Jerusalem khopuia
kuibing ruiril
15
1 Hatuka Judia ram āta pasal senkhat Antiokei khuana asē u na:
“Mosi dāna ei na ti anga,
ser na mantan u nōk ten sandam ni thei u nō tani,”
ati na unāi ngāi kāra ei hong man chu u.
2 Hatuka Paul le Barnaba chu anngoi u mak achālaka ankhal sabak u na.
Kuibing hān Paul le Barnaba hanūk abil u na unāi senkhat hava anbuaina ruia Jerusalem khopuia kuitīr ngāi le pātar ngāi kōma asē ranga aruat u na.
Hatuka kuibingin amāni ngāi chu atīr u na.
3 Phoiniki le Samari ram ei vapal u balama Jentail ngāi Pathian tianga ei hong kīr rēt u rui chu aril u na.
Havan han unāi ngāi dōra rāi amansān sabak u na.
4 Jerusalem khopui atung u le kuibing ngāi,
kuitīr ngāi hanūk pātar ngāiin alei phām u na.
Hatuka Pathianin amāni manga sin ei thō ngāi dōra aril u na.
5 Tenchu,
Pharisi dōla aiam ngāi bila mi senkhat anding u na:
“Jentail ngāi serantan u rase,
hanūk chu Mosi dān ngāi um ei tel zit u ranga chong pēk inti,”
ati u na.
6 Hatuka kuitīr ngāi le pātar ngāiin hava ruia andon ranga anchun u na.
7 Asōtpa ankhal sua u le Peter andinga akōm u na:
“Parual le unāi ngāi,
Jentail ngāiin ka mūra āta thang ahui ariata ei iam u na ranga Pathianin mān āta nangni kār āta ei na
ruat ha nangnīn na riattit u na.
8 Hatuka malung āriatpu Pathianin amāni ei poma koi ni kōma Ratha Ānthiang ei na pēk anga amāni chungam Ratha Ānthiang ei pēka hin amāni kōma ama rui ei manriat ani na.
9 Iamnān amalung u ei manthiang sika amān koini le amāni na man tei lāi mak.
10 Hatuka,
koini na pi na pu ngāi le koinīn nei pēl thei nōk rīngkol ha atun zolāi ngāi rīnga anput ranga ichanga mo hantin han Pathian nei man sin u?
11 Tenchu hantin han ni mak,
amāni ei iam u anga koinīm Puma Isua Krista lungkhamna zāra iama sandama nei om kēng,”
ati na.
12 Hatuka mipui dōra chu adāi chīt u na.
Barnaba le Paul hān Pathianin amāni manga nam atei ngāi kāra sinsiana le boidong khap sin ei thō u ngāi rui aril u na arangāi u.
13 Hatuka,
amāni chong aril among suale Jakobin chong aril rēta:
“Parual le unāi ngāi,
ka chong na rangāi pe u ro.
14 Pathianin mānsa chu ami ngāi ahong thūna,
ama araming anput ranga Jentail ngāi ei athangna rui chu Simonin aril zeia.
15 Hava rui le deari ngāi chong ril chu ansūkthap ani na.
16 ‘Hava suale kīr rēt ka ti na,
David apuan in achiam chu
manding rēt ka ti,
Ei siatna ngāi dōra manliang
rēt ka ti.
Hiva ngāi dōra athōthei
Pumān manliang rēt ka ti.
17 Nam tin chi tin dōrān
Puma ei rok thei u na ranga
manding rēt ka ti.
Ka raming anput Jentail ngāi
dōrān Puma ei rok thei u na
ranga manding rēt ka ti.
Hiva ngāi dōra athōthei
Pumān ei ti ani na.
18 Tian lāi āta Puma asin thō ngāi dōra ahong anril kēng ani zei,’ ”
ati u na.
19 Hava sika han hintin hin kei masat:
“Jentail ngāi bila Pathian tianga anhoi ngāi tak chunga antakna sin u lāi nō rei.
20 Tenchu akōm u na lekha maziaka mathuan inti.
Amānīn ramīl anmōk,
annim abuang,
hurna le to-ōk andēna athi mē sāk le athi buang āta ei bāng thei u na ranga mathuan int.
