Paenua hangko salaka au matanta
44
1 Hangko inditi, Yusupu mampohawaami topokadipura souna, nauli, “Nuihii iti karunda hai pare, suka-sukana pebukuanda moanti, hai doinda hadua-hadua nupusa hule i karunda nuwoli i wongko pare. 2 Nupusa wori paenuangku au hangko i salaka i lalu karuna adinda au totoadi hihimbela hai doi popeholona pare.” Hawana Yusupu iti napeulai mpuumi topokadipura souna. 3 Kahalona madondo-dondo, halaluna Yusupu rapopelingkamohe hai kalidenda. 4 Bara manihe karao hangko i wanua, mololitami Yusupu i tadulako topokadipura souna, nauli, “Nukulelehe holiga tauna orei. Ane nulambi, nuuliangaahe, ‘Moapari roangku nihurungi hai dake? 5 Moapari hai mopanangkakau mai paenua salaka au napaenui tuangku hai au napake wori medodi?a Ikamu mobabehikau dake au mahile.’ ”6 I kanalambinda halalunahe Yusupu iti, napahaweamohe hintoto hai apa au nauli Yusupu. 7 Mehanahe, “Tua, apari tunggaiana lolitamu iti? Bara wongkamia bai mobabehi dake au nodo! 8 Tua, nuisato mogalori doi au kilambi i lalu karu i wongko pare kipopesule hulemi i tua, mewali bara mesua akala ane mopanangka mbulingkai salaka ba bulawa au i lalu souna Gubernur. 9 Ane hadua hangko irikami rapolambii paenua salaka iti, rahuku mate peami hai ikami mewalimongkai hawina tua.”
10 Nauli toratudu iti, “Maroa, agaiana hema au rapolambii paenua iti, ia itimi au mewali hawingku; au ntanina peisahe liliu.” 11 Hoholigamohe motaura antianda hai hadua-haduahe mobungkahi karunda. 12 Hangko inditi, topokadipura souna Yusupu moparesa karunda, mepongka i karuna au towutu alana hawe i karuna au toadi, hai paenua salaka iti ralambi mpuumi i karuna Benami. 13 Masusa mpuu lalunda wutuna, ido hai mohepa-hepamohe hampinda. Roo indo, rahawirami antianda i kalide, hai mesule hulehe i wanua.
14 Kahawenda Yehuda hampohalalua i souna Yusupu, ralambi mani indo, liliu molingkudumohe motumpa iria. 15 Nauli Yusupu, “Moapari hai nibabehi nodo? Bara pae niisa ide iko topedodina au moisa babehia kadake?”
16 Mehana Yehuda, “Tua, apa mani pae kiuli? Barapi ara pehanangki, hai barapi ara au mopatongawa notongki. Napatongawami Pue Ala kamasalangki. Ide-ide mewalimongkai hawimu ope-ope, bara pea au rapolambii paenua iti.”
17 Agaiana nauli Yusupu, “Bara nodo tunggaiaku! Batena pea au rapolambii paenuangku iti, au ina kupohawi. Au ntanina peisa mesule i umami.”
Yehuda mamperurui Benami
18 Roo indo, Yehuda mohungkuki Yusupu hai nauli, “Tua, merapi ampuna. Ane nupokana mololita manina i tua, inee wongkoia nukarumpui, lawi tua himbelami hai datu. 19 Tua mekunemi irikami node, ‘Ara mani pae umami hai halalumi au ntanina?’ 20 Mehanangkai kiuli, ‘Umangki ara mani, agaiana saemi, hai i tempona adingki mesupa, ia saemi. Wutuna adingki au hangina-nginana matemi, mewali ide-ide ia pearai au tuwo. Idomi hai napokakaia mpuu umangki.’ 21 Naperapi tua, adingki iti kianti mai, bona naita tua, 22 agaiana mehanangkai, ‘Anangkoi iti bara mpuu peisa mampogaaki umana, lawi ane mampogaaki umana, peisa-peisa umana mate mabila.’ 23 Roo indo nauli mbuli tua irikami, ‘Barakau peisa mai i lindoku ane bara mai nianti adimi.’
24 Pesulengki i umangki, kipetumbuiami lolitana tua. 25 Hangko inditi natudu mbulimongkai mai meholo paande. 26 Agaiana kihanai, ‘Barangkai peisa lao i Gubernur ane barangkai moanti adingki au totoadi. Peisangkai lao ane adingki iti kianti.’ 27 Roo indo, nauli umangki, ‘Niisato sambokongku Raheli rodua pea anana. 28 Au towutu, napalehimona. Manoto matemi nahaka singa, lawi duuna ide-ide barapi kuita. 29 Ane adimi au totoadi ide niala mbuli hangko iriko hai ara au mewali iria, kapari au nibabehiana ina mopaholigami kapatengku lawi saemona!’
30-31 Idomi tua, ane mesulengkai i umangki hai barapi ara adingki iti, manoto kaina matenami umangki. Katuwona umangki tetangge pea i anangkoi ide, lawi sae ntepuumi, mewali kapari lalu au kibabehia ina moanti kapatena. 32 Modandimona i umangku, iko au mohuru katuwona anangkoi iti. Kupololita i uma ane barapi kuanti anangkoi iti mesule iria, ikomi au rahuku mate. 33 Mewali kuperapi i tua, aginami iko au napohawi tua mopahuru adingki iti bona mesule pea woia hihimbelahe hai wutuna. 34 Bara kubuku mesule i umangki, ane adingki ide barapi kianti mpesule. Barana bai moita umangki narumpa kapari.”