Ikoniama Paul le Barnaba
14
1 Hatuka Ikoniam khuana Jihudi ngāi ankhōmna ina Paul le Barnaba chu avalūt u na.
Achong ril u han Jihudi le Grik chong amang mipui ātampan ahong iam u na.
2 Tenchu a iam nōk Jihudi ngāiin Jentail ngāi ama thōk u na,
unāi ngāi chunga malung āsia ei man chōi u.
3 Hava sika han Paul le Barnaba chu Puma ruia arāng chunga chong aril titir u na,
hava han hun asōtpa ei om u.
Hatuka amānīn sinsiana le boidongkhap sin ngāi chu athō u na,
alungkhamna rui ani ngēt ati na ei man riat u.
4 Tenchu khuana mipui ngāi chu ansen sāi pok u na.
Asen chu Jihudi ngāi tiang akop u na,
asen chu kuitīr ngāi tiang akop u na.
5 Hatuka Jentail le Jihudi ngāi le aruaitu u ngāi lehan anruala mipui amanbūma amāni chu māimōk asak rang le lung adēng ranga ei ansin u.
6 Hava ha ei riat phing u le Lukonia rama Lustra khua le Derbe khuana avarot u na.
7 Hava muna han thang ahui avaril chian u na.
Lustra le Derbea Paul
8 Hatuka Lustra khuana ake khor khat ansut babanga a om a.
Anzir len āta ake khor zēt ani na,
kal la chōi ngal ngāi lui ani na.
9 Hava nāi hān Paul achongril arangāia,
Paulin ama tiang a en chiana,
adam theina ranga iamna adōn ti ariata.
10 Hatuka anringpana ankhēka:
“Na ke le kal chōia andīnphita anding ro!”
ati na.
Hatuka ama chu antōma kal ei chōi chunga ei sē ani na.
11 Hatuka mipuin Paul ei thō ngāi amu u le Lukonia mi ngāi chonga anringpana:
“Pathian ngāi kēng monisi anga koini ngāi kōma ahong achum ani zei!”
ati u na.
12 Barnaba rang Zeu ati u na.
Paul chu chong aril athei ei ni sika Herme ati u na.
13 Hatuka khopui matona om Zeu biak in ha ochāiin serāt tang le pār raka ngāi makot kōla ei hong chōia amāni bila mipui abiak ngāi ranga anbōlna rang serāt athat rang ei zōt u ani na.
14 Tenchu kuitīr Barnaba le Paul hava rui ei riat phing u le apuan u ngāi athēt u na mipui kāra atāna ei valūt u.
15 Hatuka ei an khēk u na:
“Monisi ngāi,
ichanga mo hiva om ngāi nei thō u?
Koinīm nangni ngāi anga nun chang anput adōn miring kēng na ni.
Hiva ei nemna bui akorong ngāi amāka Pathian adam tiang nei hong kīr thei u na ranga thang ahui na kōm u na nei hong man tung kēng.
Ama hi anvān le ramual le tipuilian hanūk chu asūnga a om dōra asinpu ani na.
16 Hava Pathian hān tian lāia nam atei ngāi dōra alampui chip azī ranga ahong aphal ani na.
17 Amān asa tin ei thō na hin aninga anriatna mi kōma ei pēk hi machāi pial mak.
Anvān āta ruati ei na pēka akum le ahuna thei mara ei na pēk.
Amān nēk sāk hanūk rāisānna le koi ni na malung ei na man bit pe,”
ati u na.
18 Hava chong ngāi aril u le kēng mipui ngāiin amāni ranga dāli ei dar u ranga nāta ei khāp zām thei u ala ni.
19 Tenchu Antiokei le Ikoniam khua nāta Jihudi nam senkhat ahong u na.
Amāni hān mipui abut zat u na Paul chu lung le aman dēng chian u na.
Athi zei ati a ei iam u sika han khopui āta ei keia ei chōi u.
20 Tenchu zolāi ngāi aravēla anhual vinga anding chit u lāi tak anthuia khua sūnga avalūt rēta.
Hatuka zīng khua vāra Barnaba le han Derbe khuana ei sē u ani na.
Suria rama Antiokeia akīr u
21 Hava khuana han thang ahui rui aril u na zolāi atāmpa aman chang sua u le Lustra,
Ikoniam le Antiokei khuana akīr rēt u na.
22 Hatuka zolāi ngāi malung aman rāta iamnana adettita a om ranga lungngamna asak u na:
“Antakna tamtak atiara Pathian rama nei lūt rang anāng,”
ati u na.
23 Hatuka kuibing tina pātar athang u na,
bu ngoi chunga bōr azong u le ei iam u Puma kōma ei betōk u chachak ani na.
24 Pisidia ram avachīl sua u le Pamphulia rama ahong atung u na.
25 Perga khuana chong aril sua u le Attalia khuana ei pan u.
26 Hatuka havan āta rakuang aliana Antiokei khuana ei antol u.
Hiva khua hi kuibingin kuitīr ngāi ei tīr u na mun ani na.
Hava lāi han Barnaba le Paul
chu hasōndom ranga Pathian lungkhamna kuta abetōk u na.
Atun chu asin thō u rang azuia Antiokei khuana akīr rēt u na.