Paul le Sila nūk Timothīn azī
16
1 Hatuka chu Derbe khuana le Lustra khua chu avatunga.
Hatuka,
enta,
hava han zolāi angkhat araming Timothi a om a.
Ama chu Jihudi nupang aiam khat nāi pasal ani na.
Tenchu apa ha chu Grik mi ani na.
2 Lustra le Ikoniam khuana unāi a om ngāiin ama chu ei manpāk sabak u ani na.
3 Paulin ama chu abil u na aruai rang ei zōt sika aser ei tan pe na.
Asik chu hava muna Jihudi a om ngāi dōrān apa Grik mi ani ti ei riat u ani na.
4 Hatuka khotina ei sē balam u na Jerusalem khopuia kuitīr le pātar ngāiin rīti ei masat dān athar atel rang unāi ngāi kōma lekha ngāi abetōk u na.
5 Hava sika han kuibing a om ngāi chu iamnana adet tir u na,
anikhuan tina miring ansona apung tir u na.
Troas khuana
Paulin anrālna amu
6 Tenchu Ratha Ānthiangin Asia rama chong aril ranga ei khāp sika Phrugia le Galatia rama asē u na.
7 Hatuka Musia ram ahong suak u le Bethunia rama asē rang aval u na.
Tenchu Ratha hān alūt ranga phal mak.
8 Hankēng Musia ram akhēl u na Troas khuana asē u na.
9 Hatuka zāna Paulin ramang anga ahong anrāla Makedonia rama mi angkhat andinga:
“Makedonia rama hong tānla,
koini na hong san ro,”
tia ei mathēm chian ha ei mu ani na.
10 Hatuka ramang chu amu sua le Makedonia rama sē rang koinīn nei pūt len ani na.
Amāni kōma thang ahui arila Pumān ei na pāina kēng ti na riata.
Philippi khuana Ludi
amalung anthūl
11 Hava sika han Troas khua nāta rakuanga nei suaka,
aluang zāta Samothraki mualanlāna nei sē ani na.
Zīngkhua vāra Neopoli khuana nei sē rēt ani zei.
12 Hatuka havan āta Philippi khuana na sē na.
Hava khua ha Makedonia rama khua lian angkhat ani na.
Rom khua nāta mi anthot ngāi omna khua ani na.
Hava han nikhua tampa na om a.
13 Hatuka Pōngansa nikhua rakul makot pang tianga tidung kōla mīn bōrzongna mun ei ti u na tiang na sē na.
Hatuka nānsuta,
nupang ahong an khōm ngāi kōma chong na rila.
14 Hatuka Thuatira khuana mi,
araming Ludi,
puansenduk azuar chachak,
Pathian abiak nupang khatin koini chong arangāia.
Paul achong ril ei pom theina ranga Pumān amalung amalong pe na.
15 Ama le a in sūngkua mi dōra baptisma na pēk suana:
“Nangnīn aiam tatak ani zei ati na nei na mandon u sika ka ina hong tung u ro,”
ati na amathēma na mathān pial mak.
Paul le Sila lung ina ankhum
16 Hatuka hintin hin ani a,
bōrzongna muna na pan lāi han,
suak nungākte khat hi dōi aen thei ratha sa nōk hān ei sūr ha na vamu na.
Ama hān dōi ei en theina le apuma ngāi rang sum ātampa ei manpui chachak ani na.
17 Hava dōi aen thei hān Paul le koini ngāi na loma na nūk ahong zīna:
“Hiva damna lampui koini kōma ana ril ngāi hi,
Chung ansāng khīta Pathian suak u kēng,”
ati na ankhēka.
18 Han tin han nikhua asōtpa ati babanga.
Hatuka Paul chu amalung diar lāi mak,
raluai tiang anhoia:
“Isua Krista raminga asūng āta ahong asuak ranga chong ka na pēk,”
ati na.
Hatuka raluain amathān lena.
19 Tenchu,
apuma ngāiin asum man u na ranga asa dōra anpei zit zei ti ariat u le,
Paul le Sila chu akuta asūr u na ruiril ulian ngāi makunga aruai ranga bazār muna akei u na.
