Kornelia ina Peter avatung
10
1 Hatuka Kaisari khuana pholona mi khat a om a,
araming chu Kornelia ani na,
ama hi Itali sipai rual lian ngāi bila raza aruaipu ani na.
2 Ama le ainsūng mi ngāi dōra Pathian andon mi le Pathian anchi mi ani u na.
Mi ngāi kōma rāisān taka anriang dān apēk le Pathian kōma bōr azong babang miring ani na.
3 Ni khat chu cho nūk tiang dār anthum dāma ramang anga anthiang phāta Pathian vānpalāi khat akōm ahong alūta amu na.
4 Vānpalāiin akōma:
“O Kornelia,”
ahong ti na.
Hatuka Kornelia chu ama tianga a en chiana arathātana:
“Puma,
hong zāt mo nei na zong?”
ati na arakela.
Hatuka vānpalāiin:
“Na bōr zong ngāi le mi kōma dān nei pēk chachak ngāi ha Pathian matona avatung zei,
amān hava ngāi ha alei riattit kēng.
5 Atun len Joppa khuana mi tīr tānla,
mīn Peter ei ti Simon ha vamanla ro.
6 Ama ha mevun anchi chachak Simon atei ina atunga a om ani na.
Ama a in omna chu tipui kōl tak ninti.
Amān nei thō rang chu aloma na ril pe zit inti,”
ati na.
7 Hatuka ama achongpui vānpalāi asē suale ainsūnga asuak dōn anni le Pathian andon mi ama āngāk ngāi bila sipai khat akuia.
8 Hatuka Kornelian akōm u na aloma chong aril zit suale Joppa khuana atīra.
Peterin anrālna amu
9 Hatuka zīngkhua vāra ei pan u na rang asē u na khua avasuak vit u le Peter chu bōr azong ranga insūnga chung ansānga avakala,
hava lāi taka hun ha sūn anchim lāi tak ani na.
10 Hankēng chu avon ahong anchāma,
anēk azōta,
tenchu ei nēk rang chu amansūk pe u lāi tak han anrālna amuna.
11 Chungvān anlonga,
hatuka hong lek mo puan bong alianpa anga kil manlina rī ankhita tu khat lekin mo thuai tiang ahong masuma amu na.
12 Hava puan sūnga han aloma ina sake manli a om le ramsa chitin dōra,
hanūk chu thuaia alōnlim le chunga azuanglim vātin dōra a om zita.
13 Hatuka akōma hē ahong asuaka:
“Peter,
anthui tānla hiva ngāi dōra hi thāta sa ro,”
ati na.
14 Tenchu Peterin:
“Puma,
havan tin han chu ni nō rase ba.
Asik chu ānnim le ānthiang lui itē nēk sāk ngāi makung hile,”
ati na.
15 Voi anni changna akōma hē ahong rēta:
“Pathianin ei manthiang sua chu nangin ānthiang nōk ti nō ro,”
ati na.
16 Hantin chian han voi anthum hē ahong a om a.
Hava suale chu anlāiseka hava neinun ha chung tiang ankhal vat rēta.
17 Havan tin han Peter ramang anga anrālna ei mu ngāi a omzia riat thei mak.
Athei daka amandon chian lāi tak Kornelia amitīr ngāi chu ahong tung u na.
Simon a in chu ahong tok u na bēr panga makot kōla anding chian u na.
18 Hatuka mi apāi u na,
hava han Peter anti Simon ha ei om le om nōk arakel u na.
19 Hava tak han Peter chu ramang anga anrālna hong zazāt mo ei mu ngāi ha amandon lāi tak Rathān akōma:
“Enta,
pasal anthumin ana hong ravān u so.
20 Hasika han anthui tānla,
thuaia vachum ro.
Hatuka amāni bila sē tānla itē malung antholna dōn nō ro.
Asik chu hiva ngāi hi kei hong tīr u kēng,”
ati na.
21 Hatuka Peter chu thuaia achuma hava mi ngāi kōma asēna:
“Nei hong ravān u miring ha koi hi ka ni zei,
hong mo asik nei hong u na?”
ati na.
22 Hatuka amānīn:
“Vānpalāi Ānthiang khat amanga sipai raza ruaipu Kornelia kōma Pathianin aman theia.
Amān nang na chong anngāi ranga a ina ei na mankuina ranga ei na tīr na ni.
Ama chu mi diktak le Pathian anchi mi le Jihudi nam pumpuin um achān lalchi ei thō mi ani na,”
ati u na.
23 Hatuka Peterin hava ngāi ha insūnga akuia,
a ina amanriaka.
Kornelia ina Peter avaom
Zīngkhua vār le Peter anthuia amāni bila asēna.
