Paul Phesta matona anding
25
1 Hava rama ei hong ni anthum suale,
Phesta chu Kaisari khua nāta Jerusalem khopuia asēna.
2 Hankēng chāizūng le Jihudi ngāi ruaitu lian ngāi chu ama kōma Paul achunga chong āsia aman tung u na.
3 Phesta kōma amāni malung do anga Paul achunga athō ranga achān ei vamathēm u.
Amāni ei zōt u chu,
Paul Jerusalem khopuia akuia lampuia lamruang athōna alei athat ranga ei man sūk u.
4 Tenchu Phestan amasanga:
“Paul chu Kaisari khuana kēng ei ankhum.
Hasika han koi um anrapa asē rang ka ni zei.
5 Nangni na kāra ruaitu senkhat āthethei chu sē u sela hava mi ei siatna a om ten hong ril u rase,”
ati na.
6 Amāni bila ni sōm nēka a om suale Phesta chu Kaisari khuana asēna.
Hatuka zīngkhua vāra arui rilna sutmuna ansuta Paul amān kuia.
7 Ama chu avasuakle Jerusalem khopui āta asē mi ngāi chu akōla anding u na atak chunga chong āsia ātampa ahong ril u na Tenchu abul arēl ei mandang thei khat ngal om u mak.
8 Hankēng Paul chu ama ei anzōkna rang chong arila:
“Jihudi ngāi dān ruia mo ani,
ole Pathian biak in tak chunga mo ani,
rēng Kaisar achunga mo ani,
itē kei masialna om mak,”
ati na.
9 Tenchu Phestan Jihudi ngāi malung do chang anga sin athō ranga ei nuam ani na.
Hasika
han Paul akōma amasanga:
“Jerusalem khopuia son asēna na chunga hiva rui ngāi dōra hi ka kōma hong andinga aril ranga na zōt mo?”
ati na.
10 Paulin amasanga:
“Kaisar ruirilna sutmun ansāng matona ahong anding ka ni.
Hiva hin kēng ka rui nei na ril pe ranga.
Jihudi ngāi chunga itē kei masialna ei bui hi nangin anthiang vanga na riata.
11 Masial kei thō a om ten hanūk chu thīna rang ten peia kei thō a om ten,
athi ranga annar makung.
Tenchu hiva chong āsia ei hong chōia ei na thō u na ngāi itē abul arēl ei bui sika tutēn amāni kōma anān betōk thei rang om mak.
Kaisar kōma ruirilna azong ka ni,”
ati na.
12 Hatuka Phesta chu ruiril ulian ngāi lehan anrilpui suale Paul amasanga:
“Kaisar kōma ruirilna nei zong sika,
Kaisar kōma kēng nei sē rang,”
ati na.
Phestān Agrippa kōma
Paul arui aril
13 Nikhua alakte suale rēng Agrippa le Berniki chu Kaisari khuana a honga tung u na.
Phesta kōma chibai ahong būk u na.
14 Nikhua tampa hava han ei om u sika Phestan Paul arui chu rēng kōma arila:
“Pheliks hān mi khat ei sūra ei khum a oma.
15 Jerusalem khopuia ka om lāi han Jihudi ngāi chāizūng ulian le pātar ngāiin ama tak chunga chong āsia ei hong chōi u.
Amānīn hava mi arui kei masat pe ranga ka kōma ei hong zong u,”
ati na.
16 Tenchu koiin ka masanga:
“Ama kōma havan tina thō ha Rom mi ngāi ei thō u dān ni mak.
Asik chu chong āsia ahong achōi ngāi le āsia athōpu chu antong bak luia ansiat ranga anbetōk thei ngāi mak.
Tenchu arui andarna hēr apēk ngēt ei nāng kēng ka ti na.
17 Hatuka hivan hin ka kōm ahong atung u le sōt rei luia zīngkhua vāra ruirilna ka pāi lena.
Hatuka hava monisi chu ruirilnana ahong aruai ranga arung ngāi chong ka pēka.
18 Ama chunga chong āsia ahong achōi ngāi āchong ranga anding u na,
tenchu kei asa anga achunga itē aril rua riat u mak.
19 Tenchu amāni Pathian andonna ruitete ngāia ankhalna ei dōn u.
Hatuka araming Isua ati na mi khat ruia ei ankhal u.
Hava mi ha athi sua,
tenchu Paulin chu ahong adam rēt,
ti ha kēng āsia ei thō u ani na.
20 Hiva ngāi rui ka riata koiin andonna chang riat makunga.
Hava sika han Paul Jerusalem khopuia asēna hava han ama arui chu avaril ranga ei zōt le ei zōt nōk chu ka rakela.
21 Tenchu Augusta Rēngpuiin ama arui chu ei manriat theina ranga Paulin Jerusalem khopuia ei sē nōkna rang azonga.
Hankēng Kaisar kōma ka mathuan thei māseng chu ārung ranga ārung ngāi kōma chong ka pēka,”
ati na.
22 Hatuka Agrippa chu Phesta kōma:
“Koi um ka theia hiva miring kōma āta achong ariat rang ka zōt,”
ati na.
Hatuka Phesta hān:
“Nangtūk akōm āta chong rangāi bo tani,”
ati na.
Rēng Agrippa matona
Paul anding
23 Zīng khua vāra Agrippa chu Barnik lehan anlian le anlal sabaka ahong u na.
Sipai ulian ngāi le khopuia ruaitu ulian ngāi chu ruirilna anchun zōla alūt u na.
Hatuka Phestan chong apēk le chu Paul ahong ruai u na.
24 Hatuka Phestan:
“Rēng Agrippa le hiva muna koini bila alian arāng ahong anchel ngāi dōra,
hiva mi hi mu u ta ro!
Hiva mi aruia hin Jihudi mipui rual dōrān alom u na ka kōma ana hong mathēm u na.
Jerusalem khopuia le hiva muna a om Jihudi ngāi dōrān hiva mi hi chu dam lāi nō rase ati na ei ankhēk u.
25 Tenchu thīna rang tenpeia itē masial ei thō om mak ati na ka mu.
Tenchu Augusta Rēngpui ngēt kōma avasuak rang ei pūt sika ātīr ranga kei masuk ani zei.
26 Tenchu ka ulian kōma arui andang siaka itē anziak rua riat makunga.
Hava ha nangni ngāi kōma kei hong masuakna asik.
Aliaktena,
Rēng Agrippa nang na makunga kei hong masuak.
Ama na radēk suale ama aruia anziak rua dōn ka ti.
27 Asik chu chong āsia ei matung u na asik andang siaka riat luia ankhit chuchunga ahong atīr hi anhuia re makung,”
ati na.