asēna avānsut u na.
15 Hatuka dānbu le deari ngāi lekhabu apore sua u le ankhōmna ina ruaitu ngāiin amāni kōma chong amathuan u na:
“Parual le unāi ngāi,
mi ngāi ranga lungngamna chong ang khat pei na dōn u ten,
hong ril u ro ba,”
ati u na.
16 Hatuka chu Paul andinga akut le azāpa:
“Israel mi ngāi le nangni Pathian anchi ngāi,
rangāi u ro.
17 Hiva Israel mi ngāi Pathianin koini na chipui ngāi hi ei thang ani na.
Hiva mi ngāi hi Aigupta rama a om u lāi han ei mansāng ani na,
hanūk chu thōtheina ranak kut lehan havan āta ahong maruaia.
18 Hatuka kum sōm manli zotor pei philchār rama amāni bibila atiara.
19 Hatuka amān Kanaan rama nam sari a om ngāi chu apei pe kiara,
hatuka amāni ei lua u rang ram chu ravān enna lehan abāk siama.
20 Hava suale chu deari Samuel ahun ten pei,
kum raza manli le kum sōm rangā sūng amāni ranga ruirilpu ngāi apēka.
21 Hatuka hava suale amāni ranga rēng khat azong rēt u na.
Hasika han Pathianin Kis anāi pasal Saul,
Benjamin achina mi chu amāni ranga apēka.
Amān kum sōm manli avonga.
22 Hatuka Saul chu akhāi suale amāni arēng u rang David ahong mandinga.
Hanūk chu ama arui tak hi Pathianin ei riatpuina ani na:
‘Jessi anāi pasal David chu koi ka malung do ang taka miring ka man zei,
amān aloma ka malung vong ngāi dōra chu na thō pe kiar inti,’
(1 Sam.13:14 )
ati na.
23 Ama achi nāta Pathianin,
chongtin ang taka Israel ngāi ranga Sandampu Isua ei masuak ani na.
24 Ama ahong mān han,
Johanin malung ankhīra baptisma alāk ranga aloma Israel mi ngāi kōma chong alei ril ani na.
25 Hanūk chu Johan asin thō rang ngāi dōra asua rang vitle:
‘Nangnīn koi hi tu ati na mo nei mandon u?
Koi chu ama ni makunga,
tenchu en u ro,
ka nūka angkhat ahong rang ani zei.
Koi chu ama akekok khitna asūt rua ngal ni makung,’
ati na.
26 Unāi le parual ngāi,
Abraham achina nāi ngāi le Pathian anchi ngāi dōra,
nangni na kōma hiva sandamna chong
hi ei na hong tīr ani zei.
27 Jerusalem khopuia a om ngāi le aruaitu u ngāiin ama chu ei riat u nōk sika,
hanūk chu pōngansa nikhua kipa anpore chachak deari ngāi rōl um ei riat thei u nōk sika āsia ei manlō u han deari ngāi chong ei makhip ani u zei.
28 Ama chunga thīna rang khop peia siatna itē amu u nōkām nisela athat ranga Pilat akōma ei vazong.
29 Hatuka ama aruia anziak ngāi dōra amakhip sua u le thing kros āta amasum u na thāna avaphūm u na.
30 Tenchu Pathianin athi nāta ahong mathui rēta.
31 Hatuka Galili ram len āta Jerusalem khopui tenpeia ama bila ahong ngāi kōma nikhua tampa anlanga.
Hava ngāi ha atun hin mi ngāi kōma ama ariatpui ani u na.
32 Hatuka koinīm nisela na chipui ngāi kōma Pathianin chongtin ei dōn,
thang ahui ha na kōm u na nei hong ril ani zei.
33 Hivan tin hin Pathianin Isua ei hong mathui rēta hin amāni anāi ngāi chunga achong ei hong makhip ani na.
Asik chu Sām lekhabu annina hiva hi anziaka:
‘Nang hi ka nāi pasal,
Aviana kei na nei ani zei,’
(Sām 2:7 )
ati na.