20 Hatuka rui aril ulian ngāi kōma aruai u na:
“Hiva mi ngāi hi Jihudi nam ani u na.
Koini na khua hi achān ei na hong man pōn sabak u kēng ani zei.
21 Koinīn hong zazāt dān mo nei pom nōk le nei nāng nōk ngāi ei hong ril u ani na.
Asik chu koini hi Rom rama mi kēng na ni,”
ati u na.
22 Hatuka mipui ngāi um Paul le Sila athō ranga apu u na.
Ruiril ulian ngāiin apuan rasil ngāi athēt pe u na,
rāimol le azēm ranga chong apēk u na.
23 Achālaka azēm sua u le ankhumna ina avakhum rap u na,
hatuka arungpu kōma asa dima arung ranga chong apēk u na.
24 Hava dōr pei chong ei pēk u sika amān ankhumna ina intepep sūnga avakhum rapa ake
u na ke-ōkna thing pēk aman bun u na.
25 Tenchu zānchima Paul le Sila Pathian kōma bōr azong u na,
la athō u na ankhum ngāiin arangāi chian u na.
26 Hatuka anlāiseka nīnu anrikpa ahonga,
ankhumna in ei ansutna lung ngāi chu annīka suakkhār dōra anlong zit lena,
hatuka zīngzir anbun ngāi dōra ankhēk zita.
27 Hatuka arungpa ha a in āta anthuia ankhumna ina suakkhār dōra anlonga amu na,
ankhum ngāi dōra arot kēng ani u zei ati a ei mandon sika akhendāi aphōia atheia anthat rang athō na.
28 Tenchu Paul anringpana ankhēka:
“Na thetheia itē ansiatna thō nō ro.
Asik chu koini na loma hin na la om kiar hile,”
ati na.
29 Hatuka lung in arungpu chu anēlna ahong achōi ranga arila atān chiana avalūta.
Anchi le annōk chunga Paul le Sila ake kunga avān boka.
30 Hatuka amāni rang ha tual panga aruaia:
“Ka pu ngāi,
sandamna kei man theina rang imo kei thō anāng?”
ati na.
31 Hatuka,
amāni hān:
“Puma Isua Krista iam ro,
Pathianin nang le na insūng mi dōra aloma sandama om inti,”
ati na.
32 Hatuka ama le a in sūng mi dōra kōma Puma chong aril u na.
33 Hava zāna hun lena han aruaia ei zēm u na manu ngāi chu arathiall pe u na,
hatuka ama le a in sūng mi dōra baptisma apēk len u na.
34 Hatuka ina aruai u na,
nēk sāk amansūk pe u na.
Pathian ei iam u sika ama a in sūng mi dōra chu achān arāi asān u na.
35 Hatuka sūn ahong asuak le rui aril ulian ngāiin:
“Hava mi ngāi ha mazōk u ta ro,”
ati na misūr ulian ngāi atīr u na.
36 Hatuka arungpa hān Paul akōma achong ril u ngāi aman tunga:
“Rui aril ulian ngāiin anān zōk u ranga mi ei hong tīr u kēng ani zei.
Hava sika han atun suak u tānla,
phūkdāi riama sē u ro,”
ati na.
37 Tenchu,
Paul misūr ulian ngāi kōma:
“Nei satna le nei sat nōkna itē riat bak luia loko vāntāng mit muna ei na man zēma,
lung ina ei na mankhum u.
Koini hi Rom rama mi kēng na ni.
Atun maruka ei na tuara ei na mazōk u rang mo?
Hiva hi ni thei nō ni.
Amāni apum ngēt hong u sela na hong mazōk u rase,”
ati na.
38 Hatuka misūr ulian ngāiin hava chong ngāi ha ruiril ulian ngāi kōm avaril u na.
Rom mi kēng na ni ti ariat u le arathāta u zeia.
39 Hatuka asē u na avamathēm u na.
Hankēng ahong ruai u na:
“Khua nāta asuaka na sē pe zām u ta ro,”
ati u na.
40 Paul le Sila lung in āta ahong asuaka Ludi ina asē u na.
Unāi ngāi antong pui u na lungngam asak u na,
hatuka asuaka ei sē u ani zei.