Yako mowatihe anana
49
1 Roo indo, Yako mokakiohe anana hai mololita, nauli, “Poteruhumodekau mai inde, nihungkukina. Ina kupopaisaakau apa au ina mewali irikamu hangalo.2 Ananakau Yako, pogulumodekau hai nipehadingi.
Nipehadingi lolitana Isaraeli, umami.
3 Rube, anangku au towutu, rohongku tongawami i watamu;
oio ulu anangku au rapoanaka i tanga ngkaroho-rohoangku.
Moula katowutumu, oiomi au teadai hai au makuasa.
4 Agaiana nodoko owai au rumihi poimborana,
bara nubuku morempeki peundeana lalumu. Mewali barapoko teadai i olonda halalumu,
lawi nupoluhimi hadua towawinengku;
nupamaremumi paturuangku.
5 Simeo hai Lewi topohalalu,
pihonda rapake mepakarugi.
6 Bara ina kupepesuaki pobotusinda;
bara worihe ina kuporangai i lalu poguluanda.
Anti kamasekenda, mopapatehe tauna,
hai anti kahengkenda, motimpohe japi au maroho.
7 Hararamohe, lawi rumihi kamasekenda,
hararamohe anti kahengkenda.
Ina kupopogaa-gaahe i humalele tampo Isaraeli;
Ina kukira-kirahe i olonda ope-ope tinana Yako.
8 Yehuda, ina monangiko iwalimu.
Ina ratoiako halalumuhe,
hai ina motumpahe i lindomu.
9 Yehuda nodo hambaa singa au mangura mani;
roo mehaka, mesule hulemi i harana.
Ane maturumi i harana,
hema pae au bai mokakalea.
10 Yehuda ina mokingki lai kadatua,
hai pemuleana ina moparenta liliu
duuna hawe hadua au hintoto mpuu moparenta.
Tauna hangko i ope-ope kadatua ina moantihe popenomba Iria,
hai ina motumpahe hai mengkoruhe i lindoNa.
11 Yehuda ina maroa mpuu tuwona
hai mewali powiana.
Maemba mpuu bonde anggorona hai ngkaia mpuu wuana
duuna napotakaimohe kalidena,
hai owai anggorona napopobahoimi hampina.
12 Anti kangkaiana anggoro,
matana ina mewali malei.
Anti kangkaiana susu,
ngihina ina mewali bula.
13 Sebulo ina maida i wiwi ntahi
au ina mewali sondaka kapala tahi.
Tampana tampona ina hawe-hawe i wanua Sidon.
14 Isakar nodo hambaa kalide au maroho buuna,
au moluku i olo antiana.
15 Kanaitana pengkarooangaa iti maroa
hai naitami peraena tampo iti,
molukumi rapohawirai antiana,
hai mengkoru i ampuna mewali hawi.
16 Oio, Dani, ina mampohuda-hudaako kara-karanda taunana,
hai pemuleamu ina mewalihe hantina
nodo tina ntanina i tampo Isaraeli.
17 Ia nodo hambaa ile
au mangawu i wiwi rara
au motilo tangkado dara
duuna teweduka taunana.”
18 Roo indo, meraroami Yako i Pue Ala, nauli, “O Pue, kupepegiami kaNuhoremangku.”
Roo nodo, nauli mbuli,
19 “Gad, ina rabungka toperampaki,
agaiana ina nahuhulihe.
20 Aser, ina nakaarai paande au ngkaia hai maroa;
ina mopasilolongako paandendahe datu.
21 Naptali nodo lagiwa lundara au tekabaha;
makara-karahe anana.
22 Yusupu nodo hampoa anggoro au ngkaia wuana
au tuwo hungku i owai;
penga-pengana mendoa i wala.a
23 Kehapiri rumihi karabungkana iwali
au mewulaihe hai pana,
24 agaiana taiena Yusupu maroho mepana,
hai bara bata-bata laluna,
lawi kuasana Pue Ala ara iria;
Hai Pue Ala au makuasa au kupenombai,
Iami au mokadipurako nodo hadua toporewu.
Iami au mewali bulu watu rohonda to Isaraeli.
25 Pue Ala au napenombai umamu ina motulungiko.
Pue Ala au makuasa ina mowatiko hai mopaaraako
uda hangko i langi,
owai hangko i lapi tampo
hai bosa pemuleamu.
26 Pewatina Pue Ala au napenombai umamu
ina melumbu hangko i peraena bulu
au ara amimi hangko i pewalina dunia.
Kuperapi bona ope-ope pewati iti hawe i Yusupu;
iami au teadai i olondahe halaluna.
27 Benami nodo hambaa serigala au maseke.
Ane madondo mohaka paandena;
ane kaindi nakira-kirami apa au nahumba.”
28 Nodomi Yako mowati anana au hampulo hai rodua au mewalihe toiorunda hampulo hai rontina to Isaraeli. Ope-opehe nawati moula apa au hintoto i hadua-hadua.
Yako mate hai ratawu
29-30 Roo indo, meawilimi Yako i ananahe, nauli, “Barapi mahae, hai matemona. Hangangaa nitawuna i holanda toiorungku, i lalu lia watu i bonde Mapela, hungku i boea Mamre i tampo Kanaa. Hangkoia Burahima moholo bonde au nakaarai lia watu iti hangko i Epron to Heti bona rapopewali talumba. 31 Inditimohe Burahima hai Sara ratawu; nodo worihe Isaki hai Ribeka, hai inditi worimi Lea kutawu. 32 Bonde hai lia watu iti raholomi hangko i to Heti. Nitawumona inditi.” 33 Karoona Yako meawili i ananahe, mengkadampami i paturuana, pane matemi.