Rēng Agrippa matona
Paulin ei satna chong aril
26
1 Hatuka Agrippa hān Paul akōma:
“Nang na theia rui ngāi aril ranga ka na phal zei,”
ati na.
Hatuka Paul chu akut alānga ama aninga ei anzōkna rang chong aril aphuta.
2 Amān:
“Rēng Agrippa,
kei anzōkna ranga chong aril ranga aviana na matona kei anding hi ka rāi asāna kan riat.
Jihudi ngāiin ka chunga chong āsia ei na malō u na ngāi dōr āta kei anzōkna chong aril ka nāng zei.
3 Nangin Jihudi nam ngāi kāra rui le nam dān ngāi le rui anpōn dōra tak chunga ariat sabak nei ni sika alaktena ka rāi asāna.
Hasika han dūk ana diarpui zāma ka chong anān ngāi pe ranga achālaka kei na mathēm.
4 Nāipangtete ka ni lāi āta Jihudi ngāiin kei lēng dān chu ei na riat zit u ani na.
Aphut len āta ka nam ngāi bila Jerusalem khopuia kei hong om hi Jihudi ngāiin um aphā mān āta ei na riat zit u kēng.
5 Hun asōtpa nāta ei na riat u kēng.
Azōt u ten ka rui aril thei ani u na.
Koini na Pathian mandonna ruia ankhir khīt pōl,
Pharisi mi ka ni na,
Pharisi om anga a om ka ni.
6 Pathianin koini na chipui ngāi kōma achong tin aiam kei ni sika,
atun hin ka rui anril ranga kei hong anding.
7 Hiva achong tin hi aman ranga ei mangang u na koini na nam sōm lei anni ngāiin asūn azāna malung tataka Pathian ei mōk u chachak.
O Rēng Agrippa!
hiva chongtin nei mangang ruia hin Jihudi ngāiin āsia ei na mantung u.
8 Pathianin hava athi ngāi ei mathui hi,
ichanga mo nangnīn a iamrua ni thei mak nei ti u?
Paulin ei anzir tharna rui aril
9 Taktaka koi um Nazareta mi Isua raming aduia athō rua ātampa hi kei thō rang hi anāng ati na kei anriat.
10 Hava tak ha Jerusalem khopuia kei thō lele ani na.
Chāizūng ulian ngāi kōm āta ningneina kei lāka mīnthiang ngāi tamtak ankhumna ina kei khum chachak ani na.
Amāni ngāi athat u lāi um kei pomna kei manlang ani na.
11 Hatuka Jihudi ngāi ankhōmna in tina kei sēna kei vazēm u chachak.
Isua siat anril khakhak ranga kei put u chachak.
Achung u na achālaka kei sing nōk ani na.
Ram atei ten pei kei sēna kei sinsak u chachak.
12 Havan tin han ansinsak ranga ka suak lāi han,
Damaska khuana kei sē na chāizūng ulian ngāi kōm āta ningneina le phalna lekha kei chōi ani na.
13 Hatuka,
O Rēng,
lampuia ka sē lāi han anvān āta ani nēka ra-āng anei ka muna.
Hava ha sūn chimrip ani na,
koi le ka lōm kei sēpui ngāi ravēl chu khuanlek anga a ēl zuaka.
14 Na loma phila nānbok kiar le chu koin hē ka riata:
‘Saul,
Saul,’
ati na Hebrai chonga ei na ril,
‘ichanga mo nei na sinsak chachak?
Na ranga sunrol anzum anpir chu ana kēng,’
ana ti na.
15 Hatuka:
‘Koin Puma,
tu mo na ni?’
ka ti na.
Hatuka Pumān:
‘Koi,
Isua nangin nei sinsak chachak ha ka ni.
16 Atun chu anthui tānla na ke le anding ta ro.
Na kōma kei hong anrālna chu hava ha asik ani.
Koi ka dorbo andom ranga le ka chong anriatpu chang ranga kei na phun kēng.
Nangin ka ruia nei mu ngāi le na kōma kei anrālna rui arilpu chang in nati.
