Wutuna Yusupu laohe meholo pare i tampo Masiri
42
1 Kanahadina Yako i tampo Masiri ara pare, napololitaamohe anana, nauli, “Moapari hai roo-roo peakau? 2 Kuhadi ara pare i tampo Masiri. Laomokau mai meholo pare indolou datike mateoho.” 3 Ido hai meangka mpuumohe wutuna Yusupu au hampulo iti hangko i tampo Kanaa laohe meholo pare i tampo Masiri. 4 Agaiana Yako bara mopaliu Benami, wata adina Yusupu, raanti raporanga wutunahe, lawi napokalanga molambi rugi.5 Anti karumihina rimi au merumpa i tampo Kanaa, ido hai ananahe Yako hai bosa tauna ntanina laohe meholo pare i tampo Masiri. 6 Au mampobalu pare i hema pea au hawe mai meholo, iami Yusupu, lawi ia mewalimi gubernur i tampo Masiri. Idomi hai pane i kahawenda wutuna, motumpamohe molingkudu i lindona Yusupu.
Mehanahe wutuna, rauli, “Tua, ikami to Kanaa, mai wongkamia meholo paandeki.”
8 Naisatohe Yusupu ihira iti wutunahe, agaiana ihira barahe meisa. 9 Nakatuinaomi Yusupu pangipina kana irihira, ido hai nauliangaahe, “Ikamu ide, tomependenga. Mai peakau mampepeita iumba kaledeana tampoki.”
10 Mehanahe, rauli, “Bara, tua. Ikami ide hawi pea wongkamia, mai peangkai meholo pare. 11 Ikami ide, hampohalaluangkai. Ikami tauna maroa, barangkai tomependenga.” 12 Agaiana nauli Yusupu irihira, “Dongkomi! Ikamu maikau moparesa iumba kaledeana tampoki ide.”
13 Mehanahe, rauli, “Tua, ikami hampohalalua hampulongkai hai rodua, hadua pea umangki, ara i tampo Kanaa. Hadua halalungki barapi ara hai hadua adingki au totoadi ide-ide mamporangai umangki.”
14 Mehana Yusupu, nauli, “Tou mpuu kuuli, ikamu ide tauna au maikau mependenga. 15 Ina kupampeitaikau. Mosumpana i lalu hangana datu, barakau peisa padu hangko i tampo ide ane adimi au totoadi bara mai nianti inde. 16 Hadua hangko irikamu hangangaa mesule lao mai moala adimi iti. Au ntanina, kutahahe inde bona tongawa mpuu katouna lolitami. Ane bara, i lalu hangana datu, ikamu ide tomependengakau.” 17 Pane napopesuamohe i lalu tarunggu talu alona kamahaena.
18 I kataluna alona, Yusupu mampopeala mbulimohe halaluna, hai nauliangaahe “Ide iko tauna au langa hai mengkoruna i Pue Ala. Ane nipeulai apa au kuuli inona, ina kukabahakau. 19 Bona tongawa mpuu ikamu tauna manotokau, hadua hangko irikamu kutaha i lalu tarunggu, hai au ntanina peisami mesule moanti pare au niholo bona rapotuwo tinami au tanganda motodiha rimi. 20 Ane mai mbulikau, hangangaa nianti mai adimi au totoadi iriko. Itimi katongawana katouna lolitami, mewali barapokau kuhuku mate.”
Rapokana mpuu pobotusina gubernur iti. 21 Roo indo, mololitamohe hadua hai hadua, “Peita, ide-ide rahukumoke, mampohurungake kamasalanta i adinta hangkoia; merapimi woia pepokaahi hangko irikita agaiana bara tapehadingi, nauri taitato kamaparina. Idomi pongkana pane ide-ide molambike kapari au node.”
22 Nauli Rube, “Bara pae hangkoia kuuliangaamokau bona anangkoi iti inee woia tapopoapa, agaiana bararina nipehadingi. Mewali ide-ide kapatena tapohurungami.” 23 Yusupu moisato lempona basanda, agaiana ihira bara raisa kanodona, lawi ane mololitahe hai ia, Yusupu mopakeri hadua topopalimba basa. 24 Kanahadina Yusupu lolitana Rube iti, napalehimohe halaluna lao moteria. I tempona nabuku mbulimi mololita, ia mesulemi i halalunahe, hai naalami Simeo napopehilu i lindonda halaluna.
Wutunahe Yusupu mesule i tampo Kanaa
25 Mohawami Yusupu bona ope-ope karu au raanti wutuna raihii pare, hai doinda hadua-hadua rapusa hule pea i lalu karunda pane rawei worihe bakunda. Hawana iti rapeulai mpuu topobagona. 26 Hangko indo, wutuna mohawiramohe antianda i kalide, pane meangkamohe mesule. 27 I pohambengianda, hadua hangko irihira mobungkahi karuna ina mopaande kalidena. Nahumbari doina ara i baba karu iti. 28 Nauliangaahe halaluna, “Doingku rapopesule! Peita, ara i lalu karungku!” Rapotingkara hai langahe pane mombekune-kunehe, rauli, “Apari wei au nababehi Pue Ala irikita?”
29 Kahawenda i tampo Kanaa, rapololita i umanda hinangka au mewali irihira, 30 rauli, “Gubernur i Masiri mahara pololitana irikami hai naraingkai tomependenga i tampona. 31 Mehanangkai, kiuli: ‘Ikami tauna manoto, barangkai tomai mependenga. 32 Tua, ikami hampohalalua hampulongkai hai rodua, hadua pea umangki, ara i tampo Kanaa. Hadua halalungki barapi ara hai hadua adingki au totoadi ide-ide mamporangai umangki.’
33 Nauli gubernur iti: ‘Ina kupampeitaikau bona tongawa mpuu katouna ikamu tauna manoto; hadua hangko irikamu ina kutaha inde, au ntanina peisami mesule moanti pare i tinami au tanganda motodiha rimi. 34 Ane mai mbulikau, nianti mai adimi au totoadi; hangko inditi ina kuisa kadami tomependenga agaiana tauna manotokau. Mewali ane nodo, halalumi au kutaha inde ina kupopesule irikamu, hai peisakau maida hai mobalu-balu inde.’ ”
35 I temponda mobumbuha pare au i karunda, hadua-haduahe molambi karapenda au kehi doi; ido hai rumihimi kalanganda, nodo wori umanda. 36 Roo indo, nauli umanda, “Ikamu pongkana pane matantahe ide anangku. Yusupu barapi ara; Simeo bara wopi ara; hai ide-ide Benami niuli mbulimi ina nianti. Rumihi mpuumi dide kamaparina lalungku.”
37 Roo indo, naulimi Rube, “Uma, nuweina iti Benami. Kudandito, batena kuanti mpesule; ane bara mesule, anangku tobalilo au rodua peisahe nupapate.”
38 Agaiana nauli Yako, “Bara! Benami bara peisa nianti; wutuna matemi hai ia pearai au ara ide-ide. Ide iko, saemona. Ane ia molambi rugi i polumaomi, ina nipaarana kapari lalu au moantina i kapate.”