Paul achunga Jihudi
Pātar ngāi bādo
24
1 Ni rangā suale chāizūng ulian Anania chu Kaisaria khuana asēna.
Pātar senkhat le dān ariatpu khat araming Tertulla chu abila asē u na.
Paul achunga chong āsia ei matung u na dōra,
ram optu kōma achōi u na.
2 Hatuka Paul chu apāi sua u le Tertullan chong āsia ei mantungna chong chu Pheliks kōma avamanlōna:
“Lalchi thōrua Pheliks!
Nang na zāra kēng achālaka rāisān le phūk dāia nei om ani na.
Nangin hiva nam ngāi ranga satna nei man don sabak sika ahui ahēka ei om u.
3 Mun tina le kong tina nei na sanna le nei na vūrna hi tāituana rāisān taka na na manpāk.
4 Tenchu na ranga ning chial akāi rang hi zōt mak mena.
Na lungkhamna le koini na chong bāi khat dak anān ngāi pe ranga nei na mathēm.
5 Hiva monisi hi mīn buai sabak ani ti nei riat kēng.
Maniapūra Jihudi a om ngāi dōrām ei man sel chachak kēng,
hanūk chu ama hi Nazaret pōla mi ulian khīt khat ani na.
6 Hanūk chu Pathian biak in um annim rang ei val ani na,
hatuka amāni hi nei sūra koini na dān anga ama rui hi aril ranga nei zōt.
7 Tenchu sipai ulian Lusia honga suaka,
hatuka ranak ruma koini na kut āta ei ruai tap ani na.
8 Paul āsia antung ngāi chu na kōma ahong ranga chong ei pēk,
hasika han nang na pumin hiva ngāi rui hi asa dima radēk tānla aloma ei dikna dōra chu riat zit in na ti.
Ama chunga bado nei thōna ngāi riat thei na ti,”
ati na.
9 Hatuka Jihudi ngāiin ei maham u nōkna hi dik kēng
ati u na.
Paulin Pheliks matona
ama satna chong aril
10 Hatuka aram optu hān Paul ei man chongna ranga akut le azāpa.
Paulin amasanga:
“Kum asōtpa nangin hiva nam ngāi rui nei hong ril pe ani ti ka riata rāisān taka kei sat le kei siatna na ril ka ti.
11 Jerusalem khopuia Pathian abiak ranga kei sē tena avian tena hin ni sōm lei anni la kāi makung.
Hava tak han ei
dik nōkna chu riat thei na ti.
12 Pathian biak ina tutē le ankhal ngāi makunga.
Ankhomna ina mo ole khua sūnga mo angkhat pei mi mathoka manbuaia na mu u mak.
13 Atun um ka chunga āsia ei na man tung u na hi na kōma anthiang vanga mandang thei u nō ni.
14 Tenchu hiva rui hi na kōma puang ka ti:
‘Koi hi Lampui azī ngāi,
mīn pōl atei ngāi ei ti u azī ka ni na,
hava ang ang dān taka koini na chipui ngāi Pathian abiak ka ni.
Alom pumpuia dān dōra le deari ngāi lekhabūna anziak dōra a iam ka ni na.
15 Hava mi ngāiin ei pom u anga koi um Pathian asa dōn ka ni.
Pathianin mi dik ngāi le mi dik lui ngāi athi nāta mathui inti ti ka ka iama.
16 Hiva sika hin Pathian tiang le miring kōmam demna buia mandon ānthiang adōn ranga kei pūt chian ani,’
ati na.
17 Atun,
kum ātampa suale ka nam ngāi atuanga dāli dar ranga kei sē ani na.
18 Tenchu Jihudi mi senkhat Asia ram āta ahong u na.
Hiva ngāi ka thō lāi han Pathian biak ina ei na mu u.
Ruitāng azī lama anthiang vang ka ni.
Mipui manbūm makunga,
buaina rahūm thō makung.
19 Amāni ngāi ha kei siatna a om ten,
na kōma ei hong chōi u rang kēng ani zei.
Na kōma chong āsia ei hong mantung u rang ani na.
20 Hano tenchu hivana a om ngāi len hin ril u rase.
Ruiril zōla kan ding lāi han hong zāt kei dik nōkna mo ei mu u?
21 Hiva chong kam khat rong kēng ei ni rang ani zei,
amāni lāia kan dinga anringpana:
‘Thīna nāta athi anthui rētna ruia avian nangni matona ka rui ei anril ani zei,’
kei ti,”
ati na.
22 Hatuka Pheliks hān hiva rui ariat suale chu alei siak tota.
Asik chu Lampui anti rui chu asa ani ti na ei riat vang sika amān:
“Sipai ulian Lusia ahong tik le na rui chu la sat bo ning,”
ati na.
23 Hatuka Pheliks hān sipai raza ruaipa kōma Paul chu arung ranga chong apēka:
“Ama ei nuam anga man om ro.
Amal arual ngāiin ei nāng anga ankiavāng ranga khār nō ro,”
ati na.
Pheliks le anungāk Drusila matona Paul anding
24 Nikhua sōt asē miai sua rēt le Pheliks anungāk Drusila lehan ahong u na.
Drusila chu Jihudi nupang khat ani na.
Amān Paul chu akuia Krista Isuana iamna ruia Paulin arila arangāi sabaka.
25 Paulin adikna rui,
aninga anrēng theina rui le ruirilna ei la hong rang rui aril pe na.
Hankēng Pheliks chu arathāta sika han:
“Atuna ranga chu ahun zei,
sē pei ta ro.
Hun kan hēr tik,
na pāi rēt bo ning,”
ati na.
26 Amān ei mazōk theina ranga Paulin sum na pe bo ni ti na asa ei thō ani na.
Hasik han ei pāi rēt ei pāi rēta ei chongpui chachak.
27 Tenchu kum anni suale,
Porka Phestan Pheliks asut mun chu aluana.
Pheliks chu Jihudi ngāiin na dit u rase ei ti sika
Paul chu ei khuma ei siak chian ani na.