50
1 Yusupu mampolumbai umana, nateriahi hai naangki lindona. 2 Roo indo, napohawaamohe tomapande bona mokadipura watana umana hai rapambolii rampa-rampa dati kadake. 3 Bago iti moande tempo iba pulona alona moula adanda to Masiri. Kapatena Yako iti raombo to Masiri pitu pulona alona.4 Kahopona ombo, mololitami Yusupu i topobagona Pirao bona laohe mopahawe pamperapina ide i Pirao, nauli, 5 “Hangko damani umangku mate, natudumona mosumpa bona kutawu i talumba au rapasilolongami i tampo Kanaa. Idomi hai pane kuperapi bona raweina tempo lao motawu umangku. Roo indo, ina mesule hule peana mai.”
6 Mehanami Pirao, “Laomoko motawu umamu moula posumpamu iria.”
7 Lao mpuumi Yusupu motawu umana. Ope-ope topobagona datu, totosae i souna datu, hai ope-ope au mahile tuwonda i tampo Masiri, laohe mamporangai Yusupu. 8 Ope-opehe hantambiana hai halaluna Yusupu, nodo worihe hantambiana umana, lao worihe. Batena pearaihe anangkoi hai pinatuwonda au rapalehi i tampo Gose. 9 Surodado au mokareta hai au modara meula worihe. Ido hai bosa mpuuhe au meula i Yusupu.
10 Hawemohe i paidaanda topoihe pare i Goren-Haatad hungku i owai Yarade, moteria hai mandawi mbulimohe. Inditi, Yusupu mopaara ombo pitu alona kamahaena. 11 Karaitanda to Kanaa, rauli, “Mewiwiorai mpuu ombonda to Masiri iti.” Idomi pongkana paidaa iti rahanga Abel-Misraim.a 12 Mewali rababehi mpuumi ananahe Yako apa au naawiliahe umanda: 13 Raanti mpuumi watana umanda lao i tampo Kanaa, hai ratawu i lia watu i bonde Mapela hungku i boea Mamre, i tampo au naholo Burahima i Epron hangkoia. 14 Karoona Yusupu motawu umana, mesulemi i tampo Masiri hihimbela hai halalunahe hai ope-ope tauna au meulahe iria.
Yusupu mopatinda lalunda wutuna
15 Lawi matemi umanda, mololitamohe halaluna Yusupu hadua hai hadua, rauli, “Noumbamoke ane rapana napailaluke Yusupu hai nahurungi babehianta au kadake iria hangkoia?” 16 Ido hai rapakatumi lolita i Yusupu node, “Hangko damani umamu mate, 17 natudumongkai bona kipahawe pamperapina ide irio, ‘Nuampungimi kamasalanda wutumu irio.’ ”
Rauli mbuli halaluna iria, “Ikami ide, hawina woringkai Pue Ala au napenombai umanta, ido hai kiperapi bona inee wongkamia nupeita salangki au kibabehimi.”
Mohadi lolitanda halaluna au rapahawea, moteriami Yusupu. 18 Roo indo, laomohe halaluna iria, motumpahe meampu i lindona, rauli, “Ikami ide, hawimumongkai.”
19 Agaiana nauli Yusupu irihira, “Ineemokau langa, lawi iko barana makuasa nodo Pue Ala au makuasa mohurungi dakenda tauna. 20 Nauri hintuwumokau mobabehi dake iriko, agaiana Pue Ala mopalikangaa au kadake iti mewali bona hinangka au mewali hangkoia peisa mopatuwo tauna bosa. 21 Mewali ineemokau langa iriko lawi ina kupasilolonga hinangka au nipotuwo hawe-hawe i anami.” Nodomi Yusupu mopatinda lalunda halaluna.
Kapatena Yusupu
22 Yusupu maida liliu i tampo Masiri hihimbela hai halalunahe. Tinuwuna Yusupu hangatu hampulo parena, 23 ido hai tepaka mani moita anana hai ampuna Epraim. Moita mani worihe ampuna Manase, iamohe anana Makir. Anana Makir iti napoanahe Yusupu.
24 Mewali, mololitami Yusupu i halalunahe, nauli, “Barapi mahae hai matemona, agaiana manotomi, Pue Ala ina mopatuwokau hai moantikau hangko i tampo ide lao i tampo au Nadandimi i Burahima, Isaki hai Yako. 25 Mosumpakau iriko, ane naporangaikau Pue Ala mesule i tampo Kanaa hangangaa nianti wori watangku.”
26 Handami tinuwuna hangatu hampulo parena, matemi Yusupu. Watana rakadipura hai rapambolii rampa-rampa, hai rapusa i lalu lumu i tampo Masiri.