Thessalonika khuana
17
1 Hatuka Amphipoli khua le Apollonia khua apala ei sē u na Thessalonika khua avatung u na.
Hava han Jihudi ngāi ankhōmna in a om a.
2 Paul ei thō babang anga amāni bila avalūta Jihudi ngāi pōngansa nikhuanthum chu Pathian Lekhana chong āta achālaka athūnpui u na.
3 Krista,
chu antakna ei tiar rang ei nāng zia le āthi nāta ei ānthui rēt rang zia ngāi ha ei rila achong ngāi ei man thianga:
“Hiva Isua hi Pathian sariak manthi Krista,
ama rui kēng kei na ril u,”
ati na.
4 Hatuka amāni bila senkhat chu Pathian a iam u na,
Paul le Sila tianga anchel u na.
Pathian andon Grik mipui ātampa le nupang raming anthang ātampa abila a kop u na.
5 Tenchu a iam nōk Jihudi ngāiin achān khāmaret athō u na.
Bazār mun āta mi ruanōk senkhat aruaia,
mipui ei man būm u na,
khua pumpui aman buai u na Jason a in rusum avathō u na Paul le Sila ei ravān u.
Amāni ha vāntāng matona,
aruai ranga ei val u.
6 Hatuka amāni anni ngāi chu tok u lāi mak,
Jason le unāi atei senkhat kēng khua ulian ngāi kōma ei keia ei ruai u na:
“Ramual pumpui anlet ankhup ngāi,
anchokelek le anbuai chachak ngāi hi hiva mun ām ahong u zei.
7 Hatuka Jason hīn ama ina alei man tunga,
hiva ngāi alom u na,
Kaisar adāna arui ril adui ei ti u rēng atei khat ala om,
araming Isua,”
ati na ankhēk u na.
8 Hava chong ngāi ariat u na mipui le khua ulian ngāi achān aman buaia.
9 Hatuka Jason le atei ngāi rathūla zabīm anding u na,
ama zōk u.
Beroia khuana
10 Hatuka unāi ngāiin zān zāna Paul le Sila chu Beroia khuana aman sē len u na.
Hava han avatung u le Jihudi ngāi ankhōmna ina avalūt u na.
11 Hava na mi ngāi chu Thessaloniki khuana mi nēka mi asa ual u ani na.
Asik chu malung dōra apēk tataka chong ei pom u ani a.
Paul achong ril chu ei dik le dik nōk riatna ranga anikhuan tina Pathian Lekhabu ei anchū u chachak.
12 Amāni bila Jihudi mi ātampan ahong iam u na.
Hanūk chu Grik nupang bila lalchi dōn ngāi le pasal ātampān ahong iam u na.
13 Tenchu Thessaloniki khuana Jihudi ngāiin Paul Beroia khuana Pathian chong aril ti ariat u le sova son um asē u na mipui avamathok u na,
avaman buai rēt u na.
14 Hatuka chu unāi ngāiin tipui lian rakham tenpei Paul chu ansē ranga ati papei u na.
Tenchu Sila le Timothi chu hava muna han a om chian u na.
15 Hatuka Paul chu mi senkhatin Atheni khua tenpei avaruai u na.
Hanūk chu Sila le Timothi ei thei zotor pei akōma anrapa apan ranga chong amāka asēna.
Atheni khuana
16 Paulin Atheni khuana amānīn alei ngāk lāi han,
khua sūng chu Pathian ramīl le abit thaka amu na achān amalung āsiāta.
17 Hava sika han ankhōmna ina anikhuan tina Jihudi ngāi le Pathian andon mi ngāi le bazār muna a om ei antongpui ngāi lehan ankhal u chachaka.
18 Hatuka Epikuria mi le Stoik mi ngāi bila mi,
hianna andit ngāi senkhat chu ama ahong ankhalpui u na:
“Mi senkhatin,
hiva chong ātam hīn imo ei ril zōt hi?”
ati u na.
“Senkhatin,
ram ateia Pathian chong arilpu nīnti,”
ati u na.
Asik chu Isua arui le anthui rētna rui kēng amān ei ril chachak ani na.
19 Hatuka ama chu akuta asūr u na,
Areopaga muala ruirilna han aruai u na:
“Hiva chong nei ril ngāi hi anchūna thar khat kēng hile,
koinīn le na riat thei mo?
20 Asik chu chong athathar koini ngāi kuara nei na man riat ani na.
Hava sika han hava ngāi om zia ariat rang na zōt,”
ati u na.
21 Atheni khuana mi dōra le akhua sūng u na khua teteia om mi dōrām,
hun anhēr u kip pei chong athar aril rang mo anngāi rang mo ei zōt u anga hun ei mang u chachak ani na.
22 Hatuka Paul chu Areopaga muala ruirilna amalāi taka andinga:
“Atheni khuana mi ngāi,
nangni hi alom peia Pathian andon sabak miring na ni u ti ka riata.
23 Asik chu mun tina kei chei sūng hin Pathian nei biak u na nei nūn ngāi ka muna.
Hava han māichām angkhat ka muna achunga:
‘Riatlui Pathian rang,’
ati na lung chunga nei maziak u.
Hava sika han riat luia nei biakpu u rui ha kei na hong ril u ani zei.
24 Hava Pathian ha maniapūr le asūnga neinun a om dōra asinpu.
Ama chu ramual le anvān Puma ei ni sika miring kut le ansin biak ina om ngāi mak.
25 Miring kut le adorbo andom um amān nāng mak.
Ama chu mi dōra aloma damna,
phūksanna le aloma a om dōra tukareng kōma apēkpu ei ni sika,
itē reng ansama om mak.
26 Miring angkhat āta nam tin chi tin hi ramual pumpuia ei lēng thei u na ranga asinpu ani na.
Amāni ei lēng u na ranga ahun le ei om u na ramri ei mandanga ei sin pe.
27 Miringin Puma chu ei ravāna,
ei tok theia,
akut le ei anchama,
ei vahuam theina ranga Pathianin ei sin ani na.
Hanum nisela ama chu koini ngāi angkhat angkhat āta ala sabaka om ni mak.
28 Asik chu ama zāra nei dam thei,
sīng nei ansa thei le nei om thei ani na.
Nangni bila laphuatu khatin:
‘Koinīm ama nāta asuak kiar kēng na ni,’
ati u na.
29 Hava sika Pathian āta asuak nei ni sika hin Pathian ramīl chu rāngkachak,
rupa,
lung le ansin miring akut thiam le malung avāra ei man sūk anga hin nei mandon u rang ni lāi mak.
30 Tian lāi chu Pathianin ei riat u nōkna ngāi itēna be pe mak.
Tenchu atun hin chu mun tina,
mi tin kōma malung ansīrna ranga chong ei pēk ani zei.
31 Asik chu nikhua angkhat ei ruat a om a,
hava nikhua han ami ei ruat hān maniapūra mi dōra adika rui la hong ril inti.
Ama ha Pathianin athi nāta ei mathuia hin mi tin kōma ei riatpuina ani zei,”
ati na.
32 Hatuka athi ngāi anthui rētna rui ariat u le senkhatin:
“Hiva rui hi na kōm āta athara rangāisa inti,”
ati u na.
33 Hava suale Paul amāni bil āta asuaka.
34 Tenchu mi senkhat mo chu Paul anūk azīna a iam u na.
Hava bila senkhat chu Areopaga muala ruirilna bila mi,
Dionusia ani na.
Hanūk chu nupang angkhat araming Damari ani na.
Amāni abil u na mi atei ātampa ala omsa u na.