Paul Makedonia ram
le Grik ram apan
20
1 Hava rahu pēk ansuale,
Paul zolāi ngāi akuia,
lungngamna asaka,
chong ahuia anthānpuia.
Hatuka Makedonia rama sē ranga asuaka.
2 Hava rama ngāi dōra chu achīl kiara chong ātampa le zolāi ngāi lungngam asaka.
Nukhon khīta chu Grik rama avatunga.
3 Hatuka hava han thānthum amang suale Suria rama rakuanga asē rang vit le Jihudi ngāiin akhit rang aval u na.
Hava sika han Makedonia ram tianga asē ranga amasuk rēta.
4 Hiva ngāi hi abila asē u:
Beroia khuana mi Sopatar,
Thessalonika khuana mi Aristarka le Sekunda,
Derbe khuana mi Gaia le Timothi,
hanūk chu Asia rama mi Tukhika le Trophima ngāi ani u na.
5 Amāni ngāi hi koini na matona alei sē u na,
Troas khuana ana lei vangāk u na.
6 Koini chu chol anchel lui ruti pānta nikhua ahek suale Philippi khua nāta rakuanga nāntola,
ni rangā suale Troas khuana na vān tongpuia,
hava han ni sari na om a.
Eutuka āthi nāta amandam
7 Hatuka hapta sūnga nikhua mānsa khīt nikhuana ruti ankhiak ranga nānkhōma,
hatuka Paul chu zīng khua vāra asē rang ei ti sika zān anchim ten pei amāni kōma chong arila.
8 Ina tadan ansānga nei ankhōmna muna han lēm ātampa a om ani na.
9 Hatuka hava han araming Eutuka ati na ruathar khat tukver sūng tiang ansuta.
Hatuka amit alei khu sika alei in zeia.
Paulin asōtpa chong ei ril sika mitakhu lei
diar lāi mak,
in thār anthum
āta achul vinga,
athi chunga avarūt u na.
10 Tenchu Paul thuaia avachuma,
achunga aboka avakuana:
“Na ratha manta u nō ro,
asik chu aphūk ala om,”
ati na.
11 Hava suale Paul chu chunga avakal rēta,
ruti akhiaka,
hatuka anēka.
Amāni kōma khuavār vita chong aril suale ei sē ani na.
12 Hatuka ruatharte chu adam vanga aruai una achālaka lungngamna adōn u na.
Ephesi kuibinga upa ngāi
Paulin anthānpui
13 Koini chu maton nānsana,
Asso khua tenpei rakuanga na sē na.
Sova nāta Paul chu rakuang lian sūnga anchuang ranga nei pūt ani na,
asik chu ama chu ke tianga asē ranga ngal ei mansūk ani na.
14 Hatuka Asō khuana na hong asuak le Paul chu rakuanga na makhala Mitulini khuana nei sē ani na.
15 Havan āta rakuang dēna na sē rēta,
zīng khuavāra chu Kio mualanlān kōla na vasuaka.
Hatuka hanūk nikhua rēta Samo mualanlāna na vasuaka.
Hatuka havan āta hanūk nikhua rēta han Trogillam khuana na vasuaka.
Hatuka hanūk zīng khuavār rēt le kēng Melita khuana nei vasuak ala ni.
16 Paul chu Asia rama hun asōtpa ei mang zōt nōk sika Ephesi khua chu rakuanga akhēl vat ranga ei zōt ani na.
Asik chu athei ten,
Pentikos nikhua ngēt avamang ranga,
Jerusalem khopuia asē ranga annot ani na.
17 Hatuka Melita khua nāta Ephesi khuana mi atīra kuibinga pātar ngāi chu avamankuia.
18 Hatuka akōma ahong u le amāni alom u ranga ati na:
“Asia ram ka hong thin mānsa nikhua len āta na bil u na ka om sūnga ka omdān ngāi chu na riat kiar u na.
19 Alom peia om annuai le mit rathi zān chunga le alom peia antak atiar chunga Puma haso kei adom ani na.
20 Hanūk chu ituk mo nangni ngāi nei anlāp u na rang pei aniten,
itē ip luia,
mipui vāntāng bila le in tina nangni ngāi anānchū ranga anpām ngal makung.
21 Jihudi le Grik ngāi kōma Pathian tianga malung ankhīra,
koini na Puma Isua Krista ei iam thei u na ranga asa dima kei manriat u ani na.
22 Hanūk chu en u ro,
atun hin Ratha Ānthiangin ei tīr hi tel luia om thei makunga,
hasik han Jerusalem khopuia asē ka nāng.
Sova son ka chunga imo kei vachang rang chu re makunga.
23 Tenchu Ratha Ānthiangin ei na ti:
‘Ankhitna le antaknān ei ngāk chian,’
ati na khotina ei na manthei rong hi kei riat thei ani zei.
24 Hanum nisela hiva ngāi dōrān angkhat ngalin na manbuai thei nō ni.
Kei damna hi ka ranga itēna be makung.
Tenchu kei tānna hi rāisān taka asua rang le Puma Isua kōma kei man Pathian lungkhamna thang ahui arilna dorbo rong hi asua ranga kei zōt ani zei.
25 Hanūk chu en u ro,
nangni kār āta Pathian ram ruia tāng kei hāi tira kei sē hin na lom u na ka mēl na mu u lāi nō ta ni ti ka riata.
26 Hava sika han loko thisen āta anthiang kēng ka ni ti hi avian na lom u na kei na manriat u ani zei.
27 Nangni kōma Pathian mandon ngāi dōra aloma anān thei u ranga annar ngal makung.
28 Hasika han nangni ngāi hi anrēng chip u ro.
En u ro,
Ratha Ānthiangin bera rual ngāi chunga arung ranga ei na phun u kēng.
Athisen le ei rachok,
Pathian kuibing achōm ranga ei na phun u ani na.
29 Ka na māk sua u le en u ro,
nangni bila ngelang anchirua ngāi hong lūt untia bera ngāi hōi ngal pial u nō ni.
30 Nangni ngāi bil āta ngēt um nisela aleko tianga chong arila atiang u na zolāia akei ranga la suak unti.
31 Hasika han rangāi u ro,
nangni bila kum anthum pei mit rathi zān chunga asūn le azāna kei na manchū u ha riattit u ro.
32 Atun chu unāi ngāi,
Pathian kōma le alungkhamna chonga ka na betōk u,
hava ngēt lehan nangni ngāi nei anding thei u na rang le Pathianin ei manthiang ngāi bila dōng ei na manlua thei u na rang ani na.
33 Koiin tutē ta rāngkachak,
rupa le puanpāi ning ōl makunga.
34 Ani lele kēng,
hiva ka kut ngēt lehin sin kei thōna koi le ka bila a om ngāi ei nāng u dōra chu kei zon chachak ti ha nangnīn na riat u na.
35 Havan tin han achuai ngāi apōng le asōl ngāi kōma nei zon thei u na ranga alom peia kei thō dōra chu kei na man mu kiar u ani na.
Asik chu Puma Isua achong ril ngāi ha mandontit u ro:
‘Alāk nēka apēka hin bōrsāng tungna kēng,’ ”
ati na.
36 Hatuka hava chong ngāi dōra aril suale chu mankhūk abila loko bila bōr azonga.