Korinth khuana
18
1 Hava ngāi dōra ansuale Paul Atheni khua nāta asuaka,
Korinth khuana asēna.
2 Hatuka Jihudi mi angkhat araming Akuila chu antong puia.
Ama ha Pontia rama mi ani na.
Rēng Klaudian Jihudi nam dōra Rom āta asuak zit ranga chong ei pēk sika anungāk Priskilli le Itali ram āta Korinth khuana asē phing ala ni u na.
3 Paul amāni avān tongpuia,
amāni bila a om lena.
Amāni asin athō zāt dēn ei thō sika amāni bila sin athō na.
Amāni sin thō ha puanle in asin ani u na.
4 Hatuka Jihudi ngāi pōngansa nikhua kipa ankhōmna ina Jihudi le Grik mi ei chongpuia aiam ngāi ei buta ei manchū chachak ani na.
5 Hatuka Sila le Timothi chu Makedonia ram āta ahong u na Paul chu Rathan amaruaia Isua hi Krista ani ti Jihudi ngāi kōma ei man riat chachak.
6 Tenchu ama aduia asiat aril u han Paul chu apuan athinga,
akōm u na:
“Na thisen u phuba chu na lu chung u na chul rase koi chu kan thiang,
atun āta chu Jentail ngāi kōm asē rang ka ni zei,”
ati na.
7 Hankēng Paul ankhōmna in āta araming Justa ati na mi khat ina avalūta.
Ama chu Pathian abiak chachak ani na,
a in um ankhōmna in le anzom thap ani na.
8 Hatuka Krispa,
ankhōmna ina ulian,
ama le ainsūngkua dōra Puma a iam u na.
Korinth khuana mi ngāi um ariat u le ei iam u hatuka baptisma alāk u na.
9 Zānkhat chu Pumān Paul akōma ramang anga ahong ti na:
“Āchi nō ro,
chong ril chian pei ro,
dāirek nō ro.
10 Koi na bibila ka om hile,
āsia ana thō ranga tutēn na chunga kut alek nō ni,
asik chu hiva khua hin mi tampa ka la dōn,”
ati na.
11 Hava sika han Paul hava han amāni bila Pathian chong anchūna kum khat le atan a om a.
12 Hatuka Gallio chu,
Akaia rama ram optu achang lāi han Jihudi ngāi chong anrual u na Paul achunga ei varūn u.
Ruirilna in matona aruai u na.
13 “Hiva monisi hīn dān nonōka Pathian abiak ranga mi ngāi ei man chāng kēng ani zei,”
ati u na.
14 Paulin ama sang rang vita Gallion Jihudi ngāi kōma:
“Jihudi ngāi,
hiva hi masial duai athō mo ole āsia lianpa athō sika mo nisela chu koin kei na man don pe
ngēt rang ani na.
15 Tenchu,
chongkamte ngāi sika,
ramingte ngāi sika le nangni na dān u ngāi rui ei ni sika nangnīn rui vazēk mai u ro.
Koi chu hava ang zāt ril zōt makung,”
ati na.
16 Hatuka amān rui ril zōl āta amasuak kiara.
17 Hatuka Grik mi ngāi alom u na ankhōmna ina ulian Sosthene chu asūra rui ril zōl matona azēm u na.
Gallion hava ngāi dōra ha itē na malung pe mak.
Akuila le Priskilli,
Apolo ngāi rui
18 Hatuka Paul Korinth khuana,
asōt miaia ala om a.
Hava suale unāi ngāi anthānpui ngēia Suria ram tiang rakuanga asēna.
Abila Priskilli le Akuila ngāi um asē u na.
Paul Kenkria khuana asam aman vuia.
Asik chu Pathian kōma akhomāk ansam ei lenna ani na.
19 Hatuka Ephesi khua avatung u na.
Hava han amāni anni chu amāka,
Paul chu ankhōmna ina alūta.
Jihudi ngāi achongpuia.
20 Amāni bila asōt uala om ranga ama thēm u nam nisela zōt lāi mak.
21 Amāni anthānpui suale ati na:
“Jerusalem khopuia pānta a om rang hi kei mang ngēt rang anāng.
Pathian azōt anten,
nangni kōma hong rēt ka ti,”
ati na.
Hatuka Ephesi khua nāta rakuanga asēna.
22 Hatuka rakuang āta Kaisari khuana avachuma,
hatuka Jerusalem khopuia avakala kuibing chu chibai avathōna.
Hava suale Antiokei khuana asēna.
23 Antiokei khua a om tot suale ei sē rēt ani na.
Galatia ram le Phrugia ram achīl zita zolāi ngāi dōra aman chak tira.
24 Hava lāi han Jihudi angkhat,
araming Apolo,
Aleksandria khuana mi chu Ephesi khuana ahonga.
Ama chu achong thei sabak le Pathian Lekhabūna chong ariat sabak ani na.
25 Ama chu Puma lampui ruia mi ei manchū ani na,
amalunga ei harna le Puma rui adik taka ei rila ei manchū chachak ani na.
Tenchu Johan abaptisma rui rong ha ei riat ani na.
26 Ankhomna ina arāng sabaka chong aril ei phut ani zeia.
Hankēng Akuila le Priskilli han achong ril ariat u na akil uala aruai u na.
Akōma Pathian lampui rui adik bet uala ei man thiang pe sa u ani na.
27 Akaia rama asē rang malung avong le unāi ngāiin lungngam asak u na.
Ama alei phām u na ranga zolāi ngāi kōma lekha amaziak pe u na.
Hatuka avatung le Pathian lungkhamna sika a iam ngāi chu asan sabaka.
28 Vāntāng riata Jihudi ngāiin ama chu ankhal ngam om u mak,
Pathian lekhabūna chong amanga Isua hi Krista ani ti aman mu na.