Paul Jerusalem khopui apan
21
1 Hava suale chu hintin hin ani na,
amāni ngāi le nān sen suale rakuanga nān tola,
andīn zāta na sē na Kos mualanlāna na vatunga.
Hatuka zīng khuavāra Rhodi mualanlāna na vasuak rēta,
hankēng havan āta Pātara khuana na vasuaka.
2 Hava han Phoiniki rama apan rang rakuang khat na vamuna,
hava han na chuanga na pan tira.
3 Hatuka Kupra mualanlān na vamu le chu sim tiang chang na rakāna Suria ram āta na sēna Tura khuana na hong achuma,
asik chu hava han rakuanga neinun ngāi ansum rang ani na.
4 Hava han zolāi ngāi chu na vamu le chu amāni bila ni sari na om a.
Ratha Ānthiangin amāni manga,
Paul akōma Jerusalem khopuia asē nōk ranga ei manthei u ani na.
5 Tenchu koini na nikhua ahong aheka,
nān sen rang tiang na lampui na pan han unāi ngāi dōra chu anungāk le anāi u ngāi le khopui akhēl raka ana hong thak u na.
Hatuka hava han tipui rakhama khūk sabila lokōna bōr na zonga.
6 Hatuka chong ahui le nān thān suale rakuanga na vachuanga,
amāni chu ina akīr u na.
7 Hatuka Tura khua nāta rakuanga antol nān suale Ptolemai khuana na hong asuaka,
unāi a om ngāi chu chibai na vathōna,
amāni bila ni khat na om a.
8 Hatuka zīng khuavāra na suaka Kaisari khuana na vatunga,
thang ahui aril chachak Philip a ina na valūta.
Ama hi kuitīr sari ngāi bila angkhat ani na,
ama ina na om a.
9 Amān nāi nupang in la nei lui nungākte ānthiang manli adōna.
Hava ngāiin deari anga chong aril u chachaka.
10 Hava han nikhua sōtpa na om a.
Hava lāi han Judia ram āta araming Agaba ati na deari khat ahong asuaka.
11 Ama chu koini na kōma ahonga,
Paul akōng khitna alāka,
anininga ake le akut ngāi chu akhita:
“Hivan tin hin Jerusalem khopuia Jihudi ngāiin hiva kōngkhit adōnpu hi ei khit u rang,
hanūk chu Jentail ngāi kuta ei betōk u rang.
Hiva hi Ratha Ānthiangin ei na ril,”
ati na.
12 Koini le hava na a om ngāi dōrān na riata,
Paul chu Jerusalem khopuia asē nōkna ranga na mathēma.
13 Tenchu Paulin amasanga:
“Ichanga mo hin tina nei om u hi?
Nei chap u sika hin ka malung asiata ka riata.
Puma Isua raming sika Jerusalem khopuia ankhit rong ni mak kei anphal tenchu thīna ten peia kei anphal kēng,”
ati na.
14 Hatuka:
“Puma ei zōt ang taka ni ta rase,”
na ti na.
15 Hava suale asē ranga aloma nānsin vang suale Jerusalem khopui chu na pana.
16 Koini bila Kaisari khuana zolāi ngāi bila senkhat um asē u na.
Mnason ina atung ranga ana ruai u na.
Ama hi zolāi mānsa ngāi bila mi le Kupra mualanlāna mi ani na.
Jerusalem khopuia Paulin Jakob antongpui
17 Hatuka Jerusalem khua na vatung le unāi ngāi rāisān taka alei phām u na.
18 Hatuka hanūk zīng khuavāra Paul koini na bila Jakob ina asēna.
Hava han kuibing pātar ngāi dōram alei om kiar u na.
19 Hatuka Paulin amāni kōma chibai avathō suale Pathianin sin ei thō ngāi dōra adōn tena arila.
Hanūk chu Paul,
ama len amanga Pathianin Jentail ngāi kāra asin thō ngāi aril kiara.
20 Hava chong ngāi ariat u na Pathian aman pāk u na,
hatuka Paul akōma:
“Enta parual,
Jihudi ngāi kāra ituk zāt mo a iam ei tam ani u zei,
hanūk chu dān lampangam alom u na achālaka atep annēl u ani na.
21 Mīn nang na ruia hiva hi ei ti u:
‘Jentail ngāi kāra Jihudi a om ngāi dōra chu Mosi dān lampui anmāk ranga mi ei manchū kēng ani zei.
Hava rong ni mak,
anāi u ngāi um serantan lele nāng mak hanūk chu pipu dān ngāi azī nāng mak,
ati na ei manchū,’
ati u na.
