Yako mampombelambia Pirao
47
1 Hangko inditi, laomi Yusupu i Pirao, nauli, “Umangku hai halalungku hangko i tampo Kanaa hawemohe hai moantihe towau, japi hai ope-ope anu-anunda. Ide-ide aramohe i tampo Gose.” 2 Roo indo, naantimohe Yusupu lima halaluna lao mampohidupaa Pirao. 3 Mekunemi Pirao irihira nauli, “Apa bagomi?”Mehanahe, rauli, “Tua, ikami ide, toporewungkai nodohe toiorungki. 4 Maingkai i tampo ide, lawi i tampo Kanaa rumihi mpuu rimi, ido hai barapi ara hehi paandenda towau hai dimba. Ane napokana datu, maidamongkai i tampo Gose.”
5 Hangko indo, nauli Pirao i Yusupu, “Ide-ide umamu hai halalumu aramohe inde. 6 Tampo Masiri ide niimbami tampomi haduduami. Nupopaidamohe i tampo Gose, tampo au marudu ntepuu. Hai nupatoka wori tauna au matopa morewu bona mamporewuhe pinatuwongku.”
7 Yusupu mampopombekaisanga wori umana i Pirao, hai Yako mowati Pirao. 8 Roo indo, Pirao mekune iria, “Hangkiami tinuwunta, uma?”
9 Mehana Yako, nauli, “Tinuwungku datu, hangatumi talu pulona parena. Katuwongku handa kapari hai tinuwungku sosoe ane tapahimbela hai tinuwunda toiorungku au molilohe.” 10 Roo nodo, mowati mbulimi Pirao, hai mepalakanami.
11 Hangko inditi, Yusupu motudungiahe umana hai halalunahe tampo au rapaidai. Naweihe tampo au marudu ntepuu mewali kiranda i tampo Ramese,a hintoto hai pangulina Pirao. 12 Hai napaara wori paandenda umana hai halalunahe hawe-hawe i ananda.
Tempo rimi
13 Rimi iti rumihi ntepuu, hai iumba-umba pea barapi ara paande. Ido hai maledemohe tauna au maida i tampo Masiri hai i tampo Kanaa. 14 Bela-belanda tauna iti meholo pare, doi popobaiarinda nagulu Yusupu pane nawoli i souna Pirao. 15 Opemi doinda to Masiri hai to Kanaa, maimohe ope-ope tauna i Yusupu rauli, “Nuwei wongkamia paandeki, ineengkai nupogiangaa mate. Doingki opemi.”
16 Mehana Yusupu, “Ane opemi doimi, niweina pinatuwomi bona kuweikau paandemi.”
17 Mewali pinatuwonda au raantia Yusupu rapopointolohi paandenda iami: dara, dimba, towau, japi hai kalide. I lalu hampare iti naweihe Yusupu paandenda, au rabaiari hai pinatuwonda.
18 I pare maina, hawe mbulihe iria hai rauli, “Tua, doingki opemi. Pinatuwongki irio hahamohe. Barapi ara apa-apangki au peisako kiwei, batena rai watangki hai tampoki. 19 Inee wongkamia nupalikangaa mate. Bondeki inee nupogiangaa bangi. Watangki hai tampoki nuholomi hai pare. Tampoki kihuhuami Pirao hai mewalimongkai hawina. Nuweingkai pare i suka kahandana kipopoumpuki tuwongki hai bona kipotinuda wori i bondeki.”
20 Ope-ope tamponda to Masiri naholomi Yusupu mewali tampona Pirao. Anti karumihina rimi iti, ope-opemohe mampobalu tamponda iria, pane ope-ope tampo i Masiri mewali hahami tampona Pirao. 21 Kahopoana, ope-ope tauna i tampo Masiri mewalimohe hawina Pirao. 22 Batena rai tamponda tadulako mpenomba au bara naholo Yusupu. Ihira barahe mampobalu tamponda, lawi paandenda napasilolongaahe Pirao. 23 Nauli Yusupu i tauna bosa, “Bona niisa, ikamu hai tampomi kuholoami Pirao. Idemi tinuda au nituda i bondemi. 24 Ane nipeparemi, hangkira lima hangko i rasimi hangangaa niwei Pirao. Pentarana hangko indo peisami niala nipotinuda hai niande hampoanaka.”
25 Mehanahe, rauli, “Nuhoremamongkai hangko i rimi ide, ido hai kiuli ngkaia kamaroana irio. Ane maahi liliuko irikami, bula wori lalungki mewali hawina Pirao.”
26 Hangko indo, nababehimi Yusupu atura i tampo Masiri bona hangkira lima hangko i polambianda tauna hangangaa mewali kirana Pirao. Hawe ide-ide atura iti rapopolumao mani. Batena pearai tamponda tadulako mpenomba au bara mewali tampona Pirao.
Peawilina Yako
27 Mewali tetida mpuumohe to Isaraeli i tampo Masiri i lembo Gose. Mepongka indo, kapepebukuarihe hai kabosa-bosaarihe. 28 Yako tuwo mani hampulo hai pitu parena i tampo Masiri duuna tinuwuna handa hangatu iba pulona hai pitu parena. 29 Naisa kaina matenami, mokakiomi Yusupu hai meawili, nauli, “Ane nupokakaiana, nuwoli taiemu i patongke paangku hai mosumpako bona ineena nutawu i tampo Masiri. 30 Kupeinao bona ratawuna i talumbanda toiorungku. Mewali watangku ide nuanti hangko i tampo ide hai nutawu i talumbanda toiorungku.”
Nahanai Yusupu, “Uma, apa au nuuliangaana batena kubabehi.”
31 Nauli Yako, “Mosumpako iriko.” Mosumpami Yusupu. Roo nodo, motumpami Yako menomba i Pue Ala i paturuana.