17 Nang na nam ngāi le atuna nam atei ngāi kōma kei na tīr ngāi kut āta na mazōk ka ti.
18 Amit u ei vār theina rang le azīng āta avāra ei hong kīr u theina ranga amāni kōma kei na tīr.
Soitān ningneina nāta Pathian opna tianga hong kīr unti.
Hanūk chu koi ana iama āsia andualna le kei manthiang ka mi ngāi bila dōngluana man unti,’
ati na.
Paulin asinthōna rui aril
19 Hava sika han,
Rēng Agrippa,
chungvān āta anrālna ha tel luia om thei makunga.
20 Mānsana Damaska khuana Jihudi mi ngāi kōma Pathian chong kei ril ani na.
Hava suale Jerusalem khopuia Jihudi mi ngāi kōma.
Hankēng chu Judia ram pumpuia hanūk chu Jentail ngāi kōm tenpei kei varil ani na.
Amalung u makhīra Pathian tiang ei hong kīr thei u na rang le amalung u ansīrna om zia diktak anlang chunga sin ei thōthei u na ranga Pathian chong kei ril chachak.
21 Hava sika han Pathian biak ina ka om lāi han Jihudi senkhat ngāiin ei na sūra ana that ranga ei na val u.
22 Tenchu Pathianin ana sana avian ten pei hin mi lian khīt le mi sīn khīt ngāi kōma ama ruia aril thei ranga kei lān ding ani na.
Mosi le deari ngāiin ei ril u ha anrapa ahong atung rang ani zei ti rong ha kēng kei ril atei itē kei ril om mak.
23 Krista,
chu antakna ei la hong tiar ngēt rang rui kēng amānīn ei ril u.
Ama chu athi ngāi kār āta anthui mānsa khīt ei ni sika mānsana Jihudi nam kōma ra-āng rui ril inti.
Hava suale Jentail ngāi kōma ril inti,
ei ti u,”
ati na.
24 Havan tin han ama aninga ei anzōkna rang rui aril lāi tak Phesta chu anring sabaka ankhēka:
“Paul,
achāng kēng na ni.
Achālaka lekha nei theina hīn na lu ei masiat kēng ani zei,”
ati na.
25 Tenchu Paulin:
“Lalchi thōrua,
Phesta aliankhīt,
achāng ni makung.
Tenchu chong tak le malung avār vanga chong kēng kei ril.
26 Rēngin hiva rui ngāi dōra ei riat zit sika akōma anngam panga chong kei ril thei.
Asik chu hiva ngāi hi Rēngin itē ei riat nōk om mak ati na kei anngam pang ani na.
Asik chu hiva rui ngāi hi maruka mīn ei thō om mak.
27 Rēng Agrippa,
deari ngāiin ei ril u hi na iam mo?
Na iam ati na ka na riat,”
ati na.
28 Agrippa chu Paul kōm:
“Nangin hiva hun anrap tena Kristian anchang ranga nei na mathēm kēng hile,”
ati na.
29 Hatuka Paulin:
“Hun anāi tena mo ani ole hun asōtpana mo ani,
ni rase.
Nang rong ni mak,
tenchu aviana ka chong anngāi ngāi dōra koi kei chang anga nei chang u ranga Pathian kōma ka bōrzong ani na.
Tenchu hiva zīngzir ankhit ngāi rong om nō rase,”
ati na.
30 Hatuka Paulin hiva chong ngāi aril suale Rēng Agrippa,
hanūk chu ram oppu,
hanūk Berniki hanūk chu abil u na
ansut ngāi dōra anthui kiar u na.
31 Hava in amāk sua u le amāni le amāni achong u na:
“Hiva monisi hīn thīna rang le ankhumna rang khop chu itē āsiat ei thō om mak hile,”
ati u na.
32 Hatuka,
Agrippa hān Phesta kōma:
“Amān Kaisar kōma ruirilna vazong nō sela chu,
koinīn na mazōk thei ba,”
ati u na.