Yako hantina melimba i tampo Masiri
46
1 Mewali, Yako hantina mangkadipuramohe hai melingkamohe. Kahawenda i boea Barseba, napopenombami Yako bahangkia baana binata i Pue Ala au napenombai Isaki, umana. 2 Kaindimi, mampatongawami Pue Ala iria i lalu hambua pampetudungia, Nauli, “Yako, Yako!”Mehana Yako, “Pue, idetona.”
3 Mongkorami Pue Ala, Nauli, “Ikomi Pue Ala au napenombai umamu. Ineeko langa lao i tampo Masiri, lawi pemuleamu ina Kupopewali hambua kadatua au mahile i tampo Masiri. 4 Ina Kuporangaiko lao i tampo Masiri, hai ina kuanti huleko i tampo Kanaa hihimbela hai pemuleamu. Hai ane matemoko, Yusupumi au ina mokadipurako.”
5 Roo indo, meangkamohe Yako hihimbela hai anana, sambokonda hangko i boea Barseba, mampesawihe kareta au napakatu mai Pirao. 6-7 Moanti worihe pinatuwonda hai hinangka anu-anunda au ralambi i tampo Kanaa. Nodo wori ananahe tobalilo, towawine, hai ope-opehe ampuna naanti hahahe i tampo Masiri.
8 Idemohe hanganda hantambiana Yako au melimbahe i tampo Masiri:
9-15 Idemohe anana Yako tobalilo hangko i Lea.
Au towutu iami Rube. Anana Rube idemohe: Heno, Palu, Hesron hai Karmi.
Simeo hai ananahe: Yemuel, Yamin, Ohad, Yakin, Sohar hai Saulu. Inana Saulu to Kanaa.
Lewi hai ananahe: Gerson, Kehat, hai Merari.
Yehuda hai ananahe: Er, Onan, Sela, Peres, hai Sera, agaiana Er hai Onan matehe i tampo Kanaa. Anana Peres idemohe Hesron hai Hamul.
Isakar hai ananahe: Tola, Pua, Ayubi, hai Simron.
Sebulo hai ananahe: Sered, Elon, hai Yaleel.
Ara hadua ananda towawine, hangana Dina. Mewali pemuleana Yako hangko i Lea sambokona, au mesupahe i Padan-Aram, kabosanda talu pulona hai talu.
16-18 Anana Yako hangko Silipa, hawina Lea, idemohe:
Gadi hai ananahe: Sipion, Hagi, Suni, Esbon, Eri, Arodi hai Areli.
Aser hai ananahe: Yimna, Yiswa, Yiswi, Beria, hai Sera, halalunda towawine. Anana Beria idemohe Heber hai Malkiel.
Mewali pemuleana Yako hangko i Silipa, hawina Lea sambokona, kabosanda hampulo hai ini.
19-22 Anana Yako hangko i Raheli, idemohe: Yusupu hai Benami.
Yusupu hai Asnat sambokona, anana Potipera to Masiri, hadua tadulako mpenomba i wanua On, moanahe: Manasye hai Epraim.
Anana Benami idemohe: Bela, Beker, Asbel, Gera, Naaman, Ehi, Rosi, Mupim, Hupim, hai Ared.
Mewali pemuleana Yako hangko i Raheli, kabosanda hampulo hai iba.
23-25 Anana Yako hangko i Bilha, hawina Raheli, idemohe: Dani hai Naptali
Anana Dani, iami: Husim.
Anana Naptali, idemohe: Yaseel, Guni, Yeser hai Silem.
Mewali pemuleana Yako hangko i Bilha, hawina Raheli sambokona, kabosanda pitu.
26 Pemuleana Yako au melimba i tampo Masiri, poguluanda ini pulonda hai ini, bara manihe tepesua maniana. 27 Yusupu hai rodua anana au mesupamohe i Masiri, ara amimohe i tampo Masiri. Mewali poguluanda Yako hantina au melimba i tampo Masiri, pitu pulonda.
Yako hai tinana i tampo Masiri
28 I lalu polumaonda, Yako motudumi Yehuda moioru lao mokakio Yusupu bona mai mampombelambia i tampo Gose. Bara mahae hawe mpuumi umana i Gose. 29 Mewali mesawimi Yusupu i karetana hai lao mampohidupaa umana. I pohidupanda, mokalapuimi umana hai moteria mahae i owangana umana.
31 Roo indo, nauli Yusupu i halalunahe hai i tinanahe, “Moioruna, mampopaisaa Pirao kahawenami umangku, halalungku, hai ope-opehe tinanda au hangko i tampo Kanaa. 32 Kuuliangaa rai Pirao ikamu ide toporewukau dimba hai japi, hai moantimokau pinatuwomi, hai hinangka anu-anumi. 33 Ane nakakiokau Pirao hai napekune kana i bagomi, 34 niuliangaa node, ‘Hangko kokoi maningkai duungki mahile, topokadipura pinatuwo hangko i toiorungkipi.’ Ane nodo nipololita, ina natudukau maida i tampo Gose, lawi bara raunde to Masiri mampogulua toporewu.”