Wutunahe Yusupu lao mbulihe i tampo Masiri hai moantimohe Benami
43
1 Kamarimi i tampo Kanaa rumihi ntepuumi, 2 hai pare au lao mai raholo i tampo Masiri opemi raande Yako hampoanaka. Ido hai nauli Yako i ananahe, “Lao mbulikau mai i tampo Masiri meholo pare bona ara pea paandeta.”3 Agaiana nauli Yehuda i umana, “Rumihi kanapopaingaangki gubernur i Masiri, barangkai peisa lao i lindona ane barangkai moanti Benami. 4 Ane nupaliu iti adingki kianti, maungkai lao meholo paandeta, 5 agaiana ane bara nupaliu kianti, barangkai mau lao, lawi nauli amimi gubernur iti, barangkai peisa lao iria ane adingki bara meula.”
6 Nauli Yako, “Moapari hai nipakasusa gagana? Moapari pane niuliangaa tauna iti kaarana mani adimi?”
7 Mehanahe, “Tauna iti mampetampa ntepuu kana irikita hantina, nauli: ‘Tuwo mani pae umami? Mole ba ara mani adimi tobalilo au ntanina?’ Idomi hai pane kihanai pearai hinangka pekunena. Bara naduu pekiringki kaina natudungkai moanti adingki iti iria.”
8 Roo indo, nauli Yehuda i umana, “Nukirami anangkoi iti meula irikami bona polo melingkangkai datike ara au mate laloara. 9 Ikomi au mangisa tuwona. Ane bara mai kuanti hule i uma, peisa nuhaoki iriko hai kupoharara duungku mate. 10 Ane rapana barangkai mahae mepegia node, kerompalimongkai mesule.”
11 Nahanai umanda, “Ane lawi nodomi, nianti wori apa polambiata au maroa i tampo ide, nipusa i karumi nipopedupa i gubernur iti; nodo balasee, tinaha, rampa-rampa, beau hai wua haleka. 12 Nianti wori doi rombela kangkaiana hangko i doi au nilambi i karumi, lawi doi au nilambi hangangaa nipopasule pea, babila anti kawulindato hai rapusa. 13 Niantimide adimi hai holiga peakau mai mesule. 14 Taperapi i Pue Ala au makuasa bona gubernur iti mampokaahikau, hai mampopasulehe Benami hai Simeo. Kana iriko, ane lawi matantamohe ide anangku, tapanoumba pae?”
15 Hangko inditi halalunahe Yusupu moantihe pedupanda hai doi au rombela kangkaiana, hai melingkamohe lao i tampo Masiri hihimbela hai Benami. Kahawenda indolou, lao mpuumohe mampombelambia Yusupu. 16 Kamoitana Benami hai halalunahe, Yusupu mampohawaami tadulako topokadipura souna, nauli, “Nuantihe tauna iti i soungku lawi ihira ina maande sambelahe hai iko pualo ide. Nusambale hambaa binata, nudaka hai nupatimama maroa.” 17 Topokadipura sou iti mopasilolonga mpuumi apa au nahawaa Yusupu, hai halalunahe Yusupu naanti i lalu sou.
18 Karaantinda i souna Yusupu, langamohe halaluna iti hai rapopombeulimi, “I karaantita inde, babila mampohurungamoke doi au tahumba i baba karunta i kamainta hangkoia. Ina rahakake, raala kalidenta hai rapohawike.” 19 Ido hai, hungkumi i baba souna Yusupu, mololitamohe i tadulako topokadipura sou, 20 rauli, “Tua, merapi ampungkai, hambelamongkai mai meholo pare. 21-22 I pesulengki, hawengkai i pohambengiangki, hadua-haduangkai mobungkahi karungki. Agaiana Tingkara mpuungkai lawi doi popeholongki pare ara i baba karu hai bara kiisa hema au mamboli. Hai doi iti batena kianti mpesule mai hihimbela hai doi au ina kipopeholo mbuli pare.”
23 Nauli topokadipura sou, “Ineemokau langa. Inee karao inaomi. Pue Ala au nipenombai hai au napenombai umami, Ia au mopusa hule doi iti i karumi. Doi popeholomi pare au nianti mai iti, kudokomi.”
Hangko indo, raantimi Simeo irihira, 24 pane rapopesuahe i lalu souna Yusupu. Raweihe owai rapopobahoi bitinda, hai kalidenda rapaande wori. 25 Roo nodo, mopatimamamohe popedupanda au ina rahuhu i Yusupu, lawi rapopaisaamohe kaina maande sambelanda hai Yusupu pualo iti.
26 Kahawena Yusupu i sou, rahuhua mpuumi popedupanda iti hai meampuhe iria. 27 Napekunehe Yusupu, nauli, “Maroa-roatokau?” Hai nakune mbulihe, nauli, “Hangkoia nipololita iriko kana i umami au matinuwumi. Noumba ide-ide? Maroa-roato?”
28 Mehanahe, “Io, tua, umangki maroa-roato.” Roo indo, molingkudumohe motumpa iria.
29 I kanatotokinda Yusupu ope-ope, moitami Benami adina au hangina-nginana, hai mololita, nauli, “Idemi pae adimi au totoadi au nipololitami iriko?” Nauli mbuli, “Kuharunga anangku, nawatiko Pue Ala.”
31 Roo nodo, mewawalindomi hai mesuwu. I tempo iti, nabuku mani motaha laluna, hai motudumi hawina mopatimama paandenda.
32 Meja paandeana Yusupu tepatani hangko i mejanda halaluna, nodo wori to Masiri maandehe i hambua meja, lawi to Masiri mampokarikahe to Ibarani, ane maande sambelahe. 33 Halalunahe rapopohuda mombelindo hai Yusupu, moula pombeusuna tinuwunda mepongka au totowutu hawe i au totoadi. I karaitana pembeusu-usuna pohudanda, mombekilamohe hadua hai hadua lawi rapotingkara. 34 Ihira rarorahe hangko i mejana Yusupu, agaiana rorana Benami lima belana kangkaiana hangko kiranda wutuna. Maande hai maenu sambelamohe i lalu katana-tana hai Yusupu.