21 Asik chu tian lāi āta Mosi chong rui aril titir mi khotina a om u ani na.
Hanūk chu Jihudi pōngansa nikhua kipa anchunna in tina achong anpore chachak ani na,”
ati na.
Jentail aiam ngāi ranga kuibing ruiril lekha
22 Hatuka chu kuitīr ngāi le pātar ngāi kuibing pumpui anrual u na ei pom u,
hatuka Paul le Barnaba bila Antiokei khuana asē rang amāni bila mi athang u na.
Unāi ngāi bila ulian anni athang u na,
hava ngāi ha Barsabba anti Juda le Sila ani u na.
23 Amāni kuta hintin hin ei maziaka ei mathuan u:
Koini na parual u kuitīr le
pātar ngāi hīn,
Nangni Antiokei khuana mi,
Suria rama mi le Kilikia
rama Jentail unāi ngāi,
Na kōma chibai na hong thō.
24 Koinīn na lei riat anga,
koini ngāi bila mi senkhat na kōm u na ahonga chong tin rēnga ei na hong manbuai u,
hanūk chu na malung sōk ei na mancha pe ani u zei.
Amānīn ei hong ti u chu:
“Aser nei tan ngēt u rang hanūk chu Mosi dān nei zī zit u rang anāng,”
ti ha ani na.
Tenchu havan tin han amāni kōm itē chong pe mak me.
25 Hasika han koinīn malung munkhat nānchun suale na unāi andit Barnaba le Paul ngāi abila mi senkhat nei thang ngāi atīr hi asa ranga nei mandon ani na.
26 Paul le Barnaba ngāi hi koini na Puma Isua Krista raming sika thi rang tenpeia anphal miring ani u na.
27 Hasika han Juda le Sila hi na kōm u na nei hong tīr.
Amāni hān hava ngāi rui dōra amūr u nam na manthei unti.
28 Ratha Ānthiang le koinīn um asa ati na nei madon ani na,
hiva anāng sabak rui ngāi rong nōk chu atei puak arikpa ngāi na manput u nō rei.
29 Ramīl anmōknana me andar asāk,
thi abuang,
to-ōk andēna mē sāk le hurna nāta nei bāng u rang hi ani na.
Hiva ngāi dōra nāta nān rung thei u ten asa na ni u zei.
Hituk hin ni rase.
Koinīn na manhek zei.
Amathāna amansē u
30 Hantin han anthān sua u le Antiokei khuana asē u na mipui ātampa amanchū u le hava lekha ha amanlōn u na.
31 Lekha chu apore u na hatuka hava ha phūkdāina chong ei ni sika arāi asān sabak u na.
32 Juda le Sila ngāi um deari ei ni u sika chongtin rēng le unāi ngāi lungngam asaka amalung u aman rāta.
33 Hatuka nikhua ho zet mo a om sua u le kuitīr ngāi kōma akīr rēt ranga unāi ngāi chu phūkdāi taka anthānpui u na.
34 Tenchu Sila chu hava han ala om chian ranga azōta.
35 Tenchu Paul le Barnaba chu Antiokei khuana a om u na Puma achong ngāi le thang ahui chu atei atei mi tampa kōma amanchū na,
aril u na.
Paul le Barnaba ankhal u
36 Hatuka nikhua ituk suale mo chu Paulin Barnaba kōma ei ti:
“Tho,
khotina Puma chong nei varil suana unāi a om ngāi kōma sē rēta vaen rei ba,
hon titin mo ei om ani u zei,”
ati na.
37 Barnaban Marka anti Johan chu amāni bila aruai ranga ei masuk ani na.
38 Tenchu ama hi Pamphulia rama abil u na sin athō sē luia alōm ngāi amāk rak ani na.
Hasik han havan tina miring aruai chu Paulin mancha lāi mak.
39 Hantin han amāni le amāni ei ankhal u sika ei ansen u ani na.
Barnaban abila Marka aruaia Kupra mualanlān tiang ei sēpui ani na.
40 Tenchu Paulin Sila athanga.
Hatuka unāi ngāiin Puma alungkhamnana abetōk u na ei sē u.
41 Hatuka Suria ram le Kilikia ram avacheia,
kuibing ngāi dōra chu avamanchū u na.