Hanūk chu Joppa khuana parual senkhat um amāni bila avazī u na.
24 Hatuka hanūka nikhuana chu Kaisari khuana avalūt u na.
Hatuka Kornelian aunāi ngāi dōra le amal madit tatak ngāi aloma aina akui kiara alei maruang u na.
25 Hatuka Peter avalūt rang vit le Kornelia asēna alei vazonga,
ake bula anbok laka amōka.
26 Tenchu Peterin amathuia:
“Anding ro,
koi um nang na anga miring ka ni,”
ati na.
27 Hatuka achong chuchunga ina alūt u na,
mi tampa alei anchun avamu na.
28 Hatuka Peterin akōm u na:
“Jihudi nam ngāi chu Jentail le anlop le abil u na asē hi nam kal dānin phal mak ti ha na riat kiar u na.
Tenchu Pathianin mi tukareng ranga anthiang mak le annim kei ti nōkna ranga ana man muna.
29 Hava sika han amānīn ei na hong kui u le bāi mankham luia kei hong len ani na.
Atun chu imo asik nei na hong mankuina?
Na ril ta ro,”
ati na.
30 Hatuka Kornelian ati na:
“Atuna hiva hun āta ni manli māna ani zei bu ngoia kei om a,
ka ina bōr kei zong chian ani na.
Hatuka enta,
mi khatin puan alang sabak antianga ka matona ahong andinga.
31 Amān:
‘Kornelia,
Pathianin na bōr zong ngāi dōra ana lei riat petit zei.
Hatuka mi ngāi kōma na dān thō ngāi um ana lei riattit pe zei.
32 Hasika han Joppa khuana mi tīr tānla Peter ei ti u Simon chu vamankui ro.
Ama chu tipui kōla mevun ānchīpu Simon a ina atung ani na.
Ama ahong tikle aloma na hong ril zit inti,’
ana ti na.
33 Hasika han na kōma mi kei hong tīr len ani na.
Nei hong thei hi asa sabak zei.
Atun chu na kōma Pathianin chongpēk ei na pēk ngāi dōra anngāi ranga Pathian makunga na loma nei hong suak ani zei,”
ati na.
34 Hankēng Peter chu chong aril ranga aphuta:
“Pathianin ami mandangna manlang mak ti hi adik taka ka hong riat zei.
35 Tenchu nam tin kāra miring Pathian anchi le dikna om athō tak chu amān ei pom ani na.
36 Pathianin Israel nāi ngāi kōma chong ei hong ril ha na riat u na.
Hava ha Isua Krista zāra anngoina thang ahui ani na.
Ama chu alom pei chunga Puma ani na.
37 Hava ha Johanin baptisma pēk ruia chong ei ril ha ani zei.
Hava ha Galili ram len āta anphuta Judia ram pumpuia ei anthek ha na riat u na.
38 Hanūk chu Pathianin Nazaret Isua ha hontin mo Ratha Ānthiang le thōtheina ranaka sariak ei manthi,
hanūk chu sin āsa thō chunga mun atei ateia asuaka ratha sa nōkin ei sinsak ngāi dōra ei mandam ha na riat u na.
Asik chu abila Pathian a om ani na.
39 Hanūk chu Judia ram le Jerusalem khopuia aloma asin thō ngāi dōra ariatpui ngāi chu koini hi na ni zei,
ama ha mīn thinga ei tāra ei that u ani zei.
40 Tenchu Pathianin athi nāta nīnthum nikhuana ahong mathui rēta.
Mipui vāntāng mit muna aman langa.
41 Tenchu aloma mi tin kōma ni mak.
Pathianin ei na thangsa ariatpui koini ngāi kōma,
hanūk chu athi nāta anthui rēt suale ama bila ana nēkpui le ana sākpui koini ngāi kōma ei hong anlang ani na.
42 Ama hi athi le adam ngāi chunga rui arilpu ranga Pathianin ei ruat ani ti mi ngāi kōma aril rang le ariatpui ranga koini na kōma chong ei na pēk.
43 Tukareng ama zāra araming a iam tak chu āsia asāina man inti,
ti hi deari ngāi dōrān ei riatpui u kēng,”
ati na.
44 Hatuka Peterin chong ala ril kār han hava chong ariat ngāi dōra chunga Ratha Ānthiang ahong chula.
45 Hatuka serantan Jihudi aiam ngāi,
Peter ahong azī ngāi dōra chu achālaka aboi adong u na.
Asik chu Jentail ngāi chungām Ratha Ānthiang bōrsāng ei chul ani zeia.
46 Asik chu amāni ngāi ha chong ateia achong u na Pathian amanpāk u ariat u na.