22 Hasika han atun koinīn imo nei thō rang ani zei?
Asik chu nei hong tung hi amānīn ei riat ngēt u rang ani na.
23 Hasika han koinīn nei na ti anga nei thō rang anāng zeia.
Koini bila Pathian kōma khomāk ansam pasal manli na dōna.
24 Hava mi ngāi ha ruai tānla,
amāni bila nang len um dān ang taka ānthiang ranga vān chel ro.
Hatuka asam ei manvui u na ranga sum nei thām rang ani na.
Hatuka nang na ruia lokōn mīn ei ti ha adik ni mak ati na manriat unti.
Hanūk chu nang len um dān atela adik taka nei om ti ha manriat unti.
25 Tenchu Jentail ngāi kāra aiam ngāi kōma adet rapa rui nei rila hintin hin nei maziak kēng ani zei:
Mi ramīl kōma andar dāli,
thisen abuang,
tōkbopa anthat me hanūk chu hurna lama ankhār u rase,”
ati u na.
26 Hatuka zīng khuavār le chu Paulin pasal ngāi aruaia amāni bila avān thianga,
Pathian biak ina avalūta,
dān anga anthiangna hun ei hekna avapuanga,
hatuka hava hun taka han dān anga anbōlna dāli ei dar chip u rang ani na.
Paul ei ansūrna
27 Hankēng ni sari nikhua chu ahek rang vit le Asia rama om Jihudi ngāiin Paul chu biak ina avamu u na,
mipui dōra ama thok u na ama chu avasūr u na.
28 Hatuka amānīn ankhēka:
“Israel mi ngāi,
na hong san u ta ro,
asik chu hiva mi hin koini na mi ngāi kōma le mun tina mi tin kōma dān ruia le hiva biak in ānthiang ruia adik nōka kēng ei manchū ani zei.
Ama bila han Pathian biak ina Grik mi ei hong lūtpuia hiva mun ānthiang hi ei hong mannim kēng ani zei hile,”
ati u na.
29 Hava mān beta han khopui sūnga Ephesi kho mi Trophima chu Paul abila om a ei mu u ani na.
Ama chu Paul nīnti Pathian biak ina ahong aruai ati na ei iam u ani na.
30 Hasika han kho pumpui achālaka anbuaia alum sabak zeia.
Mipui chu kil tin āta ahong atān u na,
Paul chu ahong sūr u na Pathian biak in āta ei keia ei rasua u ani na.
Anrarapa khopui ankhārna makot ngāi dōra chu akhār zit u na.
31 Hatuka athat rang ati na ei val u thang ha Rom sipai rual aruaipu kōma ahong asuaka,
amān Jerusalem khopui pumpui anbuai sabak zei ti alei riata.
32 Hatuka ama len sipai ngāi le sipai raza ruaipu ngāi aruaia atān u na.
Hatuka sipai raza ruaipu ngāi le sipai rual aruaipu ngāi alei mu u na,
Paul ei zēm chu among u na.
33 Hatuka sipai ruaitu khat akōla ahong pana Paul chu ahong sūra hatuka zīngzir anni le akhit ranga chong apēka.
Hatuka ama hi tu mo,
hong zāt mo ei thō?
ati na arakela.
34 Hatuka mipui ngāi chu angkhatin angkhat chong arila,
angkhatin atei chong arila,
a om zia tatak riat thei mak.
Hasika han ama chu sipai omna insūng apinga aruai ranga chong apēka.
35 Hatuka kalchum asuak le chu mipui taksitna sika han ama chu sipai ngāiin adianga ama ruai u na.
36 Asik chu mipui ngāiin anūk azī u na:
“Ama chu pei u ro,”
ati na ankhēk u na.
Paulin ama ei satna chong aril
37 Hatuka Paul chu inaping sūnga avalūtpui u rang vita sipai ruaitupa kōma:
“Na kōma ka chong mo thei?”
ati na.
Hatuka amān amasanga:
“Grik chong mo na thei?”
ati na.
38 Hanūk chu amān:
“Aigupta rama mi ha mo na ni?
Amān mipui ei mathoka mi āsel pōl ei sina miring asāng manli pei philchār rama aruaia ei vathat ha?”
39 Tenchu Paulin:
“Jihudi nama mi,
le Kilikia rama Tarsa khopuia mi le khopui anthanga mi ka ni na.
Na kōma kei na mathēm zōt khat chu:
‘Mipui ngāi kōma chong na manril lak ro ba,’ ”
ati na.
40 Hatuka sipai ruaitupān aphala Paul chu akalna sirbina andinga mipui ngāi dōra adāi chīt ranga akut le azāpa.
Hatuka amān Hebrai chonga chong arila: