23
1 Paul chu rui aril ngāi tiang anhoia:
“Ka parual le unāi ngāi,
avian ten peia hin Pathian matona siat le sa riatna dik adōn chunga kei la om thei hi asa,”
ati na.
2 Chāizūng Anania hān Paul akōla anding ngāi kōma Paul amūr asuk pe rak ranga chong apēka.
3 Paulin akōma:
“Nang bang anpelena lung apōlpa,
Pathianin ei na zēm rang ani zei.
Dān ang taka ka rui aril ranga ansut kēng na ni hale,
tenchu hontin mo dān nōka anānzēm ranga chong nei pēk?”
ati na.
4 Paul akōla anding ngāiin:
“Pathian chāizūng ulian hintin hin ankhal rang nei ngam mo?”
ati u na.
5 Hatuka Paulin:
“Parual ngāi,
chāizūng ulian ani ti kei riat nōk kēng ani zei,”
ati na.
Asik chu:
“Na nam ngāi kāra ruirilpu ngāi chunga chong āsia ril nō ro,
(Ant.22:28 )
ti ha Lekhabu ānthianga anziak kēng,”
ati na.
6 Hatuka Paulin asen chu Sadduki ngāi bila mi hanūk asen chu Pharisi ngāi bila mi ani u ti ariata ruiril ngāi kōma anringa ei ti:
“Parual le unāi ngāi,
koi hi Pharisi nama mi kēng ka ni.
Pharisi sanāi ka ni na.
Thīna nāta anthui rētna ruia ansabeina kei dōn sika hin avian na kār u na ka rui anril ranga kei anding ani zei,”
ati na.
7 Hava chong aril le chu Pharisi le Sadduki ngāi ankhalna asuak pe u na.
Rui aril ngāi bila ansen pok u na.
8 Asik chu Sadduki ngāiin ei ti u anthui rētna hi om mak.
Hatuka vānpalāi le rathām om mak.
Tenchu Pharisi ngāiin aninīn apom rit u na.
9 Hatuka achālaka rahupui asuaka.
Pharisi ngāi bila senkhat dān mīnchū ngāi anding u na.
Achālaka ankhal u na ei ti u:
“Hiva mi hi itē āsia ei thō mu mak me na,
vānpalāi mo ole ratha mo achongpui ani ving ten,
Pathian ādui chang inti,”
ati u na.
10 Tenchu ei ankhēk u anrik riam le chu sipai ulianpa hān ei pot nek u rang kēng ti āchīna.
Hankēng sipai ngāi asēna amāni bil āta avanuk tapa insūng apinga ahong aruai ranga chong apēka.
11 Hanūk zāna han Puma chu Paul akōla andinga:
“Ngam tānla omtit pei ro.
Jerusalem khopuia ka chong anthiang vanga nei man riat babang anga Rom khopuia hin um ka chong nei vaman riat rang anāng,”
ana ti na.
Paul athatna ranga
lamruang athō u
12 Sūn ahong avār le Jihudi senkhat maruka chong anrual u na,
Paul na that thei māseng chu itē nēk sāk thō nō mani,
ati na khomāk ansam u na.
13 Pasal sōm manli nēka ātamin khomāk ansama hiva zāt chong maruk ei sin u.
14 Hatuka amāni chu chāizūng ulian ngāi,
pātar ngāi kōma asē u na:
“Paul na that thei māseng chu itē nēk sāk thō nō mani ati na khomāk ansam kēng na ni.
15 Hava sika han nangnīn rui aril ngāi lehan sipai ulian kōma hintin hin anthēmna thō u ro:
‘Nangtūk ama arui adik uala nei ril sa theina ranga Paul chu nang na kōma hong chumpui ro,
ati u na.
Hatuka nangni ngāi ana honga suak u mān koinīn athat ranga lei ansin inti,’ ”
ati u na.
16 Tenchu Paul asarnu nāi pasalten lamruang thōna achan alei en u chong ha ariata insūnga intpepa avalūta,
Paul akōma lamruang alei thō u rang rui avarila
17 Hatuka Paulin sipai raza aruaipa khat apāia:
“Hiva ruathar hi sipai ulianpa kōma ruai ro,
akōma chong ei ril lak rang adōn,”
ati na.
18 Hatuka sipai ulianpa kōma aruaia:
“Paul ankhumpu hān ana pāia,
hiva ruatharte hi nang na kōma honga ruai ranga ei na mathēm.
Amān na kōma chong aril lak rang ei dōn ninti,”
ati na.
19 Hatuka sipai ulianpa hān akuta ama ruaia.
Abingtena asēpuia maruka:
“Hong mo nei na ril zōt?”
ati na arakela.
20 Amān:
“Jihudi ngāiin nangtūka rui ril ngāi kōma Paul aruai ranga na kōma ahong azong ranga chong ei anrual u.
Paul arui chu adik uala ril sa u rei ati papei u na.
21 Tenchu hava ha atel ranga lei zōt pe nō ro.
Asik chu mi sōm manli nēka ātamin lampuia achan alei en u rang kēng.
Paul athat u māseng chu itē asāk anēk nōkna ranga khomāk ansam u kēng.
Atun hin na chongtin angāk chunga ansina om chian u,”
ati na.
22 Hatuka sipai ulianin ruathar chu aman sēna:
“Hiva hi ka kōma nei na man thei ati na tutē kōma ril ta ni,”
ati a chong apēka.
Paul Kaisari khuana aruai u
23 Hatuka sipai raza ruaipu ngāi anni akuia:
“Sipai raza anni,
hanūk sakor amang thei mi sōm sari hanūk asei anlek mi raza anni man sin lilip u ro.
Atun zāna dār akua huna Kaisari khua
ten pei nei sē u rang anāng.
24 Hanūk chu ram oppu Pheliks kōma azōk hiaia nei ruai theina ranga Paul ei chuangna rang sakor man liang pe u ro,”
ati na.
25 Hintin hin lekha anthuan ranga amaziaka:
26 “Koi Klaudia Lusia hīn,
Lalchi thōrua ram optu Pheliks kōma ka chibai ka hong thō.
27 Hiva mi hi Jihudi ngāiin ei sūra athat ranga ei ansin u.
Tenchu sipai ngāi ka ruaia kei mazōk ani na.
Ama hi Rom mi ani ti ka riata.
28 Tenchu āsia ei manlō u na asik le akong ariat rang kei zōt sika han amāni ruiril ngāi kōma kei ruai.
29 Hatuka amāni adān u ruia hong zātte mo ei ankhal u sika āsia ei thō ti ka riata.
Tenchu thīna rang le ei ankhumna rang khopa āsia ei thō chu mu makung.
30 Hatuka Jihudi ngāiin achan ei ravān chian u ti ei na man thei u le na kōma kei hong tīr len ani na.
Ama āsia anlō ngāiin achunga chong āsia adōn u ten na kōma ahong a ril u ranga kei man thei ati na ka lekha hong mathuan chu ka manmong,”
ati na.
31 Hava sika han sipai ngāi chu chong anpēk anga Paul chu zān zāna aruai u na,
Antipatri khuana avatung u na.
32 Zīng khuavāra sakora achuang mi ngāi chu Paul abila sē tir ranga ei la ti u.
Sipai ngāi chu insūnga intepepa ahong akīr rēt u na.
33 Hatuka sakora achuang mi ngāi chu Kaisari khua honga suak u le lekha chu ram oppu kōma apēk u.
Paul um ama matona avamanding u na.
34 Ram optu chu lekha apore suale ama hi hova rama mi mo?
ati na arakela.
Hankēng Kilikia rama mi ani ti ariata.
35 Hatuka amān:
“Na chunga āsia anān lō ngāi ahong atung u tikle,
na rui hi la mandon rēt rong,”
ati na.
Hatuka Herod sipai omna inpuia āsiak u ranga chong apēka.