22
1 “Parual ngāi le unāi ngāi,
atuna hin na kōm
u na kei satna le kei siatna
hong andar ka ti,
na rangāi pe u ro,”
ati na.
2 Hatuka Hebrai chonga chong ei ril ti ariat u na adāi reka a om riam u zeia.
3 Amān ati na:
“Jihudi nama mi,
le Kilikia rama Tarsa khopuia anzir ka ni na,
tenchu hiva Jerusalem khopuia hin Gamaliel akōma lekha anchūna ālian le āsei ka ni.
Amān koini na chipui ngāi dān a omzia ngāi ankhir sabaka ei na manchūna om ka ni na.
Aviana nangni ngāi na lom u na anga koi um Pathian ranga tak asat mi ka ni na.
Paulin ei anzir tharna rui aril
4 Hiva lampui azī ngāi chunga athat rang zotor peia kei sinsak chachak.
Nupang le pasal ngāi kei khita ankhumna ina akhum ranga kei betōk chachak.
5 Chāizung ulian khīt le pātar ngāi dōram hiva ruia anariatpui u ani na.
Hanūk chu amāni kōm āta unāi ngāi ranga lekha ka man suale Damaska khuana om ngāi chu kei khita Jerusalem khopuia kei ruaia nei sinsak theina ranga asē ka ni na.
6 Hatuka ka sē tir le chu,
Damaska khua ka suak rang vita,
sūn chīm ripa anlāiseka anvān āta ra-āng khuanlek anga ka ravēl a ēl zuaka.
7 Hatuka phila kan zuan raka,
ka kōma:
‘Saul,
Saul,
ichanga mo nei na sinsak chachak,’
ati na,
hē ka riata.
8 Hatuka koiin:
‘Puma,
tu mo na ni?’
ati na ka masanga.
Amān ka kōma:
‘Nazareta Isua nangnin nei sinsak chachak ha ka ni,’
ati na.
9 Ka bila om ngāi hān ra-āng ei mu u na ei chi u ani na.
Tenchu koi ana chong pui ahē chu riat u mak.
10 Hankēng koiin:
‘Puma hong mo kei thō ranga nei zōt?’
ka ti na.
Hatuka Pumān ka kōma:
‘Anthui tānla,
Damaska khuana son valūt ro,
sova son nangin nei thō rang dōra ansūk zēt ha na lei man thei unti,’
ati na.
11 Hava ra-āng ha ei ēl sabak sika avār mu thei lāi makunga.
Ka lōm ngāiin akut le ana maruai u na.
Damaska khuana ka lūta.
12 Hatuka mi angkhat,
araming Anania a om a.
Ama chu dān lampuia Pathian andon mi sabak ani na.
Havana Jihudi a om ngāi dōrān achān ana chi ti ei ril u ani na.
13 Ka kōma ahonga ka kōla ahong anding:
‘Ka parual Saul,
mit vārna nei rēt ta ro,’
ati na.
Hava hun len han amēl chu ka hong mu theia.
14 Hatuka amān ei ti:
‘Pathian malung vong nei riat theina ranga,
koini na chipui ngāi Pathianin ei na thang kēng.
Hava sika han ādik ha nei muna abāia chong kam ngēt um nei riat ani zei.
15 Asik chu nei mu le nei riat ngāi ruia mi dōra kōma
ama ruia āriatpui changin nati.
16 Ichanga mo nei la om chian?
Anthui tānla bapatisma la ta ro.
Puma raming na pāi le āsia nei thō ngāi dōra sāi inti,’
ati na.
17 Jerusalem khopuia ka kīra Pathian biak ina bōr ka zong
lāi han ramang anga ka om a.
18 Hatuka Isuan ka kōm chong arila kei mu:
‘Anrap tānla,
Jerusalem khopui āta suak lilip ro.
Asik chu koi ka ruia chong nei ril rang hi pom u nō ni,’
ati na.
19 Hatuka koiin ka tina:
‘Puma,
ankhōmna in tina nang ana iam ngāi chunga kei khuma kei zēm u chachak ha ei riat u kēng.
20 Nang na chong ariatpui Stephen thisen ama suak u lāi han koi um akōla anding ka ni.
Ka lei mahampuia athat ngāi puan ka lei rung kēng,’
ka ti na.
21 Hatuka Isuan ka kōma:
‘Sē ta ro,
hivan āta alapana Jentail ngāi kōma na tīr ka ti,’ ”
ati na.
Paulin Rom mi ka ni ei anti rui
22 Hava chong ei riat phing u le anringpana ati u na:
“Hiva angzāt mi hi chu ramual āta pei u ro,
adam rua ngal ni mak,”
ati
u na.
23 Hatuka ei ankhēk chuchung
u na apuan u ngāi atheta ei pei u na,
philvut chung tianga athek u na.
24 Hatuka sipai ulian khītpa hān Paul chu insūng aping sūnga aruai viak ranga chong apēka.
Hivan tin thama mipui ei ankhēkna asik ariat theina ranga azēm chunga ankel rang ati na.
25 Hatuka ei zēm thei u na ranga mevun rile akhittit u na,
hankēng Paulin akōla anding sipai raza aruaipu kōma ei ti:
“Rom mi khat pei ani anten,
hanūk chu āsia anlō lui ani anten zēm thei u mak che,
hava ha adik ni mak mo?”
ati na.
26 Sipai raza aruaipūn ariat le chu sipai ulian khītpa kōma asēna avarila:
“Atak chunga athō rang nei ti ha anrēng ro.
Asik chu ama hi Rom mi kēng,”
ati na.
27 Hankēng sipai ulian khītpa chu asēna Paul akōma:
“Rom mi tatak mo na ni?
Na man thei ta,”
ati na.
Hatuka amān:
“O hanle,
ka ni,”
ati na.
28 Sipai ulian khītpa hān:
“Koi chu,
hiva rama mi kei chang theina ranga sum ātampa le kei rachōk kēng hile,”
ati na amasanga.
Tenchu Paulin:
“Koi chu anzir len āta Rom mi kēng ka ni,”
ati na.
29 Ama ankel ranga ansin ngāi chu anūk ankei len u zeia.
Sipai ulian khītpa hām Rom mi kēng kei sūr ati na anriata arathāta zei.
Paul ruirilna ansāng
matona anding
30 Hatuka zīngkhua vāra ei ankhit āta amazōka.
Hatuka Jihudi ngāiin ichanga mo Paul āsia mantung u na asik asa dima ariat rang ei zōt sika chāizūng ngāi le rui aril ngāi dōra ruirilna ansāng ankhōm ranga chong apēk u na.
Paul chu ahong achumpuia,
ama ton u na amanding u.