Yusupu mompopaisa watana i halalunahe
45
1 Kanahadina Yusupu lolitana Yehuda, barapi nabuku motaha laluna i lindonda topobagona. Idomi hai pane natuduhe tauna iti padu holiga hangko i hologa bona napopaisaamohe halaluna kahemana. I pesuwunda topobagona ope-ope, 2 moteriami Yusupu rurumihi, alana rahadi to Masiri au arahe i raoa hologa, duuna tebambarimi hawe-hawe i souna datu. 3 Nauli Yusupu i halaluna, “Ikomi Yusupu. Tuwo mani pae uma?” Karahadina lolitana iti, langamohe hai barapohe mehana. 4 Nauli mbuli Yusupu irihira, “Maikau inde.” Mehungkukimohe halaluna, hai nauliangaahe, “Ikomi Yusupu, halalumi, au nipobalu i to Masiri. 5 Agaiana ide-ide ineemokau langa ba masandaa anti kanipobalungku i to Masiri. Katouana Pue Ala au motuduna moioru hangko irikamu mai i tampo ide bona mohorema bosa tauna. 6 Tempo rimi ide hangko rompare, hai lima mani parena tauna bara peisa mantuda-ntuda hai bara ara au ina rapupu. 7 Mewali, Pue Ala motudumona mai moioru hangko irikamu bona tuwohe pemuleami i dunia ide. Idemi rara au ina mopatuwokau hawe i pemuleami. 8 Mewali bara anti kanipobalungku panena hawe inde, agaiana batenari peundeana Pue Ala. Napopewalina gubernur, Naweina kuasa i sou kadatua hai i humalele tampo Masiri.9 Ide-ide holigamokau mesule lao i umanta hai niuliangaa: node lolitana Yusupu, anamu, ‘Naweina Pue Ala kuasa i tampo Masiri. Maimoko holiga nupombelambiana. 10 Uma peisa maida i Masiri i tampo Gose hihimbela hai anamu, ampumu, dimba, towau, japi hai hinangka anu-anuna uma bona hungkukau iriko. 11 Ane uma maidami i tampo Gose, peisamoko kukadipura, lawi tempo rimi lima mani parena. Ane bara nodo, uma hantambi hai ope-ope tauna au ara hihimbela hai uma ina molambi kapari.’
12 Halalungku, ide-ide niita matami hai nodo wori oio Benami; ikomi dide Yusupu. 13 Nipetumbuia umanta noumba kahilena kuasangku inde i tampo Masiri. Nipololita wori hinangkana au niita, hai holigami mai nianti inde.”
16 I kanahadina Pirao hai ope-ope topobago sou kadatua bambari kana i kahawenda halaluna Yusupu, matana worihe. 17 Nauli Pirao i Yusupu, “Nuuliangaahe halalumu, mohawirahe pare i kalidenda hai mesulehe i tampo Kanaa 18 hai moantihe mai umamu hantina melimba i tampo ide, bona rapombelambiana. Ina kuweihe tampo au marudu ntepuu i Masiri bona maroa katuwonda. 19 Nutudu worihe bona moantihe bahangkia kareta hangko inde rapesawii mai sambokonda, ananda hai napesawii wori mai umamu. 20 Ineemohe mampekiri anu-anunda au rapalehi, lawi ina kuweihe au maroa ntepuu i tampo Masiri.”
21 Hawana Pirao iti, rapeulai mpuu ananahe Yako. Naweimohe Yusupu bahangkia kareta hai bakunda i rara hintoto hai pangulina Pirao. 22 Hadua-haduahe nawei hampi au maroa, agaiana Benami nawei doi pera talu atuna hai hampina au wou lima tongana. 23 Napakatu wori i umana hampulo baana kalide au rapopoanti anu-anu au maroa hangko i Masiri, hai hampulo wori kalide rapopoanti pare, roti, hai paande au ina rapobaku melimba i Masiri. 24 Timamami antianda, napopelingkamohe Yusupu, hai nauliangaahe, “Ineekau mobungka-bungka i rara.”
25 Melingkamohe hangko i tampo Masiri, mesule i Kanaa i Yako, umanda. 26 Kahawenda i tampo Kanaa rapetumbuimi i umanda, rauli, “Uma, Yusupu tuwoto mani wei! Ia makuasa i humalele tampo Masiri.” Mohadi bambari iti, tingkara laluna Yako, hai bara manihe napoinalai.