Pewalina
Pepongkaa lolita
Sura ide mampololita noumba Pue Ala mampopewali dunia hai hinangka ihina, tepesua manusia, sura ide mampololita wori noumba pane dosa hai kapari mesua i dunia. Ihi sura ide peisa raparonggaa:
1. Kirana 1-11: I lalu kirana ide, tabasa noumba Pue Ala mampopewali dunia hai hinangka ihina. Hangko indo, teuki wori tuntukana Adama hai Hewa, Kai hai Habeli, Noho hai pelaboana owai, hai peantoa i Babeli.
2. Kirana 12-50: I lalu kirana ide, taisa kaiumbanda mai toiorunda to Isaraeli. Toiorunda au nguru-nguruna iami Burahima. Mahile hangana lawi maroho pepoinalaina hai rumihi pengkoruna i Pue Ala. Roo indo, tabasa tuntukana Isaki anana Burahima, hai Yako anana Isaki. (Yako iti rauli wori Isaraeli). Hangko indo, rapololita tuntukana anana Yako au hampulo hai rodua au mewalihe toiorunda hampulo hai rontina to Isaraeli. I kahopoana sura ide, tabasa kana i hadua anana Yako au rahanga Yusupu. Ia napake Pue Ala mohorema to Isaraeli hangko i rimi au merumpa. Anti karimi iti, ido hai Yako hantina melimbahe i tampo Masiri.
Ngkaia pakana au rapololita i lalu sura ide, agaiana au rapaioru iami kamakuasana Pue Ala. I pepongkana sura ide, hai i kahopoana, Pue Ala modandi ina motulungi liliuhe taunaNa hai Naantihe i hambua tampo au ina Naweihe. Tabasa hai taisa wori noumba Pue Ala mohuku tauna au mobabehi sala, hai mowati tauna au mengkoru Iria. Ane tabasa sura ide kana i pepoinalainda to Isaraeli hangkoia, ina mobundu irikita ide-ide i lalu katuwonta hai i pepoinalainta.
Ihi sura
1. Pewalina dunia hai manusia (1:1–2:25)
2. Pepongkana dosa hai kapari (3:1-24)
3. Adama hawe i Noho (4:1–5:32)
4. Noho hai pelaboana owai (6:1–10:32)
5. Peantoa i Babeli (11:1-9)
6. Sem hawe i Abram (11:10-32)
7. Burahima, Isaki, hai Yako (12:1–35:29)
8. Pemuleana Esau (36:1-43)
9. Yusupu hai halalunahe (37:1–45:28)
10. To Isaraeli i tampo Masiri (46:1–50:26)