Paul Ephesi khuana asē
19
1 Hava lāi han Apollo Korinth khuana a om kār han Paul chu mār bial tianga tāng lampuia Ephesi khuana ahong atunga.
Hava han zolāi senkhat anmu puia.
2 Amān akōm u na:
“Na iam u lāi han Ratha Ānthiang mo na chang u zei?”
ati na.
Hatuka akōma amānīn amasanga:
“Ratha Ānthiang ei om ngal ha la riat mak me,”
ati u na.
3 Hatuka Paulin:
“Hanle hong zāt baptisma mo nei lāk u?”
ati na.
Amānīn:
“Johan akōma baptisma nei lāk,”
ati u na.
4 Paulin:
“Johan chu malung akīrna baptisma le kēng baptisma ei na pēk u chachak.
Asik chu Paulin mi ngāi kōma han ama anūka ahong azī rangpu hi kēng nei iam u rang,
ama ha ani zei Krista,
Isua,”
ati na.
5 Hava chong ariat u na Paulin Puma raminga baptisma apēka.
6 Paulin achung u na akut abāng le Ratha Ānthiang chu ahonga achung u na achula.
Hatuka riat thei lui chonga ,
Pathian chong chu aril u na.
7 Hava ngāi ha alom u na pa anchang korong sōm lei anni ani u na.
8 Paul chu ankhōmna ina alūta,
tha anthum pei angam sabaka chong aril chachaka.
Pathian ram ruia mi achongpuia mi ei buta ei manchū chachak ani na.
9 Tenchu asen chu amalung ankhir u na,
tel zōt u mak,
mipui matona Lampui anti rui chu asiat aril u chachaka.
Paul chu ankhāia,
zolāi ngāi abingtena aruaia,
anikhuan tina Turanna anchūna ina mi avānkhalpui chachaka.
10 Havan tin han kum anni pei athenga ei sē ani na.
Hava mara chu Asia rama mi a om dōra Jihudi le Grik mi ngāiin Puma Isua chong chu ariat thei
u na.
11 Hatuka Pathianin Paul akut amanga achālaka tichang abui sin lampanga aman thō na.
12 Hava sika han ama atak chung āta rumāl mo ole kōngkhit mo angkhat pei ana ngāi kōma achōia avamantōn u ten,
ei natna ngāi le hanūk asūnga raluai ngāi um ei suaka ei sē ani na.
13 Tenchu Jihudi anthot titir mi senkhat dōi athei ngāiin Isua raming apāi ranga aval u na.
Amānīn ati u na:
“Paulin arui ei ril babang Isua raminga asūng āta raluai honga suak ranga chong ka na pēk,”
ati u na.
14 Hatuka hiva zāt athō chachak araming Skeva hān nāi pasal sari aneia.
Ama hi Jihudi ngāi chāizūng ulian ani na.
15 Tenchu raluai hān akōm u na amasanga:
“Isua ka riata,
Paul arui um ka riata.
Tenchu nangni hi tu mo na ni u?”
ati na.
16 Hatuka raluai adōn miring ha achung u na avachuana.
Alom u adeltita azēma,
hankēng hava in āta sāikoronga apop le aliama ei tāna ei suak u.
17 Hankēng Ephesi khuana om Jihudi le Grik ngāi dōra hava rui chu ariat u na.
Alom u na anchi chunga Puma Isua raming chu aman sānga amanpāk u.
18 Hatuka a iam ngāi chu asen azār ahong u na āsia ei thō u ngāi dōra aloma thupha ahong chōi u na.
19 Dōi athei ngāi tamtakin alekhabu u ngāi ei mankhōma ei hong chōi u.
Mipui vāntāng mit muna ei hāl u.
Hava ngāi ha aman atel u na sumru chian asāng sōm rangā pei ani na.
20 Hava dōr pei arāta Puma chong chu mun tina antheka ei rāt tir ani na.
21 Hava ngāi dōra ansuale Paulin Makedonia ram le Akaia ram achīl suale Jerusalem khopuia asē rang amasuka.
Hatuka ati na:
“Sova son ka vaom suale chu Rom khopui um kei vathin rang anāng,”
ati na.