34 Hanūk ama chu ei heka phila ei kīr rēt lāi nōkna ranga Pathianin Isua athi nāta amathuia.
Hintin hin ama ruia ati na:
‘David akōma achongtina
bōrsāng ānthiang kei pēk chu
na kōma na pe rēt ka ti,’
(Isa.55:3 )
ati na.
35 Hasika han ama dēnin Sām lekhabu teia hintin hin ati na:
‘Nangin na Mi Ānthiang ei
chuaina amu ranga phal
pial nō ta ni.’
(Sām 16:10 )
36 Asik chu David,
Pathian malung do ang taka akhūk ngāi kāra haso adom suale ama chu ei thi ani zeia.
Hatuka achipui ngāi bila anphūma ei chuai ani na.
37 Tenchu Pathianin ei hong mathui chu chuaina mu lāi nō ni.
38 Hasika han parual le unāi ngāi,
hiva hi riat u tānla hiva Isua azāra,
āsia andualna chong chu na kōm u na kei na hong ril ani u zei.
39 Hanūk chu Mosi dānin nangni ngāi asat na manlō thei u mak.
Tenchu ama zāra tukareng aiam tak chu asat ei anlō thei ani zei.
40 Hasika han deari ngāiin hong zāt mo ei ril u ha na chung u na ei chul nōkna ranga anrēng u ro.
41 Asik chu:
‘En u ro,
nangni maniēro
athei ngāi,
Na chang dong untia,
anpei una ti.
Asik chu nangni na hun
u lāia sin khat ka thō na,
Hava rui ha mīn na ril ngal
u sela hava ka sin thō chu
iam u nō ta ni,’
ati,”
(Hab.1:5 )
ati na.
42 Hatuka Jihudi ngāi anchunna in āta asuak sua u le Jentail ngāiin Paul le Barnaba kōma hiva chong ngāi hi amatona pōngansa nikhuana aril rēt ranga amathēm u na.
43 Hatuka mipui ankhōmna achīn suale chu Jihudi tamtak le Jihudi zāt lūta Pathian andon ngāi bila mīn Paul le Barnaba nūk azī u na.
Hatuka amānīn mi ngāi achongpui u na hanūk chu Pathian alungkhamnana a om chian ranga mi amathēm u na.
44 Hatuka amatona pōngansa nikhua han chu aloma kho pumpuia mi ang zotor Pathian chong anngāi ranga ahong ankhōm u na.
45 Tenchu Jihudi ngāiin mipui alei mu u na achālaka khāmaret athō u na.
Hatuka amānīn Paul achong ril ngāi dōra chu alei ankhalpui le alei ēro u na.
46 Tenchu Paul le Barnaba chu ngamna adōn riam u na:
“Pathian chong hi nangni na kōm u na anril mānsa rang nei nāng ani na,
tenchu na lei thei māk u sika tāituan damna achang ranga nei anbe u nōk.
Hasika han en u ro,
koini chu Jentail ngāi tianga anhoi inti.
47 Asik chu Pumān hintin hin koini kōma chong ana pēka:
‘Jentail ngāi ranga ra-āng nei
chang thei u na ranga,
Hanūk chu ramual kōlkil
tenpei sandamna achang
ranga kei na phun u kēng
ani zei,’
ati,”
(Isa.49:6 )
ati u na.
48 Hatuka hava ha Jentail ngāiin ariat u na arāi asān u na,
Pathian chong chu amanpāk u na.
Tāituan damna achang ranga Pathianin ei ruat ngāiin a iam u na.
49 Hatuka Puma chong chu hava ram pumpuia aloma athek u na.
50 Tenchu Jihudi ngāiin Pathian andon ngāi bila nupang senkhat le raming anthang ual nupang ngāi le khopuia ulian senkhat amathok u na.
Hatuka Paul le Barnaba chunga ansinsakna rui amasuak u na akhua u nāta arazūl u na.
51 Tenchu Paul le Barnaba chu amānīn ei dem u na ake philvut u chu athinga ei māk u.
Hatuka amāni chu Ikoniam khuana asē u na.
52 Hatuka zolāi ngāi chu rāisānna le Ratha Ānthianga abita ei om u ani na.