Peterin adōntena atak
chunga ei mu ngāi aril
11
1 Hatuka Judia rama kuitīr le unāi a om ngāiin Jentail ngāiin um Pathian chong apom u zei ti alei riat u na.
2 Hatuka Peter chu Jerusalem khopuia avasuak le serantan Jihudi ngāiin alei ankhalpui sabak u na.
3 Asik chu:
“Serantan lui ngāi ina avalūta abil u na bu ei vanēk,”
ati u na.
4 Tenchu Peterin aphut len āta adōn tena akōm u na anthiang vanga arila.
5 “Joppa khuana bōr azonga ka om lāi han,
ramang aphuazeka anrālna ka mu na.
Hong khatin mo puan bong alianpa khat kil manlina asūra chungvān āta ahong masuma ka mu.
Hava ha ka kōl taka ahong achuma.
6 Hatuka hava ha ka en sabaka ka mandona,
aloma ina om sake manli dōra,
ramsa dōra le alōnlim le chunga azuanglim vā ngāi dōra ka mu na.
7 Hatuka hē khat ahong anthanga:
‘Peter anthui tānla,
thāta sa ro,’
ana ti na.
8 Tenchu koiin:
‘Puma,
hava ha ni nō rase ba.
Asik chu ānthiang nōk le annim itē reng ka mūra la man lūt ngāi makung,’
ka ti na.
9 Tenchu anvān āta voi anni changna hē ka riata:
‘Pathianin ei manthiang sua chu nangin ānthiang mak ti nō ro,’
ati na ana masanga.
10 Havan tin chian voi anthum pei hē ahong a om a.
Hatuka tu khat lekin mo aloma chungvān tiang ana makhal pe kiar rēta,”
ati na.
11 Hatuka chu:
“Enta,
hava hun lāi tak han pasal anthum kei omna in kōla ahong anding u na.
Hava ngāi ha Kaisari khua nāta ka kōma mīn ei hong tīr u ani na.
12 Hatuka Rathan itē malung antholna abui thaka amāni azī ranga chong ana rila.
Hanūk chu hiva ka parual aruk ngāi um
ana hong zī sa u na.
Hatuka hava mi ina han na valūta.
13 Hatuka chu amān a ina vānpalāi andingin:
‘Joppa khuana mi tīr tānla,
Peter anti Simon ha vaman la ro,’
ei ti rui ha ana rila.
14 ‘Amān chong na hong ril untia,
hatuka hava chong lehan nang le na insūngkuate u na lom u na sandamna man u na ti,’
ati na ana rila.
15 Hatuka chong aril ranga kei phut le,
Ratha Ānthiang chu mānsana koini na kōma ei chul anga amāni kōmām achula.
16 Hankēng chu,
Puma achong ril chu ka hong riata:
‘Ani,
Johanin tina baptisma ei na pēk u,
tenchu koiin Ratha Ānthianga baptisma na pēk u ka ti,’
ei ti chong ha ka hong riata.
17 Koinīn Puma Isua Krista nei iama abōr pēk nei man anga amānīm nisela abōr pēk hi ei man u ani na.
Hasika han koi hi tu mo ka ni,
Pathian adui ranga kei anding rang?”
ati na.
18 Hava chong ngāi ha ariat u na achong om u lāi mak,
Pathian aman pāk u na:
“Hano tenchu Pathianin Jentail ngāi kōmam damna ranga malung kīrna hi ei pēk kēng ani zei hile,”
ati u na.
Antiokei khuana kuibing
19 Hatuka Stephan achunga ansinsakna sika anthekrak ngāi ha Phoiniki ram,
Kupra mualanlan le Antiokei khua tenpei avān lēng u na.
Hava ngāi hān Jihudi nam ngāi kōm rong nōk chu tutē kōma chong ril u mak.
20 Tenchu amāni bila senkhat chu Kupra le Kurini khuana mi ani u na,
hava ngāi ha Antiokei khuana ahong asuak u le Grik chong amang ngāi kōma Puma Isua rui thang ahui aril u na.
21 Hantin han amāni bila Puma kut chu anchela a om tira,
mi tamtakin ahong iam u na hatuka Puma tianga anhoi u na.
22 Hatuka amāni ngāi thang chu Jerusalem khopuia kuibing a om ngāi kuara avatunga.
Hasika han Barnaba chu Antiokei khua suak raka atīr u na.
23 Hatuka ama chu avatung le han Pathian alungkhamna zia avamuna arāi asāna.
Hatuka malung vong khat achōia Puma kōma adettita a om chian ranga alom u na ranga lungngamna asaka.
24 Asik chu Barnaba hi mi sa le Ratha Ānthianga ābit le iamna dōn ani na.
Hatuka mi tamtak Puma tianga ahong akop u na.
25 Hatuka Barnaba chu Tarsa khuana Saul anvān ranga asēna.
26 Hatuka ama chu avatoka,
Antiokei khuana ahong ruaia.
Havan tin han kum khat pei kuibing ngāi bila ankhōma hanūk chu mi tamtak amanchū u na.
Hatuka Antiokei khuana zolāi chu Kristian ati na ei anphua mānsa u ani na.
27 Hava hun lāi han deari senkhat Jerusalem khopui āta Antiokei khuana ahong u na.
28 Amāni ngāi bila mi khat araming Agaba chu anding vinga:
“Maniapūr pumpuia māitām alian sabak khat achul rang ani zei,
ti hi Ratha Ānthiangin aman thei,”
ati na.
Hava ang māitām ha Klaudia Kaisar hun lāi um ei chul ani zeia.
29 Hatuka zolāi ngāi amānīn ei thei u anga Judia rama unāi a om ngāi kōma sanna anthuan ranga malung ansin u na.
30 Hava ha amānīn athō tatak u na,
Barnaba le Saul akuta sanna chu pātar ngāi kōma amathuan u na.