22 Hatuka ama asan ngāi anni Timothi le Erasta chu Makedonia rama atīra.
Ama chu Asia rama ala om sa na.
Ephesi khuana anbuaina
23 Hava hun dām han Lampui ruia mi ngāi achālaka anbuaina lianpa adōn u na.
24 Mi angkhat,
araming Demetria,
rupa asutpu ama hān sumru mat le Diana
biak in ramīl asina.
Rupa sut thei ngāi kōma anlōna ātampa ei
hān asinthōpui ngāi aloma amankhōma akōm u na:
“Ka mi ngāi,
hiva sin nei thō u na hin sum nei sua nei vānna ani na.
26 Tenchu nei mu le nei riat u kēng hiva Ephesi khuana rong ni mak,
hiva Paulin Asia ram pumpuia miring ātampa kōma hin miring kut le ansin pathian chu Pathian ni mak,
ei ti na mi ngāi aman chānga ama khīr thak zei hile.
27 Hatuka koini na sin thōna raming ei masiat rang duai ha anchi zāt ni mak,
tenchu Diana pathian alian khīt biak in um lalchi anthō lāi nō ni.
Asia ram pumpui le ramual pumpuia mīn ei amōk hi ei anlianna anrapa anpei len inti.
Hava ha kēng anchi om,”
ati u na.
28 Hatuka hava chong ariat u na achālaka atak asi u na,
anruala ankhēk u na:
“Ephesi khuana mi ngāi,
Diana hi kēng alian khīt,”
ati u na.
29 Hatuka kho pumpui reng ha aman buai chit u na.
Gaia le Aristarka chu asūra lokōn atānpui u na.
Gaia le Aristarka ha Makedonia rama mi Paul abila khual anzin ani u na.
30 Paul chu mipui bila alūt rang ati na zolāi ngāiin phal u mak.
31 Asia rama ulian ngāi bila senkhat chu Paul amal ngāi ani u na,
akōma chong aman sē u na,
andāina phīlmuna alūt nōk ranga avamathēm u na.
32 Ankhōmna muna a om ngāi chu achālaka anbuai u na.
Mi tam riai chu ei anchun u na asik um re u mak.
Angkhatin angkhat chong arila han tin han achiar sabak u na.
33 Hatuka mipui bila mi senkhatin Aleksandra chu ei thei u na zia aril rang ati u na.
Tenchu Jihudi ngāiin mipui maton tiang atuar u na.
Hatuka Aleksandra chu akut le azāpa chong aril rang athō na.
34 Tenchu ama chu Jihudi nam kēng ati na ariat u le dār anni zotor pei alom u na chong khata anruala:
“Ephesi khuana Diana hi kēng alian khīt,”
hava duai ha ati na ei ankhēk chian u ani na.
35 Hatuka khopui sūnga lekhānziakpu hān mipui andāina athō tot suale:
“Ephesi khuana mi ngāi,
hiva hi tu mo ariat nōk?
Diana ramīl le Zeu ramīl hi anvān āta achul ti hi Ephesi khuana mi ngāiin ei riat ni u mak mo?
Diana ramīl hi ei riat u nōk mo?
36 Hava sika han hiva tuk ten annialna zāt om mak,
nei dāi riam u rang ani na.
Andon luia itē nei thō u rang hi dān ni mak.
37 Hivana mi nei hong ruai u ngāi hi biak in anruk ni u mak hile,
Pathian siat aril um ni u mak hile.
38 Hava sika,
han Demetria le alōm asinthōpui ngāiin angkhat pei chunga chong āsia adōn u ten ruiril in chu anlong ngal ani na,
ruiril ulian ngāi um a om u na.
39 Hava han na rui u ngāi hong dar u chachak ro.
Atei rui aril rang na dōn u ten,
hava anchunna in pangāia rui chat rase.
40 Aviana rahu sika hin koinīm āsel mīn ei na ti rang hi anchi om.
Asik chu itē abul abāl abui thak ani na.
Hivan tina abul abāl abuia nei ankhōm u na asik itē rila man vār thei nō mani,”
ati na.
41 Havan tin han amān chong aril suale mipui rahupuia ānchun ngāi chu aman chīn kiara.