Yako mowati Epraim hai Manase
48
1 Bahangkia tempona hangko indo, rabambariami Yusupu karumihinami kamahaina umana. Mewali lao mpuumi Yusupu i umana hihimbela hai rodua anana iamohe Epraim hai Manase. 2 Kanahadina Yako kahawenda Yusupu hampoanaka, marohomi buuna pane mohuda i paturuana. 3 Mololoitami Yako i Yusupu, nauli, “Pue Ala au makuasa mopatongawami wataNa iriko i tamponda to Kanaa i boea Lus.a Inditi, Nawatimona, hai 4 Nauliangaana: ‘Ina kupopemule-mulekau, hai ina kupopewalikau kabosa-bosaa duumi mewali ngkaia ngamba. Hai tampo ide ina Kuweihe pemuleamu rapososora hawe i hae-haena.’ ”5 Napaliliumi Yako lolitana, nauli, “Yusupu, ane anamu Epraim hai Manase au mesupa i tampo Masiri hangko damanina hawe inde, kuimbamohe wata anangku nodohe Rube hai Simeo. 6 Agaiana ane ara manihe anamu, ihira barapohe ina kuimba anangku; mewalimohe anamu. Sosoranda ina radoko hangko i Epraim hai Manase wutunda.
7 Ide kubabehi anti pokatuinaongku Raheli, inamu. I polumaongku mesule hangko i tampo Padan-Aram, matemi Raheli i tampo Kanaa bara karao hangko i boea Eparata. I kawiorana lalungku, kutawumi indolou i wiwi rara lao i Eparata (au ide-ide rahanga Beteleme).”
8 Kanaitanahe Yako anana Yusupu, napekune, nauli, “Hemahe anangkoi ide?”
9 Mehana Yusupu, “Idemohe anangku au naweina Pue Ala i tampo Masiri.”
Nauli Yako, “Pahungkuhe mai iriko bona kuwatihe.”
10 Anti kasaenami Yako, ido hai bara gagapi meita; lawi wurami matana. Napahungkumohe Yusupu anana iti, pane nakalapui hai naangkihe Yako. 11 Roo nodo, mololitami Yako i Yusupu, nauli, “Katouana barapi kuharunga kaina mohidupanta mani, agaiana ide-ide nawei manina Pue Ala tempo moitahe ampuku.”
12 Roo nodo, naalamohe Yusupu anana au tanganda motumpa i tambokana Yako, pane ia haduduana motumpa i tambokana umana. 13 Roo nodo, nakingkimohe Yusupu anana au rodua iti napahungku i Yako, Manase anana au towutu ntanda i koanana hai Epraim au toadi ntanda i kabeona. 14 Agaiana Yako mampopombehaperi taiena, hai taie koanana mopaga waana Epraim nauri ia au toadi, hai taie kabeona mopaga waana Manase nauri ia au towutu.
15 Hai mowatihe Yusupu hampoanaka, nauli,
“Pue Ala au rapenombai Burahima hai Isaki toiorungku,
Iami au moninina hawe ide-ide.
16 Iami au mopatongawa watana iriko nodo hadua malaeka.
Iami au mokabahana hangko i hinangka kapari.
Taperapi i Pue Ala
bona mowatihe anangkoi ide.
Taperapi bona anangkoi au kupoanahe ide
ina mopaliliu kamahilena hangangku
hai hanganda toiorungku Burahima hai Isaki.
Taperapi bona memule-mulehe
duuna bosa ntepuu pemuleanda i dunia.”
17 Kanaitana Yusupu umana mohawira taie koanana i wongko waana Epraim, bara napokana. Ido hai mokingkimi taie koanana umana ina nalimba i wongko waana Manase. 18 Nauli, “Uma, ineeko nodo! Ideri anangku au towutu. Hangangaa iriari nuhampada taie koanamu.”
19 Agaiana bara napokana umana, hai mololitami, nauli, “Kuisato, Kuisato anangku. Manase ina mahile wori kuasana, hai pemuleanahe ina mewali hambua kadatua au mahile. Kehapiri nodo, adina au ina melumbu kamahilena kuasana hangko iria, hai pemuleana adina ina mewalihe ngkaia kadatua au mahile.” 20 Mewali i alo iti, nawatimohe anangkoi iti, nauli,
“To Isaraeli ina mokabelai hangami ane mowatihe tauna, rauli,
‘Taperapi i Pue Ala bona Nawatiko nodo Epraim hai Manase.’ ”
Nodomi Yako mopaioru Epraim hangko i Manase.
21 Hangko indo, mololitami Yako i Yusupu, nauli, “Barapi mahae hai matemona, agaiana Pue Ala ina mamporangaikau hai moantikau mesule i tamponda toiorumi. 22 Hai oio, ina kuweiko tampo melumbu pane au kuweihe halalumu. Ide-ide kuweiko hambika bulu au kuperampai hangko i to Amori hai piho hai panangku.”